Sunday, September 30, 2012

ئاواره‌كانی ساڵانی (1975-1991) به‌په‌نابه‌ری سیاسیی هه‌ژمارده‌كرێن

شاكر یاسین

به‌ڕێوه‌به‌ری‌ گشتی‌ كۆچ‌و كۆچبه‌رانی‌ هه‌رێم ڕایگه‌یاند، حكومه‌تی‌ هه‌رێم به‌رده‌وام ده‌بێت له‌قه‌ره‌بووكردنه‌وه‌ی‌ ئه‌و خێزانانه‌ی‌ له‌ساڵی‌ 1975ه‌وه‌ ئاواره‌بوون، جیاواز له‌وانه‌ش كه‌ ئاواره‌ی‌ وڵاتانی‌ خۆرئاواو دراوسێكان بوون.

(شاكر یاسین) به‌NNA ڕاگه‌یاند، وه‌ك قۆناغی‌ یه‌كه‌م بڕی‌ ده‌ ملیار دیناریان به‌سه‌ر (500) خێزاندا دابه‌شكردووه‌، به‌و هیوایه‌ن له‌بودجه‌ی‌ ساڵی‌ داهاتوودا بتوانن (10.000) خێزان قه‌ره‌بوو بكه‌نه‌وه‌، به‌تایبه‌ت ئه‌وانه‌ی‌ له‌مارتی‌ 1975 بۆ (5-3-1991) ئاواره‌بووبن، به‌په‌نابه‌ری‌ سیاسی‌ هه‌ژمارده‌كرێن.


شاكر یاسین ئه‌وه‌ی‌ ئاشكراكرد، جۆری‌ كه‌یسی‌ ئه‌و په‌نابه‌ره‌ هه‌رچییه‌ك بێت، به‌ڵام بتوانێت بیسه‌لمێنێت كه‌ له‌وڵاتێكدا نیشته‌جێ یان په‌نابه‌ر بووه‌، به‌هه‌مان شێوه‌ی‌ ئه‌وانه‌ی‌ له‌ڕابردوودا به‌بڕی (20) ملیۆن دینار قه‌ره‌بوو كراونه‌ته‌وه‌، ئه‌وانه‌ش چه‌كی‌ قه‌ره‌بووكردنه‌وه‌یان پێده‌درێت.
-----------------------------------------------------------------
ئاسۆ ئه‌كره‌م- NNA/ (/) 


Thursday, September 27, 2012

داوای‌ ڕاگرتنی‌ دیپۆرتكردنه‌وه‌ی‌ په‌نابه‌ران ده‌كرێت

ئامانج عه‌بدوڵڵا

فیدراسیۆنی په‌نابه‌رانی عێراق له‌هه‌رێم ڕایگه‌یاند، پرۆسه‌ی‌ دیپۆرتكردنه‌وه‌ی‌ په‌نابه‌ران له‌لایه‌ن وڵاته‌ ئه‌وروپییه‌كانه‌وه‌ به‌رده‌وامه‌‌و ئه‌گه‌رچی له‌ماوه‌ی‌ ڕابردوودا، په‌رله‌مانی عێراق بڕیاریدا، ئه‌و په‌نابه‌رانه‌ی به‌زۆر ڕه‌وانه‌ ده‌كرێنه‌وه‌ وه‌رنه‌گیرێنه‌وه‌، به‌ڵام مه‌ترسیه‌كان هێشتا هه‌رماون، له‌ئێستاشدا ئه‌و په‌نابه‌رانه‌ له‌به‌رده‌م هه‌ڕه‌شه‌ی‌ دیپۆرتكردنه‌وه‌دان.

(ئامانج عه‌بدوڵڵا) لێپرسراوی‌ فیدراسیۆنی سه‌رتاسه‌ری‌ په‌نابه‌رانی عێراق له‌هه‌رێم به‌NNA ڕاگه‌یاند، دوای‌ ئه‌و هه‌واڵانه‌ی‌ كه‌ له‌لایه‌ن فیدراسیۆنه‌كه‌یانه‌وه‌ دراون، به‌مه‌به‌ستی‌ پێشكه‌شكردنی‌ پرۆژه‌ یاسایه‌ك به‌په‌رله‌مانی‌ عێراق‌و حكومه‌تی‌ ناوه‌ندو لایه‌نه‌ كوردییه‌كان له‌به‌غدا، سه‌باره‌ت به‌ڕێگریكردن له‌به‌زۆرناردنه‌وه‌ی‌ په‌نابه‌ران، به‌ڵام تائێستا هه‌وڵه‌كانیان هیچ ئه‌نجامێكی‌ ئه‌وتۆی‌ نه‌بووه‌.

ئامانج عه‌بدوڵڵا هێمای‌ به‌وه‌شكرد، له‌ماوه‌ی‌ ڕابردوودا (1000) په‌نابه‌ر له‌كه‌مپه‌كانی وڵاتی سویدا ئاماده‌كرابوون بۆ دیپۆرتكردنه‌وه‌یان، كه‌ به‌شێكی زۆریان كوردن، حكومه‌تی‌ ئه‌و وڵاته‌ش سووره‌ له‌سه‌ر بڕیاره‌كه‌ی‌ خۆیی‌و پێده‌چێت به‌مزووانه‌ دیپۆرتبكرێنه‌وه‌.

وتیشی‌:"زیاتر له‌(30) هه‌زار په‌نابه‌ری‌ عێراق‌و هه‌رێم له‌به‌رده‌م هه‌ڕه‌شه‌ی‌ دیپۆرتكردنه‌وه‌دان، كه‌(90)یان كوردن، له‌به‌رامبه‌ریشدا فیدراسیۆنه‌كه‌یان داواكاره‌، حكومه‌تی‌ عێراق به‌و پرۆتۆكۆلانه‌دا بچێته‌وه‌، له‌گه‌ڵ ئه‌و وڵاتانه‌ی‌ كه‌ سیاسه‌تی‌ دیپۆرتكردنه‌وه‌ به‌رجه‌سته‌ ده‌كه‌ن‌و  پێویسته‌ به‌زووترین كات پرۆسه‌ی دیپۆرتكردنه‌وه‌ی په‌نابه‌ران بوه‌ستێنرێت".
-----------------------------------------------------------------
به‌ڵێن هه‌ڵه‌بجه‌یی‌-NNA/(/)

Wednesday, September 26, 2012

فیدراسیۆن داوای‌ هاوكاریی دیپۆرتكراوه‌كان ده‌كات

لۆگۆى فیدراسیۆنی‌ سه‌رتاسه‌ری‌ په‌نابه‌ران

فیدراسیۆنی‌ سه‌رتاسه‌ری‌ په‌نابه‌ران داوای‌ هاوكاری‌‌و شوێنی‌ نیشته‌جێبوون بۆدیپۆرتكراوه‌كان ده‌كات.

ماوه‌ی‌ چه‌ن ساڵێكه‌ له‌هه‌ندێك له‌وڵاتانی‌ جیهانه‌وه‌، ژماره‌یه‌كی‌ زۆر په‌نابه‌ر دیپۆرتی‌ عێراق به‌تایبه‌تی‌ هه‌رێمی‌ كوردستان ده‌كه‌نه‌وه‌، سه‌ره‌ڕای‌ هه‌وڵه‌كان بۆڕاگرتنی‌ دیپۆرتكردنه‌وه‌، فیدراسیۆنی‌ سه‌رتاسه‌ری‌ په‌نابه‌ران له‌هه‌رێمی‌ كوردستان، له‌هه‌وڵی‌ به‌رده‌وامدایه‌ بۆهاوكاریكردن‌و نیشته‌جێكردنی‌ دیپۆرتكراوه‌كان.

(ئاری‌ جه‌لال) محێدین سه‌رپه‌رشتیاری‌ گشتی‌ فدراسیۆنی‌ په‌نابه‌ران له‌هه‌رێمی‌ كوردستان به‌ NNA ڕاگه‌یاند، فیدراسیۆنی‌ سه‌رتاسه‌ری‌ په‌نابه‌ران پرۆژه‌ یاسایه‌كی‌ (16) خاڵیان ئاڕاسته‌ی‌ په‌رله‌مانی‌ عێراق‌و كوردستان كردووه‌، بۆ قه‌ره‌بو كردنه‌وه‌‌و نیشته‌جێكردنی‌ ئه‌و هاوڵاتیانه‌ی‌ له‌وڵاتانی‌ ئه‌وروپاوه‌ دیپۆرت ده‌كرێنه‌وه‌، به‌ڵام هه‌تا ئێستا كاری‌ جیددی‌ بۆنه‌كراوه‌، بۆیه‌ داواكارن به‌زویی هه‌وڵبدرێت بۆ جێبه‌جێكردنی‌ ئه‌و پرۆژه‌یاسایه‌.
ئه‌و لێدوانه‌ی‌ ئاری‌ جه‌لال له‌كاتێكدایه‌ كه‌ به‌شی‌ كێشه‌ی‌ هاوڵاتیان بۆبه‌دواداچوونی‌ كێشه‌ی‌ چه‌ند هاوڵاتیه‌ك په‌یوه‌ندیكردبوو به‌ئه‌ندامێكی‌ لیژنه‌ی‌ یاسایی له‌په‌رله‌مانی‌ كوردستان، له‌وه‌ڵامدا ئازاد گۆران ڕایگه‌یاند له‌ئێستادا له‌په‌رله‌مان سه‌رقاڵی‌ ئاماده‌كردنی‌ پرۆژه‌یاسایه‌كن له‌سه‌ر ئه‌و كێشه‌یه‌.
-----------------------------------------------------------------
شادمان عه‌زیز-NNA/

Tuesday, September 25, 2012

هه‌وڵی‌ ڕاگرتنی‌ دیپۆرتكردنه‌وه‌ی‌ په‌نابه‌ران ده‌درێت

دۆسكی له‌گه‌ڵ ڕه‌وه‌ندی كوردو عێراقی

دیندار نه‌جمان دۆسكی‌) وه‌زیری‌ كۆچ‌و كۆچبه‌رانی‌ عێراق له‌شاری‌ (ستۆكهۆڵم) دیدار‌و چاوپێكه‌وتنی‌ له‌گه‌ڵ ڕه‌وه‌ندی‌ كورد‌و عێراقی‌ سازكرد، به‌مه‌به‌ستی‌ گوێگرتن له‌كێشه‌كانیان له‌گه‌ڵ حكومه‌تی‌ سوید.

له‌سه‌ردانه‌كه‌یدا بۆ سوید، دۆسكی‌ كۆبوونه‌وه‌یه‌كی‌ له‌گه‌ڵ ڕه‌وه‌ندی‌ كورد‌و عێراقی‌‌و هه‌ندێك په‌رله‌مانتاری‌ سویدی‌ به‌ڕه‌گه‌ز عێراقی‌ ئه‌نجامدا، هه‌تا له‌نزیكه‌وه‌ كێشه‌كانیان‌و ئه‌و نه‌هامه‌تیانه‌ ببیستێت، كه‌ به‌هۆی‌ بڕیاری‌ دیپۆرتكردنه‌وه‌وه‌، ڕووبه‌ڕووی‌ به‌شێك له‌ڕه‌وه‌ندی‌ كورد‌و عێراقی‌ بووه‌ته‌وه‌ له‌و وڵاته‌دا. 

دیندار دۆسكی‌ به‌نیازه‌ له‌ڕۆژانی‌ داهاتوودا له‌گه‌ڵ ئه‌ندامانی‌ حكومه‌ت‌و په‌رله‌مانی‌ سوید‌و وه‌زیری‌ كۆچی‌ سویدیدا دیدارێكی‌ فه‌رمی‌ ئه‌نجامبدات، به‌مه‌به‌ستی‌ گه‌یشتنه‌ بڕیارێكی‌ تایبه‌ت به‌به‌رگرتن له‌بڕیاری‌ به‌زۆر ناردنه‌وه‌ی‌ په‌نابه‌رانی‌ كورد‌و عێراق له‌لایه‌ن حكومه‌تی‌ سویده‌وه‌.

