Sunday, June 29, 2014

گروپێكى ترى كۆچبه‌ران ڤیزاى په‌نابه‌ریان پێدرا له‌ ناورو

كۆچى كوردان و كۆچ بۆ ئوسترالیا
دووه‌م گروپى په‌ناخوازان ڤیزاى په‌نابه‌ریان پێدرا له‌ ناورو و له‌ ناوه‌نده‌كانى ده‌ستبه‌سه‌ركردنه‌كان ئازادكران بۆئه‌وه‌ى تێكه‌ڵى كۆمه‌ڵگا ببن، هه‌روه‌ها ماوه‌ى 4 ساڵ ڤیزاى مانه‌وه‌یان پێدرا.
ژماره‌ى ئه‌و گروپه‌ 19 كه‌س ده‌بوون كه‌ مافى به‌نابه‌ریان پێدرا له‌لایه‌ن حكومه‌تى ناورو، و چوار له‌وانه‌ى داوایان پێشكه‌ش كردبوو و داواكه‌یان ڕه‌ت كرایه‌وه‌. ئه‌وانه‌ى كه‌ مافى به‌نابه‌ریان پێدرا 15یان له‌ پێنج خێزان بوون و یه‌ك ئافره‌تى ڕه‌به‌ن و سێ كوڕى ڕه‌به‌ن بوون. ئه‌وانه‌ى كه‌ مافى په‌نابه‌ریان پێ نه‌دراوه‌ له‌ ناوه‌ندى هه‌ڵسه‌نگاندنى هه‌رێمى ده‌مێننه‌وه‌.
حكومه‌تى ناورو ئه‌وه‌ ڕاده‌گه‌یه‌نێت كه‌ به‌رده‌وام ده‌بێت له‌ یه‌كلایى كردنه‌وه‌ى مافى په‌نابه‌رێتى ئه‌وانه‌ى داوایان پێشكه‌ش كردووه‌ له‌ چه‌ند هه‌فته‌ى داهاتوودا. حه‌وت كه‌سیان هه‌ڵسه‌نگاندنى نێگه‌تیڤیان وه‌رگرتووه‌، و كه‌ چواریان له‌ دوو خێزاندا بوون و سێیان كوڕى ڕه‌به‌ن بوون. له‌ئێستادا ئه‌وانه‌ له‌ ناوه‌ندى ده‌ستبه‌سه‌ركردن ده‌مێێننه‌وه‌.

سه‌ره‌ڕاى ئه‌و ڕێككه‌وتنه‌ى له‌نێوان حكومه‌تى ئوسترالى و ناورو و مانوس هه‌یه‌، چاوه‌ڕوان ده‌كرێت له‌دواى واژۆكردنى ڕێككه‌وتنى ئوسترالیا و كامبۆدیا هه‌ندێك له‌ په‌ناخوازه‌كان ڕه‌وانه‌ى كامبۆدیا بكرێن و له‌وێ مافى مانه‌وه‌یان پێ بدرێت.

