Wednesday, March 28, 2012

عێراقییه‌ک به‌ ژماره‌یه‌ک پاسپۆرتى ته‌زویره‌وه‌ ده‌ستگیر کرا

وێنەى دەستگیرکراوەکە
له‌ چوارچێوه‌ى هه‌وڵه‌کانى حکومه‌تى تایلاند بۆ قه‌ده‌غه‌کردنى بازرگانیکردن به‌ په‌ناخوازانه‌وه‌، به‌رپرسێکى پۆلیسى تایلاند ڕایگه‌یاند که‌ که‌سێکى عێراقیان به‌ تۆمه‌تى دروستکردنى پاسپۆرتى ته‌زویر بۆ په‌ناخوازان ده‌ستگیرکردووه‌.
له‌پاش کۆکردنه‌وه‌ى زانیارى رۆژى سێشه‌ممه‌ له‌ هه‌ڵمه‌تێکى پۆلیسى تایلاند بۆ سه‌ر مالێک له‌ بانکۆکى پایته‌ختى ئه‌و وڵاته‌، که‌سێکى به‌ ره‌گه‌ز عێراقیان ده‌ستگیرکرد، له‌گه‌ڵ ژماره‌یه‌ک پاسپۆرتى ته‌زویر که‌ به‌شێکیان پاسپۆرتى ئیماراتى بوون، له‌گه‌ڵ ئامێرێکیش بۆ دروستکردنى ئه‌و پاسپۆرتانه‌. 
ئه‌و به‌رپرسه‌ تایلاندیه‌ رایگه‌یاند: هه‌ریه‌کێک له‌و پاسپۆرتانه‌ بڕى (400) دۆلارى ئه‌مریکى تێچووه‌ و پاشان به‌ نرخێکى زیاتر ده‌فرۆشرێت به‌ په‌ناخوازان، که‌ له‌پاش هاتنیان بۆ تایلاند ئه‌و پاسپۆرته‌ ته‌زویرانه‌ ده‌کڕن که‌ ئیماراتین، به‌مه‌ش که‌متر ده‌بنه‌ جێگه‌ى گومانى ئه‌وه‌ى که‌ ئه‌وان به‌مه‌به‌ستى کۆچکردن بۆ ئوسترالیا هاتونه‌ته‌ ئه‌و ووڵاته‌.  
ئه‌و گومانلێکراوه‌ عێراقیه‌ که‌ ناوى (ره‌یهان عوره‌یبى ئه‌لفه‌تلاوی)یه‌ و ته‌مه‌نى (39) ساڵه‌. ئه‌گه‌ر تۆمه‌تى ته‌زویرکردنى ئه‌و پاسپۆرتانه‌ و قاچاخچێتى به‌ په‌ناخوازانه‌وه‌ به‌سه‌ردا ساغ بێته‌وه‌، له‌ خراپترین سزادا نزیکه‌ى (10) ساڵ زیندانیکردنى له‌ به‌ندیخانه‌دا به‌سه‌ردا ده‌سه‌پێنرێت. 
 ئه‌و به‌رپرسه‌ ئاماژه‌ى به‌وه‌شکرد که‌ ژنه‌که‌ى ئه‌و گومانلێکراوه‌ عێراقیه‌ش که‌ به‌ڕه‌گه‌ز تایله‌ندیه‌ به‌ مه‌به‌ستى وه‌رگرتنى زانیارى ده‌ستگیرکراوه‌. 
جێی ئاماژه‌یه‌ زۆربه‌ى ئه‌و په‌ناخوازانه‌ى که‌ روو له‌ وڵاتانى وه‌ک تایله‌ند و مالیزیا و ئه‌نده‌نوسیا ده‌که‌ن، به‌ هیوان بگه‌نه‌ ئوسترالیا و له‌وێ داواى مافى په‌نابه‌رێتى بکه‌ن، ئه‌مه‌ش حکومه‌تى ئوسترالیایان ناچار کردووه‌ له‌ چوارچێوه‌ى رێکه‌وتنێکى ئه‌منیدا له‌گه‌ڵ ئه‌و وڵاتانه‌دا، هه‌وڵه‌کانیان چڕ بکه‌نه‌وه‌ بۆ ده‌ستگیرکردنى قاچاخچیه‌کان و ریگرتن له‌و په‌ناخوازانه‌ش که‌ ده‌یانه‌وێت به‌ شێوه‌یه‌کى نایاسایى کۆچ بکه‌ن بۆ ئه‌و وڵاته‌. چونکه‌ له‌ژێر به‌ڵێنه‌ چه‌وته‌کانى ئه‌واندا ساڵانه‌ ده‌یان په‌ناخواز له‌ کاتى کۆچکردنیان به‌ شێوه‌یه‌کى نایاسایى و به‌ به‌له‌مى پچوکى نه‌شیاو گیان له‌ده‌ست ده‌ده‌ن.    

سه‌رچاوه‌ : واشنتن پۆست 



هه‌ژار ته‌ها 
چه‌ترپریس 

Sunday, March 25, 2012

300 هه‌زار كه‌س داوای په‌نابه‌رێتیان كردووه‌ له‌ ئه‌وروپا 15هه‌زاریان عێراقیه‌

عێراق له‌ ڕیزبه‌ندی‌ چواره‌می‌ ئه‌و وولاَتانه‌دایه‌‌
به‌پێی‌ دواهه‌مین ڕاپۆرتی‌ كۆمیسیۆنی‌ ئه‌وروپا ، 301 هه‌زار په‌ناخواز داوای‌ مافی‌ په‌نابه‌رێتیان له‌ وولاَتانی‌ یه‌كێتی‌ ئه‌وروپا كردووه‌ له‌ ساڵی‌ 2011دا و زیادبوونێك به‌ 42 هه‌زار په‌ناخواز به‌به‌راورد له‌ ساڵی‌ 2010 دا به‌دی‌ ده‌كرێت.
ڕاپۆرته‌كه‌ی‌ كۆمیسیۆنی‌ ئه‌وروپا كه‌ دوێنێ‌( هه‌ینی‌- 23 ئازار) له‌سه‌ر ماڵپه‌ری‌ فه‌رمی‌ یۆرۆستات كه‌ تایبه‌ته‌ به‌ ئاماره‌ فه‌رمیه‌كانی‌ یه‌كێتی‌ ئه‌وروپا هۆشداری‌ ده‌داته‌ وولاَتانی‌ یه‌كێتی‌ ئه‌وروپا به‌وه‌ی‌ زیادبونێك له‌ ڕێژه‌ی‌ په‌ناخوازاندا به‌دی‌ ده‌كرێـت و له‌ سه‌دا نه‌وه‌تی‌ ئه‌و په‌ناخوازانه‌ش كه‌ له‌ ساڵی‌ 2011 تۆماركراون داواكاری‌ نوێ‌ بوون له‌ سه‌دا ده‌ش په‌ناخوازی‌ سالاَنی‌ ڕابردوو بوون و تێهه‌ڵچوونه‌وه‌یان بۆ كه‌یسه‌كانیان كردووه‌.
سه‌باره‌ت به‌ ڕیزبه‌ندی‌ ئه‌و وولاَتانه‌ی‌ كه‌ زۆرترین په‌ناخوازیان داوای‌ مافی‌ په‌نابه‌رێتی‌ له‌ وولاَتانی‌ یه‌كێتی‌ ئه‌وروپا كردووه‌ وولاَتانی‌ ( ئه‌فغانستان ، ڕووسیا، پاكستان ، عێراق ) ن.
له‌ ڕاپۆرته‌كه‌دا هاتووه‌ كه‌ عێراق به‌ 15,200 په‌ناخواز كه‌ نزیكه‌ی‌ له‌ سه‌دا پێنچی‌ سه‌رجه‌م په‌ناخوازان پێك ده‌هێنێت له‌ ڕیزبه‌ندی‌ چواره‌می‌ ئه‌و وولاَتانه‌دایه‌ كه‌ زۆرترین داواكاریان بۆ وه‌رگرتنی‌ مافی‌ په‌نابه‌رێتی‌ پێشكه‌ش كردووه‌.
سه‌باره‌ت به‌ وولاَتانی‌ وه‌رگریش ، فه‌ره‌نسا و ئه‌ڵمانیا و ئیتالیا له‌ ڕیزبه‌ندی‌ پێشه‌وه‌ی‌ ئه‌و وولاَتانه‌ن كه‌ زۆرترین  داواكاری‌ مافی‌ وه‌رگرتنی‌ په‌نابه‌رێتیان لێپێشكه‌ش كراوه‌ و به‌ریتانیاش له‌ ڕیزبه‌ندی‌ شه‌شه‌م دایه‌.
سه‌باره‌ت به‌ ڕێژه‌ی‌ وه‌رگرتن و ڕه‌تكردنه‌وه‌ی‌ مافی‌ په‌نابه‌رێتی‌ ئه‌و په‌ناخوازانه‌ش كه‌ داواكاریان پێشكه‌ش كردووه‌ ، ڕاپۆرته‌كه‌ ئاماژه‌ بۆ ئه‌وه‌ ده‌كات كه‌ 177,900 په‌ناخواز كه‌ زیاتره‌ له‌ ڕێژه‌ی‌ له‌ سه‌دا په‌نجای‌ سه‌رجه‌م په‌ناخوازان كه‌یسه‌كانیان ڕه‌تكراوه‌ته‌وه‌

سه‌رچاوه‌ : ماڵپه‌ری‌ فه‌رمی‌ ئاژانسی‌ ئاماره‌كانی‌ یه‌كێتی‌ ئه‌وروپا كه‌ ناسراوه‌ به‌
Eurostat

