Friday, March 20, 2015

له‌ سێ‌ مانگی‌ ڕابوردوودا 1000 په‌نابه‌ر خنكاون

له‌ سه‌ره‌تای‌ ئه‌مساڵه‌وه‌ زیاتر له‌ هه‌زار كۆچبه‌ر له‌ ئاوه‌كانی‌ ده‌ریای‌ ناوه‌ڕاستدا گیانیان له‌ده‌ست داوه‌.

ئاژانسی پۆلیسی ئه‌وروپا (یۆرۆپۆل) یه‌كه‌یه‌كی تایبه‌تی بۆ تێكشكاندن و وه‌ستاندنی ئه‌و بانده‌ قاچاخچییانه‌ی له‌ ئاوه‌كانی ده‌ریای ناوه‌ڕاستدا بازرگانی به‌ گیانی په‌نابه‌رانه‌وه‌ ده‌كه‌ن، ڕاگه‌یاند، چوونكه‌ به‌پێی ئاماره‌كان، له‌ سه‌ره‌تای‌ ئه‌مساڵه‌وه‌ زیاتر له‌ 1000 په‌نابه‌ر پێش گه‌یشتنیان به‌ وڵاتانی‌ ئه‌وروپا گیانیان له‌ده‌ست داوه‌، ئه‌مه‌ له‌ كاتێكدایه‌ كۆی قوربانییان له‌ ساڵی‌ 2014دا زیاتر له‌ سێ‌ هه‌زار كۆچبه‌ر بووه‌، كه‌ پێش گه‌یشتنیان به‌ شوێنی مه‌به‌ستی خۆیان له‌ناو ئاوه‌كانی‌ ده‌ریای‌ ناوه‌ڕاستدا گیانیان له‌ده‌ست داوه‌.

سه‌باره‌ت به‌ ڕه‌گه‌زنامه‌ی قاچاخچییه‌كان، ئاژانسی یه‌كێتیی ئه‌وروپا ڕایگه‌یاند: زۆربه‌یان عێرقی و سووری و لیبی و ئه‌وروپین، كه‌ له‌ به‌رامبه‌ر وه‌رگرتنی پاره‌دا ژیانی ئه‌و په‌نابه‌رانه‌ له‌ ئاوه‌كانی ده‌ریای ناوه‌ڕاستدا ده‌خه‌نه‌ مه‌ترسییه‌وه‌ و ده‌یانخنكێنن.

هاوكات دادگایه‌كی ئوسترالی تاوانباریی كه‌سێكی سه‌لماند كه‌ عێراقییه‌ و پێشتریش ڕۆژنامه‌یه‌كی ئوسترالی وه‌ك قاچاخچییه‌كی كورد ناساندبووی، به‌ تاوانی ئه‌وه‌ی له‌ ساڵانی ڕابردوودا دوو به‌له‌م كۆچبه‌ری نایاسایی له‌ ڕێگه‌ی ده‌ریاوه‌ ڕه‌وانه‌ی ئوسترالیا كردووه‌، واش چاوه‌ڕوان ده‌كرێت دادگای ئه‌و وڵاته‌ له‌ دانیشتنی داهاتوویدا سه‌باره‌ت به‌ دۆسیه‌ی ئه‌و تاوانباره‌ كه‌ پێده‌چێت له‌ مانگی مایسدا به‌ڕێوه‌ بچێت، جۆری سزاكه‌ی بۆ دیاری بكات.

ده‌رفه‌تی ٤٠ زه‌ماله‌ی خوێندن له‌ روسیا راگه‌یه‌ندرا

وه‌زاره‌تی خوێندنی باڵا رایده‌گه‌یه‌نێت، دانیشتوان و مامۆستایان و فه‌رمانبه‌رانی وه‌زاره‌تی خوێندنی باڵا و توێژینه‌وه‌ی زانستیی ئاگادار ده‌كه‌ین، كه‌ وڵاتی كۆماری روسیایی فیدرال ٤٠چل زه‌ماله‌ی خوێندنی پیشكه‌ش به‌ هه‌رێمی كوردستان كردوه‌، به‌مه‌به‌ستی خوێندنی (به‌كالۆریۆس، ماسته‌ر، پسپۆری پزیشكی، دكتۆرا) له‌ زانكۆكانی ئه‌و وڵاته‌ به‌م شێوه‌ی خواره‌وه‌.
یه‌كه‌م: (١٩) زه‌ماله‌ی خوێندن (به‌كالۆریۆس) له‌وڵاتی كۆماری ڕوسیایی فیدرال:
مه‌رجه‌كان:
1.  ده‌بێت پێشكه‌شكار هاوڵاتی هه‌رێمی كوردستان بێت.
2.  ده‌بێت پێشكه‌شكار ده‌رچوی خوێندنی زانستی یان وێژه‌یی بێت به‌ پێیی تایبه‌تمه‌ندی به‌رنامه‌كه‌.
3.  ده‌بێت ته‌مه‌نی له‌ ٢٥ ساڵ زیاتر نه‌بێت.
4. كاندیدی سه‌ركه‌وتو له‌لایه‌ن وه‌زاره‌تی خوێندنی باڵا و توێژینه‌وه‌ی زانستی ته‌نها مۆڵه‌تی خوێندنی پێده‌درێت واتا به‌ مووچه‌ی بنه‌ڕه‌تی و ده‌رماڵه‌ جێگیره‌كان.
5. كاندیدی سه‌ركه‌وتوو له‌لایه‌ن ووڵاتی كۆماری ڕوسیایی فیدرال مانگانه‌ بڕی (٢٥٠) دۆلاری ئه‌مریكی وه‌ك ده‌رماڵه‌ی مانگانه‌  پێده‌درێت. هه‌روه‌ها كرێی خوێندن و به‌شی ناوخۆیی له‌ زانكۆ بۆ دابین ده‌كرێت. به‌ڵام سه‌باره‌ت به‌ خه‌رجی بیمه‌ی ته‌ندروستی و كرێی هاتووچۆ ده‌كه‌وێته‌ سه‌ر ئه‌ستۆی خوێندكار.
6.  دوا مۆڵه‌ت بۆ پێشكه‌شكردن له‌ ڕێگه‌ی ئه‌م فۆڕمه‌ی خواره‌وه‌ بریتیه‌ له‌ ١/٤/٢٠١٥