ئه‌و هه‌نگاوه‌ی‌ وه‌زیری‌ كۆچ‌و كۆچبه‌رانی‌ حكومه‌تی‌ عێراق، یه‌كێكه‌ له‌هه‌وڵه‌كانی‌ وه‌زاراه‌ته‌كه‌ی‌، بۆ به‌رگرتن له‌بڕیاری‌ دیپۆرتكردنه‌وه‌ی‌ په‌نابه‌رانی‌ كورد‌و عێراق له‌سوید، پێشتریش په‌رله‌مانی‌ عێراق ڕایگه‌یاندبوو، پێویسته‌ هیچ په‌نابه‌رێكی‌ دیپۆرتكراو له‌هیچ فڕۆكه‌خانه‌یه‌كی‌ عێراق وه‌رنه‌گیرێته‌وه‌.
-----------------------------------------------------------------
و: ئاسۆ ئه‌كره‌م  (/)
NNA

ناڕەزایەتی له‌ هۆڵه‌نده‌ دژ به‌ به‌زۆرناردنه‌وه‌ی 1300 په‌نابه‌ر درێژه‌ی هه‌یه‌


راپۆرتێک له‌سه‌ر ناڕه‌زایه‌تیه‌کانیو چالاکیه‌کانی په‌نابه‌رانی عێراقی
لە دوای پێچانەوەی چادرگەی سێڵینگن لەلایەن شارەوانی هەمان گوندەوە و ئاوارە کردنەوەی چەند بارەی پەنابەرانی بێجێگەو ڕێگە، کە دەکاتە 14ی سێپتێمبەر، پەنابەران ناچار بوون بە کۆمەڵ پەنا بۆ شاری لاهای/ دێنهاخ ببەن و لە نزیك ویستگەی شەمەندەفەری ئەو شارە کۆببنه‌وه‌. سەرەتا ناره‌زایه‌تیه‌کان به‌وه‌ دەستیان پێکرد کە داوای مۆڵەتی مانەوە پێشکەشی شارەوانی شاری لاهای بکەن بۆ مانەوە لە پارکی کومارك و دواتریش درێژەدان بە ناڕەزایەتی و خۆپیشاندانەکانیان دژی سیاسەتی بە زۆرناردنەوەی 1300 پەنابەر کە حکومەتە ڕاستڕەوەکەی خێرت لێرس خەریك بوو لەگەڵ حکومەتی عێراق و وەزیری کۆچو کۆچبەرانەکەی بناغەی بۆ داده‌ڕشت.
سەرباری ئەوەی پەنابەران لە هه‌ڵومەرجێکی زۆر نالەباری ژیان و گوزەراندان کە وەکو پێویست خواردن، سەردانی پزیشك، شوێنی خۆشتن، خەوتن و تەوالێتیان نیە و بەدەست سەرماو تەڕوتوشیەوە دەناڵێنن. هەروەها پەنابەران تا ئاستێکی زۆر بێزارو نیگەرانی ئەوەن کە سیاسەتی هەڵاواردنیان لەگەڵدا کراوە کاتێك چەند مانگ لەمەوبەر دوو گروپ لە پەنابەران لەهەریەك لە گوندی تێرئەپڵ و شاری دێن بوش خۆپیشاندانیان بەڕێخست لە پێناوی بەدەست هێنانەوەی مافی گەڕانەوە بۆ کەمپەکانیان، کە ئەو کات خێرت لێرس بە بڕیارێك داواکاری خۆپیشاندەرانی جێبەجێ کردوو ئەو پەنابەرانی گەڕاندەوە کەمپەکانیان. بەڵام ئەوەتا ئەم بەشە لە پەنابەران زیاتر لە 22 ڕۆژە بە جۆرەها شێوە ناڕەزایەتی و خۆپیشاندان بەڕیدەخەن بۆ بەدەستهێنانەوەی مافی گەڕانەوە بۆ کەمپەکانیان، بەڵام تا ئێستا خێرت لێرس سیاسه‌تی بێده‌نگی هه‌ڵبژاردوه‌و خۆی لێ دورەپەرێز گرتووەو هیچ بایەخێك بۆ داواکاری ئەو پەنابەرانە و ڕێکخراوەکانی به‌رگریکار لە مافی پەنابەران دانانێ.
لەو ڕاستایەدا پەنابەران و ئەو گروپ و ڕێکخراوانەی کە به‌رگری لە مافەکانیان دەکەن، لە ڕۆژانی هەینی و شەممەی ڕابردودا هەڵسان بە ڕێپێوان و خۆپیشاندانی هێمنانە و مەدەنیانە بۆ بەر باڵەخانەی وەزارەتی داد و پەرلەمان لە شاری لاهای بە مەبەستی ڕاکێشانی هاوپشتی و هاوسۆزی خەڵکی مرۆڤ دۆستو ئەحزاب و ڕێکخراوەکانی ئەو شارەو وڵاتی هۆڵەنده‌.
ڕێپێوانی یەکەم ڕۆژی پێنج شەممە بەڕێخراو پەنابەران بەدەم ڕێڕۆشتنەکەوە جۆرەها دروشمی دژی دیپۆرتکردنەوە و بە نایاسایی دانانی پەنابەرانیان دەوتەوەو کوچەوکۆڵانەکانی ئەو شارەیان ‌‌هێنابووە جۆشوخرۆش. ڕێڕۆشتنی دووەم ڕۆژی هەینی بەڕێخراو پەنابەران بەوتنەوەی دروشم و ناڕەزایەتی بەرەو باڵەخانەی وەزارەتی داد بەڕێکەوتن.
هەروەها ڕۆژی شەممەی ڕابردوش پەنابەران ڕێڕۆشتنێکی تریان بەڕێخست بەناو کوچەو شەقام و شوێنە گشتیەکانی شاردا کە مەبەست لێی بەدەستهێنانی پشتگیری مادی و مەعنەوی و بە ئاگا هێنانەوەی خەڵکی ئەو وڵاتە بوو لە سیاسەتە ڕاستڕەوی و دژە پەنابەرانی خێرت لێرس کە دەرهەق بە پەنابەرانی بێ دەرەتان گرتوێتیەبەر.
فیدراسیۆنی سەراسەری پەنابەرانی عێراقی له‌ هۆڵەنده‌ هەروەکو چۆن پەنابەرانی لە چادرگەی سێڵینگن یارمەتی مادی و مەعنەوی کردووە، بەو جۆرەش لە ڕووهێنانی پەنابەران بۆ شاری لاهای لەیەکەم ڕۆژەوە هیچ درێغیەکی نەکردووەو بەردەوام بووە لە بەدەستهێنانی یارمەتی و پشتگیری پەیداکردن بۆ سەرخستنی داوای بەرهەقی پەنابەران و پێدانی مافی نیشتەجێبونیان. هەروەها جگە لە ئامۆژگاری، بەرچاوو ڕۆشنکردنەو و بەسەرکردنەوەی بەردەوامی په‌نابەران لە پارکی کومارك، فیدراسیۆن ڕۆژی شەممە بەشداری بەرچاوی لە ڕێپێوانی ناره‌زایه‌تی پەنابەراندا کردو گڕوتین و مەعنەویەتی زیاتری پێبەخشین.
شایه‌نی باسه‌ هەردوابەدوای کۆتایهێنان به‌ رێپێوانه‌که‌، فیدراسیۆن لەگەڵ پەنابەرانی کۆبووه‌و دەستیکرد بە گفتوگۆو بیروڕا گۆڕینەوە لەسەر چۆنیەتی بەردەوامی پێدانی ناڕەزایەتیەکەو و کاروچالاکیه‌کانی ئایندەو دواکاری پەنابەران و پێشهاتەکانو گرێوگۆڵەکانی سەر ڕێگای چونەپێشەوەی خەبات و ناڕەزایەتی پەنابەران. لە درێژەو بەرەنجامی گفتوگۆی کراوەو دۆستانه‌ی نێوان فیدراسیۆن و پەنابەران هەردوولا گەیشتنە ئەو بڕوایەی کە پەنابەران پێویستە داواکاریەکانی خۆیان لە نوسراوێکدا گەڵاڵە بکەن و ئاڕاستەی وەزارەتی کۆچو کۆچبەرانی بکرێ و دواتریش لە زۆربەی ناوەندو میدیاکاندا بڵاوبکرێتەوە لە پێناوی سەرخستنی یەکجاری دۆزی پەنابەران، ئەمە سەرەرای ئەوەی کە پێش چەند ڕۆژێك داواکاری نامەیەکی گشتی لەلایەن گروپێکی هۆلەندی کە ئێستا بەرگریکەرە لە مافەکانی پەنابەران لە کومارك گەڵاڵەکراوە بڵاوکراوەتەو بەڵام پەنابەران و فیدراسیۆن گەیشتنە ئەو بڕوایەی کە ئەو داواکارینامەیەی پێشتر کەموکوڕی تێدایەوە پێویستە پەنابەران بە یارمەتی فیدراسیۆن خۆیان داواکارینامەیەك گەڵاڵە بکەن کە ڕاستەوخۆ کێشەوگرفت و داواکاریەکانی پەنابەران پێچەوانە بکاتەوە.
لەکاتی تەواوکردن و گەڵاڵەکردنی داواکارینامەکەو دەنگدانی هەموو پەنابەران لەسەری، فیدراسیۆن وێنەیەکی بڵاودەکاتەوە بۆ زیاتر ناساندنی کێشەو داواکاریەکانی پەنابەران.

سەرچاوە: پەیجى فیدراسیۆنی سەراسەری پەنابەرانی عێراقی- هۆڵەندە

ژنێكی كورد ده‌بێته‌ ئه‌ندامی ئاژانسی ناسای ئه‌مه‌ریكی

پێشتریش له‌ ئاژانسی فه‌زایی كه‌نه‌دا كاریكردوه‌

ژنێكی كوردی دانیشتوی به‌ریتانیا ده‌بێته‌ ئه‌ندامی ناسای ئه‌مه‌ریكا و پێشتریش له‌ ئاژانسی فه‌زایی كه‌نه‌دا كاریكردوه‌.
ئاژانسی هه‌واڵی فوراتنیوز بڵاویكرده‌وه‌: زه‌ینه‌ب كوربان، كه‌ خه‌ڵكی باكوری كوردستانه‌ و له‌ به‌ریتانیا نیشته‌جێیه‌ ده‌بێته‌ ئه‌ندامی ئاژانسی ناسای ئه‌مه‌ریكا و چۆته‌ ریزی پیشه‌وه‌رانی ئه‌مه‌ریكاوه‌.
زه‌ینه‌ب له‌ ته‌مه‌نی (9) ساڵیدا چوه‌ته‌ به‌ریتانیا ه‌ له‌ زانكۆی له‌نده‌ن خوێندنی ته‌واوكردوه‌ و تێزه‌كه‌شی سه‌باره‌ت به‌ پاشه‌كه‌وتكردنی وزه‌ی هیدرۆژن.
پرۆژه‌كه‌ی به‌هاوكاری زانكۆی ئۆكسفۆردی له‌نده‌ن ئه‌نجامداوه‌ و له‌كاتی تێپه‌ڕاندنی دكتۆراكه‌شیدا له‌ كۆمپانیای زه‌ی سه‌لاش كاریكردوه‌ له‌گه‌ڵ رێكخراوی ناسا و حكومه‌تی به‌ریتانیاش په‌یوه‌ندی هه‌بوه‌ و گه‌یشتۆته‌ ریزی پشه‌گه‌رانی زانستی ئه‌مه‌ریكا و له‌ ساڵی (2011)ه‌ش له‌ ناوه‌ندی فه‌زایی كه‌نه‌دا كاریكردوه‌.
له‌ ئێستادا ئه‌و ژنه‌ كورده‌ ئه‌ندامی رێكخراوی ناسای ئه‌مه‌ریكایه‌ و شانازی به‌ كوردبونیه‌وه‌ ده‌كات و هیوای ئاینده‌یه‌كی گه‌ش بۆ گه‌له‌كه‌ی ده‌خوازێت.