هه‌ژار ته‌ها 
كۆمه‌ڵ نیوز 

Thursday, March 22, 2012

له‌ سێ رۆژدا 82 هه‌زار گه‌شتیار هاتونه‌ت هه‌رێمى كوردستان


چاوه‌رِێ ده‌كرێت ئه‌و ژماره‌یش زۆر زیادبكات 
له‌ماوه‌ى سێ رِۆژدا زیاتر له‌ 82 هه‌زار گه‌شتیار سه‌ردانى شاره‌ جیاجیاكانى هه‌رێمى كوردستانیان كردووه‌و وته‌بێژى ده‌سته‌ گه‌شت و گوزارى هه‌رێمیش رایده‌گه‌ێنێت ژماره‌ى گه‌شتیاران له‌زیادبوندایه‌و ژماره‌كه‌ش له‌چاو ساڵى رِابردودا نزیكه‌ى دووهێنده‌ بووه‌ته‌وه‌.
نادر رۆستى وته‌بێژى ده‌سته‌ى گه‌شتو گوزارى حكومه‌تى هه‌رێمى كوردستان له‌ لێدوانێكى تایبه‌تدا به‌كوردیوى راگه‌یاند: له‌رۆژانى 18 و 19, 20 ئه‌م مانگه‌دا 82 هه‌زار گه‌شتیار سه‌ردانى هه‌رێمى كوردستانیان كردوه‌و ئه‌و ژماره‌یه‌ش له‌ زیادبوندایه‌ .
وته‌بێژى ده‌سته‌ى گه‌شتو گوزارى حكومه‌تى هه‌رێمى كوردستان وتیشى " گه‌شتیاره‌كان كوردانى باكو رۆژ هه‌لاَت و رۆژئاوان و ژماره‌یه‌ك عه‌ره‌بى عێراقیش به‌هۆى چه‌ژنى نه‌ورۆزه‌وه‌ هاتونه‌ته‌ شاره‌ جیاجیاكانى هه‌رێمى كوردستان و له‌و ژماره‌یه‌ش 31 هه‌زارگه‌شتیار سه‌ردانى شارى سلێمانیان كردووه‌ 26 هه‌زاریشیان سه‌ردانى شارى هه‌ولێریانكردووه‌ 13 هه‌زارى تریشیان سه‌ردانى پارێزگاى دهۆكیان كردووه‌ ئه‌وانی تریشیان سه‌ردانى شارۆچكه‌كانى ترى كوردستانیانكردووه‌"
نادر رۆستى ئاماژه‌ی به‌وه‌شدا " ئه‌م ژماره‌یه‌ له‌چاو ساڵى رابردوودا زۆر زیادى كردووه‌ له‌ساڵى رابردوودا ته‌نها 57 هه‌زارگه‌شتیار له‌ئاهه‌نگه‌كانى نه‌ورۆزدا سه‌ردانى هه‌رێمى كوردستانیانكردبوو، چاوه‌رِێش ده‌كرێت ئه‌و ژماره‌یش زۆر زیادبكات و هێشتا ئامارى رۆژانى 21 و22 شمان پێنه‌گه‌یشتوه‌ "

كوردیو

Tuesday, March 20, 2012

كچه‌ كوردێك له‌سوید گه‌ڕایه‌وه‌و له‌ رانیه‌ “كوژرا


له‌‌میانه‌ى مانه‌وه‌شیدا له‌سوید هاوسه‌رگیریی و په‌یوه‌ندى له‌گه‌ڵ هه‌موو گه‌نجێك ره‌تده‌كرده‌وه‌


هه‌رگیز ئه‌وه‌ به‌ بیرى “س، م”ى ته‌مه‌ن (21) ساڵدا نه‌ده‌هات كه‌ دواى ئه‌وه‌ى ده‌گه‌ڕێته‌وه‌ بۆ شوێنى له‌دایكبوونى خۆى (هه‌رێمى كوردستان) جارێكى تر سوید نابینێته‌وه‌.
(س) كه‌ له‌ساڵى 2008 گه‌ڕایه‌وه‌ بۆ ناوچه‌كه‌ى خۆى “شارى رانیه‌” نه‌یزانى ئه‌وه‌ رێگه‌ى مه‌رگى یه‌كجاریه‌تى، ئه‌و دواى ئه‌وه‌ى باوكى له‌ڕێگه‌ى براكانیه‌وه‌ پێى راگه‌یاند سه‌ردانى دایكه‌ نه‌خۆشه‌كه‌ى بكات، بڕیاردا به‌ره‌و رانیه‌ بگه‌ڕێته‌وه‌.
رۆژنامه‌ى ” Aftonbladet ” سویدى كه‌ رۆژنامه‌یه‌كى به‌ر بڵاوه‌ له‌و وڵاته‌، دواى پێنج ساڵ دۆسیه‌ى گیان له‌ده‌ستدانى “س” ى هه‌ڵداوه‌ته‌وه‌و ورده‌كاریییه‌كه‌ى ئاشكراكردووه‌.
رۆژنامه‌كه‌ نوسیویه‌تى “س” پێش چوونى بۆ سوید ره‌تیكردبوویه‌وه‌ كه‌ هاوسه‌رگیریی له‌گه‌ڵ هه‌ر گه‌نجێكدا بكات له‌عێراق، سووربوو له‌سه‌ر ره‌تكردنه‌وه‌ى هه‌ر داواكارییه‌كى هاوسه‌رگیریی له‌و باره‌یه‌وه‌، به‌ڵام ئه‌و به‌ ژیانى باجى ئه‌وه‌یدا.
رۆژنامه‌كه‌ باس له‌وه‌ده‌كات “س” له‌‌میانه‌ى مانه‌وه‌شیدا له‌سوید هاوسه‌رگیریی و په‌یوه‌ندى له‌گه‌ڵ هه‌موو گه‌نجێك ره‌تده‌كرده‌وه‌.
به‌پێى هه‌واڵى رۆژنامه‌كه‌، سه‌ره‌ڕاى ئه‌وه‌ى خێزانى “س” بانگه‌شه‌ى ئه‌وه‌یانكردووه‌ كه‌ ئه‌وان كچه‌كه‌یان نه‌كوشتووه‌و به‌ مردنى ئاسایی و به‌ “نه‌خۆشى سه‌ره‌تان” مردووه‌، به‌ڵام سه‌رۆكى ده‌سته‌ى “”GAPF” ى سویدى ئه‌وه‌ ره‌تده‌كاته‌وه‌ و رایگه‌یاندووه‌ به‌ڵگه‌ى به‌هێزیان له‌به‌ده‌ستدایه‌ كه‌ ده‌یسه‌لمێنێت (س) روبه‌ڕووى پاكتاوكردن بووه‌ته‌وه‌ له‌لایه‌ن باوكى یه‌وه‌ و به‌ خێرایی نێژراوه‌، ته‌نانه‌ت رێوڕه‌سمیشیان بۆ سازنه‌كردووه‌ و رێگه‌ به‌ هیچ یه‌كێك له‌ ئه‌ندامانى خێزانه‌كه‌ى و كه‌سه‌ نزیكه‌كانى نه‌دراوه‌ كه‌ چاویان به‌ جه‌سته‌كه‌ى بكه‌وێت.
رۆژنامه‌كه‌ نوسیویه‌تى كه‌ چاویان به‌ ژماره‌یه‌ك له‌ هاوڕێكانى (س) كه‌وتووه‌ له‌ سوید، ئه‌وان جه‌ختیان له‌وه‌كردووه‌ته‌وه‌ كه‌ په‌یوه‌ندیان كردووه‌ به‌ رێكخراوێكى سویدى پارێزه‌رى ژنان له‌ توندوتیژى له‌ عێراق و داوایانكردووه‌ هاوكارى (س) بكه‌ن چونكه‌ هه‌ڕه‌شه‌ى كوشتنى له‌سه‌ره‌، ناشتوانێت جارێكى تر بگه‌ڕێته‌وه‌ سوید له‌به‌رئه‌وه‌ى باوكى ده‌ستى به‌سه‌ر “پاسپۆرته‌كه‌یدا” گرتووه‌.
هاوڕێكانى ده‌ڵێن كه‌ هیچ رێكخراوێكى سویدى و پۆلیس هیچ شتێكیان بۆ (س) نه‌كردووه‌، ئه‌وه‌ش جێگه‌ى مشتومڕو ره‌خنه‌ى زۆره‌.
رۆژنامه‌كه‌ باسى له‌وه‌شكردووه‌ كه‌ ره‌خنه‌ى توند له‌و باره‌یه‌وه‌ له‌ كونسوڵگه‌ریی سوید له‌ هه‌ولێر ده‌گیرێت، به‌هۆى ئه‌وه‌ى (س) داوایكردووه‌ كه‌ “پاسپۆرتێكى” نوێى پێ بده‌ن بۆ ئه‌وه‌ى بتوانێت پێى بگه‌ڕێته‌وه‌ سوید، به‌ڵام كونسوڵگه‌رى سوید ئه‌وه‌یان ره‌تكردووه‌ته‌وه‌.
هاوڕێكانى (س) ئه‌وه‌ش ده‌خه‌نه‌ڕوو كه‌ ئه‌و كه‌سێكى خۆشه‌ویست بووه‌و حه‌زى به‌ یارمه‌تیدانى خه‌ڵكانى دیكه‌ هه‌بووه‌، هه‌رچه‌نده‌ باوكى به‌ڵێنیدا بوو لێى ببورێت له‌سه‌ر هه‌ڵهاتنى له‌كوردستان، به‌ڵام به‌ڵێنه‌كه‌ى نه‌برده‌ سه‌ر.
پۆلیسى سویدى ده‌ڵێت لێكۆڵینه‌وه‌ى له‌و باره‌یه‌وه‌ ده‌ستپێكردووه‌، به‌ڵام هیچ كه‌سێكى به‌تۆمه‌تى تێوه‌گلان له‌و تاوانه‌ ده‌ستگیرنه‌كردووه‌، ناشزانرێت لێكۆڵینه‌وه‌ له‌و باره‌یه‌وه‌ به‌رده‌وام ده‌بێت یان داده‌خرێت به‌هۆى ئه‌وه‌ى ئه‌و تاوانه‌ له‌ده‌ره‌وه‌ى خاكى سوید ئه‌نجامدراوه‌.