دووه‌م: (٢١) زه‌ماله‌ی خوێندن (ماسته‌ر و پسپۆری پزیشكی و دكتۆرا) له‌وڵاتی كۆماری ڕوسیایی فیدرال
مامۆستا و فه‌رمانبه‌رانی وه‌زاره‌تی خوێندنی باڵا و توێژینه‌وه‌ی زانستی ئاگادار ده‌كه‌ین، كه‌ وڵاتی كۆماری ڕوسیایی فیدرال بیست و یه‌ك (١٦ ماسته‌ر و ٣ پسپۆڕی پزیشكی و ٢ دكتۆرا) زه‌ماله‌ی خوێندن پێشكه‌ش به‌ هه‌رێمی كوردستان كردوه‌، به‌مه‌به‌ستی خوێندنی ماسته‌ر و پسپۆڕی پزیشكی و دكتۆرا به‌م شێوه‌ی خواره‌وه‌:
مه‌رجه‌كان:
1. پێشكه‌شكار ده‌بێت مامۆستا یان فه‌رمانبه‌ر بێت له‌ دامه‌زراوه‌كانی وه‌زاره‌تی خوێندنی باڵا و توێژینه‌وه‌ی زانستی.
2. پێشكه‌شكار ده‌بێت به‌ لایه‌نی كه‌م دوو ساڵ خزمه‌تی هه‌بێت له‌ پاش به‌ ده‌ستهێنانی دوایین بڕوانامه‌.
3. یه‌كه‌م و دووه‌م و سێیه‌می سه‌ر ئاستی به‌شه‌كان له‌ زانكۆكانی كوردستان له‌ ساڵی خوێندنی (٢٠١٣-٢٠١٤) له‌ مه‌رجی دوو ساڵ تێپه‌ربوون به‌سه‌ر ده‌رچونیان ده‌به‌خشرێن.
4. ده‌بێت كۆ نمره‌ی به‌كالۆریۆسی له‌ ٪٦٥ كه‌متر نه‌بێت.
5. ده‌بێت ته‌مه‌نی له‌ ٤٥ ساڵ زیاتر نه‌بێت.  (ئه‌مه‌ مه‌رجی لایه‌نی ڕوسیایه‌).
6. كاندیدی سه‌ركه‌وتوو له‌لایه‌ن وه‌زاره‌تی خوێندنی باڵا و توێژینه‌وه‌ی زانستی ته‌نها مۆله‌تی خوێندنی پێده‌درێت واتا به‌ مووچه‌ی بنه‌ڕه‌تی و ده‌رماڵه‌ی جێگیره‌كان.
7. كاندیدی سه‌ركه‌وتوو له‌لایه‌ن ووڵاتی كۆماری ڕوسیایی فیدرال مانگانه‌ بری (٢٥٠) دۆلاری ئه‌مریكی وه‌ك ده‌رماڵه‌ی مانگانه‌ پێده‌درێت و هه‌روه‌ها كرێی خوێندن و به‌شی ناوخۆی له‌ زانكۆ بۆ دابین ده‌كرێت. به‌لام سه‌باره‌ت به‌ خه‌رجی بیمه‌ی ته‌ندروستی و كرێی هاتووچۆ، ئه‌وا ده‌كه‌وێته‌ سه‌ر ئه‌ستۆی كاندیده‌كه‌.
8.  دوا مۆله‌ت بۆ پێشكه‌شكردن له‌ ڕێگه‌ی ئه‌م فۆڕمه‌ی خواره‌وه‌ بریتیه‌ له‌ ١/٤/٢٠١٥ .




تێبینی:
- ئه‌و به‌ڕێزانه‌ی ئاره‌زوی پێشكه‌شكردنی داواكاری ده‌كه‌ن، پێویسته‌ له‌ ریگه‌ی ئه‌م لینكه‌وە فۆرمی پێشكه‌شكردنی ئه‌لكترۆنی پڕ بكه‌نه‌وه‌، دواین كات رێكه‌وتی (1/4/2015)ه‌.

Monday, March 16, 2015

له‌ئه‌نده‌نوسیا پاره‌ بۆ وڵاتێكی‌ ده‌وڵه‌مه‌ند كۆده‌كرێته‌وه‌

وه‌ك ناڕه‌زاییه‌ك له‌دژی‌ وته‌كانی‌ سه‌رۆك وه‌زیرانی‌ ئوسترالیا كه‌ رایگه‌یاندبو، ده‌بێت ئه‌نده‌نوسیا ئه‌و هاوكاریه‌ مادیانه‌ی‌ له‌بیر بێت كه‌ وڵاته‌كه‌ی‌ پێشكه‌شی‌ ئه‌وانی‌ كردوه‌، ژماره‌یه‌ك له‌هاوڵاتی‌ ئه‌نده‌نوسیا له‌جاكارتای‌ پایته‌ختی‌ ئه‌و وڵاته‌ رژانه‌ سه‌رشه‌قامه‌كان‌و كه‌مپه‌ینێكیان بۆ كۆكردنه‌وه‌ی‌ پاره‌ بۆ ئوسترالیا ڕاگه‌یاند، ئامانجیش له‌كۆكردنه‌وه‌ی‌ ئه‌و پارانه‌ بۆ دانه‌وه‌ی‌ ئه‌و هاوكارییه‌ی‌ پێشتری‌ حكومه‌تی‌ سیدنی‌-یه‌.
 