Sunday, September 23, 2012

فیدراسۆن ئیدانەی ناردنی پەناخوازانی عێراقی دەكات بۆ دوورگەی ناورۆ


پاش ئەوەی ئەمڕۆ هەینی 21 ئەیلولی 2012، حكومەتی ئوسترالیا دووەم وەجبەی پەناخوازانی گواستەوە بۆ دورگەی ناورۆ، كە ژمارەیان 30 پەناخواز بوو كەلەناویاندا 6 پەناخوازی بەڕەگەز عێراقی هەن، فیدراسۆنی سەرتاسەری پەنابەرانی عێراق بە توندی ئیدانەی ئەو ڕاگواستنە دەكات.

ئامانج عەبدوڵا، سەرۆكی لقی كوردستانی فیدراسیۆنی سەرتاسەری پەنابەرانی عێراق، لە لێدوانێكی رۆژنامەوانیدا بە توندی ئیدانەی ئەو ڕاگواستنەی كرد و بەپێشێلكردنی مافی پەناخوازانی لەقەڵەمدا و داوای لە بەرپرسانی حكومەتی عێراق كرد كە هەڵوێست وەربگرن و داوا لە نوێنەرایەتیەكانی حكومەتی ئوسترالیا بكەن كە پلانی ڕاگواستنی پەناخوازان بۆ ئەو دوورگەیە ڕابگرێت.

ئامانج ووتی ” ئەم ڕاگواستنە بازرگانیكردنە بە گیانی پەناخوازانەوە و حكومەتی ئوسترالیا دەیان ملیۆن دۆلار دەداتە ئەو دورگەیە بۆ ئەوەی پەناخوازانی ووڵاتەكەی لێوەربگرێت.”

ڕاگواستنی پەناخوازان سیاسەتێكی پێشووتری حكومەتی ئوسترالیا بووە لە ساڵانی 2001 بۆ 2007 بەمەبەستی ڕێگەگرتن لە شاڵاوی كۆچبەرانی نایاسایی بۆ ئوسترالیا و كۆتایهێنان بە مەرگی پەناخوازان كە ساڵانە لەپێش گەشتنیان بەبەلەم لەئاوەكانی نێوان ئوسترالیا و ووڵاتانی باشووری خۆرهەڵاتی ئاسیاداو بەتایبەت ئەندەنوسیادا دەخنكێن.

بەگوێرەی ووردەكاری ڕاگواستنەكە، ئەو پەناخوازانەی كە ناتوانن بیسەلمێنن كە پەنابەری ڕاستەقینەن دیپۆرتی ووڵاتەكانیان دەكرێنەوە و ئەوانەش كە دەبنە پەنابەر هێشتا مەرج نیە ئوسترالیا مافی پەنابەرێتیان پێبدات و ڕەوانەی ئەو ووڵاتانە دەكرێن كە ئامادەن وەك پەنابەر پێشوازیان لێبكەن.

هاوڵاتی


Saturday, September 22, 2012

یه‌كه‌م كاروانى په‌نابه‌ره‌ عێراقییه‌كان گه‌یشته‌ دوورگه‌ى نارو


وێنەی كامپە ئامادەكراوەكان بۆ پەناخوازان لەدوورگەی ناورۆ
شه‌ش عێراقى له‌نێو ئه‌و گرووپه‌ سى كه‌سییه‌ بوون كه‌ له‌ دوورگه‌ى كریسمسه‌وه‌ به‌ فڕۆكه‌ ره‌وانه‌ى كامپى تۆپسایدى دوورگه‌ى نارو كران كه‌ پێشتر 60 په‌نابه‌رى دیكه‌شى وه‌رگرتووه‌.

30 په‌نابه‌ر كه‌ شه‌شیان عێراقى بوونى‌و ئه‌وانى دیكه‌ش سریلانكی دوێنێ گه‌یشتنه‌ دوورگه‌ى نارو، وه‌زاره‌تى كۆچى ئوسترالى راینه‌گه‌یاندووه‌ كه‌ "حاڵه‌ى ئه‌و په‌نابه‌رانه‌ باش یان یان خراپ بێ"، به‌ڵام ده‌سه‌ڵاتدارانى دوورگه‌كه‌ ده‌ڵێن "بارى په‌نابه‌ره‌كان خراپه‌".

عێراقییه‌كان زه‌رده‌خه‌نه‌یان له‌سه‌ر لێو بوو و بایبایان له‌وانى دیكه‌ ده‌كرد كاتێ چوونه‌ ناو فڕۆكه‌‌و وه‌ڕێكه‌وتن بۆ ئه‌و دوورگه‌یه‌ى كه‌ ده‌بێته‌ ماڵیان بۆ داهاتووێكى پێشبینیكراو. ئه‌و په‌نابه‌رانه‌ له‌ كامپه‌كه‌ى دوورگه‌ى نارو لێپرسینه‌وه‌یان له‌گه‌ڵدا ده‌كرێ، ئینجا حكومه‌تى ئوسترالیا بڕیار ده‌دا ئاخۆ دیپۆرتیان بكاته‌وه‌ یان وه‌ریان بگرێ.

گۆران سه‌باح
رووداو- ئوسترالیا


Friday, September 21, 2012

ئوستڕالیا قاچاخچیێکى عێراقى 11 ساڵ حوکم دەدات

دادوەر بە حەیدەرى گوت: تۆ قاچاخچیێکى سادە نەبووى

عەلى حەیدەرى، 37 ساڵ، پارساڵ لەلایەن پۆلیسى ئوستڕالیا گیرا دواى ئەوەى بە بەلەم شەش پەنابەرى گەیاندبووە کەنارەکانى ئەو وڵاتە. دواى ساڵێک، ئەمڕۆ دادگەى ڤیکتۆریا حوکمى 11 ساڵ زیندانى بەسەردا سەپاند.
ئەم حوکمە تا ئێستە بە قورسترین حوکم دادەنرێت لەسەر قاچاخچیێک درا بێ لە ئوستڕالیا. قاچاخچییەکە هاتە گرتن دواى ئەوەى پۆلیس بە جلى مەدەنى داواى لێ دەکا هەندێ کەس لە ئەندەنووسیاوە بهێنێت بۆ ئوستڕالیا. ئەویش بە کارەکە هەڵدەستێ و دواتر دەکەوێتە داوى پۆلیس.  
حەیدەرى زیاتر قاچاخچیى کوردەکان بوو بۆ ئوستڕالیا. رۆڵێکى سەرەکى هەبووە لە بردنى کوردەکان بۆ ئوستڕالیا بە بەلەم. دادوەر، مایکل رۆزنس، لە ناو دادگە لە حەیدەرى گوت: "تۆ هەر تەنیا قاچاخچیێکى سادە نەبووى، زۆر لەوە زیاتر بووى و لە هەموو قۆناخێکى رێى قاچاخ تێوەگڵاوى و دەستت هەبووە."
حەیدەرى هەشت هەزار دۆلار (80 وەرەقە)ى لە کوردێکى ئێرانى وەرگرتووە لە 2009 تا بە بەلەم بیگەیەنێتە ئوستڕالیا. بەلەمەکە هیچ کەلوپەلێکى سەلامەتى تێدا نەبووە و زۆریش ترسناک بووە.
هەروەها لە 2010 حەیدەرى پارەى لە دوو خێزانى ترى کورد وەرگرتووە و هێناویانى بۆ ئوستڕالیا. دواى گەیشتنیشیان پارەى زیاترى لێ وەرگرتوون.
دادگەى ڤیکتۆریا حەیدەرى بەکار دێنێ بۆ وەرگرتنى زانیارى زیاتر لەسەر قاچاخچییەکانى تر و گرتنیان.  

گۆران سەباح

سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration


Thursday, September 20, 2012

دۆسیەى پەنابەرێکى کورد لە بەریتانیا لەنێوان دیپۆرتکردنەوەو مانەوەیدا


کاوه‌ عه‌لی ئه‌و په‌نابه‌ریه‌ ماوه‌ی 10 ساڵه‌ له‌ووڵاتی به‌ریتانیا ده‌ژی وه‌ خاوەنی مناڵیکی شەش سالی نیوە و پاش کێشه‌یه‌کی خێزانی له‌ساڵی 2008 ، بڕیاری زیندانیکردنی دراوه و مۆڵه‌تی مانه‌وه‌شی لێسه‌ندراوه‌ته‌وه‌‌. بۆ به‌دواچوونی ئه‌م دۆسیه‌یه‌ فیدراسیۆن په‌یوه‌ندی له‌گه‌ڵ کاوه‌ عه‌لی کرد، ئه‌و ووتی" چونکه‌ من خه‌ڵکی شاری به‌غدام‌ له‌ 15.10 .2009 دا له‌گه‌ڵ کۆمه‌ڵێکی تر له‌په‌نابه‌ران ڕه‌وانه‌ی شاری به‌غدا کراینه‌وه‌، به‌ڵام پاش ئه‌وه‌ی لێپرسراوانی فڕۆکه‌خانه‌مان تێگه‌یاند ئێمه‌ به‌زۆر نێردراوینه‌ته‌وه‌، وه‌ریان نه‌گرتینه‌وه‌ به‌ره‌و ووڵاتی به‌ریتانیا گه‌ڕێنراینه‌وه‌."
ئه‌م په‌نابه‌ره‌ له‌ دریژه‌ی قسه‌کانیدا سه‌باره‌ت به‌دیپۆرتکردنه‌وه‌که‌ی ده‌ڵێت" من قسه‌م له‌گه‌ڵ ئه‌فسه‌رانی فه‌رمانگه‌ی کۆچی به‌ریتانی کردووه‌، گوایه‌ ئه‌وان په‌یوه‌ندیان به‌ نوینه‌رایه‌تی حکومه‌تی هه‌رێمی کوردستانه‌وه‌ له‌له‌نده‌ن کردووه‌ و ئه‌وانیش به‌ ئیمه‌یڵ وه‌ڵامیان داونه‌‌ته‌وه‌ که‌ گوایه‌ لاریان له‌ دیپۆرتکردنه‌وه‌م نیه‌" .
به‌ڵام پاش ئه‌م هه‌واڵه‌ ناوەندی هەواڵگری فیدراسیۆن په‌یوه‌ندی ته‌له‌فۆنی له‌گه‌ڵ نوێنه‌رایه‌تی حکومه‌تی هه‌رێم له‌له‌نده‌ن کرد و ئه‌و قسانه‌یان ڕه‌تکرده‌وه‌ و ووتیان" ئێمه‌‌ به‌هیچ جۆرێک ئیمه‌ڵمان بۆ ئیمیگره‌یشن نه‌کردووه‌ و دژی به‌زۆر ناردنه‌وه‌ی په‌نابه‌رانین. وه‌ بۆ ئه‌و پرسانه‌ هۆم ئۆفیس یان فه‌رمانگه‌ی کۆچبه‌رانی سنور (UKBA) په‌یوه‌ندی به‌ حکومه‌تی عێراقه‌وه ده‌کات نه‌ک ئێمه‌".
هەر لە درێژەی بەدواداچونی ئەم کەیسەدا کاوە تەواوی بەڵگەکانی دادگای خستە بەردەم فیدراسیۆن لەو بارەیەوە لە نامەیەکی داوەر (هۆچ کنسن) هاتووە کە داوای ئازادکردنی کاوە بە کەفالەت رەتدەکاتەوەوەیەکیک لەو هۆکارانە داوەر دەڵێت :"ئاگادارکراومەتەوە کە حکومەتی هەرێمی کوردستان مۆڵەتی گەرانەوەی زۆرە ملێی داوە بە داواکاری پێداچونەوەو بەڵام ئەوەی رێگەگرە لەبەردەم ناردنەوەیدا لابردنی ئەو فەرمانەی (کۆنترۆلکردنی دادگایە)."
سەبارەت بەم کەیسە لەگەل دەشتی جەمال سکرتیری فیدراسیۆن پەیوەندیمانگرت ووتی"هەر جۆرە هاوکاریکردنیکی حکومەتی هەرێمی کوردستان نەک تەنها بۆ حکومەتی بەریتانیا بەڵکو بۆحکومەتەکانی ئەوروپا سەبارەت بە بەزۆر ناردنەوەی پەنابەران پێچەوانەی ئیدعاکانیان نیشان ئەدات کە گوایە دژ بە زۆر ناردنەوەی پەنابەرانن. ..ئێمەش ناچار دەبین راستیەکان بۆ رای گشتی ئاشکرا بکەین لەوەش زیاتر گەر هەر هاوکاریەکیان بۆ ناردنەوەی بەزۆری پەنابەران سەربگریت ئەوا جارێکی دیکە دەرگا بە رووی حکومەتە راستەکانی تری ولاتانی ئەوروپا دەکاتەوە سیاسەتی بەزۆر ناردنەوەی پەنابەران بەرنە پێشەوە"
سەبارەت بەهەوڵەکانی فیدراسیۆنی پەنابەران دەشتی جەمال ووتی"بە هەوڵی ئیمەو کۆمەڵیک لە کەسانی دڵسوزو یاسایی نزیک بە ٢ساڵە دیپۆرتی پەنابەران لە بەریتانیا راگیراوە، وە ئیستە کەیسی ناردنەوەی پەنابەران لە دادگایە سەرباری ئەوەی چەند جاریک هەوڵدراوە ئەو بریارە هەلبگیرێت بەلام خۆشبەختانە سەری نەگرتوە وا بریارە کۆتای ئەم مانگە دادگا چاوبگیریتەوە بەداواکەی وەزارەتی ناوخۆدا، ئێمەش لەو بارەوە دەیان بەڵگەمان ئامادەکردوە تا ئەم سیاسەتە دژی ئینسانیە پۆچەڵبکەینەوە"
هەروەها سەبارەت بە کەیسی ئەو پەنابەرە فیدراسیۆن لەهەوڵدایە بۆ لابردنی هەرەشەی دیپۆرتو ئازادکردنی .
بۆ زانیاری زیاتر هەموو بەڵگەکانو وتەکانی دادگا وینەی ئاراستەی فیدراسیۆنکراوەو لەبەردەستدایە.