Thursday, June 26, 2014

حكومه‌تى ئوسترالى گۆڕانكارى گه‌وره‌ له‌یاساى مافى په‌نابه‌رى ده‌كات


كۆچى كوردان و كۆچ بۆ ئوسترالیا
حكومه‌تى فیدراڵى ئوسترالیا گۆڕانكارى گه‌وره‌ ده‌كات له‌ هه‌ڵسه‌نگاندنى داخوازى مافى په‌نابه‌راندا. ئه‌گه‌ر ئه‌و یاسایه‌ له‌ په‌رله‌ماندا په‌سه‌ند بكرێت ئه‌وا، به‌رپرسیارێتى په‌ناخوازه‌ كه‌ به‌ته‌واوى داخوازیه‌كه‌ى خۆى بسه‌لمێنێت. هه‌روه‌ها ڤیزاى پاراستن نابه‌خشرێت كاتێك كه‌سه‌كه‌ به‌ته‌واوى پێناسى خۆى ناسه‌لمێنێت.
وه‌زیرى كۆچ سكۆت مۆریسۆن ڕایگه‌یاند كه‌ هه‌ندێك له‌ په‌ناخوازه‌كان وه‌كو ئه‌وانه‌ى كه‌ بێ نیشتمانن، دۆكیومێنتى فه‌رمیان نیه‌، به‌ڵام به‌رپرسیارێتى ته‌واوى سه‌لماندنى ناسنامه‌ ده‌كه‌وێته‌ ئه‌ستۆى په‌ناخوازه‌وه‌.
له‌لایه‌كى تره‌وه‌ ئه‌و یاسایه‌ ڕێژه‌ى مه‌ترسى ڕه‌وانه‌كردنه‌وه‌ى ئه‌وانه‌ى ده‌گه‌ن به‌ ئوسترالیا بۆ وڵاتانى تر زیاتر ده‌كات. له‌ئێستادا، ئه‌و خه‌ڵكانه‌ى كه‌ چانسى 10٪ى ڕووبه‌ڕوو بوونه‌وه‌ى مه‌ترسیان هه‌یه‌ له‌و وڵاته‌وه‌ى بۆى هاتوون ڕه‌وانه‌ ناكرێنه‌وه‌. حكومه‌ت له‌ئێستادا ئه‌و ڕێژه‌یه‌ زیاتر ده‌كات بۆ زیاتر له‌ 50٪. ئه‌گه‌ر ئه‌و یاسایه‌ جێبه‌جێ بكرێت، ئه‌وا یه‌كگرتنه‌وه‌ى خێزانى په‌ناخوازان له‌دواى گه‌یشتنیان به‌ به‌له‌م ڕه‌ت ده‌كرێته‌وه‌.

مۆریسۆن ڕایده‌گه‌یه‌نێت كه‌ خزمى كه‌سێك كه‌ خاوه‌نى ڤیزاى پاراستنه‌، هه‌مان ڤیزاى پێنادرێت ته‌نها له‌به‌رئه‌وه‌ى كه‌ له‌هه‌مان خێزانن. هه‌روه‌ها ئه‌وه‌ ده‌خاته‌ڕوو كه‌ گۆڕانكاریه‌كان واده‌كه‌ن كه‌ ئه‌ندامانى خێزانى خاوه‌ن ڤیزاى پاراستن هان نادرێن كه‌ بگه‌نه‌ ئوسترالیا. 

