Tuesday, September 30, 2014

ئه‌گه‌ر له‌ به‌ریتانیا بگه‌ڕێیته‌وه‌، ده‌رفه‌تى كار له‌كوردستان به‌ده‌ست بهێنه‌

رێكخراوی‌ IOM ی نێوده‌وڵه‌تی‌ بۆ كۆچ له‌ پڕۆژه‌یه‌كیدا به‌ناوی‌ (ماگنێت) بۆ دۆزینه‌وه‌ی‌ هه‌لی‌ كار، هه‌وڵده‌دات بۆ دۆزینه‌وه‌ى هه‌لى كار بۆ ئه‌و گه‌نجانه‌ى كوردستان و عێراق كه‌ خۆبه‌خشانه‌ له‌ به‌ریتانیاوه‌ ده‌گه‌ڕێنه‌وه‌ بۆ هه‌رێمى كوردستان. 
پڕۆژه‌كه‌ له‌هه‌وڵى ڕێنوێنى كردنى گه‌نجاندا ده‌بێت هه‌روه‌ها یارمه‌تیان ده‌دات بۆ ناساندنیان به‌ كۆمپانیا به‌ناوبانگه‌كان و كۆمپانیا ناوخۆیى و بیانیه‌كان له‌ هه‌رێمى كوردستان. له‌ماوه‌ى ڕابردوودا ژماره‌یه‌ك له‌وانه‌ى له‌ به‌ڕیتانیاوه‌ گه‌ڕاونه‌ته‌وه‌ توانیویانه‌ له‌ڕێگه‌ى ئه‌و پڕۆژه‌یه‌وه‌ ده‌رفه‌تى كار به‌ده‌ست بهێنن. 
ئه‌مه‌ وێبسایتى پڕۆژه‌كه‌یه‌ بۆ زانیارى زیاترو ئاشنابوون به‌ پڕۆژه‌كه‌و په‌یوه‌ندى كردن به‌ پڕۆژه‌كه‌وه‌: 
http://magnet.iomiraq.net/

Sunday, September 28, 2014

نەتەوە یەكگرتووەكان: عێراقی و سووری زۆر داوای پەنابەری دەكەن



330 هەزار و 700 كەس لەماوەی شەش مانگی یەكەمی ئەمساڵدا داوای پەنابەرییان كردووە لە 44 وڵاتی پیشەسازیی جیهان ، بەوشێوەیەش داوای پەنابەریكردن بە بەراورد لەگەڵ نیوەی یەكەمی ساڵی رابردوو بە رێژەی 24% زیادیكردووە .
كۆمیساریای باڵای پەنابەرانی سەر بە نەتەوەیەكگرتووەكان UNHCR ئەمڕۆ هەینی 26ی ئەیلول رایگەیاند ، هەڵگیرسانی شەڕ لە سووریا و عێراق و، نەبوونی سەقامگیری لەچەند شوێنێكی دیكەی جیهان ، وایكردووە كە ژمارەیەكی زۆر زیاتر لە خەڵكی ئەو شوێنانە داوای پەنابەری بكەن لە وڵاتانی جیهان . بەوشێوەیەش داواكردنی مافی پەنابەری ئەمساڵ بە رادەیەك بەرزبووەتەوە ، كە لە 20 ساڵی رابردوودا شتی وانەبووە .
كۆمیساریای باڵای پەنابەرانی سەر بە نەتەوەیەكگرتووەكان UNHCR لە راپۆرتەكەیدا دەڵێ ئەگەر ، داواكردنی مافی پەنابەری بەوشێوەیەی ئێستا بەردەوامبێت ، ژمارەی ئەوانەی ئەمساڵ داوای مافی پەنابەری دەكەن دەگاتە 700 هەزار كەس " ئەوەش گەورەترین ژمارەیە بۆ وڵاتانی پیشەسازی بە درێژایی 20ساڵی رابردوو، كە لە دوای ململانێی یوگسلاڤیا لە نەوەتەكاندا ، شتی وا رووینەداوە".
كۆمیساری UNHCR  ئەنتۆنیۆ جۆتیرێس ، رایگەیاند " دەبێ كۆمەڵگەی نێودەوڵەتی خەڵك ئامادە بكات بۆ ئەوەی ، ئەگەر چارەسەری كێشەكان نەكرێت ، جیهان پەنابەری زیاتر بەخۆیەوە دەبینێت لەماوەی مانگ و ساڵەكانی داهاتوودا".
UNHCR دەڵێت زۆر داواكارییەكانی مافی پەنابەری لە شەش مانگی یەكەمی ئەمساڵدا لە ئەڵمانیا، ئەمریكا ، فەرەنسا ، سوید، توركیا و ئیتاڵیا بوونە . هەروەها روونیدەكاتەوە كە لە هەر حەوت داواكاری ، یەكێكیان لە كەسێكی خەڵكی سووریاوە بووە ، كە بەگشتی داواكاری خەڵكی سووریا لەو وڵاتانە لەماوەی شەش مانگدا 48هەزار و 400 داواكاری بووە .