هاوڵاتى

قاچاخچیه‌كی‌ عێراقی‌ راده‌ستی‌ ئوسترالیا ده‌كرێته‌وه‌

وێنه‌ی‌ مه‌یسه‌م كامیل له‌ یه‌كێك له‌ دانیشتنه‌كانی‌ دادگادا
له‌ دوایه‌مین قۆناغی‌ دادگاییكردنی‌ كه‌سێكی‌ به‌ڕه‌گه‌ز عێراقیدا‌ به‌ ناوی‌ مه‌یسه‌م كامیل، به‌ تۆمه‌تی‌ بازرگانیكردن به‌ په‌ناخوازانه‌وه،‌ كه‌ له‌مانگی‌ ته‌مموزی‌ رابردو له‌لایه‌ن پۆلیسی‌ نیوزله‌نداوه‌ ده‌ستگیر كرا، ئه‌مڕۆ دادگای‌ نیوزله‌ندا بڕیاری‌ ڕاده‌ستكردنیی‌ به‌ دادگای‌ ئوسترالیا ده‌ركرد. 
بەپێی لێکۆڵینەوەکانی دادگای‌ نیوزله‌ندا، مه‌یسه‌م كامیل یه‌كێك بوه‌ له‌ رێكخه‌رانی‌ ئه‌و به‌له‌مه‌ی‌ كه‌ له‌ پاش تێكشكانی‌، زیاتر له‌ 350 په‌ناخوازی‌ كرده‌ قوربانی‌ له‌ نزیك ئاوه‌كانی‌ ئوسترالیا له‌ ساڵی‌ 2001 دا، هەروەک ئه‌مڕۆش بڕیاری‌ راده‌ستكردنی‌ ئه‌و كه‌سه‌ی‌ به‌ دادگای‌ ئوسترالیا ده‌ركرد، بەوپێیەی پێشتر له‌ لایه‌ن دادگای‌ ئه‌و وڵاتەوە داواكراو بوە.
به‌پێی‌ یاساكانی‌ ئوسترالیا، هه‌ر كه‌سێك تۆمه‌تی‌ قاچاخچێتی‌ به‌ په‌ناخوازانه‌وه‌ بۆ ئوسترالیا به‌سه‌ردا ساغ بێته‌وه،‌ له‌ خراپترین سزای‌ یاسایدا نزیكه‌ی‌ 20 ساڵ به‌ندكردنی‌ له‌ زینداندا به‌سه‌ردا ده‌سه‌پێنرێت. 
پێشتر دو كه‌سی‌ تر به‌تۆمه‌تی‌ تێوه‌گلان له‌هه‌مان روداو‌ زیندانی‌ كراون، یه‌كێكیان به‌ ره‌گه‌ز میسری‌ بوه‌و له‌ پاش راده‌ستكردنه‌وه‌ی‌ بۆ وڵاتەکەی خۆی‌، دادگای‌ میسر سزای‌ 5 ساڵ به‌ندكردنی‌ له‌ زینداندا به‌سه‌ردا سه‌پاند. 
له‌ئه‌گه‌ری‌ ساغبونه‌وه‌ی‌ تۆمه‌تی‌ قاچاغچێتكردن به‌ په‌ناخوازانه‌وه‌ به‌سه‌ریدا، مه‌یسه‌م ده‌بێته‌ دوه‌م قاچاخچی‌ به‌ ره‌گه‌ز عێراقی‌ كه‌ له‌لایه‌ن دادگای‌ ئوسترالیاوه‌ له‌ ماوه‌ی‌ چه‌ند ساڵی‌ رابردودا سزا درابێت، پێشتریش هادی‌ ئه‌حمه‌دی‌، سزای‌ حه‌وت ساڵ و نیوی‌ به‌سه‌ردا سه‌پێنرا به‌ تۆمه‌تی‌ ناردنی‌ زیاتر له‌ 300 په‌ناخواز به‌ شێوه‌یه‌كی‌ نایاسایی‌ و له‌ رێگه‌ی‌ كه‌ناره‌ ئاوییه‌كانه‌وه‌ بۆ ئوسترالیا. 
روداوی‌ تێكشكانی‌ ئه‌و به‌له‌مه‌ كه ‌له‌ ئۆكتۆبه‌ری‌ ساڵی‌ 2001 دا رویدا، یه‌كێكه‌ له‌ گه‌وره‌ترین كاره‌ساته‌ مرۆییه‌كان له‌ دوای‌ جه‌نگی‌ جیهانی‌ دوه‌مه‌وه‌ له‌ ئوسترالیا روییدا بێت، تیایدا زیاتر له‌ 350 په‌ناخوازی‌ كرده‌ قوربانی‌ كه‌ 145 كه‌سیان منداڵ بون. 
 
  (سبەی)

Sunday, March 18, 2012

كۆچی پێچەوانە بۆ كوردستان لە زیادبووندایە


گەڕانەوە بۆ هەرێمى کوردستان
له درێژایی سەدەی رابردوو، كورد لە كۆچێكی هەندێجار هێواش و هەندێجاریش خێرادا بووە بەرەو ئەوروپا و وڵاتانی رۆژئاوا، بەڵام چەند ساڵێكە لە هەرێمی كوردستان كە تازە خەریكە جموجوڵێكی ئابووری لەسایەی سەقامگرییەكی رێژەییدا بەخۆوە دەبینێ، وردە وردە سەرەتاكانی كۆچێكی پێچەوانە بەدیدەكرێ.
ئەو دیمەنە، رەنگە زیاتر لە شارێكی وەك هەولێر بەدیبكرێ كە لەم ساڵانەی دواییدا گۆڕانێكی بەرچاوی بەسەردا هاتووە و بەخێرایی لە گەشەكردن و گەورەبووندایە. زۆر لە كوڕان و كچانی كورد كە زۆربەیان لە وڵاتانی رۆژئاوا گەورەبوون و هەندێكیشیان هەر لەوێ لەدایكبوون، ئێستا لە هەولێر گیرساونەتەوەو هەندێكیان دەڵێن كە چیدی ناگەڕێنەوە ئەو وڵاتانەی لێوەی هاتوونەتەوە، هەندێكیش دەڵێن بۆ كاركردن هاتوونەتەوەو لەوانەیە بڕۆنەوە.
سارا نوری، كچێكی گەنجە و لە شاری لەندەن گەورەبووە، لە قاوەخانەی كۆستاریكا كە یەكێكە لەو شوێنە كەمانەی كوردە گەڕاوەكان كاتی خۆیانی تێدا بەسەر دەبەن، خەریكی خواردنەوەی قاوەیە.
سارا تەمەنی سێ ساڵان بووە كە خێزانەكەی لە بەغداوە چوونەتە بەریتانیا و ئیدی هەر لەوێ ژیاوە، دوای رووخانی رژێمی سەددام حوسێن، ئەوان گەڕانەوە كوردستان، لە ئەیلولی 2009 پاش تەواوكردنی ماستەرەكەی لە بواری یاسا، بووە فەرمانبەر لە ئەنجوومەنی وەزیران لە شاری هەولێر.
سارا دەڵێت “حەزمدەكرد بزانم ئایا دەتوانم بە چ شێوەیەك یارمەتی كوردستان بدەم بۆ ئەوەی پێشبكەوێت لەدوای رووخاندنی سەددام”.
بۆ زۆربەی ئەوانەی لەم ساڵانەدا گەڕاونەتەوە، پێشكەوتنی هەولێر هۆكارێكی سەرەكی بووە لە بڕیاری مانەوەیان و هەلی كاریش لەم وڵاتەی كە وڵاتی یەكەمی خۆیانە تاڕاددەیەكی باشە.
هەولێر لەگەڵ ئەوەی بەشێوەیەكی خێرا لە پێشكەوتندایە، بەڵام هێشتاش زۆر دوورە لەو ستانداردەی ژیان كە ئەوان لە رۆژئاوا پێی راهاتوون، كەواتە بۆچی رۆژئاوا بەجێدێڵن و دەگەڕێنەوە ئێرە؟
ئارەزوو جاف، لە لەندەن لەدایكبووە و لە هۆڵەندا گەورەبووە، هاوینی ساڵی رابردوو گەڕاوەتەوە هەولێر. ئارەزوو بۆ دۆزینەوەی كار روویكردووەتە كوردستان، كاتێكیش زانیویەتی زۆر كەسی دیكە لە رۆژئاواوە گەڕاونەتەوە، زیاتر دڵگەرم بووە بۆ ئەوەی لێرە بمێنێتەوە. ئارەزوو دەڵێ لەگەڵ ئەوەی ئەوان توانیویانە بەپێی توانای خۆیان یارمەتی وڵاتەكەیان بدەن، بەڵام لە بەرامبەریشدا وڵاتەكەیان هەلی كاری بۆ دۆزیونەتەوە، هەرچەندە ژیانی كوردستانیش وەك هەموو شوێنێكی دیكەی دنیا لایەنی پۆزەتیڤ و نێگەتیڤی هەیە.
عومەر محەممەد، كە گەڕاوەیەكی دیكەی تاراوگەیە و لە ئینگلتەرا لەدایكبووە و هەر لەوێ گەورەبووە، دەڵێت لەگەڵ كاركردن و هەستكردن بەوەی كە دەبێ یارمەتی وڵاتەكەی بدات، حەزیش دەكات لەنێو خەڵكەكەی خۆی بژی و چیدی هەست بەوە نەكات كە كەسێكی بیانییە.
زۆربەی ئەوانەی بەمجۆرە گەڕاونەتەوە، دەڵێن كە هەستدەكەن لە وڵاتی خۆیان دەژین سەرەڕای ئەوەی لێرە نەژیاون، بەڵام بەهۆی ئەوەی لە دەرەوەی وڵات مامەڵەیان لەگەڵ كورد كردووە، ئەوە یارمەتیداون بۆئەوەی بەئاسانی لەگەڵ شێوازی ژیانی كوردستان بگونجێن.
بۆ دانیشتووانی نوێی ئەم شارە دێرینە، ئەو جێگۆڕكێیە رووبەڕووی چەندین گرفتیشی كردوونەتەوە.
هەندێ لە كچەكان دەڵێن كە ناتوانن بەتەواوی خۆیان تێكەڵی خەڵكی شارەكە بكەن و حەزدەكەن لەگەڵ خزم و كەسوكاریان مامەڵە بكەن، یانیش لەگەڵ ئەو كوردانەی كە وەك خۆیان لە تاراوگە گەڕاونەتەوە.
ئارەزوو بەبێ دوودڵی دەڵێت “حەزم لێرەیەو حەزم لە ئەوروپا نییە، بەڵام هەندێجاریش هەستدەكەی ژیانی ئێرە قورسە”.
كاتێك ئارەزوو بۆ یەكەمجار گەڕایەوە كوردستان، لەوبڕوایەدا نەبوو بتوانێ بەیەكجاری بمێنێتەوە، بەڵام كاتێك زانی كە زۆر كەسی وەك ئەو لەم شارە دەژین، بەرامبەر بیرۆكەی مانەوەی یەكجاری زیاتر كراوەتەوە.
عومەر دەڵێت كە توانیویەتی بەباشی تێكەڵاوی خەڵكی شارەكە ببێت، ئەو لەو بڕوایەدایە كە بۆ پیاو ئاسانترە خۆی لەگەڵ كەشوهەوا و شێوازی ژیانی ئێرە بگونجێنێ.
بۆ ساراش، كێشە گەورەكە لە جیاوازییەكانی خزمەتگوزاری تەندروستی و ژێرخان و پەروەردەدایە و هێشتا لەگەڵی رانەهاتووە.

