Monday, September 30, 2013

120 په‌نابه‌ر به‌ به‌له‌مه‌كه‌یانه‌وه‌ نقومبون


به‌رپرسانی هێزه‌ ده‌ریایه‌كانی ئه‌نده‌نوسیا رایانگه‌یاند شه‌وی رابردو به‌له‌مێك كه‌ نزیكه‌ی 120 په‌نابه‌ری هه‌ڵگرتبوو له‌پێش گه‌شتنیان به‌دورگه‌ی كریسمسی ئوسترالیا نقوم بون و 
به‌پێی زانیاریه‌ سه‌ره‌تاییه‌كانیش تا ئێستا چاره‌نوسی 70 له‌و په‌نابه‌رانه‌ نادیاره‌و ته‌رمی 22 په‌نابه‌ر دۆزراونه‌ته‌وه‌ كه‌ زۆربه‌یان منداڵن.

ئاژانسی فرانس پرێس له‌ زاری به‌رپرسێكی پۆلیسه‌وه‌ ئاشكرایكردوه‌ كه‌ تا ئێستا گه‌ڕان به‌دوای ئه‌و په‌نابه‌رانه‌دا به‌رده‌وامه‌ كه‌ پێده‌چێت هه‌موویان خه‌ڵكی وڵاتانی خۆرهه‌ڵاتی ناوه‌ڕاست بن.

نقومبونی ئه‌و به‌له‌مه‌ش هاوكاته‌ له‌گه‌ڵ گێڕانه‌وه‌ی 44 په‌نابه‌ری تر له‌ ئوسترالیاوه‌ بۆ ئه‌نده‌نوسیا له‌پاش گه‌شتنیان به‌و وڵاته‌ وه‌ك سه‌ره‌تایه‌ك بۆ ئه‌و پلانه‌ی كه‌ سه‌رۆك وه‌زیرانی نوێی ئوسترالیا له‌ هه‌ڵمه‌تی هه‌ڵبژاردنه‌كانی ئه‌م دواییه‌ی ووڵاته‌كه‌ بانگه‌شه‌ی بۆ كرد. 

كۆچی نایاسایی په‌نابه‌ران له‌ڕێگه‌ی ده‌ریاوه‌ یه‌كێكه‌ له‌و گرفتانه‌ی كه‌ حكومه‌ته‌ یه‌ك له‌دوایه‌كه‌كانی ئه‌و وڵاته‌ هه‌وڵده‌ده‌ن چاره‌سه‌رێكی بۆ بدۆزنه‌وه‌ ئه‌ویش له‌ڕێگه‌ی به‌ندكردنی په‌نابه‌ران له‌ كه‌مپه‌ زۆره‌ملێكان و دیپۆرتكردنه‌وه‌یان و به‌مه‌ش سیاسه‌ته‌كانی ئه‌و وڵاته‌ هه‌میشه‌ جێگه‌ی نیگه‌رانی رێكخراوه‌كانی داكۆكیكارن له‌ مافی په‌نابه‌ران و وه‌ڵامی حكومه‌تی ئوسترالیا ئه‌وه‌یه‌ كه‌ ده‌یانه‌وێت كۆتایی بهێنێت به‌ قه‌یرانی نقومبونی به‌له‌می په‌نابه‌ران و هه‌وڵنه‌ده‌ن له‌ڕێگه‌ی ده‌ریاوه‌ خۆیان بگه‌یه‌ننه‌ ئه‌و ووڵاته‌ كه‌ زۆرجار به‌ كاره‌سات كۆتایی دێت.

Sunday, September 29, 2013

بەلەمێکى پەناخوازان لەلایەن هێزى دەریایى ڕەوانەى ئیندۆنیزیا کرایەوە



کۆچ بۆ ئوسترالیا و کۆچى کوردان
کەشتیەکى گەورەى هێزى دەریایى ئوسترالیا ئاوەکانى ئیندۆنیزیاى بەزاند لە سەرلەبەیانى هەینیدا و 44 پەناخوازى بۆ ئیندۆنیزیا گێڕایەوە، ئەمە لەکاتێکدایە کە دەزگاکانى گەڕان و ڕزگارکردنى پەناخوازان ڕایدەگەیەنن کە ئەمە یەکەم هەوڵى حکومەتى ئوسترالى نیە بۆ گێڕانەوەى پەناخوازان، لەسەردەمى حکومەتى ئابۆتدا. 
دەزگاى گەڕان و ڕزگارکردنى ئیندۆنیزى (باسارناس) جەختى لەوە کردەوە کە ئەو بەلەمانەى پەناخوازان بەکاریان هێناوە لە تەختە دروستکراوەو ئەوان لە ئێوارەى پێنج شەممەدا دەسەڵاتدارانى ئوسترالیایان لێ ئاگادار کردۆتەوە. 
بەپێى پڕۆتۆکۆڵێکى نێوان حکومەتى ئوسترالى و ئیندۆنیزى لە ساڵى ڕابردووودا، بەوپێیە وەزیرى گواستنەوە ئانتۆنى ئالبانێسێ، دەسەڵاتى ئەوەى پێداروە کە بچێتە ئاوەکانى ئیندۆنیزیاوە بۆ ڕزگارکردنى پەناخوازان. 
ئەو تیمە بەلەمەکەى پەناخوازەکانیان بەدى کردوووە کە 39 پیاو و ئافرەتێک و 4 منداڵى هەڵگرتووە، و وەکو پێویست نەبووە.
گروپێک لە پەناخوازەکان لەسەر بەلەمەکە جەختیان لەوە کردەوە کە لەلایەن هێزى دەریاییەوە ڕزگارکراون لەدواى ئەوەى نزیک بووە بەلەمەکەیان نوقم ببێت لەڕێگەیاندا بۆ گەیشتن بە دوورگەى کریسمس، کە سێ ڕۆژ لەناو دەریادابوون. 
هەروەها وتوویانە کە ئەوان بڕیارەکەى حکومەتى ئابۆتیان بەلاوە گرنگ نیە و نە پلانى پاپوا نیو گینیا، و دووبارە هەوڵدەدەن بگەن بە ئوسترالیا. 
وتەبێژى ئەو گروپە، یاسر حوسێن، دەڵێت، ئەگەر تۆنى ئابۆت نەیەوێت ئێمە وەکو پەناخواز قبووڵ بکات کە لەڕێگەى بەلەمەوە بگەینە ئەو وڵاتە، ئەوا با ڤیزامان بدەنێ. 
حوسێن دەڵێت، ئێمە دەمانەوێت بچینە هەر شوێنێک بێت ناورو یان پاپوا نیو گینیا یان ئوسترالیا. 
ئەگەر لایەنى ئاسایشمان بۆ فەراهەم بکەن ئەوا بۆهەمیشە لە پاپوا نیو گینیا دەمێنینەوە، ئەو وادەڵێت. 
هێزە دەریاییەکەى ئوسترالیا بەپێى پڕۆتۆکۆڵەکەى نێوان هەردوو وڵات، گەشتیارەکانى گەیاندەوە بە ئاوەکانى نزیک ئوسترالیا و بە کەشتیەکى ئیندۆنیزیا. 
سەرۆکى جێبەجێکارى هەرێمى جاکارتاى باسارناس، ئەحمەد فیردەوسى ڕایگەیاند، ئەمە سێیەم جارە لەدواى واژوو کردنى لێکتێگەیشتنەکە لە ساڵى ڕابردووەوە کە چالاکى لەمجۆرە ئەنجام دەدرێت لە ناوچەى ڕزگارکردندا. 
لەسەردەمى ئابۆتدا چاوەڕوان دەکرێت گەڕان و هەوڵەکانى حکومەتى ئوسترالى فراوانتر بێت و نزیک ببێتەوە لە ئاوەکانى ئیندۆنیزیا. 
ئەمە لەکاتێکدایە کە مارتى ناتالێگاوا وەزیرى دەرەوەى ئیندۆنیزیا ڕایگەیاند کە ئەو ڕێوشوێنەى ئوسترالیا ڕەت دەکاتەوە.