Wednesday, June 25, 2014

دادگایەكی بەریتانی بە مەرج منداڵێك دەداتەوە باوكە كوردەكەی

بڕیاری دادوەرێكی بەریتانی رێگە بە باوكێكی كوردی تاراوگەنشین دەدات كوڕە 7 ساڵانەكەی كە لە بەریتانیا لەدایكبووە، بباتەوە كوردستان و ژیانێكی نوێ دەستپێبكات. بڕیارەكە دوای ئەوە دێت كە دایكە ئینگلیزەكەی منداڵەكە و ماڵی ئەوان ناڕازی بوون لە بردنەوەی منداڵەكە بۆ كوردستان.
بڕیارەكە دوای لێكۆڵینەوەی شارەزایان هات، دوای ئەوەی گەیشتنە ئەو ئەنجامەی كە ئەو منداڵە لە شوێنێكی ئارامدا دەبێت و پێویستییەكانی خوێندنی بۆ دەستەبەر دەكرێت. 
سێ لە خزمانی باوكەكە لە رێگەی ڤیدیۆوە لە هەولێرەوە بەڵگەیان پێشكەشی دادوەر كرد و دادوەریان دڵنیاكردەوە كە منداڵەكە لە كوردستان باش پەروەردە دەكرێت.
دوای سێ رۆژ دانیشتن لە دادگای باڵای میدڵسبۆرۆ لە باكووری بەریتانیا، دادوەر بڕیاری دا منداڵەكە بداتە (د.ه) كە لە تەمەنی 15 ساڵیدا و لەساڵی 2002 گەیشتووەتە بەریتانیا و داوای مافی پەنابەری كردووە. 
منداڵەكە  (ل.د) لە ساڵی 2006 لەدایكبووە، ئەمەش تەنیا دوای یەك ساڵ لە پەیوەندییەكی ناجێگیری نێوان باوكەكە و دایكە ئینگلیزەكەی، ئەوان هەرگیز هاوسەرگیرییان نەكردووە.
ناسنامەی كەسەكان بە نهێنی هێڵدرایەوە بۆ پارێزگاریكردن لە ژیانی تایبەتیی منداڵەكە. یاسای بەریتانی بۆ پێدانی منداڵ بە دایك یان بە باوك، تەنیا جەخت دەكاتە سەر ژیان و گوزەرانی منداڵەكە، چ لایەك بۆ منداڵەكە باشە. یاسا گوێ بە ویست و خواستی دایك و باوك نادات.
دادوەر، جەستس كاب، بۆی دەركەوت كە منداڵەكە ژیانێكی سەختی هەبووە، ساڵێك لە ماڵێكی دیكە ژیاوە دوای ئەوەی كە دەركەوت دایكەكە گرنگی بە منداڵەكە نادات لە رووی سۆزەوە. 
دایك و باوكی منداڵەكە پێش لە دایكبوونی منداڵەكە لە یەكدی جیاببوونەوە. لە كاتی لە دایكبوونی منداڵەكەدا باوكی منداڵەكە لەگەڵ پەنابەرێكی دیكەدا لە باكووری بەریتانیا لە خانوویەكدا دەژیا. لە ساڵی 2011 باوكەكە وڵاتینامەی بەریتانی پێدرا. 
منداڵەكە لە ساڵی 2010 وە زۆربەی كاتەكانی لەگەڵ باوكیدا بەسەر دەبات و مامۆستاكانی بە "منداڵێكی خنجیلانەی رووخۆش" وەسفی دەكەن، بەڵام لە هەمانكاتدا منداڵەكە وا دەردەكەوت كە كێشەی فێربوونی هەیە. ئەو زمانی كوردی و ئینگلیزی بەتەواوەتی دەزانێت، ئەمانە بە دادوەری دادگاكە گوتران لە كاتی دانیشتنەكەدا.
دادوەر گەیشتە ئەو بڕوایەی كە دایكی منداڵەكە و باوانی دایكەكە، هەرچەندە پەیوەندیەكی زۆرباشیان لەگەڵ منداڵەكە هەیە، بەڵام كێشەی شەخسییان هەیە و ناتوانن بەپێی پێویست ئاگایان لە منداڵەكە بێت، ئەگەر ئەو منداڵە لە بەریتانیا بمێنێتەوە.
باوكەكە سوورە لەسەر گەڕانەوەی بۆ هەولێر بۆلای ژنە نوێیەكەی كە كوردێكی رۆژهەڵاتی كوردستانە و لە ساڵی 2011 لە ئێران مارەی بڕیوە. ئەو نەیتوانیوە ڤیزای بەریتانی بۆ ژنەكەی دابین بكات، لەبەرئەوە ژنە نوێیەكە ناتوانێت بچێت بۆ لای باوك و كوڕەكە لە بەریتانیا. لە راپۆرتە 15 لاپەڕەییەكەیدا دادوەر دەربارەی باوكەكە دەنووسێت "لە كاتی پێدانی بەڵگەی زارەكی، دەركەوت ئەو پیاوە شەكەت بووە بەدەست كێشەی خێزانییەوە".
باوكەكە زۆربەی بەڵگەكانی بە كوردی خستە پێش دادوەر و لە رێگەی وەرگێڕێكەوە دادوەر گوێی لە بەڵگەكان بوو. بەڵام بە ئینگلیزیش قسەی كرد بۆ ئەوەی پیشانی دادگای بدات كە دەتوانێت بە ئینگلیزی لەگەڵ كوڕەكەی قسە بكات و توانای زمانی ئینگلیزی منداڵەكە بپارێزێت.
دادوەرەكە لە راپۆرتەكەیدا دەنووسێت "من بۆچوونێكی باشم لا دروست بووە سەبارەت بە باوكەكە و بەڵگەكانی سەرنجڕاكێش بوون". ئەو هەروەها دەڵێت "باوكەكە پیشانی دا كە ئەو بە وریاییەوە مامەڵە لەگەڵ بەرپرسیارێتییەكانی دەكات وەكو باوك. "
دادوەر هەروەها دەنووسێت "روون بوو كە باوكەكە خۆشەویستی و دڵسۆزی بۆ بەریتانیا هەیە و سوور بوو لەسەر ئەوەی كە پارێزگاری لە وڵاتینامەكەی بكات و پەیوەندی خۆی بە وڵاتەكەیەوە بپارێزێت".
باوكەكە لە خواردنگەیەكی فاست فوود كار دەكات، بەڵام ئێستا لە هەولێر برایەكی بەڵێنی كارێكی پێداوە. براكەی بەڕێوەبەری كۆمپانیایەكی پێداویستی و كەوانتەری چێشتخانەیە.
باوكەكە و كوڕەكەی بە نیازن لە مانگی تەمووز، واتا كۆتایی ساڵی خوێندن لە بەریتانیا بەرەو كوردستان بگەڕێنەوە. منداڵەكە هەر لە ئێستاوە شوێنێكی لە یەكێك لە خوێندنگەكانی هەولێر بۆ دابینكراوە، لەوێ مامی جێگری بەڕێوەبەری خوێندنگەكەیە.
هارڤی مۆریس
رووداو - لەندەن