Wednesday, September 19, 2012

سه‌رمایه‌ى ساڵانه‌ى بازرگانیكردن به‌ كۆچبه‌رانى نایاساییه‌وه‌ 25 ملیار یۆرۆیه‌

ساڵانە سەدان پەناخواز دەبنە قوربانى لەسەرسنوورەکانى ئەوروپا

به‌پێى رِاپۆرتێكى رِۆژنامه‌ى ۆڵ ستریت جۆرناڵ كه‌له‌ 15ى دیسه‌مه‌بردا بڵاوكراوه‌ته‌وه‌ وله‌ زارى كۆمیسیارێكى یه‌كێتى ئه‌وروپا بۆ كاروبارى ناوخۆى ئه‌و یه‌كێتیه‌ ، سه‌رمایه‌ى بازرگانیكردن به‌ په‌ناخوازان و كۆچه‌به‌رانى نایاسایه‌وه‌ له‌ لایه‌ن قاچاخچیه‌كانه‌وه‌ له‌ سنورى ووڵاتانى یه‌كێتى ئه‌وروپا ساڵانه‌ به‌ نزیكه‌ى 25 ملیار یۆرۆ مه‌زه‌نده‌ ده‌كات و ده‌ڵێت " ئه‌م بازرگانیه‌ به‌جۆرێك فراوان بووه‌ كه‌ به‌ره‌نگاربوونه‌وه‌ى كارێكى زه‌حمه‌ته‌ " .
رِاپۆته‌كه‌ ئاماژه‌ به‌ خراپى باردۆخى په‌ناخوازان و كۆچبه‌رانى نایاسایى له‌ یۆنان ده‌كات و چاوپێكه‌وتنى له‌گه‌ڵ چه‌ندین په‌ناخوازدا كردووه‌ كه‌ باس له‌ خراپى باردۆخیان له‌ یۆنان ده‌كه‌ن و هه‌روه‌ها باس له‌وه‌ ده‌كه‌ن كه‌ چۆن له‌لایه‌ن قاچاخچیه‌كانه‌وه‌ خه‌ڵه‌تێنراون.
" یۆنان ئه‌وروپا نیه‌ هه‌ر وه‌ك ئاسیا و ئه‌فریقایه‌" ، ئه‌مه‌ ووته‌ى یه‌كێك له‌و په‌ناخوازانه‌یه‌ كه‌ نزیكه‌ى دوو هه‌زار دۆلارى داوه‌ به‌ قاچاخچیه‌كى به‌رِه‌گه‌ز كورد بۆئه‌وه‌ى له‌ رِووبارى ئڤیرۆس بیپه‌رِێنێته‌وه‌و كه‌له‌ پاش په‌رِینه‌وه‌ى ده‌ستبه‌جێ له‌لایه‌ن پۆلیسى یۆنانه‌وه‌ ده‌ستگیركراوه‌ و خراوه‌ته‌ كه‌مپێكى نزیك سنوورى نێوان توركیا و یۆنان.
به‌گوێره‌ى رِاپۆته‌كه‌ ، به‌شێكى زۆرى كێشه‌كه‌ ئه‌و سنووره‌ هاوبه‌شه‌ 80 مایڵه‌یه‌ كه‌له‌نێوان توركیا و یۆناندایه‌ كه‌ به‌شێكى زۆرى به‌ رِووبارى ئڤیرۆس جیاده‌كرێته‌وه‌ كه‌ سالاَنه‌ سه‌دان په‌ناخواز ده‌كاته‌ قوربانى.
هه‌رچه‌نده‌ یۆنان وولاتێكى یه‌كێتى ئه‌وروپایه‌ ، ئه‌و وولاَته‌ نه‌بۆته‌ جێگه‌ى سه‌ره‌نجى به‌شێكى یه‌كجار زۆرى په‌ناخوازن له‌ رِابردوودا و به‌تایبه‌تیش له‌ ئێستادا ئه‌وه‌ش به‌هۆى خراپى بارودۆخى ئابوورى ئه‌و وولاَته‌وه‌یه‌ و كۆچبه‌ران یۆنان وه‌ك خاڵى په‌رِینه‌وه‌ بۆ ناو وولاَتانى ترى یه‌كێتى ئه‌وروپا به‌كارده‌هێنن.
به‌شێكى ترى راپۆته‌كه‌ باس له‌ قه‌یرانى ئاواره‌بوون و كۆچكردنى كۆچبه‌ره‌ سووریه‌كان ده‌كات و به‌پێى ئامارێكى فه‌رمى ئاژانسى پاراستنى سنووره‌كانى یه‌كێتى ئه‌وروپا ، ته‌نها له‌ مانگى ته‌مموزه‌وه‌ زیاتر له‌ 2400 كۆچبه‌رى سوورى له‌سه‌ر سنوورى نێوان توركیا و یۆناندا كه‌ به‌ ئامانجى كۆچكردنیان بۆ یه‌كێك له‌ وولاَتانى یه‌كێتى ئه‌وروپا له‌لایه‌ن پۆلیسى یۆناییه‌وه‌ ده‌ستگیركراون.
 
قاچاخچیه‌كیش كه‌ خۆى به‌رِه‌گه‌ز جه‌زائیرى به‌ رِۆژنامه‌كه‌ ناساندوه‌ ده‌ڵێت سووریه‌كان ده‌وڵه‌مه‌ندترین كۆچبه‌رن و ئاماده‌ن 10 هه‌زار یۆرۆ بده‌ن بۆئه‌وه‌ى بگه‌نه‌ وولاَتێكى ترى وه‌ك فنلانده‌ یان نه‌رویج یان سوید.
وه‌ك هه‌میشه‌ش ، یۆنان و وولاَتانى یه‌كێتى ئه‌وروپا به‌رده‌وامن له‌ رِاكێشانى په‌نجه‌ى تۆمه‌ت به‌ئارِاسته‌ى یه‌كتر . یۆنان باوه‌رِى وایه‌ كه‌ وولاَتانى یه‌كێتى ئه‌وروپا به‌رپرسیاریه‌تیه‌كى كه‌میان له‌باره‌ى كۆنترِۆڵكردنى سنووره‌كانى یه‌كێتیه‌كه‌وه‌ گرتۆته‌ ئه‌ستۆ و هاوكاریه‌كى سنوردار ده‌ده‌نه‌ یۆنان بۆ چاره‌سه‌ركردنى ئه‌و قه‌یرانه‌ و له‌به‌رامبه‌ریشدا به‌شێك له‌ وولاَتـانى یه‌كێتى ئه‌وروپا هه‌وڵه‌كانى حكومه‌ته‌ یه‌ك له‌دوایه‌كه‌كانى یۆنان به‌ هه‌وڵى كورتخایه‌ن وه‌سف ده‌كه‌ن و ده‌ركردنى یۆنان له‌ ناوچه‌ى یۆرۆ به‌ یه‌كێك له‌و چاره‌سه‌رانه‌ ده‌زانن بۆ دووباره‌ كۆنترۆڵكردنه‌وه‌ى سنوورى یه‌كێتى ئه‌وروپا و تێكشكاندنى بانده‌ قاچاخچیه‌كان.
كورديو

سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration


وه‌زاره‌تی‌ دارایی‌ به‌ڵێنی‌ پێدانی‌ سلفه‌ی‌ هاوسه‌ر گیری‌ ده‌دات بوَ ئه‌وانه‌ی‌ له‌هه‌نده‌ران ده‌گه‌ڕێنه‌وه


وه‌زاره‌تی‌ دارایی‌ و ئابووری‌ حكومه‌تی‌ هه‌رێمی‌ كوردستان به‌ڵێنی‌ بڕینه‌وه‌ی‌ ده‌رماڵه‌ بوَ ژن و منداڵی‌ شه‌هید و ئه‌نفال و پێدانی‌ سلفه‌ی‌ هاوسه‌ر گیری‌ بوَ كوڕ و كچی‌ شه‌هیدو و ئه‌نفال و كیمیا باران له‌ناوچه‌ دابڕێنراوه‌كان و ئه‌وانه‌شی‌ له‌ هه‌نده‌ران ده‌گه‌ڕێنه‌وه‌ ده‌دات.

ئه‌مڕوَ سێشه‌ممه‌ 18/9/2012 به‌مه‌به‌ستی‌ به‌ دواداچوون بوَ هه‌ندێ‌ بڕیار كه‌ تا ئێستا له‌لایه‌ن وه‌زاره‌تی‌ دارایی‌ و ئابووری‌ حكومه‌تی‌ هه‌رێمه‌وه‌ نه‌خراوه‌ته‌ بواری‌ جێبه‌جێكردنه‌وه‌، لیژنه‌ی‌ كاروباری‌ پێشمه‌رگه‌ و شه‌هیدان و قوربانیانی‌ جینوَساید له‌ په‌رله‌مانی‌ كوردستان به‌ ئاماده‌بوون و سه‌رۆكایه‌تی‌ محه‌مه‌د شاره‌زووری‌، سه‌رۆكی‌ لیژنه‌كه‌ و به‌شێك له‌ئه‌ندامان سه‌ردانی‌ وه‌زاره‌تی‌ دارایی‌ و ئابوری‌ حكومه‌تی‌ هه‌رێمی‌ كوردستانیان كرد  و له‌لایه‌ بایز تاڵه‌بانی‌ وه‌زیری‌ دارایی‌ و ئابووری‌ پێشوازیان لێكرا.

له‌ كۆبوونه‌وه‌یه‌كدا كه‌ له‌دیوانی وه‌زاره‌ت به‌رێوه‌چوو وه‌زیری‌ دارایی و ئابووری‌  هه‌موو ئاماده‌یه‌كی‌ وه‌زاره‌ته‌كه‌ی‌ ده‌ربڕی‌ له‌ پێناو خزمه‌تكردنی‌ كه‌سوكاری‌ شه‌هیدان و پێشمه‌رگه‌ سه‌ربه‌رزه‌كانی‌ كوردستان.

وه‌زیری‌ دارایی‌ و ئابووری‌ ده‌ست به‌جێ‌ بڕیاری‌ جێبه‌جێكردنی‌ چه‌ند خاڵێكیدا كه‌ بریتی‌ بوون له‌خه‌رج كردنی‌ ده‌رماڵه‌ بوَ  ژن و منداڵی‌ شه‌هید و ئه‌نفال و جینوَساید كه‌ له‌ بودجه‌ی‌ ساڵی‌ 2012 بڕیاری‌ له‌ سه‌ر دراوه‌ له‌ 1/1/2012 وه‌ خه‌رج ده‌كرێت، ئه‌ویش بۆ  ژنی‌ شه‌هید بڕی‌ 50 هه‌زار دینار و بوَ هه‌ر منداڵێك بڕی‌ 25 هه‌زار دینار و خه‌رجده‌كرێت و ده‌چێته‌ سه‌ر موچه‌كانیان.