Wednesday, September 25, 2013

به‌ریتانیا فیزا ده‌داته‌ بازرگان و بزنسمانه‌كانی هه‌رێم



كونوسڵخانه‌ی تایبه‌تی به‌ریتانیا له‌هه‌وڵێر ده‌ستیكرد به‌پێدانی ڤیرزا به‌بازرگان و بزنسمانانی هه‌رێمی كوردستان.

له‌ مه‌راسیمی كردنه‌وه‌ی به‌شی پێدانی ڤیزا له‌كونسوڵخانه‌كه‌، كه‌ریم شنگالی وه‌زیری ناوخۆی هه‌رێم سوپاسی خۆی ئاراسته‌ی حكومه‌تی به‌ریتانیا كرد بۆ كردنه‌وه‌ی ئه‌و به‌شه‌ له‌كونسوڵخانه‌كه‌و ره‌خساندنی ده‌رفه‌ت له‌به‌رده‌م پیاواكانی كاری هه‌رێم بۆ سازدانی گه‌شتیه‌ بازرگانیه‌كانیان، ئاماژه‌ی به‌وه‌شكرد كه‌ حكومه‌تی هه‌رێم ئاماده‌یی خۆی پیشانداوه‌ بۆ هه‌موو كار ئاسانیه‌ك له‌به‌رده‌م سه‌رمایه‌گوزارانی به‌ریتانیا بێنه‌ هه‌رێمی كوردستان و كاری سه‌رمایه‌گوزاریی بكه‌ن . 

كه‌ریم شنگالی خۆشحاڵی خۆیشی پیشاندا له‌به‌رامبه‌ر ئاستی ئه‌و په‌یوه‌ندیانه‌ی  هه‌رێمی كوردستان و به‌ریتانیا پێكه‌وه‌ ده‌به‌ستێته‌وه‌. 

هه‌ر له‌مه‌راسیمه‌كه‌دا، كه‌ریم شنگالی، ئه‌وه‌ی خسته‌ڕوو كه‌ به‌رپرسانی هه‌رێم هانی كۆمپانیاكانی به‌ریتانیا ده‌ده‌ن بێنه‌ كوردستان و به‌شداریی له‌پرۆسه‌ی ئاوه‌دانكردنه‌وه‌و بنیاتنانه‌وه‌ی هه‌رێم دا بكه‌ن.  

كه‌ریم شنگالی وه‌زیری ناوخۆی هه‌رێم و لۆرد مارلاند نێرده‌ی تایبه‌تی سه‌رۆك وه‌زیرانی به‌ریتانیا بۆ كاروباری ئابوری و كونسوڵی گشتی به‌ریتانیا ئامه‌ده‌ی مه‌راسیمی به‌شی پێدانی ڤیزا بوون له‌كونسوڵخانه‌ی به‌ریتانیا له‌هه‌ولێر.  
خه‌ندان – 

Tuesday, September 24, 2013

زانكۆی‌ ئه‌مریكی‌: خوێندن به‌ خۆڕاییه‌


له‌ رونكردنه‌وه‌یه‌كدا زانكۆی‌ ئه‌مریكی‌ له‌ عیراق بڵاویانكردۆته‌وه‌، خۆی‌ به‌ خۆشحاڵ ده‌زانێت كۆمه‌كێكی‌ حكومه‌تی‌ هه‌رێمی‌ كوردستان بكات بۆ هاریكاریی‌ و پشتگیری‌ كردنی‌ په‌یام و ئامانجی‌ زانكۆی‌ ئه‌مریكی‌ له‌ عیراق.

له‌ به‌شێكی‌ دیكه‌ی‌ رونكردنه‌وه‌كه‌دا هاتووه‌، ئه‌م كۆمه‌كه‌ ده‌ڕوات به‌ره‌و سه‌ركه‌وتووه‌كانی زه‌ماله‌ی خوێندن كه‌ پێی ده‌ووترێت زه‌ماله‌ی خوێندنی نایابی ئه‌كادیمی.

هه‌روه‌ها  ئه‌و فێرخوازانه‌ی نمره‌ی 85% یان له‌ به‌كالۆریا به‌ده‌ستهێناوه‌ ده‌توانن داوا پێشكه‌ش بكه‌ن بۆ وه‌رگرتن له‌ زانكۆكه‌ و شیاو ده‌بن بۆ وه‌رگرتنی مینحه‌ی ته‌واوی خوێندن (كرێی خوێندن وه‌لاده‌نرێت) بۆ ده‌وام كردن له‌ زانكۆی ئه‌مریكی له‌ عیراق.