لە ماڵپەرى (سەربەست) وەرگیراوە

Thursday, March 15, 2012

30 هەزار پەنابەری كورد و عێراق هەڕەشەی دیپۆرتكردنەوەیان لێدەكرێ

مانگی رابردوو 50 عيراقى دیپۆرتكرانەوە
دوای ئەوەی بە دەردەسەریەكی زۆر گەیشتە ئەوروپا، لەوێش ژیانێكی سەخت و پڕ لە دڵەڕاوكێی لە كەمپێكی سوێد بەسەربرد، ئینجاش هیوا دوای 6 ساڵ لەلایەن پۆلیسی سوێدەوە بەزۆر دیپۆرتكرایەوە.
هیوا ئیسماعیل، 34ساڵ، خەڵكی سلێمانییە و رۆژی 26/2/2012 لەگەڵ 49 پەنابەری دیكە بەزۆر نێردرایەوە عێراق. ئەو ترسێكی زۆری هەبوو لە ناردنەوە، چونكە دەبووایە لە بەغدا دابەزێت، لەبەرئەوەی فڕۆكەخانەكانی هەرێمی كوردستان هیچ پەناخوازێكی بەزۆر دیپۆرتكراو وەرناگرن.
“ خواردنەكەمان زۆر پیسبوو،بەڵام لەناچاری دەمانخوارد”هیوا، كە لەگەڵ 6 پەناخوازی دیكە لە ژوورێكی 5 بە 4 مەتری كەمپەكەی سوێد دەمانەوە گوتی “وڵاتانی ئەوروپایی هەر باسی دیموكراسی و مافی مرۆڤ دەكەن، بەڵام لەڕاستیدا لە وڵاتی خۆیان هیچ حیسابێك بۆ مرۆڤ ناكەن، لەنێو كەمپ زۆر بەخراپی مامەڵەیان لەگەڵ دەكردین، رێگەی هیچ كارێكمان پێنەدەدرا، ئەو خواردنەی پێشماندەدرا زۆر پیسبوو، بەڵام لەناچاری دەمانخوارد”.

دوای رووخاندنی رژێمی سەدام حوسێن، هەڵمەتی دیپۆرتكردنەوەی بەنابەرانی عێراق، بەتایبەتی ئەوانەی خەڵكی هەرێمی كوردستانن لە وڵاتانی ئەوروپا دەستی پێكردووە. تائێستا زیاتر لە 5 هەزار پەنابەر بەزۆر رەوانەی عێراق كراونەتەوە، كە زۆربەیان كوردن.
دوایین گرووپی ناردنەوەی پەناخوازان، رۆژی 26/2/2012 كە ژمارەیان 50 پەناخوازی كورد بوو لە هەردوو وڵاتی سوید و نەرویج لە فڕۆكەخانەی بەغدا دانران، هەروەها 30 هەزار پەنابەری دیكەش لەژێر هەڕەشەی دیپۆرتكردنەوەدان.
ئامانج عەبدوڵڵا، سكرتێری لقی كوردستانی فیدراسیۆنی سەرتاسەری پەنابەرانی عێراق بە (رووداو)ی راگەیاند، كە هەڵمەتێكی دیكەی دیپۆرتكردنەوەی پەناخوازان لە وڵاتانی ئەوروپا دەستیپێكردووە، ئەو گرووپە 50 كەسەش بەشێكبوون لەو هەڵمەتە تازەیە.
فیدراسیۆنی‌ سەرتاسەری‌ پەنابەرانی عێراق، كە كەسەكانی زیاتر سەر بەپارتی كۆمۆنیستی كرێكاری عێراقن، لەساڵی‌ 1992 دامەزراوەو بارەگای سەرەكی لە لەندەنە، ئێستا لە 8 وڵاتی ئەوروپی نووسینگە و نوێنەرایەتی هەیە و چالاكی دژی بەزۆر ناردنەوەی پەنابەران ئەنجامدەدات.
لەساڵی 2005 دیپۆرتكردنەوەی بەزۆری پەناخوازان دەستیپێكردووە. ئامانج عەبدوڵڵا، دەڵێ “دوور لە بنەماكانی مافی مرۆڤ پەنابەران دیپۆرتدەكرێنەوەو، زۆرجار ئەو پەنابەرانە لەكاتی دیپۆرتكردنەوەیان لێشیاندەدرێت”.
تائێستا 15 پەنابەری كورد لەنێو كەمپەكاندا خۆیان كوشتووەئامانج، باس لەوە دەكات كە بەریتانیا پشكی شێری بەردەكەوێت لە بەزۆر ناردنەوەی پەناخوازان لەنێو سەرجەم وڵاتانی ئەوروپادا، كە لەساڵی 2005ەوە تاوەكو ئێستا زیاتر لە 5 هەزار پەناخوازی رەوانەی عێراق كردووەتەوە.
بەهۆی خراپی رەوشی نێو كەمپەكانی پەنابەری لە وڵاتانی ئەووروپا، تائێستا دەیان رووداو و هەوڵی خۆكوشتن هەبووە لەو ساڵانەی دواییدا. بەپێی ئاماری فیدراسیۆنی سەرتاسەری پەنابەرانی عێراق تائێستا 15 پەنابەری كورد لەنێو كەمپەكانی وڵاتە جیاجیاكانی ئەوروپا خۆیان كوشتووە، ژمارەیەكی زیاتریش هەوڵی خۆكوشتنیان داوە.
ئامانج عەبدوڵڵا، دەڵێ “جگە لەوانەی كە لەنێو كەمپەكانی ئەوروپا خۆیان كوشتووە، 9 كەسی دیكەش دوای گەڕانەوەیان لە هەرێمی كوردستان خۆیان كوشتووەو 2 هەوڵی خۆكوشتنیش لە مانگی رابردوو هەبوو”.
پەنابەران بۆ ئەوەی دیپۆرتنەكرێنەوە، بە جۆرەها شێواز ناڕەزاییان دەربڕیوە، هەندێك لەو پەناخوازانە بۆئەوەی دیپۆرتنەكرێنەوە، دەمی خۆیان دووریوەتەوە، بەڵام ئەوەش دادی نەداون و هەر دیپۆرتكراونەتەوە.
دەشتی‌ جەمال، سكرتێری فیدراسیۆنی سەرتاسەری پەنابەرانی عێراق گوتی “ژمارەیەكی زۆر لە پەنابەران، لە كەمپەكانی وڵاتانی ئەوروپا ژیانێكی كولەمەرگی بەسەردەبەن و كەس بەهانایانەوە ناچێت، لە ساڵی 2005 تاوەكو ئێستا 5600 پەنابەری عێراقی دیپۆرتكراونەتەوە، جگە لەوەش ژمارەیەك پەنابەر لەنێو زیندانەكانی یۆنان‌، ئێران، توركیا، سوریا بەدەستبەسەركراوی دەناڵێنن”.
جگە لە وڵاتانی ئەوروپا ساڵانە ژمارەیەكی زۆر پەنابەری عێراقی بەتایبەت كورد بەشێوەی نایاسایی روو لە ئوسترالیا دەكەن، لەساڵی 2007 وە تاوەكو مانگی نیسانی رابردوو 1305 پەنابەری كورد بەشێوەیەكی نایاسایی روویان لە ئوسترالیا كردووە، ئەوەش ئوسترالیای هاندا كە زیاتر سنوورەكانی قایم بكات.
ساڵی رابردوو حكومەتی ئوسترالی رێككەوتننامەیەكی لەگەڵ مالیزیا مۆركرد، بۆ رێگرتن لە گەڕانەوەی ئەو پەنابەرانەی بەشێوەی نایاسایی چووبوونە نێو خاكی ئوسترالیا لەگەڕانەوە بۆ ئوسترالیا لەڕێگەی مالیزیاوە، چاوەڕواندەكرێت زۆربەی ئەو پەنابەرانە دیپۆرتبكرێنەوە. وەزارەتی ناوخۆی ئوسترالیا رایگەیاندووە، هەر پەنابەرێك بەشێوەی نایاسایی بێتە ئوسترالیا، دەستگیردەكرێ و رەوانەی مالیزیا دەكرێتەوە.
بەپێی ئامارێكی فەرمی حكومەتی ئوسترالیا زیاتر لە 5000 پەناخوازی كورد لە كەمپەكانی ئوسترالیا لە چاوەڕوانی وەرگرتنی مافی پەنابەرێتیدا ژیانێكی سەخت بەسەردەبەن، بەڵام بەهۆی بڕیاری حكومەتی ئوسترالی ئەو چاوەڕوانییەیان زۆر سەختتربووە.
 بارزان محەممەد
رووداو -هەولێر