وه‌زیری‌ دارایی‌ و ئابووری‌ به‌ڵێنیشیدا سلفه‌ی‌ هاوسه‌رگیری‌ وه‌ك مینحه‌ بۆ  كوڕ و كچی‌ شه‌هیدان و ئه‌نفال و كیمیاباران له‌ ناوچه‌ دابڕێنراوه‌كان هاوشێوه‌ی‌ هه‌رێمی‌ كوردستان خه‌رج بكرێت و ئه‌و كوڕ و كچی‌ شه‌هیدانه‌ش كه‌له‌ هه‌نده‌ران ده‌گه‌رێنه‌وه‌ به‌ هه‌مان شێوه‌ ده‌یان گرێته‌وه‌.

له‌كۆتایشدا باس له‌وه‌كرا كه‌ مادده‌ی‌ (10) بڕگه‌ی‌ دووه‌م له‌ یاسای‌ ژماره‌ (38)ی‌ ساڵی‌ (2007) له‌ په‌رله‌مانی‌ كوردستان ده‌رچووه‌ جێبه‌جێ بكرێت كه‌ تایبه‌ته‌ به‌و پێشمه‌رگانه‌ی پێش به‌رواری‌ 5/3/1991 پێشمه‌رگه‌ بوون یان به‌هوَی‌ بزوتنه‌وه‌ی‌ ڕزگاری‌ خوازی‌ كوردستانه‌وه‌ ئاواره‌بون ،كه‌ خزمه‌ته‌كانیان ساڵێََك به‌ دووساڵ هه‌ژمار بكرێ‌ به‌مه‌به‌ستی‌ زیاد كردنی‌ موچه‌ و سه‌ره‌ موچه‌ و خانه‌نشینی‌ كه‌ تا ئیستا جێ‌ به‌ جێ‌ نه‌كراوه‌.

خه‌ندان ـ
سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

Monday, September 17, 2012

كچه‌ كوردێك له‌ هۆڵه‌ندا ده‌كوژرێ

سندی ده‌روێش

كچه‌ كوردێكی چالاكوان به‌نێوی سندی ده‌روێش له‌ وڵاتی هۆڵه‌ندا له‌لایه‌ن چه‌ند مافیایه‌كه‌وه‌ ده‌كوژرێت .
سه‌رچاوه‌یه‌كی تایبه‌ت به‌ (باس نیوز)ی راگه‌یاند "ئه‌و كچه‌ كچێكی چالاكوان بوو له‌ بواری رێكخراوه‌یی ژنان كاری ده‌كرد له‌ رۆژی 6/7/2012 له‌لایه‌ن چه‌ند مافیایه‌كه‌وه‌ ده‌كه‌وێته‌ به‌ر ده‌ستڕێژی گولله‌ و به‌سه‌ختی بریندار ده‌كرێ، ئه‌مڕۆش 17/9/2012 گیانی له‌ده‌ست دا.
ئه‌م رووداوه‌ بووه‌ته‌ جیگه‌ی نیگه‌رانی رۆشنبیران و چالاكوانانی كورد له‌ وڵاتی هۆڵه‌ندا .
سندی له‌ 1/3/1975 له‌دایك بووه‌ و ماوه‌ی چه‌ند ساڵێكه‌ له‌ هۆڵه‌ندا نیشته‌جێ بووه‌ .

Sunday, September 16, 2012

بارودۆخ و هەواڵى پەناخوازانى ئوسترالى لە دوورگەى ناورو


یەکێک لەو پەناخوازانەى ڕۆژى هەینى گەیەنرانە دوورگەى ناورو
کۆچ بۆ ئوسترالیا و کۆچى کوردان

ئەو پەناخوازە ئوسترالیانەى ڕەوانەى ناورو دەکرێن، بەپێى یاساکانى حکومەتى ناورو لەشوێنى یاساى ئوسترالیا کەیسەکانیان هەڵدەسەنگێنرێت.
لە ناورودا تەنها پیاوانى پەناخواز جێگیر ناکرێن بەڵکو ئافرەت و منداڵانیش جێگیر دەکرێن لەداهاتوودا. بەهەمانشێوە کەیسەکانیان هەڵدەسەنگێنرێن کە ئایا وەکو پەناخواز لەئوسترالیا وەردەگیرێن یاخود نا.
پامێڵا کور، چالاکوانێکى بوارى پەناخوازان، ڕاگەیاند کە ئەو 30 پەناخوازە سریلانکییەى کە بۆ یەکەمجار ڕەوانەى ناورو کران، واتێگەیەنراون کە ڕەوانەى خاکى سەرەکى ئوسترالیا دەکرێن، بۆیە زۆر بەهێمنى چوونە ناو فڕۆکەکان و هاتنە دەرەوە و تەنگژەو توندوتیژییان دروست نەکرد.
بارى ئاسایش لە دوورگەى کریسمس توندکراوە وەکو ئامادەکارییەک بۆ گواستنەوەى زیاتر. پاسەوانانى ناوەندەکانى دەستبەسەرکردن لەو دوورگەیەدا بە میدیاکانیان ڕاگەیاندووە کە زۆربەى پەناخوازە ئەفغانییەکان لە ناوەندەکانى دەستبەسەرکردنى ئوسترالیا ترسیان لە ناورو هەیە. بەڵام بەبێ هیچ خۆپیشاندان و توندوتیژیییەک دەگوازرێنەوە. پاسەوانەکان نیگەرانن لەوەى کە گروپێکى ئامادەکراوى پەناخوازى ئێرانى ئامادەکراو بۆ گواستنەوەیان بۆ ناورو ئامادەییان تێدا نییەو چاوەڕێ دەکرێ تەنگژەو کێشە دروست بکەن لەکاتى گواستنەوەیاندا.
لەکاتێکدا لە دوورگەى کریسمس پەناخوازان شوێنى مانەوەیان فێنککەرەوەو، جێگەى باش، و ئینتەرنێت، و کتێبخانە و ژوورى پشوودان و کۆبوونەوەو چالاکییەکانیان هەبوو، لەئێستادا یەکەم گروپى پەناخوازان بۆ چەند چادرگەیەکى گەرم و خراپ و سەرەتایى لە دەشتایى و دۆڵەکانى ناورو ڕەوانە کراون. 
کۆمسیۆنى مافەکانى مرۆڤ لە ئوسترالیا ڕاگەیاند زۆر نیگەرانن لە بارودۆخى مافەکانى مرۆڤى پەناخوازان کە ڕەوانەى ناورو دەکرێن و بەشێوەیەکى ڕێکوپێک ناپارێزرێن.
یەکێک لە دەستبەسەرکراوەکانى پێشوو لە دوورگەى ناورو بارودۆخى سامناک و پڕمەترسى دەساڵ لەمەوبەرى خۆى وەکو پەناخوازێک لەو دوورگەیە دەگێڕێتەوە. ئەو لەوبڕوایەدایە کە دووبارە دەستپێکردنەوەى ئەو ڕێوشوێنە بەرامبەر پەناخوازان تاڕاددەیەکى زۆر لەسەر حسابى پەناخوازان دەبێت.

سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

Saturday, September 15, 2012

وەزیرى کۆچى ئوسترالى: قاچاخچییەکان زانیارى ناڕاست و بێ بنەمایان بڵاو کردووەتەوە

سیستمێکى نوێ دێتە کایەوە

وەزیرى کۆچى ئوسترالى کریس بۆوێن ڕاگەیاند ئەمڕۆ ڕۆژێکى گرنگە کە پەیامێکى بەهێز بۆ قاچاخچییەکان دەنێردرێت لە ناوچەکەدا کە سیستمێکى نوێ دێتە کایەوەو دەستبەکار دەبێت. بۆوێن وتیشى: ئێمە دەزانین کە قاچاخچییەکان لە دەرەوە لەم چەند هەفتەیەدا زانیارى ناڕاست و بێ بنەمایان بڵاو کردووەتەوە، کە وتوویانە ئەمە ڕوونادات، و ناوەندى پڕۆسێسکردنى کەیسى پەناخوازان لە ناورو دانامەزرێنرێت و گوایە ئەوان گەرەنتى ئەوە دەدەن کە خەڵکى ڕەوانەى ئەو دەوڵەتە ناکرێن. ئەمەش ئەوە نیشان دەدات کە قاچاخچییەکان لە چەند هەفتەى ڕابردوودا درۆیان بڵاوکردۆتەوە.
لەلایەکى ترەوە حکومەتى ئوسترالى ڕاگەیاند کە پڕۆسێسکردنى کەیسى پەناخوازان لە دەرەوەى خاکى وڵاتەکەى پێویستە خەڵکى بووەستێنێت لە کۆچى پڕ مەترسى بە بەلەم بۆ ئوسترالیا. 
جێگەى باسە لەماوەى چەند ساڵى ڕابردوودا چەندین تراژیدى بەلەمەکان ڕوویداوەو چەندان کەس بوونەتە قوربانى و شوێن بزر بوون.
هەر لەدرێژەى هەواڵەکانى پەناخوازان و کۆچ بۆ ئوسترالیا:
یەکێک لە پاسەوانە تایبەتییەکانى سەرۆکى ئیندۆنیزیا تێوەگلاوە لە قاچاخچێتى و ژیانى 200 پەناخوازى کردۆتە قوربانى.
ئوسترالیا ڕایگەیاند بەشێوەیەکى یاسایى 1000 پەنابەرى سوورى لە وڵاتەکەى وەردەگرێت کە ئێستا لە عێراقدان.

ئوسترالیا یه‌كه‌م فرۆكه‌ى پڕ له‌ په‌ناخوازانى ره‌وانه‌ى دوورگه‌ى نارو كرد

ئوسترالیا چیدیكه‌ هاوكاریى په‌ناخوازانى رێى به‌له‌م ناكا‌

ئه‌مڕۆ ئوسترالیا یه‌كه‌م فرۆكه‌ى پڕ له‌ په‌ناخوازانى ره‌وانه‌ى دوورگه‌ى نارو كرد، كه‌ فڕۆكه‌كه‌ 40 پیاوى تێدابوو هه‌موویان له‌ كه‌مپێكدا ده‌ژین له‌و دوورگه‌یه‌.

ئه‌و هه‌نگاوه‌ى ئوسترالیا دواى ئه‌و بڕیاره‌ى په‌رله‌مانى ئوسترالیا دێت، كه‌ له‌ مانگى رابردوو ده‌رچوو، له‌بڕیاره‌كه‌دا هاتووه‌ ئوسترالیا "چیدیكه‌ هاوكاریى په‌ناخوازانى رێى به‌له‌م ناكا‌و ده‌یاننێرێته‌ دوورگه‌ى نارو و پاپاگینیا".

چه‌ند كاژێرێك پێش نیشتنه‌وه‌ى فڕۆكه‌كه‌، كریس بۆوین وه‌زیرى كۆچى ئوسترالى له‌ په‌رله‌مانى ئوسترالیا رایگه‌یاند "ئوسترالیا هه‌زار په‌نابه‌رى دیكه‌ى سوورى وه‌رده‌گرێت وه‌ك به‌شێك له‌ بڕیارى وه‌رگرتن‌و به‌خێوكردنى 20 هه‌زار كه‌یسى مرۆیى".

له‌ سووریا به‌ هه‌زاران كه‌س رۆژانه‌ هه‌ڵدێت، چاوه‌ڕێ ده‌كرێ 650 هه‌زار په‌نابه‌رى دیكه‌ى سوورى بگه‌نه‌ ئه‌و وڵاته‌ له‌ چه‌ند مانگى داهاتوودا، هه‌روه‌ها به‌ هه‌زاران سورى دیكه‌ كه‌ پێشتر چوونه‌ته‌ عێراق، ئێستا له‌ عێراقیش رایانكردووه‌‌و به‌ره‌و ئه‌وێ چوونه‌، بۆوین گوتى "ئێمه‌ به‌ رێزه‌وه‌ سه‌یرى قه‌یرانى مرۆیى ده‌كه‌ین له‌ سووریا".