Saturday, September 27, 2014

یەكێك لەهەژارترین وڵاتانی جیهان دەرگای وڵاتەكەی بۆ پەنابەران دەكاتەوە

CambodiaMap
حكومەتی كەمبۆدیا بڕیاریدا كە بەیەكێك لەوڵاتە هەژارەكانی جیهان ناسراوە بڕیاریدا بەوەرگرتنی هەر پەنابەرێك كەلەدورگەی ناورۆ مافی پەنابەرێتی وەردەگرێت‌و بەڵام نایانەوێت لەو دورگەیە بمێنێتەوە.
ئەم بڕیارەی حكومەتی ئەو وڵاتەش پاش ڕێكەوتنی دێت لەگەڵ حكومەتی ئوسترالیا بۆ نیشتەجێكردنی ئەو پەنابەرانەی كەپێشتر ئوسترالیا لەپاش گەشتنیان بە بەلەم‌و بەشێوەیەكی نایاسایی دیپۆرتی ئەو دوورگەیەى كردون. 
لەگەڵ ئیمزاكردنی ڕێكەوتنامەكە كە دوێنێ‌ – هەینی 27 ی سێپتەمبەر – لەنێوان وەزیری كۆچی ئوسترالیا و وەزیری ناوخۆی كەمبۆدیا ئیمزا كرا ، بەشێكی بەرچاو لەڕێكخراوەكانی تایبەت بە داكۆكیكردن لە مافی پەنابەران ئیدانەی ڕێكەوتنامەكەیان و كرد و بەپێشلێكردنێكی ئاشكرای مافەكانی پەنابەرانیان وەسفكرد.
لای خۆیەوە بەرپرسی كۆمیسیۆنی باڵای پەنابەرانی سەربەنەتەوە یەكگرتووەكان ڕایگەیاند كە ئەوان خوازیارن كە ئوسترالیا بەو ڕێكەوتنامەیەدا بچێتەوە‌و وتیشی " پەنابەران مافی ئەوەیان هەیە كەبەشێوەیەكی باشتر مامەڵەیان لەگەڵ بكرێت نەك ئەم ووڵات و ئەو ووڵاتیان پێبكرێت". 
لەبەرامبەر وەرگرتنی ئەو پەنابەرانەی كە دەیانەوێت بچنە كەمبۆدیا ، كە یەكێكە لە هەژارترین ووڵاتەكانی كیشوەری ئاسیا و خاوەنی ڕیكۆردێكی خراپە بۆ پاراستنی مافەكانی مرۆڤ ، حكومەتی ئوسترالیا بڕی 40 ملیۆن دۆلاری ئوسترالی دەداتە ئەو ووڵاتە كە بە ووتەی وەزیری كۆچی ئوسترالیا بەمەبەستی گەشەپێدانی ئەو ووڵاتەیە نەك لەبەرامبەر وەرگرتنی پەنابەرەكان بێت و ڕایگەیاند كە ڕێكەوتنامەكە مافەكانی پەنابەران پێشێل ناكات.
بەپێی دواهەمین ئاماریش ، لە ئێستادا زیاتر لە 1200 پەناخواز لە دوورگەی ناورۆن كەبەشَكیان بەڕەگەز عێراقین و لەبەرخراپی بارودۆخیان و ناڕوونی داهاتوویان لەو دوورگەیە ، بەشێكیان گەڕاونەتەوە عێراق.
سەرچاوە : ماڵپەری گاردیان ، ماڵپەری وەزارەتی كۆچی ئوسترالیا