له‌ شه‌ش مانگى ڕابردوودا هیچ به‌له‌مێكى په‌ناخوازان نه‌گه‌یشتۆته‌ ئوسترالیا

كۆچى كوردان و كۆچ بۆ ئوسترالیا

فه‌رمانده‌ى سه‌ربازى ئۆپه‌راسیۆنى سه‌روه‌رى سنووره‌كانى ئوسترالیا، ژه‌نه‌ڕاڵ ئانگیوس كامپبێڵ له‌وبڕوایه‌دایه‌ كه‌ ئوسترالیا هه‌ڵوێستى به‌خشندانه‌ بووه‌ به‌رامبه‌ر په‌نابه‌ران. كامپبێڵ ڕایگه‌یاند ئه‌و ئۆپه‌راسیۆنه‌ى سه‌رپه‌رشتى ده‌كات ژیانى چه‌ندانى ڕزگار كردووه‌. هه‌روه‌ها ئه‌و لێدوانه‌ى وه‌زیرى كۆچى ئوسترالى سكۆت مۆریسۆنى دووباره‌ كرده‌وه‌ كه‌ له‌ماوه‌ى شه‌ش مانگى ڕابردوودا هیچ به‌له‌مێك نه‌گه‌یشتۆته‌ ئوسترالیا. هه‌روه‌ها ئه‌وه‌ى خسته‌ڕوو كه‌ هیچ گیان له‌ده‌ستدانێك له‌ناو ده‌ریادا له‌و ماوه‌یه‌دا ڕووینه‌داوه‌. له‌كاتێكدا بگه‌ڕێینه‌وه‌ بۆ داتا و ژماره‌كان نزیكه‌ى 180 كه‌س گیانیان له‌ده‌ستداوه‌ له‌ 2012-2013. هه‌روه‌ها كامپبێڵ ئه‌وه‌ى ڕایگه‌یاند كه‌ قاچاخچیه‌كان گروپى ڕێكراوى تاوانن كه‌ ڕووبه‌ڕووى مه‌ترسى بوونه‌ته‌وه‌ به‌ هه‌ر گۆڕانكاریه‌ك له‌ ڕێوشوێنه‌كانى حكومه‌تى ئوسترالی بۆ پاراستنى سنووره‌كان. هه‌روه‌ها ڕایگه‌یاند كه‌ هه‌ر پشوودانێكیان له‌و پڕۆسه‌یه‌ ده‌رفه‌ت ده‌به‌خشێت به‌ قاچاخچیه‌كان. كه‌ له‌ماوه‌ى نۆ مانگى ڕابردووى ئه‌و ئۆپه‌راسیۆنه‌دا 203 كه‌س ده‌ستگیركراون. 