ئه‌مه‌ش ده‌قی‌ روونكردنه‌وه‌كه‌یه‌:

زانكۆی ئه‌مریكی له‌ عێراق، سلێمانی كۆمه‌كێكی حكومه‌تی هه‌رێمی كوردستان و پرۆگرامی زه‌ماله‌ی خوێندن بۆ سه‌ركه‌وتووه‌كان راده‌گه‌یێنێت. 
  
زانكۆی ئه‌مریكی له‌ عێراق، سلێمانی (AUIS)، خۆی به‌ خۆشحاڵ ده‌زانێت به‌ ڕاگه‌یاندنی كۆمه‌كێكی  حكومه‌تی هه‌رێمی كوردوستان بۆ هاریكاریی و پشتگیری كردنی په‌یام و ئامانجی زانكۆی ئه‌مریكی له‌عێراق، سلێمانی بۆ پێشكه‌شكردنی خوێندنی كوالیتی ئاست به‌رز و به‌تواناكردنی چین ونه‌وه‌ی گه‌نج. ئه‌م كۆمه‌كه‌ ده‌ڕوات به‌ره‌و سه‌ركه‌وتووه‌كانی زه‌ماله‌ی خوێندن كه‌ پێی ده‌ووترێت زه‌ماله‌ی خوێندنی نایابی ئه‌كادیمی. ئه‌و فێرخوازانه‌ی نمره‌ی 85% یان له‌ به‌كالۆریا به‌ده‌ستهێناوه‌ ده‌توانن داوا پێشكه‌ش بكه‌ن بۆ وه‌رگرتن له‌ زانكۆكه‌ و شیاو ده‌بن بۆ وه‌رگرتنی مینحه‌ی ته‌واوی خوێندن (كرێی خوێندن وه‌لاده‌نرێت) بۆ ده‌وام كردن له‌ زانكۆی ئه‌مریكی له‌ عێراق، سلێمانی. ئه‌م مینحه‌یه‌ هه‌موو ساڵێك پیاچوونه‌وه‌ی بۆ ده‌كرێت، هه‌تا فێرخوازان به‌رده‌وام بن له‌ خوێندندا له‌ ئاستی لێهاتوییدا، مینحه‌كه‌ هه‌موو ساڵێك نوێ ده‌كرێته‌وه‌. 
  
بۆردی ئه‌مینداران سوپاسگوزاری سه‌ره‌ك وه‌زیران نێچیره‌ڤان بارزانی و حكومه‌تی هه‌رێمی كوردوستانه‌ بۆ ئه‌م هاوكارییه‌ جوامێرانه‌یه‌ی زانكۆكه‌ و فێرخوازه‌ گه‌نجه‌كان.

بۆ زانیاری زیاتر و پێشكه‌شكردنی داواكاری وه‌رگرتن، تكایه‌ سه‌ردانی ماڵپه‌ڕه‌كه‌مان بكه‌ن http://www.auis.edu.iq/ku/node/1199

یان په‌یوه‌ندی بكه‌ن به‌ زانكۆی ئه‌مریكی عێراق، سلێمانی به‌م ژماره‌ مۆبایله‌ +964 0770 461 7555
دوا به‌روار بۆ پێشكه‌شكردنی داواكاری وه‌رگرتن 6/ 10/ 2013 یه. بڕیاره‌كانی وه‌رگرتن له‌ دوای 15/10/2013 وه‌ ڕاده‌گه‌یه‌نرێت. 

ده‌رباره‌ی زانكۆی ئه‌مریكی عێراق، سلێمانی
زانكۆی ئه‌مریكی عێراق، سلێمانی دامه‌زراوه‌یه‌كی قازانجنه‌ویسته‌ له‌پێناو  به‌رژه‌وه‌ندی گشتی دا له‌ سلێمانی، عێراق. له‌ ئێستادا ئه‌م زانكۆیه‌ پێنج بڕوانامه‌ی زانكۆیی پێشكه‌ش ده‌كات كه‌ بریتین له‌ ( ئه‌ندازیاری گشتی، ڕۆژنامه‌وانی ئینگلیزی، به‌ڕێوه‌بردنی كار، دیراساتی نێوده‌وڵه‌تی، ته‌كنۆلۆجیای زانیاری) كه‌ بنه‌مایه‌كی پته‌وی زانیاری و توانای تایبه‌ت به‌ پیشه‌سازی ده‌سته‌به‌ر ده‌كات و هانی بیركردنه‌وه‌ی ڕه‌خنه‌گرانه‌ ده‌دات. سه‌ره‌ڕای ئه‌وانه‌ش، زانكۆكه‌ پرۆگرامێكی تایبه‌تیی‌ ماسته‌ر له‌ به‌ڕێوه‌بردنی كاردا پێشكه‌ش ده‌كات بۆ به‌رزكردنه‌وه‌ی ئاستی ئه‌دایان له‌ ژینگه‌ی كاری به‌جیهانی كراودا.