Tuesday, March 13, 2012

گەشت بکە، بخوێنە، بەشێوەیەکى یاسایى بمێنەرەوە لە ئوسترالیا


تایبەت: کۆچ بۆ ئوسترالیا

بەشێوەیەکى یاسایى گەشت بکە
زۆرجار گەنجانى ئێمە لەشوێنى ئەوەى ڕێگاى یاسایى هەڵبژێرن بۆ کۆچ کردن بۆ دەرەوەى وڵات لەڕێگەى نایاساییەوە هەوڵەکانیان دەخەنەگەڕ. ئەمەش وایکردووە کە گەنجانى ئێمە ڕووبەڕووى چەندین مەترسى و سەختى ببنەوەو زۆرجار ژیانیان کەوتۆتە مەترسییەوەو تەنانەت هەندێجار لەناوچوون لە ڕێگاى کۆچ کردندا.
لێرەوە ئێمە پێشنیار دەکەین کە گەنجانى ئێمە بەر لە کۆچ کردن پلانێکى تۆکمەیان هەبێت و ژیان و داهاتووى خۆیان باشتر لەبەرچاوبگرن، چەندین دەرفەتى گەورە چاوەڕێیان دەکات ئەگەر بەشێوەیەکى پلان بۆ ڕێژراو ئەو کارە بکەن. لێرەوە و لەڕێگەى ئەم بلۆگەوە هەوڵدەدەین بەشێوەیەکى بەردەوام زانیارى گرنگ و شێوازى یاسایى کۆچکردن بڵاو بکەینەوە. وا لەخوارەوەدا چەند لینکێکمان داناوە کە خوێندکارو قوتابیانى کورد لە ناوخۆ و لە ئوسترالیا ئەتوانن درێژە بەخوێندنیان بدەن لەبوارەکانى بەکالۆریۆس و ماستەرو دکتۆرا و زیاتریش. ئەمەش لینکەکانن

2012 International Undergraduate Scholarships at University of Melbourne، Australia
http://cms.unimelb.edu.au/studentservices/scholarships/ugrad/international/iugrad#process

2012 Postdoctoral Research Fellowship in Astronomy at Macquarie University، Australia
https://mq.taleo.net/careersection/internal/jobsearch.ftl?lang=en

2012 Indigenous Scholarships and Awards for University of Melbourne Students، Australia
http://benews.unimelb.edu.au/bcomnews/2012/02/2012-indigenous-scholarships-and-awards/

John Dillon Memorial Fellowship in Agricultural Research Management، Agricultural Policy and Extension Technologies at ACIAR، Australia
http://aciar.gov.au/node/2077

2012 Melbourne Law School Scholarships، Australia
http://www.law.unimelb.edu.au/index.cfm?objectid=652CA510-CFC0-11E0-B5650050568D0140

NSW Rural Allied Health Scholarships for Undergraduates and Graduates، Australia 2012
http://www.health.nsw.gov.au/rural/alliedhealth/scholarships.asp

وەرگیراوە لە:

Friday, March 9, 2012

ره‌گه‌زی‌ مێیه‌ زۆرترین قوربانی ده‌ده‌ن له‌پێناو وه‌رگرتنی‌ مافی‌ په‌نابه‌ریدا

گومانی‌ تێدانیه‌ له‌ ئێستادا كه‌ كوردانی‌ په‌ناخواز بونه‌ته‌ قوربانی‌ قه‌یرانێكی‌ مرۆیی،‌ كه‌ جێگه‌ی‌ نیگه‌رانی‌ سه‌رجه‌م لایه‌نه‌ داكۆكیكار و به‌شێك له‌ وڵاتانی‌ وه‌رگری‌ ئه‌و په‌ناخوازانه‌شه‌، به‌ڵام ئه‌گه‌ر په‌ناخوازێكی‌ كوردی‌ به‌ڕه‌گه‌ز نێرینه‌ جارێك له‌ قه‌یراندا بێت ئه‌وا ئه‌و قه‌یرانه‌ چه‌ند جاره‌یه‌ بۆ په‌ناخوازێكی‌ به‌ڕه‌گه‌ز میێنه‌.
یاسا نێوده‌وڵه‌تیه‌كان هیچ جیاوازیه‌كی‌ ئه‌وتۆ ناكات له‌نێوان په‌ناخوازاندا له‌سه‌ر بنه‌مای‌ ره‌گه‌ ز
یاساكانی‌ وه‌رگرتنی‌ مافی‌ په‌نابه‌رێتی‌ "ره‌گه‌ز" به‌هه‌ند وه‌رناگرن:
ئه‌وه‌ی‌ جێگه‌ی‌ نیگه‌رانی‌ رێكخراوه‌كانی‌ داكۆیكردنن له‌ مافه‌كانی‌ ره‌گه‌زی‌ مێینه‌ ئه‌وه‌یه،‌ كه‌ یاسا نێوده‌وڵه‌تیه‌كان هیچ جیاوازیه‌كی‌ ئه‌وتۆ ناكات له‌نێوان په‌ناخوازاندا له‌سه‌ر بنه‌مای‌ ره‌گه‌ز و ژن بون به‌هه‌ند وه‌رناگیرێت. ئه‌و پێناسه‌ بنچینه‌ییه‌ی‌ كه‌ له‌ سه‌رجه‌م وڵاتانی‌ وه‌رگردا كاری‌ پێده‌كرێت بۆ هه‌ڵسه‌نگاندنی‌ كه‌یسی‌ په‌ناخوازان ده‌ڵێت: "په‌ناخواز ده‌بێت به‌ په‌نابه‌ر (واته‌ مافی‌ په‌نابه‌رێتی‌ وه‌رده‌گرێت) ئه‌گه‌ر ئه‌و كه‌سه‌ له‌ژێر مه‌ترسیه‌كی‌ راسته‌قینه‌ و سه‌لمێنراوی‌ سته‌ملێكردندا بێت له‌ وڵاتی‌ خۆی،‌ به‌هۆی‌ باكگراونده‌ ئیتنیكیه‌كه‌یه‌وه‌، یان بیروباوه‌ی‌ سیاسیه‌وه‌ یان به‌هۆی‌ ئه‌ندام بونی‌ له‌ رێكخراوێكی‌ كۆمه‌ڵایه‌تی‌ دیاریكراودا، یان به‌هۆی‌ بیروباوه‌ ئایینه‌كه‌یه‌وه‌". له‌م پێناسه‌یه‌دا ده‌رده‌كه‌وێت كه‌ بنه‌مای‌ بنچینه‌یی وه‌رگرتنی‌ مافی‌ په‌نابه‌رێتی‌ به‌هیچ شێوه‌یه‌ك ره‌گه‌ز وه‌ك خودی‌ خۆی‌ به‌هه‌ند وه‌رناگرێت، ئه‌وه‌ی‌ به‌هه‌ند وه‌رگیراوه‌ سه‌لماندنی‌ ئه‌و سته‌م و ترسه‌یه‌ كه‌ ئه‌و مرۆڤه‌ی‌ ناچاركردوه‌ وڵاتی‌ خۆی‌ به‌جێبهێلێت و له‌كاتی‌ گه‌ڕانه‌وه‌ی‌ بۆ وڵاتی‌ خۆی‌ مافی‌ ژیان و بونی‌ ده‌كه‌وێته‌ مه‌ترسیه‌وه‌
ئاماره‌كان چی‌ ده‌ڵێن؟
له‌به‌ر رۆشنایی ئه‌و ئامارانه‌ی‌ كه‌ لایه‌نه‌ فه‌رمیه‌كانی‌ به‌ریتانیا بڵاویانكردۆته‌وه‌، له‌سه‌دا حه‌فتای‌ ئه‌و ژنانه‌ی‌ كه‌ داوای‌ مافی‌ په‌نابه‌رێتیان له‌و وڵاته‌ كردوه‌ ره‌فزكراون له‌ ساڵی‌ رابردودا و له‌ نیوه‌ زیاتری‌ ئه‌و په‌ناخوازانه‌ش، كه‌ له‌ كه‌مپه‌كانی‌ وڵاته‌ یه‌گرتوه‌كانی‌ ئه‌مه‌ریكادان ژنان و منداڵانن و له‌ كۆی‌ زیاتر له‌و 5000 په‌ناخوازه‌ش، كه‌ له‌ كه‌مپه‌كانی‌ وڵاتی‌ ئوسترالیادان نزیكه‌ی‌ 1000 په‌ناخوازی‌ به‌ ره‌گه‌ز مێینه‌ و منداڵه‌كانییانن كه‌ به‌هه‌مان شێوه‌ی‌ پیاوان له‌ چاوه‌ڕوانی‌ مافی‌ وه‌رگرتنی‌ په‌نابه‌ریدا بۆ كاتێكی‌ نادیار به‌ند كراون.
ژنان ده‌نێردرێن بۆ وه‌رگرتنی‌ مافی‌ په‌نابه‌رێتی
كه‌یسی‌ په‌ناخوازانی‌ ژنانی‌ كورد:
كێشه‌ی‌ خێزانی‌ كورد كه‌ له‌ دایكێك و چوار منداڵ كه‌ سیانیان به‌ ره‌گه‌ز مێینه‌ بون له‌ وڵاتی‌ به‌ریتانیا، كه‌ له‌ ساڵانی‌ 2002دا بۆ ماوه‌ی‌ زیاتر له‌ 13 مانگ له‌ كه‌مپێكی‌ ئه‌و وڵاته‌دا به‌ندكران كه‌یسێكی‌ به‌ڵگه‌ نه‌ویسته‌ كه‌ وڵاتانی‌ وه‌رگر كێشه‌ی‌ په‌ناخوازان له‌سه‌ر بنه‌مای‌ ره‌گه‌ز لێكناده‌نه‌وه‌ و بگره‌ له‌م كه‌یسه‌دا ئه‌م خێزانه‌ نه‌ك ره‌گه‌زیان به‌هه‌ند وه‌رنه‌گیرا، به‌ڵكو ژماره‌یه‌كی‌ پێوانه‌ییان تۆمار كرد بۆ به‌ندكردن له‌ كه‌مپێكی‌ ئه‌و وڵاته‌دا، كه‌ ئه‌مه‌ش حكومه‌تی‌ ئه‌و وڵاته‌ی‌ ناچاركرد له‌ پاش ده‌ ساڵ قه‌ره‌بویه‌كی‌ مادی‌ ئه‌و خێزانه‌ بكاته‌وه‌ كه‌ به‌ وته‌ی‌ ئه‌ندامانی‌ ئه‌و خێزانه‌ تائێستاش گاریگه‌ریه‌ چراپه‌كانی‌ مانه‌وه‌یان له‌و كه‌مپه‌دا له‌ڕوی‌ جه‌سته‌یی و ده‌رونیه‌وه‌ له‌سه‌ر ماوه‌.