Sunday, June 22, 2014

ئوسترالیا (10) هه‌زار دۆلار ده‌داته‌ په‌نابه‌ران


حكومه‌تی ئوسترالیا (10) هه‌زار دۆلار ده‌داته‌ ئه‌و په‌نابه‌ره‌ی، كه‌ له‌وڵاته‌كه‌یدایه‌‌و بۆ وڵاتی خۆی دیپۆرتده‌كرێته‌وه‌.

ئاژانسی هه‌واڵی فه‌ڕه‌نسا بڵاویكرده‌وه‌، سه‌رجه‌م په‌نابه‌رانی لوبنانی كه‌ له‌كه‌مپی (مانوس) له‌ئوسترالیا نیشته‌جێن، پێشنیازیان بۆ كراوه‌ دیپۆرتی وڵاته‌كه‌ی خۆیان بكرێنه‌وه‌، له‌به‌رامبه‌ردا له‌لایه‌ن حكومه‌تی ئوسترالیاوه‌ (10) هه‌زار دۆلاریان پێبدرێت.

ئه‌وه‌شخراوه‌ته‌ڕوو، به‌گوێره‌ی بڕیاره‌كه‌ی حكومه‌تی كانبێرا،  په‌نابه‌رانی ئێران‌و سودان كه‌ دیپۆرتده‌كرێنه‌وه‌، حه‌وت هه‌زار دۆلار‌و بۆ په‌نابه‌رانی ئه‌فغانیش، چوار هه‌زار دۆلاریان پێبدرێت، له‌كاتی دپۆرتكردنه‌وه‌ی په‌نابه‌رانی (پاكستان، نیپاڵ‌و میانمار)یشدا، (3300) دۆلاریان پێبدرێت.

بڕیاره‌كه‌ی حكومه‌تی ئوسترالیا له‌كاتێكدایه‌، پارساڵ له‌كاتی دیپۆرتكردنه‌وه‌ی په‌نابه‌راندا، (1500-2200) دۆلار ده‌درایه‌ ئه‌و په‌نابه‌رانه‌ی‌ ده‌گه‌ڕانه‌وه‌ بۆ وڵاته‌كانی‌ خۆیان.
-----------------------------------------------------------------
و: بیلال جه‌عفه‌ر

Friday, June 20, 2014

600 هەزار كەس داوای پەناپەرێتیان لە44 وڵات كردوە

بەپێی ئاماری نەتەوەیەكگرتوەكان ساڵی رابردوو 600 هەزار كەس داوای مافی پەنابەرێیت لە 44 ولاتكردوە‌و سبەینێش رۆژی جیهانی پەنابەرانە. 
بەرواری 20 ی حوزەیران هەموو ساڵێك ڕۆژی پەنابەرانی جیهانە كە بەبڕیارێكی نەتەوەیەكگرتووەكان لە ساڵی 2000 ەوە بە فەرمی ناسێنراوە. مەبەست لە یادكردنەوەی ئەو ڕۆژەش پیشاندانی هاوسۆزیەكە لەسەر ئاستی جیهان بۆ پرس و كێشەی پەنابەران و ئاوڕدانەوەیە لە قەبارەی كێشەكە و زیادكردنی هاریكاریەكانە بەئاڕاستەی كەمكردنەوەی خەم و ئازارەكانی پەنابەران. 
لەئامارەكانی كۆمیسیۆنی باڵای پەنابەرانی سەر بە نەتەوەیەكگرتووەكان بۆ ساڵی ڕابردوو بدەینەوە ، دەبینین كە زیاتر لە 600 هەزار كەس داوای مافی پەنابەرێتیان لە 44 ووڵاتی جیهان كردووە و نزیكەی 400 هەزاركەسیان لەوژمارەیە داوای مافی پەنابەرێتیان لە یەكێتی ئەوروپا كردووە. سەبارەت بەو ووڵاتانەش كە هاوڵاتیەكانی زۆرترین داواكاریان پێشكەشكردووە ، سوریا لەڕیزبەندی یەكەم دایە و لەسەدا نۆی هەموو پەنابەرانی جیهان پێكدەهێنێت. 
سەبارەت بە عێراقیش ، بەپێی هەمان ئامار ، عێراق لە ڕیزبەندی چوارەمدایە لەپاش سوریا و ڕووسیا و ئەفغانستان ، كە زیاتر بووە لە 38 هەزار كەس كە دەكاتە نزیكەی لە سەدا شەشی پەناخوازانی جیهان. ئەمەش لەكاتێكدایە كە ساڵی 2012 دا ، عێراق لە ڕیزبەندی حەوتەمدابووە. 
 هەموو ئەو كەسانەی كە داوایان پێشكەشكردووە پێیان دەگوترێت پەناخواز و لەئەگەری وەرگرتنی مافی پەنابەرێتیدا دەبنە پەنابەر كە بۆ ئەمەش بەشێوەیەكی سەرەكی پشت دەبەسترێت بە پێناسە بنچینەیەكی زاراوەی پەنابەر كە دەلێت  پەنابەر ئەو كەسەیە كە ناچاركراوە ووڵاتەكەی خۆی بەجێ‌ بهێڵێت و بەبەڵگەوە ئەوە دەسەلمێنێت كە ترسی ستەملێكردنی لەسەرە لەسەر بنەمای ئاینی یان نەژادی یان نەتەوەیی یان سیاسی كە هەموو ئەمانە وادەكەن نەتوانێت بگەڕێتەوە ووڵاتەكەی خۆی.
سەرچاوە : ماڵپەری فەرمی كۆمیسیۆنی باڵای پەنابەرانی سەربەنەتەوە یەكگرتووەكان
 ئامادەكردن: هەژار تەها