Friday, September 26, 2014

كۆچبەرانی سووری لە كەشتییەكە هاتنە خوارەوە

بەرپرسانی پۆلیسی قوبرسی یۆنانی رایانگەیاند كە 280 كۆچبەر، كە زۆربەیان سوورین ، رازیبوون لە كەشتییەكە بێنەخوارەوە لە بەندەری لیماسول ، كە پێشتر رازینەبوون لەو گەمییە گەشتیارییە بێنەخوارەوەو، داوایاندەكرد رێگەیان پێبدرێت بچنە ئیتاڵیا .
دوای ئەوەی پۆلیسی یۆنانی ، كۆچبەرانی لە رێگەی گفتوگۆ رازیكرد بێنە خوارەوە، پۆلیس چووە نێو كەشتییەكە . هەروەها شوێنی پێویست بۆ ئاگاداربوون لە رەوشی تەندروستی كۆچبەران ئامادەكرا ، لەوێشەوە دەگوازرێنەوە بۆ كەمپی كوكینۆتریمیسیا ، بەدووری 10 كیلۆمەتر لە پایتەختی قوبرس ، نیقۆسیا . لەوێش دەتوانن خۆیان بشۆن و جلوبەرگی نوێ وەربگرن و پشوو بدەن ، هەروەك بەرپرسانی خاچی سووری نێودەوڵەتی رایگەیاند، چونكە زۆر ماندوون .
ئەو كەشتییە گەشتیارییە لە رۆژی پێنج شەممە رزگاركرا ، كە سەرنشینەكانی بریتیبوون لە 345 كۆچبەر كە زۆربەیان سووری بوون ، بەڵام تەنیا 65 كەس رازیبوون رۆژی پێنج شەممە بێنە خوارەوە، ئەوانیدیكە داوایاندەكرد رێگەیان پێبدرێت بچنە ئیتاڵیا .
ئەوەش وایكرد كە بەڕێوەبەری گشتیی كۆمپانیا دەریاییەكە لەو كۆچبەرانە توڕەبێت ، چونكە ناچاربوو كەشتییەكە بنێرێتەوە بۆ ئەو دوورگەیەی لێی دابەزێندرابوون بۆ ئەوەی بیانگەیێنێتە بەندەری لیماسول . ئەو بەڕێوەبەرە گوتی " هەموو هەوڵێكماندا بۆ ئەوەی ژیانیان رزگار بكەین . خواردنمان پێدان و هاوكاریمان كردن ، بەڵام ئەوان دەیانەوێت دەزگاكەمان تێكبدەن "، هەروەها گوتی " بایی سەدان هەزار یۆرۆ زیانمان پێگەیشتووە".

Tuesday, September 23, 2014

شوانێكی كورد دەچێتە ئەوروپا



دەرهێنەری كورد سەهیم عومەر خەلیفە سەرقاڵی یەكەمین فیلمی درێژە كە بەناوی زاگرۆسە و بەرهەمێكی هاوبەشی بەلجیكی و ئەڵمانییە.
سەهیم بۆ یەكەمجارە زانیاری دەربارەی ئەم فیلمە بۆ (رووداو) ئاشكرا دەكات و دەڵێت "زاگرۆس ناوی نوێترین فیلمی درێژی منە، بەشێكی زۆری فیلمەكە لە بەلجیكا وێنە دەگرم و بەشێكی دیكەشی لە كوردستان، بۆ ئەم فیلمە زیاتر ئەكتەری پرۆفیشناڵ هەڵدەبژێرم و تاوەكو ئێستا تێستی 150 كەسمان كردووە كە بەشێكی زۆری لە باكووری كوردستان بووە".
چیرۆكی ئەمجارەی سەهیم جیاوازە و سەربوردەی پیاوێكی كورد دەگێڕێتەوە كە چۆن لە ژیانی شاخەوە روو لە ژیانی ئەوروپا دەكات. 
سەهیم گوتیشی "زاگرۆس شوانی مەڕە و لە چیاكانی كوردستان دەژی، هەر لە چیاش خێزان دروست دەكات، دواتر چەند هۆكارێك وا دەكەن بڕیار بدات سەری خۆی هەڵگرێت و بەرەو ئەوروپا كۆچ بكات، بەڵام ژیانی ئەوێ بۆ ئەو زۆر سەخت دەبێت".
هیوا سەڵاح - Rudaw