هه‌ژار ته‌ها، ئاوێنه‌نیوز: وته‌كانی‌ سه‌رۆك وه‌زیرانی‌ ئوسترالیا، تۆنی‌ ئه‌بوت له‌پاش ئه‌وه‌هات كه‌ دادگای‌ باڵای‌ ئه‌نده‌نوسیا بڕیاری‌ له‌سێداره‌دانی‌ بۆ دوو كه‌سی‌ به‌ڕه‌گه‌ز ئوسترالی‌ ده‌ركرد پاش ئه‌وه‌ی‌ به‌تاوانی‌ قاچاخچێتیكردن به‌ماده‌ی‌ هۆشبه‌ره‌وه‌ ده‌ستگیركران‌و پاشان هه‌ردوكیان تاوانه‌كه‌یان به‌سه‌ردا ساخبوه‌وه‌‌و به‌پێی‌ یاساكانی‌ سزادانی‌ ئه‌نده‌نوسیاش، سزای‌ له‌سێداره‌دانیان بۆ ده‌رچوه‌. 

له‌به‌رامبه‌ریشدا حكومه‌تی‌ ئوسترالیا چه‌ندین پێشنیاری‌ خستۆته‌به‌رده‌م ئه‌و وڵاته‌ تا له‌سێداره‌دانی‌ ئه‌و دوو هاوڵاتیه‌ی‌ رابگرێت‌و سزاكه‌یان بگۆڕێت بۆ سزای‌ زیندانیكردنی‌ هه‌تاهه‌تایی‌، به‌ڵام هه‌موو ئه‌و پێشنیارانه‌ له‌لایه‌ن ئه‌نده‌نوسیاوه‌ ره‌تكراوته‌نه‌وه‌، چونكه‌ به‌وته‌ی‌ به‌رپرسانی‌ ئه‌و وڵاته‌ ئه‌و پێشنیارانه‌ به‌واتای‌ ده‌ستێوه‌ردانه‌ له‌كاروباری‌ دادوه‌رییان.
 
توڕه‌یی‌ ئه‌نده‌نوسیایه‌كان له‌به‌رامبه‌ر وته‌كانی‌ سه‌رۆك وه‌زیرانی‌ ئوسترالیا كۆتایی‌ نه‌هاتوه‌‌و وه‌زیری‌ ڕێكخه‌ر بۆ كاروباری‌ سیاسی‌‌و یاسایی‌‌و ئاسایشی‌ ئه‌نده‌نوسیا رایگه‌یان، ئه‌وانیش هاوكاری‌ حكومه‌تی‌ ئوسترالیایان كردوه‌ له‌پرسی‌ كۆچداو به‌وته‌ی‌ ئه‌و ئه‌وان رێگربون له‌وه‌ی‌ كه‌ هه‌زاران كۆچبه‌ر به‌شێوه‌یه‌كی‌ نایاسایی‌ ڕو له‌و وڵاته‌ بكه‌ن.

هاوكات هۆشداریدا به‌وه‌ی‌ كه‌ ئه‌گه‌ر حكومه‌تی‌ ئوسترالیا زیاتر ئه‌نده‌نوسیه‌كان نیگه‌ران بكه‌ن ئه‌وا ئه‌وانیش ده‌توانن ئوسترالیا توشی‌ "سۆنامی‌ په‌نابه‌ران " بكه‌ن به‌وه‌ی‌ كه‌ رێگه‌ له‌و زیاتر له‌ 10 هه‌زار په‌ناخوازه‌ نه‌گرن كه‌ ده‌یانه‌وێت بچنه‌ ئوسترالیاو ئێستا له‌ئه‌نده‌نوسیان.


له‌هه‌فته‌ی‌ رابردوداو به‌ئامانجی‌ فشارخستنه‌ سه‌ر ئه‌نده‌نوسیا بۆئه‌وه‌ی‌ سزای‌ له‌سێداره‌دانی‌ ئه‌و دوو هاوڵاتیه‌ به‌ڕه‌گه‌ز ئوسترالیه‌ هه‌ڵبوه‌شێنێته‌وه‌ كه‌ له‌ئێستادا چاوه‌ڕوانی‌ جێبه‌جێكردنی‌ سزاكه‌یانن، سه‌رۆك وه‌زیرانی‌ ئوسترالیا باسی‌ ئه‌و  یه‌ك ملیار دۆلاره‌ی‌ كرد كه‌ له‌ساڵی‌ 2004دا وڵاته‌كه‌ی‌ پێشكه‌شی‌ ئه‌نده‌نوسیای‌ كردبوو رایگه‌یاند "ده‌بێت ئه‌نده‌نوسیه‌كان ئه‌و چاكه‌یه‌یان له‌به‌رچاو بێت" ئه‌مه‌ش توڕه‌یی‌ ئه‌نده‌نوسیای‌ به‌دوای‌ خۆیدا هێناو داواده‌كه‌ن سه‌رۆك وه‌زیرانی‌ ئوسترالیا داوای‌ لێبوردنیان لێبكات. 
سه‌رچاوه‌كان: ماڵپه‌ری‌ سكای‌ نیوز، ماڵپه‌ری‌ ِرۆژنامه‌ی‌ سیدنی‌ مۆرنینگ هێراڵد