Monday, September 23, 2013

چیرۆکى پەناخوازێک لە دوورگەى مانوس کە دەیەوێت لە ئوسترالیا ببێتە پەنابەر


کۆچى کوردان و کۆچ بۆ ئوسترالیا
بارودۆخمان زۆر خراپە. منداڵەکانمان دەچنە قوتابخانەیەکەوە کە هیچ فێنککەرەوەیەکى تێدا نیە. چەندان منداڵ و ئافرەتیان هێناوە بۆ ئەم دوورگەیەو بەشێوەیەکى باش مامەڵەیان لەگەڵدا ناکەن، بەهۆى گەرمى ژینگەکەوە و هەموویان لە بارودۆخێکى زۆر گەرم و کەشوهەوایەکى ناخۆشدان کە ئارەزووى خواردن بەتەواوى لەدەست دەدەن. تواناى ئەوەیان نامێنێت کە خواردن بخۆن چونکە بەهۆى کەشوهەواى گەرمەوە ئارەزووى خواردنیان نیە .منداڵەکانمان کێشیان دابەزیوە، خەڵکى وادەزانن کە ئوسترالیا ڕێز لە ئافرەت و منداڵ دەگرێت، بەڵام هەموو شتێک لێرە پێچەوانەى ئەوەیە پێشبینى دەکرێت. ئێمە داواى فێنککەرەوە دەکەین لە قوتابخانەدا بۆ منداڵەکانمان. زۆر گەرمە و تەنها دوو پانکە لە ژوورەوەدایە و خەرکە لە گەرماندا دەمرین. بەهۆى ئەو گەرمایەوە نەدەتوانن بخوێنن و نە دەتوانن بخەون و نە دەتوانن بحەوێنەوە. منداڵەکان زۆر گەنجن لە ژێر تەمەنى 10 ساڵیدان و بەرگەى ئەو گەرمایە ناگرن. خەڵکى نەخۆش دەکەون و پیردەبن بەهۆى گەرماوە. یەکێک لە ئافرەتەکان کێشەى بەردى گورچیلەى هەیە و لێرە بارودۆخی تەندروستى زۆر خراپە. ئافرەتێکى لێیە کە ڕەبۆى هەیە دوو جار بێهۆش کەوت، هەندێ لە خەڵکى بەهۆى گەرماوە پێستیان کاریگەر بووە، چونکە کەشوهەوایەکە زۆر خراپە. هەندێ لە خەڵکى ناتوانن لەم بارودۆخەدا هەناسە بدەن. هەندێ لە خەڵکى ئازارى دانیان هەیە. 
ئەم بارودۆخە کاریگەرى لەسەر بیروهۆش و جەستەمان داناوە. پێتانوایە ئەوە کارێکى مرۆڤانەیە کە چەندین خەڵک بخەنە خێمەکانەوە. کە هیچ گەرماوێکى پێویستى لێنیە. ئەم شوێنە بەڕاستى کۆن و پەڕپوتە و هیچى تێدا نیە، تەنانەت پەنجەرەو دەرگاکانیشى زۆر خراپن. ئێمە نازانین کە چەند لێرە دەمێنینەوە. هیچ تایبەتمەندى و نهێنیەکمان سەلامەت نیە. 
بۆچى ئێمە دەخەنە ناوچەیەکى مەترسیدارەوە کە مەترسى ئەوە هەیە کە تووشى مەلاریا ببین. خەڵکى کاریگەر بوون بەو بارودۆخە و لەسەر قۆڵ و قاچیان کاریگەرى تەواو هەیە. منداڵەکانمان زۆر هەستیارن بەو بارودۆخە. ئاوى پاکى خواردنەوەمان نیە و زۆر کەمە. ئێمە بیروهۆشمان زۆر کاریگەر بووە بەو بارودۆخە، و لە بارودۆخێکى زۆر خراپداین. لەناو مشک و جرج و گیانلەبەرى پیسدا دەژین. دەرمان و دەرزیمان لێدەدەن بۆئەوەى هَمن ببینەوە بەڵام ئەوە هیچ کاریگەرییەکى نیەو بارودۆخەکە باشتر نابێت. 
پێویستمان بە فێنککەرەوە هەیە بۆ یەکەکان و بۆئەوەى خەومان لێکەوێت و چیتر شێت نەبین. هیچ شوێنێکى پشوومان نیە. لە دوورگەى کریسمس ئێمە فێنککەرەوەمان هەبوو، و ئامێرى جلشۆردن و سەلاجە لە ژوورەکانماندا بوو. خواردنەکەشمان باش نیە، لە دوورگەى کریسمس خواردن باش نەبوو بەڵام دەرفەتى ئەوە هەبوو بگەڕێین و خواردن بۆ منداڵەکانمان پەیدا بکەین. 
ئێمە دڵنیا نین لە بارودۆخى خۆمان، نازانین کە چەندى تر لێرە چاوەڕێ دەکەین. نازانین کە لە داهاتوودا چى ڕوودەدات. لەوبڕوایەداین کە هیچ کەسێک گرنگى نادات بەئێمە و ئێمە سزادراوین چونکە ئێمە ڕاستیەکەیان پێدەڵێن. کام وڵات ئێمە قبووڵ دەکات و ئێمە چەندى تر لێرە دەمێنینەوە. ژیانمان لە مەترسیدایە و کاتێک گەشتمان کرد بۆ ئێمە هیوامان بە ئازادى هەبوو بەڵام ئێمە لە بارودۆخێکداین کە کاریگەرە بە بارودۆخى سیاسى و ئێمە قوربانیەکە دەدەین. ئەوەى ئێمە لێرە دەیڵێین بارودۆخەکە ڕوون دەکاتەوە، و ئەوە تەنها کێشەى ئێمەیە کە پێویستمان بە فێنککەرەوەیە و دەرگاکانمان بۆ چاک بکەنەوەو ئێمە نیگەرانین لەبارەى داهاتوومانەوە. 