ژنان ده‌نێردرێن بۆ وه‌رگرتنی‌ مافی‌ په‌نابه‌رێتی:
به‌هۆی‌ بێئاگایی په‌ناخوازان له‌ یاساكانی‌ كۆچ و وه‌رگرتنی‌ مافی‌ په‌نابه‌رێتی‌ و زیاتر توندكردنی‌ رێوشوێنه‌كانی‌ وه‌رگرتنی‌ مافی‌ په‌نابه‌رێتی‌، به‌شێك له‌ په‌ناخوازان له‌ سه‌ره‌تادا ئه‌ندامانی‌ مێینه‌ی‌ خێزانه‌كانیان ده‌نێرن به‌ هیوای‌ وه‌رگرتنی‌ مافی‌ په‌نابه‌رێتی‌ و ئاسانكاری‌ بۆ ئه‌وانی‌ تر له‌ پاش ئه‌وه‌ی‌ ئه‌وان مافی‌ په‌نابه‌رێتیان وه‌رگرت، به‌شێك په‌ناخوازانی‌ كوردیش به‌رده‌رنین له‌و دیده‌ هه‌ڵه‌یه‌ی‌ كه‌ پێیوایه‌ ئه‌م كاره‌ رۆڵی‌ ده‌بێت بۆ وه‌رگرتنی‌ مافی‌ په‌نابه‌رێتی‌. ژنێكی‌ په‌ناخوازی‌ كورد كه‌ كێشه‌كه‌ی‌ بوه‌ جێگه‌ی‌ مشتومڕی‌ ناوه‌نده‌ په‌یوه‌ندیداره‌كانی‌ ئوسترالیا له‌ ساڵی‌ رابردودا، به‌ منداڵێكی‌ پێنج ساڵانه‌وه‌ له‌ پێش مێرده‌كه‌ی‌ به‌ ساڵێك به‌ به‌له‌مێك له‌گه‌ڵ ژماره‌یه‌ك په‌ناخوازی‌ تردا خۆی‌ گه‌یانده‌ ئوسترالیا و حكومه‌تی‌ ئه‌و وڵاته‌ش به‌بێ‌ به‌هه‌ند وه‌رگرتنی‌ ره‌گه‌زه‌كه‌یی‌ و لێكدانه‌وه‌ی‌ كێشه‌كه‌ی‌ كه‌ له‌وانه‌یه‌ پێویستیان به‌ جۆرێك له‌ مامه‌ڵه‌ی‌ تر بوایه‌ ده‌ستبه‌جێ‌ گواسترانه‌وه‌ بۆ كه‌مپێكی‌ په‌ناخوازانی‌ ئه‌و وڵاته‌.
مونیره‌ عوسمان
له‌ رۆژی‌ هه‌شتی‌ مارس دا كه‌ بۆنه‌یه‌كی‌ جیهانیه‌ بۆ دوپاتكردنه‌وه‌ی‌ خه‌باتی‌ ژنان بۆ گه‌شتن به‌ مافه‌كانیان، مونیره‌ عوسمان، رۆژنامه‌نوس و چالاك له‌ بواری‌ كۆمه‌ڵگای‌ مه‌ده‌نی‌، سه‌ره‌ڕای‌ ره‌خنه‌گرتنی‌ له‌ میدیا كوردیه‌كان به‌وه‌ی‌ كه‌ نه‌یانتوانیوه‌ به‌شێوه‌یه‌كی‌ گشتگرتر روماڵكردنی‌ كێشه‌كانی‌ ژنان چ له‌ تاراوگه‌و چ له‌ ناوخۆی‌ كوردستان بكه‌نه‌ وه‌سیله‌یه‌كی‌ فشار بۆ به‌هه‌ند وه‌رگرتنی‌ كێشه‌كانی ژنان وتی:‌ "ته‌نها ئه‌وانه‌ی‌ كه‌سوكاریان له‌ وڵاتانی‌ جیهانه‌ و په‌نابه‌رن ده‌زانن كه‌ ژنانی‌ كورد چه‌ند كێشه‌یان هه‌یه‌ له‌و وڵاتانه‌ " وتیشی:‌ "ده‌بێت ژنان له‌و راستیه‌ تێبگه‌ن كه‌ ئه‌وان به‌كارده‌هێنرێن له‌ لایه‌ن مێرده‌كانیانه‌وه‌، كاتێك ناچار ده‌كرێت بۆ كۆچكردنیان بۆ وڵاتان به‌ مه‌به‌ستی‌ وه‌رگرتنی‌ مافی‌ په‌نابه‌رێتى 
به‌هار مونزیر 
به‌هار مونزیر، كه‌ خاوه‌نی‌ ئه‌زمونی‌ كاركردنه‌ له‌ بواری‌ كۆمه‌ڵگای‌ مه‌ده‌نی‌ له‌ تاراوگه‌ و له‌ ئێستاشدا داكۆكیكاره‌ له‌ بواری‌ مافه‌كانی‌ ژنان له‌ كوردستان ده‌ڵێت:‌ "هه‌رچه‌نده‌ وڵاتانی‌ وه‌رگر به‌ ئاگان له‌ خراپی‌ ره‌وشی‌ ژنانی‌ كورد، به‌ڵام زۆرجار پیاوان ویستویانه‌ ببن به‌ خاوه‌ن كه‌یس له‌ رێگه‌ی‌ ژنه‌كانیانه‌وه‌، له‌ راستیدا وه‌رگرتنی‌ مافی‌ په‌نابه‌رێتی‌ هیچ په‌یوه‌ندیه‌كی‌ به‌ ره‌گه‌زه‌وه‌ نیه‌ و په‌یوه‌ندی‌ به‌وه‌وه‌ هه‌یه‌ كه‌ ئه‌و په‌ناخوازه‌ تاچه‌ند ژیانی‌ له‌ مه‌ترسیدا بوه‌ له‌ وڵاتی‌ خۆی‌".
كنێر عه‌بدوڵا‌ 
هاوڕا له‌گه‌ڵ چالاكانی‌ تری‌ بواری‌ ژنان، كنێر عه‌بدوڵا‌، سه‌رنوسه‌ری‌ گۆڤاری‌ ته‌وار و ئه‌ندامی‌ ئه‌نجومه‌نی‌ پارێزگای‌ سلێمانی‌ پێیوایه‌: "ئه‌و پیاوانه‌ی‌ ژنه‌كانیان پێش خۆیان ده‌نێرن بۆ وڵاتانی‌ خۆرئاوا به‌ مه‌به‌ستی‌ وه‌رگرتنی‌ مافی‌ په‌نابه‌رێتی‌ كه‌وتونه‌ته‌ هه‌ڵه‌یه‌كی‌ گه‌وره‌وه،‌ چونكه‌ ئه‌و بۆچونه‌ عه‌قڵێتێكی‌ پیاوسالاری‌ له‌ پشته‌وه‌یه‌ كه‌ ئه‌ویش ئه‌وه‌یه‌ ژنان لاوازن له‌ كاتێكدا بێئاگان له‌وه‌ی‌ له‌و وڵاتانه‌ هیچ جیاوازیه‌ك ناكرێت له‌سه‌ر بنه‌مای‌ ره‌گه‌ز. به‌ دیوێكی‌ تریشدا ئه‌و جۆره‌ پیاوانه‌ له‌ بیركردنه‌وه‌یه‌كی‌ ئیزدیواجیدان چۆن پیاوێك عه‌قلیه‌تێكی‌ پیاوسالاری‌ هه‌بێت رێخۆشكه‌ر ده‌بێت بۆ ئه‌وه‌ی‌ ئه‌و ژنه‌ بێباكانه‌ بنێرێت بۆ ده‌ره‌وه‌ی‌ وڵات، به‌ بڕوای‌ من ئه‌مه‌ قۆستنه‌وه‌ی‌ به‌رژه‌وه‌ندیه‌كانی‌ پیاوانه‌وه‌ له‌سه‌ر حسابی‌ ژنان و به‌ تایبه‌ت كاتێك ئه‌و ژنه‌ نه‌خوێنده‌وار بێت و وا تێبگه‌یه‌نرێت كه‌ ئه‌و كاره‌ له‌ به‌رژه‌وه‌ندی‌ هه‌مویانه‌. ئه‌مه‌ش ده‌بێته‌ پێشێلكاری‌ و شێواندنی‌ پرۆسه‌ مرۆیه‌كان".
وەرگیراوە لە (سبەى)
ئاماده‌كردنی‌: هه‌ژار ته‌ها