 

Sunday, March 15, 2015

په‌نابه‌رێكی كورد له‌ئوسترالیا به‌مردويی دۆزرایه‌وه‌

ماڵپه‌ڕی ڕۆژنامه‌ی سیدنی مۆرنیگ هێراڵدی ئوسترالی بڵاویكرده‌وه‌، ڕۆژی ڕابردوو په‌نابه‌رێكی كورد به‌ناوی ئومێد عه‌لی ئاواز ، به‌مردوویی دۆزرایه‌وه‌.
به‌پێی زانیاریه‌كانی ئه‌و ماڵپه‌ڕه‌ كه‌ له‌پۆلیسی شاری بریسبنی ئوسترالیا ده‌ستیكه‌وتووه‌، ئه‌و په‌نابه‌ره‌ به‌ڕه‌چه‌ڵه‌ك كوردی وڵاتی ئێرانه‌و پێده‌چێت خۆی كوشتبێت، به‌ڵام لێكۆڵینه‌وه‌ش له‌و باره‌یه‌وه‌ ده‌ستیپێكردووه‌.
به‌پێی تۆماره‌ پزیشكیه‌كانی كه‌ ده‌ست ئه‌و ماڵپه‌ڕه‌ كه‌وتووه‌، ئومێد ته‌مه‌نی 29 ساڵانه‌و له‌ماوه‌ی مانه‌وه‌ی له‌كه‌مپه‌كانی ئه‌و ووڵاته‌دا له‌نه‌خۆشخانه‌یه‌كی ده‌روونی چه‌ند جارێك چاره‌سه‌ری ته‌ندروستی وه‌رگرتووه‌ ئه‌ویش پاش ئه‌وه‌ی چه‌ند جارێكی تر هه‌وڵی خۆكوشتنی داوه‌ كه‌ هۆكاری ئه‌وه‌ش ده‌گێڕنه‌وه‌ بۆ خراپی باری ده‌روونی ئه‌و په‌نابه‌ره‌ كه‌ به‌هۆی زۆرمانه‌وه‌ی له‌كه‌مپی په‌نابه‌رانی ئه‌و وڵاته‌دا تووشی بووه‌.
هه‌رچه‌نده‌ ئومێد له‌ساڵی 2011 ه‌وه‌ به‌شێوه‌یه‌كی نایاسایی گه‌شتوه‌ته‌ ئوسترالیا، به‌ڵام مافی په‌نابه‌رێتی هه‌میشه‌یی وه‌رنه‌گرتووه‌ و به‌وه‌ش له‌ كه‌مپه‌كانی ئه‌و وڵاته‌دا ماوه‌ته‌وه‌ هه‌تا مانگی ڕابردوو مافی په‌نابه‌رێتی كاتی یه‌ك ساڵی پێدراوه‌و دیپۆرتی كه‌مپه‌كانی ده‌ره‌وه‌ نه‌كراوه‌، چونكه‌ پێش ئه‌وه‌ی ئه‌و سیاسه‌ته‌ بخرێته‌ بواری جێبه‌جێكردنه‌وه‌ گه‌شتوه‌ته‌ ئه‌و وڵاته‌، به‌وه‌ش ئه‌و په‌نابه‌ره‌ له‌وه‌ تێگه‌شتووه‌ كه‌ ته‌نها له‌و ماوه‌یه‌دا مافی كاركردن و مانه‌وه‌ی به‌شێوه‌یه‌كی یاسایی له‌ده‌ره‌وه‌ی كه‌مپه‌كان پێده‌درێت. جگه‌له‌وه‌ش ، به‌ وته‌ی ژماره‌یه‌ك داكۆكیكار له‌ مافی په‌نابه‌ران له‌و وڵاته‌ كه‌له‌ نزیكه‌وه‌ ئه‌و په‌نابه‌ره‌ ده‌ناسن ده‌ڵێن پاش ئه‌وه‌ی دایكی مردووه‌، ئومێد باری ده‌روونی زۆر خراپتربوو بوو.
هه‌رله‌باره‌ی گیانله‌ده‌ستدانی ئه‌و په‌نابه‌ره‌ كورده‌وه‌، سه‌رۆكی پارتی دیموكراته‌كانی ئوسترالیا له‌ ولایه‌تی ساوس ئوسترالیا له‌ ڕاگه‌یاندراوێكدا خه‌مباری خۆی به‌گیانله‌ده‌ستدانی ئه‌و په‌نابه‌ره‌ ده‌ربڕیووه‌ و ڕه‌خنه‌ له‌سیاسه‌ته‌كانی سه‌رۆك وه‌زیرانی ئێستای ئوسترالیا ده‌گرێت كه‌ كاریگه‌ری خراپی كردوه‌ته‌ سه‌ر باری ده‌روونی په‌نابه‌ران و ده‌ڵێت، ئه‌و ناوی ئومێد بوو، به‌ڵام هیچ ئومێدێكمان پێنه‌به‌خشی.