Sunday, September 22, 2013

كۆشكی سپی كچه‌ كوردێكی خه‌ڵات كرد


رۆژی پێنجشەممە له‌ كۆشكی سپی، كچه‌ كوردێك كه‌سه‌ر عه‌بدوڵا، خوێندكاری ماسته‌ر و دانیشتوی شاری ناشڤێڵ له‌ ویلایه‌تی تێنیسی ئه‌مریكا خه‌ڵات كرا. له‌ به‌ر هه‌وڵه‌كانی بۆ پێكه‌وه‌ ژیانی ئاشتیانه‌ له‌ نێوان ئایین و نه‌ته‌وه‌ جیاوازه‌كان و كاركردنی له‌گه‌ڵ په‌نابه‌ره‌كاندا بۆ تێكه‌ڵبونیان له‌ كۆمه‌ڵگای ئه‌مریكا.
ئه‌و خه‌ڵاته‌ كه‌ به‌ “پێشه‌نگی گۆڕان” له‌ پرۆگرامی “به‌خێرهاتنی ئه‌مریكا” كه‌له‌ لایه‌ن كۆشكی سپیه‌وه‌ دانراوه‌ بۆ تاكه‌كه‌س و بیزنس و رێكخراوه‌كان كه‌ یارمه‌تی كۆمه‌ڵگاكانیان له‌ ئه‌مریكا ده‌ده‌ن بۆ به‌هێزتربونیان و هاندانیان بۆ به‌شداریكردن له‌ ژیانی گشتی له‌و وڵاته‌.
كه‌سه‌ر عه‌بدوڵا یه‌كێك له‌و 10 كه‌سه‌یه‌ كه‌  پێنج شه‌ممه‌ 19 ئه‌یلول خه‌ڵاتكرا كه‌ به‌ وته‌ی كۆشكی سپی 17 ساڵه‌ هه‌وڵی “مه‌زن” ده‌دات له‌ به‌ره‌وه‌ پێشبردنی شاری ناشڤێڵ كه‌ له‌ لایه‌ن میدیای ئه‌و شاره‌و و كورده‌كانی‌ دانیشتوی‌ ئه‌و شاره‌وه‌ نازناوی “كوردستانی بچوك”ی پێدرواه‌.
كه‌سه‌ر عه‌بدوڵا له‌ گوندی بێگداوده‌ له‌ پارێزگای دهۆك له‌ 1986 له‌ دایك بوه‌ و چه‌ندین كه‌سی بنه‌ماڵه‌كه‌ی له‌ لایه‌ن حكومه‌تی به‌عسه‌وه‌ كوژراون. كه‌سه‌ر له‌ 1988 تا 1992 له‌گه‌ڵ خێزانه‌كه‌ی له‌ كه‌مپی په‌نابه‌ران له‌ شاری مێردین له‌ كوردستانی توركیا ژیاون و له‌ ئه‌یلولی 1992 له‌ لایه‌ن حكومه‌تی ئه‌مریكاوه‌ مۆڵه‌تی نیشته‌جێبونیان پێدراوه‌ له‌و وڵاته‌.
برنادێت میهان، وته‌بێژی كۆشكی سپێ له‌ ئیمه‌یڵێكدا به‌ رۆژنامه‌ی‌ هاوڵاتی راگه‌یاند “كه‌سه‌ر به‌ هه‌وڵه‌كانی له‌ رێگه‌ی (ده‌سپێشخه‌ری به‌خێرهاتنی تێنیسی) كاری باشی كردوه‌ بۆ ئه‌وه‌ی كۆچبه‌ران تێكه‌ڵی كۆمه‌ڵگای ناشڤێڵ بن. هه‌وڵه‌كانی ئه‌و كچه‌ بوه‌ هۆی ئه‌وه‌ كه‌ ناشڤێڵ ببێت به‌ شارێكی كراوه‌ و شوێنی گفتوگۆ و جێگربونی خه‌ڵكی جیاواز كه‌ بوه‌ به‌ یه‌كێك له‌ باشترین لایه‌نه‌كانی تێنیسی.”
كه‌سه‌ر عه‌بدوڵا كه‌ ئیستا خوێندكاری ماسته‌ره‌ له‌ “كۆنترۆلكردنی شه‌ر” له‌ زانكۆی لاپتنی تێنیسی له‌ رێگه‌ی ته‌له‌فونه‌وه‌ به‌ هاوڵاتی ڕاگه‌یاند “به‌ راستی پێشبینی ئه‌مه‌م نه‌ده‌كرد. جێی‌ زۆر شانازیه‌ بۆ من و هیوادارم كه‌ ئه‌م خه‌ڵاته‌ ببێته‌ جێ ئۆمید و هاندان بۆ كه‌سانی تر. خه‌ڵكی كورد له‌ ناشڤیَڵ گه‌وره‌ترین كه‌مینه‌ن به‌ڵام هێشتا زۆر كه‌س له‌ ئه‌مریكا له‌ به‌سه‌رهاتی كورد ئاگادار نیه‌.”
شاری ناشڤێڵ به‌ “شاری مۆسیقا”ش ناسراوه‌ و له‌ ساڵی 2010دا ژماره‌ی دانیشتوانی ناوچه‌ی ناشڤێل زیاد له‌ 1 ملیۆن و 500 هه‌زار كه‌س بو كه‌ له‌و ژماره‌یه‌ به‌ وته‌ی كه‌سه‌ر عه‌بدوڵا 10-15 هه‌زاریان كوردن. زۆربه‌ر ئه‌و كۆردانه‌ی دانیشتوی ئه‌و شاره‌ن خه‌ڵكی كۆردستانی باشورن به‌ڵام كوردی پارچه‌كانی تری كوردستانی تێدا هه‌یه‌.
ڕه‌مزیه‌ سوله‌یمان كه‌ ئه‌ویش كچه‌ كوردێكی‌ شاری زاخۆیه‌ و له‌ ناشڤێڵ نیشته‌جیه‌ و كه‌سه‌ر له‌ نزیكه‌وه‌ ده‌ناسێت پێ وایه‌ كه‌ كه‌س به‌ قه‌د كه‌سه‌ر شایانی ئه‌و خه‌ڵاته‌ی كۆشكی سپی نیه‌. ڕه‌مزیه‌ كه‌ له‌گه‌ڵ كه‌سه‌ر له‌ سه‌نته‌ری ئه‌مریكی “ئاوتریچ” له‌ شاری ناشڤێڵ كاریان كردوه‌ وئیستا به‌رپرسی سیاسه‌ته‌كانی ئه‌و سه‌نته‌ره‌یه‌ به‌ هاوڵاتی‌ وت “من زۆر شانازیی ئه‌كه‌م به‌ كه‌سه‌ر عه‌بدوڵا بێگداوده‌ له‌به‌ر هه‌وڵه‌كانی و خزمه‌تكردنی نه‌ته‌نیا كۆمه‌ڵگای كوردی به‌ڵكو هه‌مو كه‌سێك.”
له‌ 2005دا، كه‌سه‌ر له‌ زانكۆی حكومی تێنیسی به‌كالۆریسی كۆمه‌ڵناسی ته‌واو كردوه‌ و كاتێك كه‌ له‌و زانكۆ وانه‌ی خوێندوه‌ له‌ سه‌نته‌ری ته‌ندروستی لێكۆڵینه‌وه‌ی ئه‌و شوێنه‌ كاری كردوه‌ وه‌ك سه‌رۆكی كۆمه‌ڵه‌ی خوێندكارانی مۆسڵمانی ئه‌و زانكۆیه‌ هه‌ڵبژێردراوه‌.
كه‌سه‌ر له‌ كانونی دوه‌می 2006 له‌ په‌یمانگای رابه‌رایه‌تی مه‌ده‌نی مۆسڵمانانی ئه‌مریكا ده‌سبه‌كار بوه‌. له‌ زۆر كۆنفراس له‌ نێوان ئاینه‌كان به‌شداری كردوه‌ و له‌سه‌ر زۆر ته‌وه‌ر قسه‌ی كردوه‌ له‌وانه‌، كۆچبه‌ری، كوردستان و خه‌ڵكی كۆرد، رۆڵی ژنانی مۆسڵمان، و ژیانی خۆی وه‌ك موسڵمانێك له‌ ئه‌مریكا له‌ دوای هێرشه‌كانی 11 سیپتامبری 2001. ئه‌و كچه‌ كۆرده‌ به‌شداری فیلمی دۆكیۆمینته‌ری “كۆردستانی بچوك: ئه‌مریكا” كردوه‌ بۆ ته‌له‌ڤزیۆنی گشتی شاری ناشڤێڵ، ئێستا كه‌سه‌ر سه‌رۆكی‌ خوێندنگای‌ ڤالۆره‌.
كه‌سه‌ر به‌ هاوڵاتی ده‌ڵێت كه‌ ئه‌م خه‌ڵاته‌ بۆ ئه‌و زۆر گرنگه‌ له‌به‌ر ئه‌وه‌ كه‌ “من منداڵیم له‌ شه‌ڕ و له‌ كه‌مپی په‌نابه‌ران به‌سه‌ر بردوه‌ و كاتێكیش له‌ ئاماده‌یی بوم كارم كردوه‌ بۆ ئه‌وه‌ی كه‌ یارمه‌تی دایك و باوكم بده‌م بۆ ئه‌وه‌ی بتوانن ژیانمان دابین بكه‌ن.”
باراك ئۆباما له‌سه‌ر 19 ئه‌یلول كه‌ له‌و وڵاته‌ به‌ رۆژی ده‌ستور و هاوڵاتیبون ناونراوه‌ له‌ به‌یانێكدا رایگه‌یاند:”ئیمه‌ به‌ شانازیه‌وه‌ نه‌ته‌ویێكین كه‌ له‌ كۆچبه‌ر پێكهاتوین …كه‌ ژیانی خۆیان كردوه‌ته‌ قوربانی بۆ ئه‌وه‌ی منداڵه‌كانیان داهاتویه‌كی رونیان هه‌بێت. هه‌مو ساڵێك له‌ رۆژی هاوڵاتیبوندا، ئێمه‌ به‌ خێرهاتنی ئه‌ندامه‌ نوێكانی خێزانی ئه‌مریكا ده‌كه‌ین كاتێك كه‌ سوێند به‌ ده‌ستور ده‌خۆن و ده‌بن به‌ به‌شێك له‌ ئێمه‌ بۆ ئه‌وه‌ی به‌شێكی نوێ چیرۆكی نه‌ته‌وه‌ییمان بنوسین.”
كه‌سه‌ر عه‌بدوڵا له‌گه‌ڵ هاوسه‌ره‌كه‌ی‌ رێبه‌ر عه‌بدولره‌حمان‌و دومنداڵه‌كه‌ی‌ جه‌ننه‌‌و روه‌یدا له‌ ناشڤێڵكه‌سه‌ر عه‌بدوڵا له‌گه‌ڵ هاوسه‌ره‌كه‌ی‌ رێبه‌ر عه‌بدولره‌حمان‌و دومنداڵه‌كه‌ی‌ جه‌ننه‌‌و روه‌یدا له‌ ناشڤێڵ
 