Monday, June 16, 2014

شێف و وه‌ستاى دیوارو كاشى ده‌توانن ئیقامه‌ى ئوسترالیا وه‌ربگرن

كۆچى كوردان و كۆچ بۆ ئوسترالیا


پیشه‌كانى وه‌ستاى دیوار و كاشى و شێف زیادكراون بۆ لیستى پیشه‌ى خاوه‌ن تواناكان له‌ مانگى ته‌موزى ئه‌مساڵه‌وه‌. به‌وشێوه‌یه‌ كرێكارانى بیانى خاوه‌ن توانا له‌و پیشانه‌دا ده‌توانن داواى ڤیزاى مانه‌وه‌ى هه‌میشه‌یى بكه‌ن به‌بێ بوونى سپۆنسه‌ر.
یارمه‌تیده‌رى وه‌زیرى كۆچ و پاراستنى سنووره‌كان میشیلیا كاش ڕایگه‌یاند كه‌ گۆڕانكاریه‌كان به‌پێى خواست بوون له‌سه‌ر ئه‌و پیشانه‌. هه‌روه‌ها حكومه‌تى فیدراڵى ژماره‌ى ئه‌و كرێكارانه‌ى ده‌ستنیشان كردووه‌ كه‌ ده‌توانن داوا بۆ ڤیزاى خاوه‌ن تواناكان پێشكه‌ش بكه‌ن كه‌ 43990 پۆسته‌ تاوه‌كو ساڵى داهاتوو. 