Monday, September 22, 2014

رێكخراوێك هه‌لی‌ كار بۆ ئه‌وانه‌ ده‌دۆزێته‌وه‌ كه‌ به‌خواستی‌ خۆیان له‌ ده‌ره‌وه‌ ده‌گه‌ڕێنه‌وه‌

ئه‌مڕۆ دووشه‌ممه‌ 22ی‌ ئه‌یلولی‌ 2014، له‌ هۆتێل های‌ كریس له‌ شاری‌ سلێمانی‌، رێكخراوی‌ IOM ی نێوده‌وڵه‌تی‌ بۆ كۆچ له‌ پڕۆژه‌یه‌كیدا به‌ناوی‌ (ماگنێت) بۆ دۆزینه‌وه‌ی‌ هه‌لی‌ كار، له‌گه‌ڵ ژماره‌یه‌ك له‌ كۆمپانیاكانی‌ شاری‌ سلێمانی‌ كۆبۆوه‌ به‌مه‌به‌ستی‌ دۆزینه‌وه‌ی‌ هه‌لی‌ كار بۆ ئه‌و كه‌سانه‌ی‌ له‌وڵاتی‌ به‌ریتانیاوه‌ به‌خواستی‌ خۆیان ده‌گه‌رێنه‌وه‌ هه‌رێمی‌ كوردستان.
 سۆزان كه‌ریم، به‌ر پرسی‌ پڕۆژه‌ی‌ ماگنێت له‌ رێكخراوی‌ IOM ی‌ نێوده‌وڵه‌تی‌ بۆ كۆچ  له‌ لێدوانێكی‌ بۆ خه‌ندان وتی‌: "له‌ رێگه‌ی‌ ئه‌م پڕۆژه‌یه‌مانه‌وه‌ هه‌وڵمانداوه‌ كه‌ له‌ كۆمپانیاكانی‌ هه‌رێمی‌ كوردستان هه‌لی‌ كار بۆ ئه‌و كه‌سانه‌ بدۆزینه‌وه‌ كه‌ به‌خواستی‌ خۆیان ده‌گه‌ڕێنه‌وه‌ بۆ هه‌رێمی‌ كوردستان و ده‌یانه‌وێت كار بكه‌ن.
 وتیشی‌:" تائێستا له‌هه‌ر سێ‌ پازرێزگاكه‌ی‌ هه‌رێم 28 كه‌س له‌ كۆمپانیاكانه‌وه‌ كارمان بۆ دۆزیونه‌ته‌وه‌ و 100 كه‌سیش ناوی‌ خۆیان تۆمار كردوه‌ بۆ دۆزینه‌وه‌ی‌ هه‌لی‌ كار بۆیان".
 سۆزان كه‌ریم، ئه‌وه‌شی‌ خسته‌ڕوو: به‌هۆی‌ ئه‌و قه‌یرانه‌ ئابوورییه‌ی‌ كه‌ له‌هه‌رێمی‌ كوردستاندا هه‌یه‌ و رووبه‌ڕووی‌ خه‌ڵك و پڕۆژه‌كه‌ی‌ ئه‌وانیش بوه‌ته‌وه‌، بۆیه‌ له‌ ئێستادا هه‌لی‌ كار كه‌متره‌.
 باسی‌ له‌وه‌شكرد: "كۆمپانیاكان داوایان لێ‌ كردوین خه‌ڵكی‌ خاوه‌ن ئه‌زمونیان بۆ بنێرین، ئێمه‌ش داوامان لێكردن كه‌خۆشیان خولێكی‌ فێربوونیان بۆ بدۆزنه‌وه‌ بۆ ئه‌وه‌ی‌ به‌باشی‌ فێری‌ كاره‌كانیان ببن".
 IOM  رێكخراوێكی‌ نێوده‌وڵه‌تیه‌ بۆ كۆچ، ئه‌م رێكخراوی‌ له‌ ساڵی‌ 1950دا ده‌مه‌زاره‌وه‌ و له‌ 130 وڵات بنكه‌یان هه‌یه‌ هه‌لی‌ كار بۆ ئه‌و كه‌سانه‌ ده‌ دۆزنه‌وه‌ كه‌ به‌خواستی‌ خۆیان ده‌گه‌ڕێنه‌وه‌ وڵاته‌كانی‌ خۆیان و ده‌یانه‌وێت كاربكه‌ن.
 خه‌ندان- هێڤی‌ خالید