 فازڵ هۆرامی‌،  تایبه‌ت به‌ هاوڵاتی‌

Saturday, September 21, 2013

بڕیارێكی‌ حكومه‌ت سه‌باره‌ت به‌ خوێندكارانی‌ ماسته‌ر و دكتۆرا له‌ ده‌ره‌وه‌ی‌ وڵات


ئه‌نجومه‌نی‌ وه‌زیران بڕیار ده‌دات له‌سه‌ر خه‌رجكردنی‌ موسته‌حه‌قاتی‌ دارایی گشت حاڵه‌ته‌كانی‌ پێشووی‌ مۆڵه‌تی‌ خوێندن له‌ وه‌زاره‌تی‌ خوێندنی‌ باڵاو توێژینه‌وه‌ی‌ زانستی‌‌و گشت وه‌زاره‌ته‌كانی‌ دیكه‌ی‌ حكومه‌تی‌ هه‌رێم‌و لایه‌نه‌كانی‌ نه‌به‌ستراو به‌ وه‌زاره‌ت كه‌ مۆڵه‌تی‌ خوێندنیان وه‌رگرتووه‌ بۆ ته‌واوكردنی‌ ماسته‌ر و دكتۆرا له‌ ده‌ره‌وه‌ی‌ هه‌رێم.

سكرتارییه‌تی‌ ئه‌نجومه‌نی‌ وه‌زیران به‌ ئیمزای‌ محه‌ممه‌د قه‌ره‌داغی‌، ، ئه‌مڕۆ پێنجشه‌ممه‌  به‌ نووسراوی‌ ژماره‌ 9174  كه‌ وێنه‌یه‌كی ده‌ست خه‌ندان كه‌وتووه‌، داوا له‌سه‌رجه‌م وه‌زاره‌ته‌كان ده‌كات بڕیاری‌ ئه‌نجومه‌نی‌ وه‌زیرانی‌ ژماره‌ 61 له‌ (9ی ئه‌یلولی2013) جێبه‌جێ بكه‌ن به‌ پێی تایبه‌تمه‌ندی‌.

له‌ بڕیاره‌كه‌دا، هاتووه‌ :" ئه‌نجومه‌نی‌ وه‌زیران بڕیار ده‌دات له‌سه‌ر خه‌رجكردنی‌ موسته‌حه‌قاتی‌ دارایی گشت حاڵه‌ته‌كانی‌ پێشووی‌ مۆڵه‌تی‌ خوێندن له‌ وه‌زاره‌تی‌ خوێندنی‌ باڵاو توێژینه‌وه‌ی‌ زانستی‌‌و گشت وه‌زاره‌ته‌كانی‌ دیكه‌ی‌ حكومه‌تی‌ هه‌رێم‌و لایه‌نه‌كانی‌ نه‌به‌ستراو به‌ وه‌زاره‌ت كه‌ مۆڵه‌تی‌ خوێندنیان وه‌رگرتووه‌ بۆ ته‌واوكردنی‌ ماسته‌ر و دكتۆرا له‌ ده‌ره‌وه‌ی‌ هه‌رێم ".

ته‌ئكیدیشكراوه‌ته‌وه‌، بڕیاره‌كه‌ ته‌نها ئه‌و كه‌سانه‌ ده‌گرێته‌وه‌ كه‌ تا به‌رواری‌ (9ی ئه‌یلولی2013) به‌ره‌سمی‌ په‌یوه‌ندییان به‌ زانكۆكانیان كردووه‌‌و خوێندنیان ده‌ستپێكردووه‌.