Wednesday, June 11, 2014

ئوسترالیا: په‌ناخوازێكی‌ كورد له‌ژێرمه‌ترسی‌ دیپۆرتكردنه‌وه‌دایه‌


عه‌لی‌ په‌هله‌وانی‌، ناوی‌ ئه‌و په‌ناخوازه‌ كورده‌یه‌ كه‌ حكومه‌تی‌ ئوسترالیا ڕه‌تی‌ ده‌كاته‌وه‌ مافی‌ په‌نابه‌رێتی‌ پێبدات و داوای‌ لێكراوه‌ كه‌ بگه‌ڕێته‌وه‌ وڵاته‌كه‌ی‌ خۆی‌ و مامۆستایه‌كی‌ زانكۆش له‌ ئوسترالیا كه‌له‌ نزیكه‌وه‌ ئاگاداری‌ كه‌یسه‌كه‌ی‌ عه‌لیه‌ ده‌ڵێت ڕه‌تكردنه‌وه‌ی‌ كه‌یسه‌كه‌ی‌ عه‌لی‌ دژی‌ بنه‌ماكانی‌ مافی‌ په‌نابه‌رانه‌. 
عه‌لی‌ ته‌مه‌ن 28 ساڵ به‌ڕه‌گه‌ز كوردی‌ فه‌یلیه‌و له‌ ئێران گه‌وره‌ بووه‌ و زیاتر له‌ دوو ساڵ له‌مه‌وبه‌ر به‌ به‌له‌م و به‌شێوه‌یه‌كی‌ نایاسایی‌ گه‌شتۆته‌ ئوسترالیا و مافی‌ په‌نابه‌رێتی‌ كاتی‌ وه‌رگرتووه‌ به‌ڵام حكومه‌تی‌ ئه‌و وڵاته‌ له‌پاش توندكردنه‌وه‌ی‌ یاساكانی‌ كۆچ بۆ ئه‌و په‌ناخوازانه‌ی‌ كه‌ به‌ به‌له‌م و به‌شێوه‌یه‌كی‌ نایاسایی‌ ده‌گه‌نه‌ ئه‌و ووڵاته‌ له‌ هه‌فته‌ی‌ ڕابردوودا ڕه‌تی‌ كردۆته‌وه‌ مافی‌ په‌نابه‌رێته‌یه‌كه‌ی‌ عه‌لی‌ نوێ‌ بكاته‌وه‌. 
ڕه‌تكردنه‌وه‌ی‌ كه‌یسه‌كه‌ی‌ عه‌لی‌ هاوكاته‌ له‌گه‌ڵ مانگرتنی‌ 75 په‌ناخوازی‌ تر له‌دوورگه‌ی‌ كریستماسی‌ ئوسترالیا كه‌ حه‌وتیان ده‌می‌ خۆیان دووریوه‌ته‌وه‌.
ئامی‌ نێسه‌ری‌، مامۆستای‌ زانكۆ له‌ زانكۆی‌ دیكن له‌ شاری‌ مێڵبۆرنی‌ ئوسترالیا ، له‌چاوپێكه‌وتێكیدا له‌گه‌ڵ ماڵپه‌ری‌ هه‌واڵی‌ ( مۆرنینگ بوله‌تین) ده‌ڵێت ڕه‌تكردنه‌وه‌ی‌ كه‌یسه‌كه‌ی‌ عه‌لی‌ ده‌گه‌ڕێته‌وه‌ بۆ ئه‌و پێناسه‌یه‌ی‌ كه‌ به‌سه‌ر په‌ناخوازاندا ده‌سه‌پێنرێت و به‌ ووته‌ی‌ ئه‌و پێناسه‌كه‌ هێنده‌ ته‌سككراوه‌ته‌وه‌ له‌و ووڵاته‌ كه‌ كه‌یسه‌كه‌ی‌ عه‌لی‌ ناچێته‌ ئه‌و چوارچێوه‌یه‌وه‌ كه‌ مافی‌ په‌نابه‌رێتی‌ پێبدرێت. 