Friday, March 13, 2015

به‌رنامه‌ی ئیراسمۆس پلەس ده‌رفه‌تێكی زێرین بۆ خوازیارانی خوێندنی باڵا ده‌ڕه‌خسێنیت

ئیراسمۆس پلەس بەرنامەیەکی یەکێتی ئەوروپایە لە بوارەکانی پەروەردە و ڕاهێنان و گەنج و وەرزش بۆ ماوەی شه‌ش ساڵ (٢٠١٤ـ٢٠٢٠) کاردەکات، ئامانج له‌م بەرنامەیە چارەسەركردنی گۆرانکاری ئابوری کۆمەلایەتی، کار، گەشەکردن و یەکسانی کۆمەلایەتی، لە خۆگرتن (احتواء) لە وولاتە ئەوروپاییەکان و هاوبەشەکانیان له‌ خۆده‌گرێت.
بەرنامەی ئیراسمۆس پلەس بە شێوەیەک داڕێژراوە، پشتگیری ووڵاتە بەرنامە دارەکانی یەکێتی ئەوروپا و هاوبەشەکانی هه‌یه‌، به‌تایبه‌ت ئه‌و وڵاتانه‌ی کە توانای بەهرەدارەکان بەکاردەهێنێت و، پەرە بە هەلەکانی هاوکاری و ئاڵوگۆرکردن لە نێوان وڵاتە جیاکان لە بواری خوێندنی بالا و گەنجان دەدات.
 
ئه‌و به‌رنامه‌یه‌ی نێوان ووڵاتە بەرنامە دارەکانی یەکێتی ئەوروپا و هاوبەشەکانی بۆ ساڵی (٢٠١٤ـ٢٠٢٠) به‌ دو شێوە  ڕاگه‌یاندراوه‌، ئه‌وانیش بریتین له:
 
1. پڕۆژەی هاوبەشەکان: ئه‌مه‌ پڕۆژەی نێوان دامەزراوە جیاوازەکانه‌ و، کاریگەریان لەسەر ئاستی دامەزراوەیی دەبێت.
2. پرۆژەی پێکهاتەییەکان: پڕۆژەکانی سیستەمی خوێندنی باڵا له‌ خۆده‌گرێت، کە کاریگەرییەکانی لەسەر ئاستی نەتەوەكان دەبێت.
 
وه‌ك له‌ به‌رنامه‌كه‌دا ئاماژه‌ی بۆ كراوه‌، وڵاته‌ هاوبەشەکانی بەسەر چەند هەرێمێکی جیاواز دابەش کردوە. هەرێمی کوردستان-یش  لەگەل هەریەک لە (كۆماری ئیسلامی ئێران، یەمەن) کەوتۆتە هەرێمی ژمارە (9)، پارەی تەرخانکراویش بۆ هەرێمی ژمارە (٩) بڕه‌كه‌ی (1,85) ملیۆن یۆرۆیه‌. بۆیه‌ به‌هۆی ئه‌و بارودۆخه‌ی له‌و دو وڵاته‌ی هه‌رێمی ژماره‌ (9)‌ هه‌یه‌، ده‌رفه‌تێكی باش ڕه‌خساوه‌ بۆ خوازیارانی خوێندنی باڵا له‌ هه‌رێمی كوردستان بۆ ئه‌وه‌ی به‌شداری له‌و به‌رنامه‌یه‌ بكه‌ن و، ناوی خۆیان تۆمار بكه‌ن تا بتوانن درێژه‌ به‌خوێندن بده‌ن له‌ وڵاتانی یه‌كێتیی ئه‌وروپا له‌ چوارچیوه‌ی به‌رنامه‌ی (ئیراسمۆس پلەس)، بۆیه‌ داوا له‌ خوازیاران ده‌كه‌ین پڕۆپۆزەڵی تایبەت بە پڕۆژەکانتان ئامادە بکەن و، لە کاتی خۆیدا پێشکەشی بکەن.
 
بۆ زانیاری زیاتر ده‌رباره‌ی پڕۆژه‌كه‌و چۆنێیه‌تی پیشكه‌شكردنی داواكاری سه‌ردانی ئەم لینکانەی خوارەوە بکەن:
 

The Erasmus+ Programme Guide for the 2015 General Call for Proposals in English:
http://ec.europa.eu/programmes/erasmus-plus/calls/index_en.htm


The priorities for Capacity Building Action are available at:http://eacea.ec.europa.eu/erasmus-plus/funding/key-action-2-capacity-building-in-field-higher-education-2015_en


Direct link to the document (XLS): https://eacea.ec.europa.eu/sites/eacea-site/files/budget_allocation_regional_and_national_priorities.xls