Thursday, September 18, 2014

ده‌ریای‌ ناوه‌ڕاست بوه‌ته‌ دوا وێستگه‌ی‌ ژیانی‌ كۆچبه‌ران

18920141151602_1 وته‌بێژێكی‌ ڕێكخراوی‌ كۆچی‌ نێوده‌وڵه‌تی‌ ڕایگه‌یاند له‌ماوه‌ی‌ چه‌ند ڕۆژی‌ ڕابردوودا نزیكه‌ی‌ 700 كۆچبه‌ر له‌ده‌ریای‌ ناوه‌ڕاستدا خنكاون، به‌وه‌ش ژماره‌ی‌ ئه‌و كۆچبه‌رانه‌ی‌ كه‌له‌ده‌ریای‌ ناوه‌ڕاستدا خنكاون له‌مساڵدا نزیك ده‌بێـته‌وه‌ له‌ سێ‌ هه‌زار كه‌س.
ئه‌و وته‌بێژه‌ به‌ ئاژانسی‌ هه‌واڵی‌ ڕۆیته‌ری‌ راگه‌یاندوه‌ كه‌ به‌وته‌ی‌ ئه‌و كه‌سانه‌ی‌ كه‌له‌و كاره‌ساتانه‌ ڕزگاریان بووه‌، نزیكه‌ی‌ 500 كۆچبه‌ریان له‌ یه‌ك به‌له‌مدا بوون‌و پاش ئه‌وه‌ی‌ سه‌رنشینه‌كان داوای‌ قاچاخچیه‌كانیان ڕه‌تكردۆته‌وه‌ كه‌ به‌له‌مه‌كه‌یان بگۆڕن له‌ ناوه‌ڕاستی‌ ده‌ریاكه‌دا، ڕووبه‌ڕووبوونه‌وه‌ له‌نێوان قاچاخچیه‌كان و كۆچبه‌ره‌كاندا ڕوویداوه‌ و پاشان قاچاخچیه‌كان به‌له‌مه‌كه‌یان نقومكردووه‌. 
به‌پێی‌ زانیاریه‌كانی‌ ئه‌و ووته‌بێژه‌، ئه‌و كۆچبه‌رانه‌ به‌ڕه‌گه‌ز سووری‌‌و میسری‌‌و سۆدانی‌‌و فه‌له‌ستینی‌ بوون‌و له‌پاش ده‌رچوونیان به‌به‌له‌مێك له‌ كه‌ناره‌ ئاویه‌كانی‌ میسر له‌ نزیك وڵاتی‌ ماڵتا‌و له‌پێشگه‌شتنیان به‌ ئه‌وروپا وله‌پاش تێكشكانی‌ به‌له‌مه‌كه‌یان خنكاون. 
له‌لایه‌كی‌ تره‌وه‌، وته‌بێژێكی‌ كۆمیسیۆنی‌ باڵای‌ په‌نابه‌رانی‌ سه‌ر به‌نه‌ته‌وه‌ یه‌كگرتووه‌كان ڕایگه‌یاند كه‌ئه‌وان زانیاریان له‌سه‌ر تێكشكانی‌ ئه‌و به‌له‌مه‌ پێگه‌شتووه‌ به‌ڵام ژماره‌ی‌ قوربانیه‌كان‌و چۆنێتی‌ ڕوودانی‌ كاره‌ساته‌كه‌ی‌ پشتراستنه‌كردۆته‌وه‌ .
ڕایگه‌یاند كه‌ ئه‌و زانیاریانه‌ له‌لایه‌ن ڕزگاربووه‌كانی‌ ڕووداوه‌كه‌وه‌ دراون به‌ ده‌سته‌ڵاتدارانی‌ ماڵتا به‌ڵام وه‌ك وته‌بێژه‌كه‌ ڕایگه‌یاندووه‌ ئه‌وان له‌ هه‌وڵی‌ به‌ده‌ستهێنانی‌ زانیاری‌ ووردن له‌سه‌ر ئه‌و ڕووداوانه‌ و كه‌ خۆیان له‌تێكشكانی‌ پێنج به‌له‌مدا ده‌بینێـته‌وه‌ و لایه‌نی‌ كه‌م 500 كۆچبه‌ری‌ كردۆته‌ قوربانی‌. 
ئه‌وه‌شی‌ نه‌شارده‌وه‌ كه‌ ئه‌و ڕووداوانه‌ كاره‌ساتبارترین ڕووداوی‌ گیانله‌ده‌ستدانی‌ كۆچبه‌رانن كه‌له‌ماوه‌ی‌ كه‌متر له‌ هه‌فته‌یكدا ڕوویانداوه‌. 