خه‌ندان- سۆران كه‌ریم

Thursday, September 19, 2013

ڤیزاى کاتى ئوسترالیا چیە؟


کۆچى کوردان کۆچ بۆ ئوسترالیا 
لەسەردەمى حکومەتى (هاوەرد)دا ئوسترالیا لەنێوان ساڵانى 1999-2007 ڤیزاى پاراستنى کاتى دەبەخشى. تۆنى ئابۆت دووبارە ئەو جۆرە ڤیزایەى ڕاگەیاندەوەو بڕیارى ئەوەیدا کە دووبارە ئەو ڤیزایە دەبەخشێت بەو پەناخوازانەى دەردەکەوێت پەنابەرى ڕاستەقینەن. 
لەئێستادا ئەو پەناخوازانەى کە ڤیزاى پەڕینەوەیان بۆدەکراوەو بڕیاروایە لەم دواییانەدا ڤیزاى کاتى وەربگرن. لەئێستادا هەندێ بۆچوونى پەناخوازانتان بۆ بڵاودەکەینەوە کە لە ڕابردوودا ڤیزاى پاراستنى کاتیان وەرگرتووە. 
پەناخوازێکى عێراقى کە لە ساڵى 2003دا هەڵگرى ئەو جۆرە ڤیزایە بوو، ڕایگەیاند "بەبۆچوونى من، ئەو جۆرە ڤیزایە وەکو زیندانى وایە. ژیانمان هەیە بەبێ هیوا، و ئامانج. زۆر بە سادەیى بڵێم ئەوەى خەڵکى دەیەوێت لەم ژیانەدا بەدەستى بهێنێت هیوایە. بەبێ هیوا ژیان هیچ مانایەکى نیە. 
هەڵگرێکى ترى ئەو ڤیزایە لە 2006، دا دەڵێت ئەم حکومەتە زۆر ناشایستە مامەڵە دەکات بەرامبەر ئێمە... کەى من دایک و خوشکەکانم دەبینم؟ باوکم نەخۆشە و دەیەوێت خێزان و منداڵەکانى هەموو کۆببنەوە لە یەک شوێندا. دەترسێت لەوەى بەرلەوەى ئێمە ببینێت گیانى لەدەست بدات. 
داهاتووى ئێمە و قەدەرى ئێمە نەزانراوە. هیچ ئازادییەکمان نیە، و لە ناوەندى دەستبەسەرکردن هاتووینە دەرەوە بەڵام وەکو ئەوەیە کە لە زیندانێکدا بین، ئەمەش گوتەى پەنابەرێکى ترى هەڵگرى ئەو جۆرە ڤیزایە بوو. 
لێکۆڵینەوەیەک ئەوەى پیشانداوە کە هەڵگرانى ئەو جۆرە ڤیزایە تووشى چەندین نەخۆشى دەروونى بوون بەهۆى ئەوەى هەڵگرانى ئەو ڤیزا کاتیە نەیانتوانیوە لەگەڵ خێزانەکانیاندا یەکبگرنەوە و مافى ئەوەیان نیە کە گەشت بۆدەرەوەى وڵات بکەن بۆ بینینى خێزانەکانیان لەدەرەوەى وڵات و لەدواى سێ ساڵ ئەگەرى هەیە کە ڕەوانەى وڵاتەکەى خۆیان بکرێنەوە. 
لەئێستادا ئەوانەى هەڵگرى ڤیزاى پەڕینەوەن بۆچوونیان لەبارەى ڤیزاى پاراستنى کاتیەوە بەوشێوەیەیە: 
پەناخوازێکى ئێرانى دەڵێت: بەم ڤیزایە لەوبڕوایەدام جیاکارى بەرامبەر ئێمە دەکرێت. ئێمە حەزدەکەین وەکو خەڵکى ئاسایى بژین. حەزدەکەین ئەندامێک بین لە خێزانەکەمان. حەزدەکەین کە ژیانى خۆمان دروست بکەین. و منداڵمان هەبێت. بەڵام چۆن؟ بەم جۆرە ڤیزایە نازانین کە داهاتوومان چى دەبێت. 
پەناخوازێکى ترى ئێرانى دەڵێت، حەزدەکەم بە سیاسییەکان بڵێم: ئێمە مەخەنە ناو ڕکابەرییەکانى خۆتانەوە. تکایە لە ئێمە تێبگەن چونکە ئێمە مرۆڤین. 
پەناخوازێکى هازارا دەڵێت: خێزانەکەم زۆر نیگەرانن و زۆر خەمبارن. هەموو ڕۆژێک و هەمووکاتێک من بیریان دەکەم. 