Wednesday, March 11, 2015

دانیمارك بیر لەپێدانی مافی پەنابەرێتی كاتی بە پەنابەرانی سووری دەكاتەوە

هەرچەندە بەپێی ئامارە فەرمیەكانی بەڕێوبەرایەتی كۆچی دانیمارك ، ژمارەی ئەو كەسانەی داوای مافی پەنابەرێتیان لەو ووڵاتە كردووە لەسەرەتای ئەمساڵدا كەمیكردووە كە هۆكاری ئەم كەمكردنەوەیەش
بەهۆی توندی یاساكانی كۆچی ئەو ووڵاتەوەیە بەڵام هێشتا نزیكەی نیوەی ئەو كەسانەی داوای مافی پەنابەرێتیان لەو ووڵاتە كردووە بەڕەگەز سووین. 
بەوەش ، بەپێی زانیاریەكانی ئەو ڕۆژنامەیە ، حكومەتی دانیمارك لە مانگی ئەیلولی ئەمساڵدا مافی پەنابەرێتی كاتی یەك ساڵی دەداتە ئەو پەناخوازانەی كەلەو ووڵاتانەوە هاتوون كە توندوتیژیەكان تیایاندا بەردەوامن وەك سوریا. 
مەبەست لە پێدانی مافی پەنابەرێتی كاتی كە پێشتریش لەلایەن هەندێك ووڵاتی ترەوە پیادە كراوە بۆ ڕێگەگرنتە لە پەناخوازان تا نەتوانن داوای مافی پەنابەرێتی هەمیشەیی بكەن و بەوەش ئەو ووڵاتانە بە بەهەند وەرگرتنی بارودۆخی ووڵاتی ئەو پەناخوازانە لەپاش تەواو بوونی مافی پەنابەرێتیە كاتیەكەیان دەتوانن بیر لەدیپۆتكردنەوەیان بكەنەوە ، ئەمە جگەلەوەی لەو ماوەی ساڵەدا ناتوانن داوای مافی پەنابەرێتی بۆ كەسوكاریشیان بكەن.
ئوسترالیاش ، هاوشێوەی دانیمارك ، پێشتر یاسای مافی پەنابەرێتی كاتی نوێ‌ كردەوە بۆ ئەو پەناخوازانەی كە لە كەمپەكانی ووڵاتەكەین و بەڵام یاسای دیپۆرتكردنەوە بۆ كەمپەكانی دەرەوە نەیگرتنەوە.
ئەوەی لەئێستادا بووە بەبەشێك لە گوتاری سیاسی ووڵاتی دانیمارك هەر پرسی پەنابەرانی ناوخۆی ووڵاتەكەیان نیە بەڵكو ئەوان نیگەرانن لەزۆری ژمارە پەنابەرنی ووڵاتی سوید چونكە هەردوو ووڵات بەشێكن لە ناوچەی ووڵاتانی ئەسكەندەناڤیا و بەوەش هاتوچۆ و مانەوە ی پەنابەران پاش ئەوەی دەبنە هاوڵاتی هەریەك لەو ووڵاتانە بێسنورە.
پێشتر بەرپرسێكی باڵای پارتی گەلی دانیماركی دەستەڵاتدار لە حكومەتی ئەو ووڵاتەدا رهۆشداریدا بەوەی پاش ئەوەی ئەو ژمارە زۆرەی پەناخوازانی بەڕەگەز سوری دەبنە "بەنابەر" لە سوید ، لەماوەی چەند ساڵێكی كەمدا دەتوانن ببنە هاوڵاتی سویدی و ئینجا دەتوانن بێنە دانیمارك و هەر لەیەكەم ڕۆژی گەشتنیشیانەوە دەتوانن داوای بیمەی سۆشیال لەو ووڵاتە بكەن كە بە ووتەی ئەو بەرپرسە ئەوە مەترسیەكی گەورەیە بۆ سەر ووڵاتەكەیان. 
لەم بارەیەوە ، وەزیری دادی دانیمارك ڕایگەیاند كە حكومەتی ووڵاتەكەی ئامادەكاری كردووە لەبەرامبەر ئەگەری هاتنی هاوڵاتیانی هەڵگری ڕەگەزنامەی سویدی بەمەبەستی مانەوە لە ووڵاتەكەیان.
لەساڵی 2013 دا ، ووڵاتی سوید یەكەم ووڵاتی ئەوروپا بوو كە بڕیاریدا مافی پەنابەرێتی سەرتاسەری بداتە پەناخوازانی بەڕەگەز سووری و بەوەش بۆتە دووەم لەپاش ئەڵمانیا بۆ هەبوونی زۆرترین پەنابەری بەڕەگەز سووری لەسەر ئاستی یەكێتی ئەوروپا.


هەژار تەها  pukpb



سەرچاوە : ماڵپەری ڕۆژنامەی زەلۆكاڵی سویدی

Monday, March 9, 2015

ئه‌وروپا رێوشوێنی نوێ به‌رامبه‌ر ‌په‌نابه‌ران ده‌گرێته‌به‌ر ‌

كۆمسیاری ئه‌وروپا بڕیاریدا كه‌ په‌له‌ بكرێت له‌كاره‌كانی داڕشتنه‌وه‌ی سیاسه‌تێكی نوێ بۆ گرفتی په‌نابه‌ران به‌مه‌به‌ستی چاكسازی له‌یاسای په‌نابه‌راندا.
ئه‌و هه‌وڵه‌ی ئه‌وروپا دوای زنجیره‌یه‌ك كاره‌ساتی گه‌وره‌ دێت، كه‌ به‌هۆیه‌وه‌ هه‌زاران په‌نابه‌ر له‌ده‌ریای ناوه‌راستدا نوقم بوون كه‌ ژماره‌یه‌كی زۆریان گیانیان له‌ده‌ستداو ژماره‌یه‌كیشیان رزگار كران.
ده‌سته‌ی جێبه‌جێكردنی كۆمسیاری ئه‌وروپا گفتوگۆكانی له‌باره‌ی ئه‌و ستراتیژییه‌ته‌وه‌ ده‌ستپێكردووه‌ كه‌ لێپرسراوی كاروباری ناوخۆی كۆمسیۆنی ئه‌وروپا بۆ نه‌هێشتنی په‌نابه‌ری نایاسایی پێشكه‌شی كردووه‌، فرانس تیمه‌ر مانز جێگری سه‌رۆكی كۆمسیۆنی ئه‌وروپا رایگه‌یاند: خشته‌ی كاره‌كانی كۆمسیۆنه‌كه‌ ئه‌وله‌ویه‌تی به‌چوار بوار داوه‌ له‌وانه‌ چاكسازی له‌یاساو رێساكانی پێدانی مافی په‌نابه‌ری كه‌ ئێستا په‌یڕه‌و ده‌كرێت له‌گه‌ڵ پارێزگاریكردن له‌سنووره‌كانی یه‌كێتیی ئه‌وروپاو گرتنه‌به‌ری رێوشوێنی توند دژی په‌نابه‌رانی نایاسایی و بازرگانیكردن به‌مرۆڤه‌وه‌و مامه‌ڵه‌كردن له‌گه‌ڵ په‌نابه‌ره‌ یاساییه‌كاندا.