وه‌زیرى كۆچ گوتیشى "له‌ چه‌ند مانگى داهاتوودا هه‌زار په‌نابه‌رى دیكه‌ى عێراقى‌و سوورى وه‌رده‌گرن، به‌تایبه‌تى ئه‌وانه‌ى كه‌ خزم و كه‌سیان له‌ ئوسترالیایه‌".

كۆمه‌ڵگه‌یه‌كى عێراقى له‌ ئوسترالیادا ده‌ژین كه‌ (كورد، ئاشورى، ئه‌رمه‌نى، تورك، جووله‌كه‌، عه‌ره‌ب) ده‌گرێته‌وه‌، له‌ ساڵى 1976 بۆ جارى یه‌كه‌م عێراقییه‌كان به‌جیا له‌و وڵاته‌ ئاماركران كه‌ ژماره‌یان 2 هه‌زار‌و 273 كه‌س بوو، له‌ ساڵى 1986 بوون به‌ 4 هه‌زار‌و 516 كه‌س‌و له‌ كۆتایى شه‌ڕێ كه‌نداودا له‌ ساڵى 1991 بوون به‌ 6 هه‌زار‌و 186 كه‌س كه‌ زۆربه‌یان له‌ ویلایه‌تى ڤیكتۆریا و NSW بوون.

وارگه‌ى ئه‌لیكترۆنى رێكخراوى نێوده‌وڵه‌تى (ئاى ئاڕ ئاى) رایگه‌یاندووه‌ به‌پێى یاسا تازه‌كه‌، ئوسترالیا رێككه‌وتنێكى نوێى مۆركردووه‌ له‌گه‌ڵ هه‌ردوو وڵاتى سه‌ربه‌خۆى ناورۆ و پاپاگینیاى ناو زه‌ریاى هێمن تاوه‌كو په‌ناخوازه‌كانى لێ وه‌رگرێت، بۆ ئه‌م مه‌به‌سته‌ش ئوسترالیا سه‌رقاڵى دروستكردنى كامپه‌ له‌و 2 دوورگه‌ سه‌ربه‌خۆیه‌، به‌ڵام تاوه‌كو كامپه‌كان ته‌واو ده‌بن، ئه‌و په‌ناخوازانه‌ى به‌ به‌له‌م ده‌گه‌نه‌ ئوسترالیا له‌ناو كامپگه‌لى سه‌ربازیدا ده‌حه‌وێندرێنه‌وه‌.

جولیا گیلارد، خانمه‌ سه‌رۆك وه‌زیرانى ئوسترالیا، له‌ دیمانه‌یه‌كى بۆ وارگه‌ى ئه‌لیكتڕۆنى (زه‌ ئوسترالیه‌ن) گوتى "حكومه‌ته‌كه‌ى زۆر به‌خێرایى كارده‌كا بۆ ته‌واوكردنى كامپه‌ نوێیه‌كان تاوه‌كو به‌زووترین كات یاساكه‌ بێته‌ جێبه‌جێكرن".

له‌ ئامارى ساڵى 2001دا عێراقییه‌كان بوون به‌ 24 هه‌زار‌و 760 به‌پێى دواهه‌مین ئامارى ساڵى 2006یش ژماره‌ى عێراقییه‌كان بوون به‌ 32 هه‌زار‌و 520 كه‌س له‌و وڵاته‌ كه‌ نیوساوسوێست زۆرترین ژماره‌ى به‌ر كه‌وتووه‌ كه‌ 20 هه‌زار‌و 530 كه‌سى عێراقى لێبووه‌، ڤیكتۆریا 8 هه‌زار‌و 610 و وێسته‌رن ئوسترالیا 1 هه‌زار‌و 680 و ساوس ئوسترالیا 770 كه‌سى عێراقى لێبووه‌ كه‌ له‌و ژمارانه‌ به‌ رێژه‌ى 3.8 كوردن.

ژماره‌ى عێراقییه‌كان له‌ 30ى حوزه‌یرانى 2012 له‌ كامپه‌كانى ئوسترالیا 154 كه‌سن 23 منداڵ و 131یش گه‌وره‌، له‌و 154 كه‌سه‌ 16یان مێینه‌ن، به‌پێێ دوا ئاماریش 323 عێراقى ئێستا ده‌ست به‌سه‌رن له‌ ئوسترالیا، دیپۆرتكردنه‌وه‌ى په‌ناخوازان له‌ ئوسترالیا بۆ یه‌كه‌م جار له‌سه‌ر ده‌ستى حكومه‌تى جۆن هاوارد بوو له‌ ساڵى 2001 پاشان ئه‌م یاسایه‌ ره‌خنه‌یه‌كى زۆرى هه‌ڵگرت له‌لایه‌ن رێكخراوه‌ نێوده‌وڵه‌تییه‌كانى مافگه‌لى مرۆڤ بۆیه‌ له‌ 2007 حكومه‌ته‌كه‌ى كیڤن هاته‌ هه‌ڵوه‌شاندنه‌وه‌. ئێستاش له‌ 2012 حكومه‌ته‌كه‌ى گیلارد تووندتر یاساكه‌ى په‌سه‌ند كرده‌وه‌ كه‌ به‌هیچ شێوه‌یه‌ك له‌ به‌رژه‌وه‌ندى په‌ناخوازاندا نییه‌.
گۆران سه‌باح
رووداو- ئوسترالیا

 سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

Thursday, September 13, 2012

وه‌زیرى كۆچى ئوسترِالى: هه‌زار په‌نابه‌رى ترى عێراقى و سورى وه‌رده‌گرین


وه‌ك به‌شێك له‌ برِیارى وه‌رگرتن و به‌خێوكردنى 20000 كه‌یسى مرۆیى ، ئوسترِالیا 1000 په‌نابه‌رى ترى سورى وه‌رده‌گرێ ،

وه‌زیرى كۆچى ئوسترِالى كریس بۆوین له‌ په‌رله‌مانى ئوسترِالیا له‌ وته‌یه‌كیدا ووتی : له‌ سوریا به‌ هه‌زاران كه‌س رۆژانه‌ هه‌ڵدێن ، چاوه‌رێ ده‌كرێ 650 هه‌زار په‌نابه‌ریترى سورى بگه‌نه‌ ئه‌و وڵاته‌ له‌ چه‌ند مانگى داهاتوودا ، وه‌ به‌ هه‌زاران سوریتر كه‌ پێشتر چووبوونه‌ عێراق ، ئێسته‌ له‌ عێراقیش رایان كردووه‌ و به‌ره‌و ئوسترالیا دێن .

بۆوین گوتى "ئێمه‌ به‌ رێزه‌وه‌ سه‌یرى قه‌یرانى مرۆیى ده‌كه‌ین له‌ سوریا .

وه‌زیرى كۆچ ئه‌وه‌شى راشیگه‌یاند : كه‌ له‌ چه‌ند مانگى داهاتوودا هه‌زار په‌نابه‌رى ترى عێراقى و سورى وه‌رده‌گرین، به‌تایبه‌تى ئه‌وانه‌ى كه‌ خزم و كه‌سیان له‌ ئوسترِالیا هه‌یه‌.

كوردیو - گۆران سه‌باح

تێبینى: وەرگرتنى پەناخوازانى نوێى عێراقى و سوورى لە ئوسترالیا لە ڕاستیدا لەڕێگەى کۆمسیارى پەنابەرانى نەتەوە یەکگرتووەکانەوە (UNHCR) ئەنجام دەدرێت، نەک لەڕێگەى کۆچ کردن بۆ ئوسترالیا و لەڕیگەى کۆچ بە بەلەمەوە..


 سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

یەکەم فڕۆکەى پەناخوازانى ئوسترالى گەیەنرایە ناورو


ئەم فڕۆکەیە تەنها پەناخوازە پیاوەکان دەگرێتەوە
کۆچ بۆ ئوسترالیا و کۆچى کوردان

ئەمڕۆ یەکەم فڕۆکەى پەناخوازانى ئوسترالى لە دوورگەى کریسمسەوە ڕەوانەى ناورو دەکرێت. سەرچاوەکانى هەواڵ ڕایدەگەیەنن، کە ئەم فڕۆکەیە تەنها پەناخوازە پیاوەکان دەگرێتەوەو ئەمشەو ڕەوانەى ئەو ناوچەیە دەکرێن.
حکومەت ڕەتى دەکاتەوە هەر زانیارییەک دووپات بکاتەوە کە هەواڵى ئەوەیە هەیە حکومەت نیگەرانە لەوەى بەڕێگەیەکى یاسایى ئەو فڕۆکەیە بووەستێنرێت.
هەروەها زانیارییەکان ئەوە دەردەخەن کە فڕۆکەیەکى کۆمارى ناورو گەیشتۆتە خاکى ئوسترالیا لە دوورگەى کریسمس کە چاوەڕوان دەکرێت یەکەم گروپى پەناخوازان هەڵگرێت. 
بڕیارى حکومەتى ئوسترالى و ڕێککەوتنى لەگەڵ ناورودا بەوەى کە لەو وڵاتەدا بنیشێتەوە و پەناخوازان هەڵبگرێت، وادەردەکەوێت کە ڕێککەوتنەکە داهاتى بوارى ئاسمانى ناورو بکەن کە وڵاتێکى زۆر بچووک و دوورەدەستە.
ئەمە لەکاتێکدایە کە ئەمڕۆ وەزیرى ناوخۆ جاسۆن کلەیر ڕایگەیاند دەسەڵاتدارانى ئوسترالى تووشى بەلەمێک بوون کە 148 کۆچبەرو سێ بەلەمەوانى لەخۆگرتووە لە دوورگەکانى ئاشمۆر.
لەکاتێکدا بۆ پشکنینە بنەڕەتییەکان کۆچبەرەکان ڕەوانەى دوورگەکانى کریسمس دەکرێن، لەکۆتاییدا چاوەڕوان دەکرێت ڕەوانەى ناورو و دوورگەى مانوس بکرێن.


سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration


Wednesday, September 12, 2012

وێنە هەواڵ: ئامادەکارییەکان لە دوورگەى ناورو بۆ پەناخوازە ئوسترالییەکان

ئەم هەفتەیە یەکەم گروپى پەناخوازان ڕەوانەى ناورو دەکرێن

بلۆگى کۆچ بۆ ئوسترالیا

لەم هەفتەیەدا یەکەم گروپى پەناخوازان ڕەوانەى ناورو دەکرێن.. ئەم هەفتەیە تەنها پیاوان ڕەوانە دەکرێن.. لەداهاتوودا منداڵ و ئافرەتانیش بەتەنیا ڕەوانەى ناورو دەکرێن.. وەزیرى کۆچى ئوسترالى ڕایگەیاند یاساى نوێى ئوسترالیا بەسەر هەموو تەمەن و ڕەگەزەکاندا جێبەجێ دەکرێت.. حکومەتى ناورو ڕەزامەندە بە دەستگیرکردنى پەناخوازە ئوسترالییەکان لەدوورگەکە بۆزیاتر لە 5 ساڵ بۆهەرکەسێک.. ئەم ماوەیەش بۆ پەناخوازانى هەموو وڵاتانى جیهان جێبەجێ دەکرێت.. لەنزیک ئیندۆنیزیا بەلەمێکى تر ژێر ئاو دەکەوێت.. ئەگەر پەناخوازان ڕێگاى کۆچى دەریا بگرنەبەر مەترسى گەورەتر چاوەڕوان دەکرێت ڕووبدات..