Wednesday, March 7, 2012

ڕاپەرین، خوێندنەوەیەکى تر بۆکوردبوون و کۆچکردن


پەیجى کۆچى کوردان

هەر هاوڵاتییەکى ئێمە کوردستان وەکو ماڵێکى خۆى ببینێت


لەم چەند ڕۆژانەدا یادى ڕاپەڕین دەکەینەوە لە سەرجەم شارە جیاوازەکانى هەرێمى کوردستان، کە لە (5)ى ئازار لە شارى ڕانیەوە کە دەروازەى ڕاپەڕینە دەست پێدەکات، تاوەکو سەرجەم شارەکانى تر بە کەرکوکیشەوە دەگرێتەوە.
بێگومان لەم ڕۆژانەدا چەندین بابەتى جیاواز و ئاهەنگ و چالاکى جۆراوجۆر بەبۆنەى یادى ڕاپەڕینەوە سازدەکرێت، ئەوەى دەمەوێت لێرەدا ئاماژەى پێبدەم ماناکانى کورد بوون و ئەگەرەکانى کۆچکردنە لە یادکردنەوەیەکى لەم شێوەیەدا.
ڕاپەڕین، دەبێت ئەوەندەى تر ئینتیماى کوردبوونمان بەهێزبکاتەوە، کوردبوون بەو مانایەى ئێمە کوردستان وەکو ماڵێکى خۆمان سەیربکەین نەک ئەوەى تەنها خاکێک و نیشتمانێک. ئەوەى گرنگە هەر هاوڵاتییەکى ئێمە کوردستان وەکو ماڵێکى خۆى ببینێت. 
ڕاپەڕین، هەستى ئینتمابوونى بۆ نیشتمان، کارکردن بۆپێکەوەبوون، هاوسۆزى بۆیەکتر، کارکردن بەجیددى تێدا زیندوو کردینەوە.
لەو بڕوایەدام لە یادى ڕِاپەڕیندا ئەم ئینتیماو جۆرەمان لەکار زۆر پێویستە.
لەهەمانکاتدا، حەزدەکەم ڕووبکەمە گەنجان و هاوڵاتیانى ئێمە کە لەدەرەوەى وڵات. گەنجانى ئێمە پێویست دەکات لە دوو ڕووەوە ئەم یادە بکەنەوە. هەندێک لەوان بیرلەوە بکەنەوە کە بەرەو نیشتمان بگەڕێنەوەو دەستى کارو ئیشییان لەم وڵاتەدا بخەنەگەڕو خزمەتى وڵاتەکەمان بکەن. 
یاخود گەنجان و هاوڵاتیانى ئێمە هەوڵبدەن لەڕێگەى دروست کردنى گروپى کارى هاوبەش و ولانانى جیاوازییەکانەوەو خزمەتکردن بەکارى نەتەوەیى بەردەوامى بدەن بەم هەستە نیشتمان پەروەرییانە.
لەکۆتاییدا هیوادارین دەزگا بەرپرسەکانى ئەم هەرێمەو هاوڵاتیانى کوردیش لەدەرەوە تەنها یادێکى ڕووکەشییانەى ئەم ڕ،وداوە گرنگە نەکەنەوە، بەڵکو بەشێوەیەکى کلتورى و مەعریفى خوێندنەوەى جیددى بۆ بکەن.
هەربەردەوامبن لەسەر پاراستنى ئایدیاکان و بنەڕەتەکانى نەتەوایەتى و گرنگیدان بە ناسنامەى نیشتمانى بوونمان لە هەرکوێیەکى ئەم دونیایەبن.
هیوادارم کۆمێنت و تێبینییەکانى ئێوەش ببینم.

Friday, March 2, 2012

پەناخوازێکى کورد گڵۆپێکى کارەبایى قووت دەدات


پەناخوازان کە بەشێوەیەکى نایاسایى دەگەنە ئەو ووڵاتە بەند دةکرێن 


لە ڕووداوێکى سەیرداو لە دژى سیاسەتى کۆچى ئوسترالیا ، پەناخوازێکى کورد لە کەمپى داروینى باکورى ئوسترالیا گڵۆپێکى کارەبایى قوت دەدات.
بەپێى هەواڵێکى ئاژانسى (ئەى بى سى نیوز) ، ئەو پەناخوازە بەهۆى زۆرى مانەوەى لە کەمپەکەدا و وەڵامنەدانەوەى کەیسەکەى ئەو کارەى ئەنجامداوە و پەناخوازێکى تریش کە لە شوێنى ڕووداوەکە بووە بەهۆى ترسناکى ڕووداوەکەوە بوراوەتەوە.
بەرپرسێکى بەرێوبەرایەتى کۆچ و ڕەگەزنامەى ئەو ووڵاتەش بەبێ ئەوەى بچێتە ناو ووردەکارى چۆنێتى ڕووداوەکەوە ڕایگەیاند کە حاڵەتێکى لەو جۆرە ڕوویداوە و پەناخوازەکە لەپاش ڕەوانەکردنى بۆ نەخۆشخانەو چارەسەرکردنى گەڕێنراوەتەوە بۆ کەمپەکە.
شایانى باسە بەهۆى ئەو سیاسەتەى کە حکومەتى ئوسترالیا پیادەى دەکات لە بەرامبەر ئەو پەناخوازانەى کە بەشێوەیەکى نایاسایى و زۆرجار لە ڕێگەى بەلەمى بچوکى ڕاوە ماسیەوە خۆیان دەگەیەننە ئەو ووڵاتە و دەبێت بۆماوەیەکى دیارى نەکراو کە زۆرجار لە دوو ساڵ تێدەپەرَێت لە کەمپەکانى ئەو ووڵاتەدا بمێننەوە و ڕێگەیان پێنادرێت بچنە دەرەوەى کەمپەکان ، زۆرجار پەناخوازان ناچار دەکات کە پەنابەرنەبەر خۆئازاردان و نانەوەى ئاژاوەو پشێوى لەو کەمپانەدا.
بەپێى ئامارە فەرمیەکان ، ژمارەى پەناخوازانى کورد بە گشتى و کوردانى فەیلى بە تایبەتى کە بەشێوەیەکى نایاسایى و بە بەلەم دەگەنە ئوسترالیا ڕوو لە زیاد بوون بووە لەماوەى چەند ساڵى ڕابردوودا و لە ساڵى 2009 دا تەنها 138 پەناخواز بوون و لە ساڵى 2010 دا ئەو ژمارەیە بەرزبۆتەوە بۆ 822 کورد و  تەنها لە سێ مانگى ساڵى ڕابردوودا 341 پەناخواز بوون و لە ئێستاشدا دەیان پەناخوازى کورد و 275  عێراقى لەو کەمپانەدا لە چاوەڕوانى وەرگرتنى مافى پەنابەرێتیدان
هەر سەبارەت بەو ڕووداوە ، ئاژانسى ناوبراو ئاماژەى بەوە کردووە کە پێدەچێت ئەو پەناخوازە کوردە یەکێک بێت لەو سێ پەناخوازە کوردە فەیلیەى کە بەم دوایانە دەمى خۆیان دووریەوە.
خراپى ڕەوشى پەناخوازان کە لە ئێستادا بە گشتى بە 5000 پەناخواز مەزەندە دەکرێت لە کەمپەکانى ئەو ووڵاتە ڕێکخراوى لێبوردنى نێودەوڵەتى ناچار کرد بە شێوەیەکى مەیدانى سەردانى کەمپەکانى ئوسترالیا بکەن و لە ڕاپۆرتێکدا داواى دەستبەجێ داخستنى ژمارەیەک لە کەمپەکانى ئەو ووڵاتەیان کرد و داوایان لە حکومەتى ئەو ووڵاتە کرد کە پاپەند بێت بە ڕێکەوتنامە نێودەوڵەتیەکانى پاراستنى مافەکانى مرۆڤ و کەمکردنەوەى وادەى مانەوەى پەناخوازان لە کەمپەکاندا.
لە وەڵامى ڕەخنەکانى ڕێکخراوە جیهانیەکان سەبارەت بە ڕەوشى کەمپەکانى ووڵاتەکەى ، بەڕێوبەرایەتى کۆچى ئوسترالیا ڕایگەیاند کە بەردەوامە لە باشترکردنى ڕەوشى پەناخوازان لە کەمپەکاندا بەڵام مانەوەى ئەو کەمپانە بە پێویست وەسف دەکات و مەبەست لێیان ئازاردانى پەناخوازان نیە و لەبەر ڕۆشنایى یاساکانى کۆچ بۆ ئوسترالیا دامەزراون و بەوجۆرەش دەبێت پەناخوازان کە بەشێوەیەکى نایاسایى دەگەنە ئەو ووڵاتە بەند بکرێن تا ئەو کاتەى مافى پەنابەرێتیان یەکلایى دەکرێتەوە.