Tuesday, June 3, 2014

ڤیزای ئەرمینیا به‌ده‌ست بهێنه‌

رۆژنامەنوسێك رایدەگەیەنێت كە دوای هەوڵ و ماندوبنێكی زۆری بۆیەكەم جار پەیوەندی ڕاستەوخۆی لەگەڵ وەزارەتی دەرەوەی ئەرمینیا بستوەو ئەوانیش بەفەرمی چەند كونسوڵخانەیەكیان ئاگادار كردۆتەوە كەوا لەمەولا ( ڕۆژنامەنووس نەبەز شوانی ) دەتوانێت ڤیزای ئەرمینیا بۆ هاوڵاتیانی هەرێمی كوردستان وەر گرێت .
رۆژنامەنوس نەبەز شوانی، لەلاپەرەی تایبەتی خۆی لەتۆری كۆمەڵایەتی فەیسبوك نوسیویەتی: دوای هەوڵدان و ماندوو بوونێكی زۆر سەرەنجام توانیم بۆیەكەم جار ڤیزای ئەرمینیا بۆ هاوڵاتیانی هەرێمی كوردستان دابین بكەم بەبێ هیچ مەرجێك .
ئەو رۆژنامەنوسە دەشڵێت: ئەم هەنگاوەش بەتەنها خۆم ناومەو توانیم پەیوەندی ڕاستەوخۆ لەگەڵ وەزارەتی دەرەوەی ئەرمینیا ببەستم و ئەوانیش بەفەرمی چەند كونسوڵخانەیەكیان ئاگادار كردۆتەوە كەوا لەمە بەدواوە ( ڕۆژنامەنووس نەبەز شوانی ) دەتوانێت ڤیزای ئەرمینیا بۆ هاوڵاتیانی هەرێمی كوردستان وەر گرێت
بۆیە لەم بەروارە بەدواوە هەر هاوڕێیەك دەیەوێت گەشت بكات بۆ ووڵاتی ئەرمینیا دەتوانێت پەیوەندیم پێوە بكات:
مەرجەكانی وەرگرتنی ڤیزە
یەكەم : خاوەنی پاسەپۆرتی عێڕاقی جۆری A بێت
دووەم : بەلانی كەمەوە بەرواری پاسەپۆرتەكەی ماوەی شەش مانگی مابیت
سێیەم : 4 وێنەی ملەوەن پشتی سپی بێت
چوارەم : ڤیزا بۆ ماوەی 21 ڕۆژ نرخەكەی 150 دۆلارە
پێنجەم : ڤیزا بۆماوەی 6 مانگ نرخەكەی 225 دۆلارە
شەشەم : ڤیزا بۆماوەی ساڵیك نرخەكەی 300 دۆلارە
وەر گرتنەوەی ڤیزای تەنها 5 ڕۆژی پیدەچیت لەو ڕۆژەوەی پێشكەشی دەكەیت
بۆ وەرگرتنی ڤیزای ئەرمینیا پەیوەندیم پێوە بكەن بەم ناو نیشانە
07503368555
یان
nabazawaz@yahoo.com

Monday, June 2, 2014

بۆ ڤیزاى ئوسترالیا كام تاقیكردنه‌وانه‌ى زمان قبووڵكراون؟

كۆچى كوردان و كۆچ بۆ ئوسترالیا
وه‌زاره‌تى كۆچى ئوسترالیا له‌ تشرینى دووه‌مى 2014ـه‌وه‌ ژماره‌یه‌كى زیاتر له‌ تاقیكردنه‌وه‌كانى هه‌ڵسه‌نگاندنى ئاستى زمان قبووڵ ده‌كات بۆ ڤیزاى جیاواز. هه‌ریه‌كه‌ له‌ تاقیكردنه‌وه‌كانى تۆفڵ ئاى بى تى، و تێستى زمانى ئینگلیزى پیه‌رسۆن، پى تى ئى، قبووڵ ده‌كرێن سه‌ره‌ڕاى تاقیكردنه‌وه‌كانى ئاى ئى ئێڵتس و تاقیكردنه‌وه‌ى ئۆیت.
ئه‌و ڤیزایانه‌ى كه‌ ئه‌م تاقیكردنه‌وانه‌ قبووڵ ده‌كه‌ن جگه‌ له‌ ڤیزاى خوێندكارى، ڤیزاى كاركردن و ڤیزاى پشتیوانى هه‌رێمى كۆچ و داهێنانى بازرگانى و وه‌به‌رهێنان.
یه‌كێك له‌ پسپۆڕه‌كانى بوارى په‌روه‌رده‌ ئه‌وه‌ى ڕاگه‌یاند كه‌ ئه‌م گۆڕانكاریه‌ هه‌واڵێكى زۆرباشه‌ بۆئه‌وانه‌ى كه‌ ده‌یانه‌وێت كۆچ بۆ ئوسترالیا بكه‌ن كه‌ كاتى زیاتریان بۆ ده‌گه‌ڕێته‌وه‌ و هه‌روه‌ها مۆنۆپۆڵى تاقیكردنه‌وه‌كانى ئاى ئى ئێڵتس نامێنێت.