ئەم وێنانەى خوارەوە پێگە و ئامادەکارییەکانى دوورگەى ناورو نیشان دەدەن:



سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

دەقى یاساى نوێى ئوسترالیا بۆ مامەڵە لەگەڵ پەناخوازاندا چییە؟

سەرۆک وەزیران و وەزیرى کۆچى ئوسترالى

بلۆگەکانى کۆچ بۆ ئوسترالیا و کۆچى کوردان

حکومەت و ئۆپۆزسیۆنى ئوسترالیا لیژنەیەکى بێ لایەن و پسپۆڕو سەربەخۆى دیارى کرد بۆ گەڵاڵە کردنى چەند پێشنیارێک کە هەردوولا لەسەرى ڕێکبکەون تاوەکو بکرێتە یاسایەک و بەو شێوەیە مامەڵە لەگەڵ پەناخوازاندا بکرێت. 
وا لەخوارەوەشدا دەقى ئەو 22 ڕاسپاردەیەى کەلەلایەن پەرلەمانى ئوسترالیاوە پەسەندکرا بۆ چۆنێتى مامەڵەکردن لەگەڵ ئەو پەناخوازانەى کە لەڕێگەى بەلەمەوە دەگەنە ئوسترالیا، دەخەینەڕوو: 

1- لیژنەکە پێشنیارى ئەوەدەکات کەپێویستە ئەم پرەنسیپانەى خوارەوە ببن بەبەشێک لە سیاسەتى ئوسترالیا لە مەسەلەکانى تایبەت بە پەناخوازان کە ئەوەش بە ئامانجى جێبەجێکردنى ڕێوشوێنێکى ستراتیجى و گشتگر و و تۆکمە کە بتوانێت ئەوەلیەتى کورتخایەن و درێژخایەن و مام ناوەند بدات بە چۆنێتى مامەڵەکردن لەگەڵ مەسەلەى پەنابەرێـى و شاڵاوى کۆچ لە ناوچەکەدا. 

هەروەها دابینکردنى ڕێوشوێنى تازەوگونجاوە بۆ پەناخوازان بۆ بەدەستهێنانى پارێزگاریکردن لەڕێگەى سیستەمێک لەسەر ئاستى ناوچەکە و دابینکردنى ئاسانکارى بۆ هەمئاهەنگى لەسەر ئاستى ناوچەکە و هەبوونى چوارچێوەیەکى پارێزگاریکردن کە گونجاوبێت لەگەڵ داواکاریەکان بۆ وەرگرتنى مافى پەنابەرێتى و دابینکردنى هاوکارى بۆئەوانەى کە کەیسەکانیان هەڵسەنگاندنیان بۆکراوە و بەدەستێنانى دەرئەنجامى درێژخایەن لەو بارەیەوە.  تەتبیقکردنى پرەنسیپى " بێ سود" بۆئەوەیە کە بڵێن بەخۆدزینەوە لە هەبوونى سیستەمێکى ڕێکخراو بۆ مەسەلەى کۆچ هیچ سودێکى نیە. هەروەها باشترکردنى پڕۆگرامى مرۆیى ئوسترالیا کە زیاتر دەبێت ببێتە جێگەى باوەڕ و دادپەروەرانە بێت و ملکەچى ئوسترالیاش بۆ پابەندبوونە نێودەوڵەتیەکان دووپاتبکاتەوە.    
لەو 20 هەزار پەنابەرەى لەچوارچێوەى پڕۆگرامى مرۆییدا وەردەگیرێن ، بەلایەنى کەمەوە 12 هەزار مافى پەنابەرێتى بدرێت بە بەشى پەنابەران (کەلەلایەن یوئێنەوە دەنێنرێن بۆ ئوسترالیاوە) و بەمەش  ڕێژەکە دووهێندەى جاران دەبێت.  

پڕۆگرامى مرۆیى ئوسترالیا :

2- لیژنەکە پێشنیارى ئەوە دەکات کە دەستبەجێ ژمارەى وەرگیراوان لەم پڕۆگرامەدا زیادبکرێت بۆ 20 هەزار کەس لە ساڵێکدا. بەپشتبەستن بە باردۆخى ئابوورى ئێستا (ى ئوسترالیا) و گەشەکردنى زیاتر لەمەڕ هاریکارى لەسەر ئاستى ناوچەکە سەبارەت بە پەناخوازان ، پێشنیاردەکرێت کە ژمارەکە زیادبکرێت بۆ 27 هەزار کەس لە 5 ساڵى داهاتوودا . ئەم پڕۆگرامە دەبێت زیاتر جەخت لەو پەناخوازانە بکاتەوە کە خۆیانگەیاندۆتە ووڵاتانى باشورى ئاسیا. 

هاریکارى لەسەر ئاستى ناوچەکە :
3- لیژنەکە پێشنیارى ئەوەدەکات کە بەئامانجى پەرەپێدانى هاریکارى لەسەر ئاستى ناوچەکە بۆ سیستەمى وەرگرتنى پەنابەرێتى ، حکومەتى ئوسترالیا سەرچاوەکانى زیاتر و فراوانتر بکات لە ناوچەکەدا. 

4- لیژنەکە پێشنیارى ئەوەدەکات کە هاریکاریە دووقۆڵیەکانى لەگەڵ ئەندەنوسیا زیاتر بکات سەبارەت بە پەناخوازان ئەویش لەڕێگەى زیادکردنى بەشى ئەندەنوسیا بۆ پڕۆگرامى مرۆیەکەو هەروەها زیادکردنى چاودێرى لەڕێگەى دەوریە دەریایەکان و گەڕان و چەسپاندنى یاسا سەبارەت بە پەناخوازان و کردنى گۆڕانکارى لە یاساکانى ئوسترالیادا سەبارەت بە کەمینە ئەندەنوسیەکان و ئەوانەى کە سەرپەرشتى گەشتە دەریایە نایاسایەکان دەکەن لە ئەندەنوسیاوە بۆ ئوسترالیا.  

5- لیژنەکە پێشنیارى ئەوەدەکات کە ئوسترالیا بەردەوام بێت لە پەرەپێدانى هاریکاریەکانى لەگەڵ ئەندەنوسیا سەبارەت بە پەناخوازان کە ئەوەش وەرگرتنى ژمارەیەکى بەرچاو لە پەنابەران لەو ووڵاتەوە بەسێوەیەکى ساڵانە. 

6- لیژنەکە پێشنیارى ئەوەدەکات کە هاریکارى ووڵاتانى تر بکات بەتایبەت ووڵاتانى خۆرهەڵاتى ناوەڕاست و ئاسیا بۆ زیاردکردنى وەرگرتنى پەنابەر لەوانەوە.   

ڕاگواستنى پەناخوازان بۆ ووڵاتانى ناوچەکە : 
7- لیژنەکە پێشنیارى ئەوەدەکات کە یاسایەک بەپەلە دەربکرێتـ بۆ ڕاگواستنى پەناخوازان بۆ ووڵاتانى ناوچەکە بەمەبەستى یەکلایکردنەوەى کەیسەکانیان. ئەم یاسایە دەبێت بەجۆرێک بێت کە ڕاگواستنى پەناخوازان بۆ ووڵاتێکى گونجاوى ناوچەکە رێگەپێبدات و لەهەمان کاتدا یاسایەکى تریش هەبێت کە دەرفەتى ئەوە بە پەرلەمانى ئوسترالیا بدات کە ڕێگەبگرێـت یان ڕێگە بدات بە بەردەوامکردنى ڕاگواستن.        

8- لیژنەکە پێشنیارى ئەوەدەکات کە کەمپەکان لە دوورگەى ناورۆ بە زووترین کات بکرێنەوە بۆ ڕاگواستنى ئەو پەناخوازانەى لەڕێگەى کەنارە ئاویەکانەوە گەشتونەتە ئوسترالیا بەشێویەک کە گونجاوبێت بەرپرسیارێتیەکانى ناورۆو ئوسترالیا بەپێى یاساى نێودەوڵەتى.  

9- لیژنەکە پێشنیارى ئەوەدەکات کە کەمپەکان لە دوورگەى پاپانیوگینیا بە زووترین کات بکرێنەوە بۆ ڕاگواستنى ئەو پەناخوازانەى لەڕێگەى کەنارە ئاویەکانەوە گەشتونەتە ئوسترالیا بەشێویەک کە گونجاوبێت بەرپرسیارێتیەکانى پاپانیوگینیا و ئوسترالیا بەپێى یاساى نێودەوڵەتى.  

10- لیژنەکە پێشنیارى ئەوەدەکات کە ڕێکەوتنامەکەى 2011 ى نێوان حکومەتى مالیزیا و ئوسترالیا بۆ ڕاگواستنى پەناخوازان و وەرگرتنى پەنابەران لەو ووڵاتەوە زیاتر پەرەى پێبدرێت نەک پشتگوێ بخرێن بەجۆرێک کە هەئاهەنگى زیاتر لەسەر ئاستى باڵا بکرێت لەڕێگەى جەختکردنەوە لە پاراستن و لەئەستۆگرتنى بەرپرسیارێتى بەجۆرێک کە ببێتە بنەمایەکى ئەرێیى بۆ پەرلەمانى ئوسترالیا بۆ دووبارە بەهەندوەرگرتنەوەى یاسایەکى نوێ کە پێویست بکات. 

یەکگرتنەوەى خێزان 
11- لیژنەکە پێشنیارى ئەوەدەکات کە ئەو کەڵەکەبوون و زیادبوونەى لە چوارچێوەى پڕۆگرامى مرۆیى تایبەت هەیە لەئێستادا چارەسەربکرێت لەڕێگەى کەمکردنەوەى داواکاریەکان بۆ یەکگرتنەوەى خێزانەکان کەلەڕێگەى گەشتە دەریایە ترسناکەکانەوە دەگەنە ئوسترالیا ئەویش لەڕێگەى لابردنى ئەو ئیمتیازەى کە بۆ ئەو داواکارەکانەیە کە بەشێویەکى نایاسایى و بە گەشتە دەریایەکان گەشتونەتە ئوسترالیا و لە جیانى ئەوە داواکارەکان دەبێت لەڕێگەى پڕۆگرامى کۆچەوە داواى بەیەکگەشتنەوەى خێزانەکانیان بکەن.   

12- لیژنەکە پێشنیارى ئەوەدەکات کە ئەوانەش کە لە داهاتوودا دەگەنە ئوسترالیا لەڕێگەى کەنارە ئاویەکانەوە و نایاسایى بوون نابێت مافى ئەوەیان هەبێت کە داواى خێزانەکانیان بکەن لەچوارچێوەى پڕۆگرامى مرۆیى تایبەتەوە و دەبێـت ئەو داواکاریە لەڕێگەى پڕۆگرامى کۆچەوە بێت. 

13- لیژنەکە پێشنیارى ئەوەدەکات کە ئوسترالیا هەمئاهەنگى زیاتر بکات لەگەڵ ئەو ووڵاتانەى کە لە ئێستاو ڕابردوودا پەنابەران وەردەگرن بۆ ئەوەى دەرفەتى زیاتر هەبێت بۆ نیشتەجێکردن وەک بەشێک لە هاریکارى لەسەر ئاستى ناوچەکە.  

14- لیژنەکە پێشنیارى ئەوەدەکات کە یاساى کۆچى ساڵى 1958 هەمواربکرێتەوە بەوەش هەرگەشتنێک بەهەرشوێنێکى ئوسترالیا لەڕێگەى کەنارە ئاویەکانەوە بێت و ناڕێکخراو(نایاسایى) بێت نابێت ئەو کەسانە مافێکى یاسایى جیاوازیان بدرێتێ لەوانەى  کە گەشتونەتە دوورگەکانى ئوسترالیا.   

15- لیژنەکە پێشنیارى ئەوەدەکات یەکلایکردنەوەى مافى پەنابەرێتى لەڕووى کاتەوە گونجاو و بەسود بێـت.  

16- لیژنەکە پێشنیارى ئەوەدەکات کە ستراتیجیەکى کاریگەر پەرەیپیبدرێت بۆ دانوستانکردن بۆ بەدەستهێنانى ئەنجامە باشتر لەسەر دیپۆتکردنەوەوگێڕانەوەى ئەو پەناخوازانەى کە کەیسەکانیان ڕەتدەکرێتەوە.  

17- لیژنەکە پێشنیارى ئەوەدەکات کە دەبێت ستراتیچى تێکشکاندنى قاچاخچیەکان و ئەو مەترسیانەى ئەوان دەینێنەوە بەردەوام بێت بەجۆرێک کە ئاژانسە پەیوەندیدارەکانى ئوسترالیا سەرچاوەى زیاتریان بۆ دابینبکرێت بەشێوەیەکى بەردەوام بۆ ئەو مەبەستە. 