Saturday, March 7, 2015

ئه‌ڵمانیا: كوردانى په‌نابه‌ر خۆپیشاندانیان ئه‌نجامدا

په‌نابه‌رانى كورد له‌ ئه‌ڵمانیا خۆپیشاندانێكیان ئه‌نجامدا به‌مه‌به‌ستى داواكردنى مافه‌كانى خۆیان و هاوڵاتیانى ئه‌و وڵاته‌ پشتیوانى خۆیان ده‌ربڕى بۆ په‌نابه‌رانى كورد. ئه‌مه‌ش وه‌كو ده‌ربڕینى ناڕه‌زایى بوو به‌رامبه‌ر گروپى پێگیدا كه‌ دژى وه‌رگرتنى په‌نابه‌رانن له‌ ئه‌ڵمانیا. 
سه‌رچاوه‌یه‌ك له‌ خۆپیشانده‌رانى كورد به‌ (وار)یان ڕایگه‌یاندووه‌ كه‌ له‌دواى ئه‌وه‌ى پێكدادان له‌ناو په‌نابه‌راندا دروست بووه‌، په‌نابه‌رانى كورد و پشتیوانانى په‌نابه‌ران مانگرتنیان ڕاگه‌یاندووه‌ و داوایان كردووه‌ كه‌ ڕێز له‌ په‌نابه‌ران بگیرێت، و داواى ئه‌وه‌یان كردووه‌ كه‌ به‌زووترین كات مافه‌كانى ئه‌وان بێته‌دى و هاریكارى مرۆیى بگات به‌ ئه‌وان. 
هه‌ر ئه‌و سه‌رچاوه‌یه‌ ڕایگه‌یاند كه‌ ڕه‌وشى په‌نابه‌ران له‌ هه‌رێمى ساكسۆنیا زۆر خراپه‌ و حكومه‌ت ده‌ستى گرتووه‌ به‌ دیپۆرت كردنه‌وه‌ى په‌ناخوازان. هه‌روه‌ها مانگترن به‌ به‌شدارى 200 كه‌س به‌رده‌وامه‌ و بڕیاره‌ تاوه‌كو 25ى ئه‌م مانگه‌ به‌رده‌وامى هه‌بێت.

Wednesday, March 4, 2015

70 په‌نابه‌ری عێراقی و سوری له‌ئاوه‌كانی رۆمانیا رزگاركران

28220151335602_balam123
هێزه‌ ده‌ریاییه‌كانی رۆمانیا 70 په‌نابه‌ری عێراقی و سوری له‌خنكان رزگارده‌كه‌ن.

ئه‌مڕۆ شه‌ممه‌ هێزه‌ ده‌ریاییه‌كانی وڵاتی رۆمانیا 70 په‌نابه‌ری عێراقی و سورییان له‌ ئاوه‌كانی نزیك رۆمانیا له‌ خنكان رزگاركرد كه‌ له‌به‌له‌مێكدا ده‌یانویست خۆیان بگه‌یه‌ننه‌ ئه‌وروپا.
ماریۆس نیكۆلسكۆی وته‌بێژی هێزی ده‌ریایی رۆمانیا رایگه‌یاند، ئه‌و په‌نابه‌رانه‌ی كه‌ رزگاركراون ویستویانه‌ له‌رێگای ده‌ریاوه‌ خۆیان بگه‌یه‌ننه‌ رۆمانیاو ته‌واوی پێداویستیه‌كانیان بۆ دابینكراوه‌، ئه‌وه‌ش یه‌كه‌م به‌له‌می له‌وجۆره‌یه‌ له‌ماوه‌ی ئه‌مساڵدا ویستویه‌تی خۆی بگه‌یه‌نێته‌ رۆمانیا.
په‌نابه‌ره‌كان كه‌ له‌به‌له‌مێكی توركیدا بوون، له‌ئه‌سته‌مبوڵه‌وه‌ كه‌وتبونه‌ رێ و 16 كیلۆمه‌تریان مابووه‌ بگه‌نه‌ كه‌ناره‌كانی رۆمانیاو 20 ژن و مناڵی تێدابووه‌.



به‌پێی ئاماره‌كان 160 هه‌زار كه‌س له‌ماوه‌ی ساڵی رابوردودا توانیویانه‌ خۆیان بگه‌یه‌ننه‌ ئیتالیاو 40 هه‌زار كه‌سی تریش خۆیان گه‌یاندۆته‌ وڵاتی یۆنان، به‌هه‌زاران كه‌سیش له‌و رێگه‌یه‌دا خنكاون.

Monday, March 2, 2015

دادگایكردنی‌ تۆمه‌تبارانی‌ كه‌یسی‌ كوشتنی‌ په‌ناخوازه‌ كورده‌كه‌ ده‌ستپێده‌كاته‌وه‌

232015538602_wene2ڕۆژنامه‌ی‌ گاردیانی‌ به‌ریتانی‌ ئاشكرای‌ كرد، له‌م مانگه‌دا دادگایكردنی‌ ئه‌و دوو كه‌سه‌ی‌ كه‌ تۆمه‌تبارن به‌كوشتنی‌ په‌ناخوازه‌ كورده‌كه‌ له‌دوورگه‌ی‌ پاپانیوگینیا ده‌ستپێده‌كاته‌وه‌.