خۆرنیوز
ئامادەکردنى : هەژار تەها

Thursday, March 1, 2012

چالاكوانێك له‌ چاوه‌ڕوانی‌ مافی‌ په‌نابه‌رێتیدا له‌ئوستورالیا گیانی‌ له‌ده‌ستدا

هه‌ژار ته‌ها  و کۆشان

وێنه‌ی‌ چه‌ند په‌ناخوازێك له‌كاتی‌ مانگرتنیان له‌سه‌ر سه‌قفی‌ كه‌مپێكی‌ ئوستورالیا


داكۆكیكارێكی‌ په‌ناخوازان ڕاگه‌یاند دوێنێ‌ په‌ناخوازێكی‌ به‌ڕه‌گه‌ز ئێرانی‌ كه‌ نزیكه‌ی‌ ساڵ و نیوێكه‌ له‌ كه‌مپێكی‌ په‌ناخوازاندا له‌ ئوسترالیا له‌ چاوه‌ڕوانی‌ وه‌رگرتنی‌ مافی‌ په‌نابه‌رێتیدا بووه‌ گیانی له‌ ده‌ستدا. 
ئه‌و داكۆكیكاره‌ به‌بێ‌ ئه‌وه‌ی‌ ناوی‌ ئه‌و په‌ناخوازه‌ ئاشكرا بكات وتی‌ “ئه‌و په‌ناخوازه‌ چالاكه‌وانێكی‌ سیاسی‌ بووه‌ و سه‌ر به‌ به‌ڕه‌وتی‌ ئۆپۆزیسیۆنی‌ ئێران بووه‌ و پێشتر له‌ پێش كۆچكردنی‌ بۆ ئوسترالیا له‌لایه‌ن ڕژێمی‌ ئێرانه‌وه‌ به‌ندكراوه‌  به‌ تۆمه‌تی‌ به‌شداریكردنی‌ له‌ خۆپیشاندانه‌كانی‌ ساڵی‌ 2009ی‌ ئێران و براكه‌شی‌ له‌لایه‌ن ڕژێمی‌ ئێرانه‌وه‌ له‌ سێداره‌ دراوه‌ “. 
هه‌رچه‌نده‌ لێكۆڵینه‌وه‌ سه‌ره‌تایه‌كان ئه‌وه‌ ده‌رده‌خه‌ن كه‌ به‌هۆی‌ ئازاری‌ سنگه‌وه‌ گیانی‌ له‌ده‌ست داوه‌ به‌ڵام به‌ وته‌ی‌ محه‌مه‌د سادقپور ئه‌ندامی‌ (ڕیكخراوی‌ ئوسترالی‌ بۆ پاڵپشتی‌ دیموكراسی‌ له‌ ئێران) هه‌فته‌ی‌ ڕابردوو ئه‌و په‌ناخوازه‌ی‌ بینیوه‌ و له‌ ڕووی‌ ده‌روونیه‌وه‌ بارودۆخی‌ ناجێگیربووه‌ و لایه‌نی‌ به‌رپرسی‌ ئه‌و وڵاته‌شیان له‌ كێشه‌ ده‌روونیه‌كانی‌ ئه‌و په‌ناخوازه‌ ئاگاداركردۆته‌وه‌. 
هه‌ر سه‌باره‌ت به‌ هۆكاری‌ مردنی‌ ئه‌و په‌ناخوازه‌ ڕێكخراوی‌ SPAی‌ ئوسترالی‌ تایبه‌ت به‌ هۆشداری‌ ده‌رباره‌ی‌ خۆكوشتن داوای‌ له‌ حكومه‌تی‌ ئوسترالیا كرد كه‌ لیژنه‌یه‌كی‌ لێكۆڵینه‌وه‌ بۆ كه‌یسی‌ مردنی‌ ئه‌و په‌ناخوازه‌ بكرێت چونكه‌ ئه‌مه‌ پێنجه‌مین ڕووداوی‌ گیان له‌ده‌ستدانی‌ په‌ناخوازانه‌ له‌ ماوه‌ی‌ 18 مانگی‌ ڕابردوودا له‌ كه‌مپه‌كانی‌ ئه‌و وڵاته‌دا كه‌ چه‌ند حاڵه‌تێكیان خۆكوشتن بووه‌ له‌ دژی‌ سیاسه‌تی‌ كۆچی‌ ئه‌و وڵاته‌..
ئەم ڕووداوە بوویە هۆى ئەوەى کە بەرپرسانى ئوسترالى نیگەران بن، تەنانەت موحەمەد سادیقپور، ئەندامى ئوسترالیانى پشتیوان لە دیموکراسى ڕایگەیاند کە حکومەتى ئێرانى ئەو هاوڵاتییەى نەکوشت، بەڵکو حکومەتەکەى ئێمە بوویە هۆى ئەو کوشتنە. هەروەها ئاماژەى بەوەدا کە هەفتەى ڕابردوو من ئەوم بینیووەو ڕایگەیاندووە کە لە بارێکى زۆر سەختدایە و وتویەتى نیگەرانە دەربارەى خێزان و مناڵەکانى، بۆیەشە کۆمەڵگاى ئێرانى نامەى تایبەتییان ڕەوانە کردووە بۆ بەرپرسانى بەندیخانەکانى ئوسترالیا بۆئەوەى پشتیوانى لێبکەن و بەئاسانى ڕزگارى ببێت.
لەلایەکى ترەوە ئەمنستى ئینتەرناشناڵ (رێکخراوى لێبوردنى نێودەوڵەتى) نیگەرانى خۆى دەردەبڕێت لەهەندێ لە بەندیخانەکانى گیراوەکانى ئوسترالیا. لە ڕاپۆرتێکدا ئەو ڕێکخراوە ڕایدەگەیەنێت کە زیندانییەکانى پەنابەرەکان هەست و نەستییان بەتەواوى وێران دەکات. ئەمەش بەهۆى ئەوەى خزمەتگوزارییەکان لەناویاندا زۆر کۆن و تەواو خراپ و شوێنى بچووکن.
وتەبێژى ئەمنستى دکتۆر گراهام تۆم دەڵێت کە هەندێک لە بەندیخانە و شوێنى مانەوەى پەنابەران وەکو پێویست نین بۆمانەوەى ماوە درێژى پەنابەران.
ئەمنستى ئەوەى خستۆتەڕوو کە پێویستە تەنها ماوەى (30) ڕۆژ ماوەى مانەوەى ئەوانەبێت کە داواى مافى پەنابەرى دەکەن.
به‌پێی‌ دواهه‌مین ئاماری‌ فه‌رمیش نزیكه‌ی‌ 5000 په‌ناخواز كه‌زۆربه‌یان به‌ڕه‌گه‌ز ئه‌فغانی‌ و ئێرانی‌ و عێراقی‌ و كوردن له‌ كه‌مپه‌ زۆره‌ملێیه‌كانی‌ ئه‌و وولاَته‌دا له‌چاوه‌ڕوانی‌ وه‌رگرتنی‌ مافی‌ په‌نابه‌رێتیدان. 
وته‌بێژێك به‌ناوی‌ به‌ڕێوبه‌رایه‌تی‌ كۆچی‌ ئوسترالیاوه‌ وتی‌ به‌زووترین كات په‌یوه‌ندی‌ ده‌كرێت به‌ كه‌سوكاری‌ ئه‌و په‌ناخوازه‌وه‌ و لێكۆلینه‌وه‌ش ده‌كرێت بۆ ده‌رخستنی‌ چۆنێتی‌ و هۆكاری‌ مردنه‌كه‌ی.

سه‌رچاوه‌: ئاژانسه‌كان

بۆ ئەم ڕاپۆرتە سوود لە هەواڵێکى (هاوڵاتى)یش وەرگیراوە