18- لیژنەکە پێشنیارى ئەوەدەکات کە ئاژانسەکانى جێبەجێکەرانى یاسا لە ئوسترالیا دەبێت لە چالاکیەکانیان بۆ بەگرداچونەوەى ئەو هاوڵاتیە ئوسترالیانەى کە بەشدارن لە تەمویلکردن و ئاسانکارى بۆ کارەکانى پەقاچاخهێنانى پەناخوازان. 

19- لیژنەکە تێبینى ئەوەدەکات کە ئەو هەلومەرجانەى پێویستن بۆ گێڕانەوەى کاریگەرو سەلامەت و یاسایى ئەو بەلەمانەى کە بەشێوەیەکى ناڕێکخراو (نایاسایى) دەگەنە ئوسترالیا بەدى نەهاتوون بەڵام ئەم بارودۆخە دەکرێت بگۆڕدرێت ئەگەر هاریکارى و هەمئاهەنگى زیاتر لەناوچەکەدا کرا. 

20- لیژنەکە پێشنیارى ئەوەدەکات کە ئوسترالیا بەردەوام بێت لەکارکردن لەووڵاتانى ناوچەکە بۆ پەرەپێدان بە کارەپێکەوەیەکان بۆ بەڕێوەبردنى گەڕان و ڕزگارکردنى (پەناخوازان لەدەریاکاندا) لە ناوچەکەدا هەروەها چارەسەرکردنى هەرگرفتێک لە چوارچێوەى یاساکانى گەڕان و ڕزگارکردن لەنێوان ووڵاتانى ناوچەکەدا.   

21- لیژنەکە پێشنیارى ئەوەدەکات کەلە چوارچێوەى ئەم ڕاسپاردانەدا پەیوەندى نێوان ووردەکاریەکانى یەکلایکردنەوەى کەیسى پەناخوازان لەناو ئوسرالیاو لە دەرەوەى ئوسترالیا بەپێى پڕۆگرامى مرۆیى لەماوەى دوو ساڵدا پێداچوونەوەى بۆ بکرێت.  
22- لیژنەکە پێشنیارى ئەوەدەکات کە ناتەواوى بنەماکانى بەڵگەکانى ئێستاى تایبەت بە مەسەلەى پەنابەرێتى چارەسەربکرێت لەڕێگەى پرۆگرامێکى لێکوڵینەوەیى کە بە بوجەیەکى باش بەڕێوەببرێت بە بەشدارى حکومەت و لایەنە ناحکومیەکان.  


ئاماده‌كردنی‌: هه‌ژار ته‌ها


سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration

Tuesday, September 11, 2012

كوردێك لە نێو فڕۆكەیەكی ئەمریكیدا پەلاماری ئافرەتێك دەدات


كوردێك لەنێو فڕۆكەیەكی ئەمریكیدا پەلاماری ئافرەتێكی ئەمریكی دەدات كە لە تەنیشتی دانیشتووە و خەوی لێكەوتووە.
رۆژنامەی Chicago Tribuneی ئەمریكی لەوبارەوە بڵاویكردەوە كە باوەڕ ئاكساڵ، تەمەن 48 ساڵ و خەڵكی توركیا، لە گەشتی ئاسمانی نێوان دوو شاری ئەمریكادا دەستی بۆ ئافرەتێكی تەنیشتی بردووە و دوای ئەوەی ئافرەتەكە هاواری بەسەردا كردووە، تیمی ئەمنیی نێو فڕۆكەكە باوەڕیان دەستگیركردووە و تۆمەتی دەستدرێژی سێكسییان داوەتە پاڵ.
باوەڕ كە نزیكەی 31 ساڵە لە ئەمریكا دەژیت، لەلایەن ئافرەتەكەوە بەوە تۆمەتبار كراوە كە ئەوكاتەی ئەو خەوتبوو، ئەو پیاوە دەستی بۆ سنگی بردووە و دەستێكی دیكەشی لە جەستەی داوە، پاشان ویستوویەتی ماچی بكات.
ئافرەتەكە دوای ئەوەی لەخەو رادەبێ و هاوار بەسەر باوەڕدا دەكات، تیمی فریاكەوتنی فڕۆكەكە دەگەنە سەری و گرژییەكە هێور دەكەنەوە. بەتایبەتیش دوای ئەوەی هەندێ لە سەرنشینەكانی نزیك رووداوەكە لە باوەڕ تووڕە دەبن و هاوكاری ژنەكە دەكەن بۆئەوەی هێور ببێتەوە و لە سەر كورسییەكەی دابنیشێ.
باوەڕ لەلایەن پۆلیسی نیوجێرسی ئەمریكییەوە دەستگیركراوە و لێكۆڵینەوەی لەگەڵ كراوە. هەرچەندە نكۆڵی لەوە نەكردووە كە دەستی بۆ ئەو ئافرەتە بردووە، بەڵام رەتیدەكاتەوە پەلاماری دابێ و گوتوویەتی كە ئافرەتەكە دەستیگرتووە و بردوویەتییە لای جەستەی خۆی. 
رۆبەرت دیگۆرت، پارێزەری باوەڕ رایگەیاند كە دیپۆرتكردنەوەی باوەڕ ئەگەرێكی دوورە، چونكە باوەڕ لەدەست دەسەڵاتدارانی توركیا هەڵاتووە و ئەگەر دیپۆرت بكرێتەوە ژیانی دەكەوێتە مەترسییەوە.
پارێزەری ناوبراو دەڵێ "باوەڕ كوردە و لەدەست سەركوتكاری لە توركیا هەڵاتووە و چەندین جار لەدژی توركیا وتاری نووسیوە، دواجاریش كە سەردانی توركیای كرد، دەستگیركرا و خرایە ژێر لێكۆلینەوە".
رووداو - ئەمریكا


Monday, September 10, 2012

دیندار دۆسکی: دانیمارکیه‌کان گوتویانه‌ چی دی کوردی عێراق وه‌ک په‌نابه‌ر وه‌رناگرن


وه‌زیری کۆچ و کۆچبه‌ری عێراق
به‌پێی ڕاپۆرتێکی فێدراسیۆنی په‌نابه‌رانی عێراقی ، ئه‌و په‌نابه‌رانه‌ی ڕۆژی چوارشه‌ممه‌ له‌ڕێی فڕۆکه‌خانه‌ی به‌غداوه‌ گه‌ڕێندرابوونه‌وه‌ بۆ عێراق، زۆربه‌یان کورد بوون و له‌ فڕۆکه‌خانه‌ش پێشێلکاری و سوکایه‌تیان به‌رامبه‌ر کراوه‌ چونکه‌ زمانی عه‌ره‌بییان نه‌زانیوه‌.
دیندار نه‌جمان دۆسکی ، وه‌زیری کۆچ و کۆچبه‌ری عێراق ده‌ڵێت پێویسته‌ ئه‌و په‌نابه‌رانه‌ داوای یاسایی خۆیان له‌ڕێی دادگاکانی حکومه‌تی هه‌رێمی کوردستانی عێراقه‌وه‌ تۆمار بکه‌ن یان ڕاسته‌وخۆ په‌یوه‌ندی به‌ وه‌زاره‌ته‌وه‌ بکه‌ن تا بتوانرێت به‌دواداچوون له‌سه‌ر کێشه‌کانیان بکرێت.
وه‌زیری کۆچ و کۆچبه‌ری عێراق ده‌شڵێت بۆ چاره‌سه‌رکردنی مه‌سه‌له‌ی به‌زۆر ناردنه‌وه‌ی په‌نابه‌ران له‌ وڵاتانی ئه‌وروپاوه‌ بۆ عێراق گفت و گۆ له‌گه‌ڵ ئه‌و وڵاتانه‌ و ڕێکخراوه‌ نێونه‌ته‌وه‌ییه‌کانیشدا کراون و به‌رده‌وامیش قسه‌کردن له‌سه‌ر ئه‌و مه‌سه‌له‌یه‌ هه‌یه‌.
له‌ وه‌ڵامی پرسیارێکی هاوکارمان به‌ڵێن ساڵح ، سه‌باره‌ت به‌ ئاماده‌کاری بۆ گه‌ڕانه‌وه‌ی ئه‌و ژماره‌ زۆره‌ی په‌نابه‌رانی عێراقی که‌ له‌ سوریان و به‌هۆی ئاڵۆزی سیاسی و ئاسایشی ئه‌و وڵاته‌وه‌ باری گوزه‌ران و ژیانیان هێنده‌ی تر خراپ بووه‌، دیندار نه‌جمان دۆسکی ، وه‌زیری کۆچ و کۆچبه‌ری عێراق ده‌ڵێت ده‌ستکراوه‌ به‌ ئاماده‌کاریه‌کان و واش چاوه‌ڕوان ده‌که‌ن پاش ته‌واو بوونی خوێندنی ئه‌مساڵ زۆرێک له‌و عێراقیانه‌ بگه‌ڕێنه‌وه‌ زێدی خۆیان.
Balen Salih


کۆرسەکانی زمانی ئینگلیزی بۆ کاندیدانی تواناسازی


وەزارەتی خویندنی باڵا و توێژینەوەی زانستیی بە مەبەستی هاوکاریکردنی کاندیدەکانی بەرنامەی تواناسازی پرۆژەی کۆرسەکانی زمانی ئینگلیزی لە ناوەوەی وڵات ڕادەگەیەنێت. ئەم پڕۆژەیە تایبەتە بەو کاندیدانەی کە لە خولە جیاجیاکانی بەرنامەی تواناسازی ناویان دەرچووە و خوازیارن لەو زانکۆیانەی دەرەوەی وڵات درێژە بە خوێندنی ماستەر و دکتۆرا بدەن کە خوێندن تیایاندا بە زمانی ئینگلیزییە. 
لەم کۆرسانەدا کاندیدەکان دەتوانن بۆ ماوەی ٦ مانگ کۆرسی زمانی ئینگلیزی لە کوردستان ئەنجام بدەن، هاوکات لەگەڵ ئەم کۆرسانەدا تاقیکردنەوەی ستانداردی زمانی ئینگلیزی بۆ کاندیدەکان ئەنجام دەدرێت. 
کۆرسەکانی زمان لەم ناوەندە زانستییانەی لای خوارەوە ئەنجام دەدرێت:

  1. زانکۆی سۆران لە شاری سۆران.
  2. سێنتەری بریتش کاونسڵ لە هەولێر.
  3. زانکۆی سابیس لە هەولێر.
  4. زانکۆی ئەمەریکی عیراق/سلێمانی
ئەو کاندیدانەی خوازیارن بەشداری لەم پرۆگرامە بکەن پێویستە فۆرمی تایبەت بەم پرۆژەیە لە ڕێگای ئەم لینکەی خوارەوە دابگرن و دوای پڕکردنەوەی لە ڕێگای ئیمەیڵ ئەدرێسی 
(hcdp.language@mhe-krg.org) ەوە بیگەڕێننەوە بۆ وەزارەتی خوێندنی باڵا و توێژینەوەی زانستیی.
دوا مۆڵەت بۆ پێشکەشکردنی داواکاری ٣٠/٩/٢٠١٢ یە.

شایانی باسە کاندیدەکان لە کاتی دەستپێکردنی کۆرسەکانی زمانی ئینگلیزیدا مۆڵەتی خوێندنیان پێدەدرێت.
پرۆژەی ئەنجامدانی کۆرسەکانی زمانی ئینگلیزی لە ناوەوەی وڵات هەنگاوێکی گرنگی وەزارەتی خوێندنی باڵا و توێژینەوەی زانستییە بۆ ئامادەکردنی کاندیدەکانی بەرمانەی تواناسازی بۆ ئەوەی دوای سەفەرکردنیان بە سەرکەوتوویی خویندنی ئەکادیمی لە دەرەوەی وڵات تەواو بکەن. 

english_language_application.pdf

سەردانى گروپ و پەیجەکانمان بکەن بۆ وەرگرتنى زانیارى لەبارەى کۆچ، مینحەى خوێندن، دەرفەتى کار لە وڵاتانى دەرەوە و کۆچى یاسایى:
https://www.facebook.com/kochikurdan
https://www.facebook.com/groups/102175996536494/
http://kochikurdan.wordpress.com/
http://immigration2australia1.blogspot.com/
https://twitter.com/Kurd_Migration