ڕه‌زا به‌راتی‌، ناوی‌ ئه‌و په‌ناخوازه‌ كورده‌یه‌ كه‌له‌ 17 شوباتی‌ ساڵی‌ ڕابردوو، له‌ئه‌نجامی‌ پشێویه‌كانی‌ نێوان پۆلیسی‌ ئه‌و دوورگه‌یه‌و په‌ناخوازانی‌ ده‌ستبه‌سه‌ركراو له‌و دوورگه‌یه‌ كه‌ خۆپیشاندانیان ئه‌نجامدا بوو گیانی‌ له‌ده‌ستدا و ئه‌مه‌ جگه‌ له‌بیرنداربوونی‌ نزیكه‌ی‌ 70 په‌ناخوازی‌ تر. 

به‌پێی‌ زانیاریه‌كانی‌ ڕۆژنامه‌ی‌ گاردیان، ڕه‌زای‌ ته‌مه‌ن 23 ساڵ خانه‌واده‌ی‌ له‌ بنه‌چه‌دا خه‌ڵكی‌ پارێزگای‌ ئیلامی‌ خۆرهه‌ڵاتی‌ كوردستانن، به‌شداری‌ خۆپیشاندانه‌كه‌ی‌ نه‌كردووه‌ به‌ڵام له‌ماوه‌ی‌ پیشێویه‌كانی‌ ئه‌و شه‌وه‌دا به‌سه‌ختی‌ وه‌ك ڕاپۆرته‌كان ئاماژه‌ی‌ بۆ ده‌كه‌ن له‌لایه‌ن ستافی‌ كه‌مپه‌كه‌یانه‌وه‌ هێرشكراوه‌ته‌ سه‌ری‌ و پاشان هه‌ر ئه‌و شه‌وه‌ به‌هۆی‌ به‌ركه‌وتنی‌ سه‌ریه‌وه‌ له‌و هێرشه‌دا گیانی‌ له‌ده‌ستداوه‌.

له‌ مانگی‌ ئابی‌ ساڵی‌ پاردا، حكومه‌تی‌ پاپانیوگینیا ده‌ستگیركردنی‌ دوو كه‌سی‌ ڕاگه‌یاند كه‌ یه‌كێكیان پاسه‌وانێكی‌ كه‌مپه‌كه‌ بووه‌و ئه‌ویتریشیان كارمه‌ندی‌ دامه‌زراوه‌یه‌كی‌ تری‌ ئه‌و دوورگه‌یه‌یه‌.

یه‌كه‌م دانیشتنی‌ دادگایكردنی‌ ئه‌و دوو كه‌سه‌ له‌ تشرینی‌ دووه‌می‌ ساڵی‌ ڕابردوو ده‌ستیپێكرد به‌ڵام به‌هۆی‌ ئه‌وه‌ی‌ پارێزه‌ریان بۆ دابین نه‌كرا بوو، دادگایه‌كه‌یان دواخرا.

ڕه‌زا، له‌مانگی‌ حوزه‌یرانی‌ ساڵی‌ 2013 دا، به‌شێوه‌یه‌كی‌ نایاسایی‌ و له‌ڕێگه‌ی‌ به‌له‌مه‌وه‌ گه‌شتۆته‌ دوورگه‌ی‌ كریستماسی‌ ئوسترالیا، به‌وه‌ش سیاسه‌تی‌ دیپۆرتكردنه‌وی‌ به‌سه‌ردا جێبه‌جێكراوه‌ و ڕه‌وانه‌ی‌ دوورگه‌ی‌ پاپانیوگینیا كراوه‌.

له‌پاش ڕێككه‌وتنی‌ له‌گه‌ڵ هه‌ردوو دوورگه‌ی‌ ناورۆ و پاپانیوگینیا، له‌مانگی‌ ئابی‌ 2012 ه‌وه‌، حكومه‌تی‌ ئوسترالیا چه‌ند كه‌مپێكی‌ كرده‌وه‌ له‌و دوو دوورگه‌یه‌ بۆ ئه‌و په‌ناخوازانه‌ی‌ كه‌به‌له‌م و به‌شێوه‌یه‌كی‌ نایاسایی‌ خۆیان ده‌گه‌یه‌ننه‌ ئوسترالیا و بڕیاریدا كه‌ به‌هیچ شێوه‌یه‌ك مافی‌ په‌نابه‌رێتی‌ نه‌داته‌ هیچ كه‌سێك كه‌له‌ڕێگه‌ی‌ ده‌ریاوه‌و به‌قاچاخ ده‌گه‌نه‌ ئه‌و ووڵاته‌و دیپۆرتی‌ ئه‌و دوو دوورگه‌یه‌شیان بكات كه‌به‌پێی‌ ڕێكه‌وتنامه‌كه‌.

ئه‌و په‌ناخوازانه‌ ده‌توانن داوای‌ مافی‌ په‌نابه‌رێتی‌ له‌و دوو دوورگه‌یه‌ بكه‌ن ئه‌گه‌ر سه‌لماندیان په‌نابه‌ری‌ ڕاسته‌قینه‌ن. 

 له‌به‌رامبه‌ریشدا، په‌ناخوازانی‌ دیپۆرتكراو به‌به‌رده‌وامی‌ خۆپشاندان ڕێكده‌خه‌ن و به‌هۆی‌ خراپی‌ بارودۆخیانه‌وه‌ داوای‌ داخستنی‌ ده‌ستبه‌جێی‌ ئه‌و كه‌مپانه‌ ده‌كه‌ن. 

سه‌رچاوه‌كان : ماڵپه‌ری‌ ڕۆژنامه‌ی‌ گاردیان، ماڵپه‌ری‌ ڕۆژنامه‌ی‌ ئه‌ی‌ بی‌ سی‌ نیوز