سێ‌ هه‌زار په‌نابه‌ر له‌مساڵدا بوونه‌ته‌ قوربانی‌

ڕێكخراوی‌ كۆچی‌ نێوده‌وڵه‌تی‌ ڕایگه‌یاندووه‌ له‌ ماوه‌ی‌ چه‌ند ڕۆژی‌ ڕابردوودا نزیكه‌ی‌ 700 په‌نابه‌ر له‌ ده‌ریای‌ ناوه‌ڕاستدا خنكاون.
 وته‌بێژێك له‌ ڕێكخراوی‌ كۆچی‌ نێوده‌وڵه‌تی‌ به‌ ئاژانسی‌ رۆیته‌رزی‌ راگه‌یاند له‌ چه‌ند رۆژی‌ رابردوودا نزیكه‌ی‌ 700 په‌نابه‌ری‌ نایاسایی له‌ ده‌ریای‌ ناوه‌ڕاستدا خنكاون، به‌وه‌ش ئاماری‌ قوربانییان له‌مساڵدا له‌ سێ‌ هه‌زار كه‌س نزیكده‌بێـته‌وه‌.
 به‌پێی‌ زانیاریه‌كانی‌ ئه‌و وته‌بێژه‌، په‌نابه‌ره‌كان زۆربه‌یان به‌ ڕه‌گه‌ز سووری‌ و میسری‌ و سوودانی‌ و فه‌له‌ستینی‌ بوون، له‌ نزیك ماڵتا به‌له‌مه‌كه‌یان تێكشكاوه‌ و خنكاون.
 ئه‌و وته‌بێژه‌ له‌ زاری‌ ئه‌و كه‌سانه‌ی‌ له‌ رووداوه‌كان ڕزگاریان بووه‌، ئاشكرای ده‌كات: نزیكه‌ی‌ 500 په‌نابه‌ر له‌ یه‌ك به‌له‌مدا بوون و به‌هۆی‌ هاتنه‌ئارای‌ كێشه‌ له‌گه‌ڵ قاچاخچییه‌كانیان ڕووبه‌ڕووبوونه‌وه‌ دروستبووه‌ و قاچاخچیه‌كانیش وه‌ك تۆڵه‌سه‌ندنه‌وه‌ به‌له‌مه‌كه‌یان نوقمكردووه‌، به‌وهۆیه‌شه‌وه‌ سه‌دان په‌نابه‌ری‌ نایاسایی تیاچوون.

Wednesday, September 17, 2014

زیاد لە (700) كەس لە دەریای سپی دا خنكان

ڕێـكخراوی كۆچبەرانی نێودەوڵەتی ئاشكرایكرد، لە پێنج رۆژی رابردوودا زیاد لە (700) كەس لە دوو كەشتیدا لە ئاوی دەریای ناوەراستدا خنكاون، تەواوی ئەو كەسانەش لە وڵاتانی باكوری ئەفریقا و رۆژهەڵاتی ناوەراستەوە ویستوویانە بگەن بە ئەوروپا بۆ داواكردنی مافی پەنابەری.
كریستیان بێرپیۆم، وتەبێژی ڕێـكخراوی كۆچبەرانی نێودەوڵەتی بە ئاژانسی (ڕۆیتەرز)ی وتووە: ئەوانەی لە یەكێـك لەو دوو كەشتیـیە ڕزگاریان بووە دەڵێن، قاچاخچیـیەكان لە ناوەڕاستی دەریاكە زۆریان لێكردوون بچنە نێو كەشتیـیەكی دیكەوە و ئەمانیش ڕەتیانكردۆتەوە و لە ئاكامدا پـێـكدادان لە نێوانیاندا دروسـتبووە و سەر ئەنجام قاچاخچیـیەكان زیانیان بە كەشتیـیەكە گەیاندووە ‌و نوقمی ئاویان كردووە.
ئەوەشی راگەیاندووە: ئەو كەشـتیـیە نزیكەی (500) كەسی لەسەر بووە و زۆربەیان فەڵەسـتینی و میسری و سودانی بوون، كە ویستوویانە بەرەو ئەوروپا بڕۆن.  ئاژانسەكان دەڵێن تەنها (9) كەسیان ڕزگاریان بووە.
بەپـێی هەواڵەكان كەشـتیـیەكە لە (6ی ئەیلول) لە بەندەری دەمیاتی میسرەوە دەرچووە و لە (10 ی ئەیلول) لە بەرامبەر كەنارەكانی ماڵتا تێـكشكاوە.
پاش ئەم ڕووداوە بە چوار ڕۆژ كەشتیـیەكی دیكەی پـڕ لە كۆچبەر، لە نزیك كەنارەكانی لیبیا نوقمی ئاوبوو. ئەو كەشـتیـیەش (250) كەسی تێدابووە و تەنها (26) كەسیان ڕزگاریان بووە.
بە قوربانیانی ئەم دوو ڕووداوەوە، ژمارەی ئەو كۆچبەرە نایاسایـیانەی لە ماوەی ئەمسـاڵدا لەو لە نێو ئاوی دەریای ناوەراستدا گیانیان لە دەسـتداوە دەگاتە نزیكەی (3) هەزار كەس، كە نزیكی هەزار كەسیان ژن و منداڵ بوون.
دڵشاد حەمە
 

Thursday, September 11, 2014

هه‌رێم..18 هه‌زار و 395 كۆمپانیای خۆمالی و دوو هه‌زار و 900 كۆمپانیای بیانی تێدایه‌

images (5)
18 هه‌زار و 395 كۆمپانیای خۆمالی و دوو هه‌زار و 900 كۆمپانیای بیانی له‌ هه‌رێمی كوردستاندا هه‌ن، به‌رێوه‌به‌ری گشتی تۆماركردنی كۆمپانیاكانیش ده‌ڵێت، به‌هۆی ئه‌و باردودۆخه‌ی كه‌ هه‌رێمی گرتۆته‌وه‌ تا ئێستا هیچ كۆمپانیایه‌كی بیانی نه‌كشاوه‌ته‌وه‌.
دلزار ئیسماعیل، به‌ڕێوه‌به‌ری گشتی تۆماركردنی كۆمپانیاكان رایگه‌یاند، به‌ هۆی ئه‌و بارودۆخه‌وه‌ كه‌ هه‌رێمی كوردستانی گرتۆته‌وه‌ تا ئێستا هیچ كۆمپانیایه‌ك نه‌گه‌یشتووه‌ته‌ ئاستی ئیفلاس یا زه‌ره‌ری زۆر، بۆیه‌ به‌ به‌راوه‌رد له‌گه‌ڵ وڵاتانی دیكه‌ هه‌رێم زۆر باشتر بووه‌.

وتیشی" به‌شێوه‌یه‌كی فه‌رمی تائێستا هیچ كۆمپانیایه‌كی بیانی له‌هه‌رێم نه‌كشاوه‌ته‌وه‌، ته‌نها ئه‌وه‌ی به‌رچاوه‌ هه‌ندێك كۆمپانیا كارمه‌ندانی خۆیان كه‌م ده‌كه‌نه‌وه‌".
به‌ڕێوه‌به‌ری گشتی تۆماركردنی كۆمپانیاكان ئاماژه‌ی‌ به‌وه‌شكرد،  ٨٠٠ كۆمپانیا له‌ عێراق كار ده‌كه‌ن و زیاتر له‌سێ هه‌زار كۆمپانیاش هه‌یه‌ له‌ هه‌رێم، ئه‌و رێژه‌ییه‌ی هه‌رێمی كوردستان سێ هێنده‌ی عێراقه‌.
ناوبراو ئه‌وه‌شی‌ خسته‌ ڕوو، له‌ ئێستادا  له‌ هه‌رێمی كوردستان ١٨ هه‌زار و ٣٩٥ كۆمپانیای خۆمالی و دوو هه‌زار و ٩٠٠ كۆمپانیای بیانی تۆمار كراوه‌، هه‌روه‌ها له‌ كۆی٤٠٠ كۆمپانیای نه‌وتی كه‌ له‌ هه‌رێم تۆمار كراون نزیكه‌ ٨٠ كۆمپانیا بیانین.
NRT