سەرۆک وەزیرانى نوێى ئوسترالیا چى دەکات


کۆچ بۆ ئوسترالیا و کۆچى کوردان
دوێنى تۆنى ئابۆت سوێندى یاسایى خوارد وەکو سەرۆک وەزیرانى نوێى ئوسترالیا و پەیمانیدا کە بەزوویى شەپۆلى هاتنى پەناخوازان بەرەو ئوسترالیا لەڕێگەى بەلەمەوە لە ئیندۆنیزیاوە هێواش بکاتەوە. 
ئابۆت ڕایگەیاند، کە ئەمڕۆ تەنها ڕۆژێکى ئاهەنگ گێڕان نیە، بەڵکو ڕۆژى کارکردنە. هەروەها ڕایگەیاند کە ڕێوشوێنى نوێى ئوسترالیا بۆ پەناخوازان گەڕاندنەوەى بەزوویى ئەو پەناخوازانە دەگرێتەوە کە گەیشتوونەتە ئوسترالیا لەڕێگەى بەلەمەوە لە ئیندۆنیزیاوە. 
جێگرى سەرۆک ئەرکانى سوپاى ئوسترالیا، ژەنەڕاڵى گەورە ئانگیوس کامپبێڵ، وەکو جێبەجێکارى نوێى پارێزەرى سنوورى ئوسترالیا دەستنیشان کراوە، کە بە پڕۆسەى سەربەخۆیى سنوورەکان دەستنیشان دەکرێت. لەم پڕۆسەیەدا دەسەڵاتى تەواو دەدرێت بەو ژەنەڕاڵە سەربازیە. 
حکومەت ڕایگەیاندووە کە ئەو پڕۆسەیە گەڕاندنەوەى پەناخوازانە لەڕێگەى کەشتیەوە لە حاڵەتێکدا کە ئەو پڕۆسەیە سەلامەت بێت. 
ئەم ڕێوشوێنە نوێیەى حکومەتى ئوسترالى لەلایەن بەرپرسانى ئیندۆنیزیاوە بۆتە جێگەى ڕەخنە، هەروەها کە کڕینەوەى بەلەمەکانیش لەخۆى دەگرێت لە گوندەکان بۆئەوەى نەکەوێتە دەستى قاچاخچییەکانەوە. بەرپرسانى ئوسترالى ڕایدەگەیەنن کە خەڵاتى ماددى دەبەخشن بە گوندنشینانى ئیندۆنیزیا ئەگەر زانیارییان پێببەخشن لەبارەى قاچاخچییەکانەوە. 
هەر لەڕێگەى جێبەجێکردنى ئەو پڕۆسەیەوە وەزارەتى کۆچى ئوسترالى هەڵدەستێت بە پێدانى ڤیزاى کاتى پاراستن بە پەناخوازان ئەوانەى لەڕێگەى بەلەمەوە دەگەنە خاکەکانى ئوسترالیا. 
ئەو ڤیزایە دەبەخشرێت بەو 23 هەزار کەسەى کە لەڕێگەى بەلەمەوە لە ئابى ساڵى ڕابردووەوە گەیشتوونە ئوسترالیا و خاوەنى ڤیزاى پەڕینەوەن، و هەرگیز نیشتەجێ بوونى هەمیشەییان پێنادرێت. 
دانیال وێب، لە ناوەندى مافەکانى مرۆڤى ئوسترالى ڕایدەگەیەنێت کە ئەو هەوڵەى حکومەتى ئوسترالى زۆر جێگەى ڕەخنەیە. 
هەروەها ڕایدەگەیەنێت کە ئەو پەناخوازانە هەموو شەوێک دەچنە سەرجێگا بەبێ دڵنیایى لەبارەى داهاتوویانەوە. هیچ ڕێگایەک نیە بزانن داهاتوویان چى دەبێت و ئایا دووردەخرێنەوە یاخود دەگەرشِێنرێنەوە بۆ وڵاتەکەیان. پێموایە ئەمەش کارێکى زۆر پڕ شەرمەزایە.

Wednesday, September 18, 2013

بەریتانیا و ئیتاڵیا ئاسانکاری وەرگرتنی ڤیزە بۆ هاوڵاتیانی هەرێم دەکەن


لەمیانەی کوبوونەوەیەک لەنێوان کۆنسوڵی گشتی بەریتانا و بەرپرسی پەیوەندیەكانی دەرەوەی حكومەتی هەرێم کە لە هەولێر
بەڕێوەچوو، تێیدا باس لە پەیوەندییەکانی نێوان هەردوولا و ئامادەکارییەکانی هەرێمی کوردستان کرا بۆ بەڕێوەچوونی هەڵبژاردنەکانی هەرێمی کوردستان و بەرپرسی گشتی کۆنسوڵی بەریتانیاش جەختی لە کردنەوەی بنکەیەکی تایبەت بە وەرگرتنی ڤیزەی بەریتانیا کردەوە لە شاری هەولێر.

پێگە الوكاله‌ الاخباریه‌ بڵاویکردەوە: لەمیانەی سەردانێکی هیو ئیڤانس بەرپرسی گشتی کۆنسوڵی بەریتانیا لەهەرێم و کۆبوونەوەیان لەگەڵ فەلاح مستەفا بەرپرسی پەیوەندییەكانی دەرەوەی حكومەتی هەرێم، ئیڤانس جەختی لە هەبوونی متمانەی تەواوکرد سەبارەت بە بەڕێوەچوونی هەڵبژاردنەکانی هەرێم بەشێوازێکی سەرکەوتوو و جەختیشی لەوە کردەوە، سەرکەوتنی ئەم هەڵبژاردنانە سەرکەوتنە بۆ هەموو میللەتی کورد و بەرزراگرتنی ئەزموونی دیموکراتییە لە ناوچەکە.

لە درێژەی کۆبونەوەکەدا باس لە بەرەوپێشچوونی پەیوەندییەکانی نێوان هەردوولا و گرنگی ئاڵوگۆڕی ئەم سەردانە فەرمییانە کرا، هەروەها ئەوەش خرایە ڕوو کە بوونی پەیوەندی بازرگانی و ڕۆشنبیری سوودێکی زۆری بۆهەردوولا هەیە.

لە بەشێکی دیکەی کۆبونەوەکەدا، هیو ئیڤانس باسی لە کردنەوەی بنکەیەکی تایبەت کرد لە هەولێر بەمەبەستی ئاسانکردنی کاروباری وەرگرتنی ڤیزەی بەریتانیا لەلایەن هاوڵاتیانی هەرێم و چیتر ڕوبەرووی کێشە نەبنەوە بەهۆی چونیان بۆ بەغداد بەمەستی وەرگرتنی ڤیزەی بەریتانیا.

لەلایەکی دیکەوە، هەر ئەمڕۆ فەلاح موستەفا لەگەڵ کۆنسوڵی گشتی ئیتالیا لە هەرێم کۆبۆوە و وێڕای تاوتوێکردنی چەندین بابەتی گرنگ لە هەریەک لە بوارەکانی ئابوری و بازرگانی و بەشداریکردنێکی گەورەی کۆمپانیا ئیتاڵییەکان لەبواری بوژاندنەوەی هەرێم، کارمیلیۆ فیکارا بەرپرسی کونسوڵی گشتی ئیتاڵیا جەختی لە هەوڵەکانی کۆنسوڵخانەکەیان کردەوە بەمەستی ئاسانکار وەرگرتنی ڤیزەی ئیتاڵیا لەلایەن هاوڵاتیانی هەرێمی کوردستان. 
لە عەرەبییەوە هاوڕێ فەریق 

خەندان-

Friday, September 13, 2013

ژمارەى ئەو عێراقیانەى داواى پەناخوازیان لە ئوسترالیا کردووە



کۆچى کوردان و کۆچ بۆ ئوسترالیا 
بەپێى ئەو ژمارانەى بڵاوکراونەتەوە لەم مانگەدا، 50444 کەس لە کامپى پەناخوازان و لە شوێنى جیاوازدا بەشێوەیەکى یاسایى داواى مافى پەنابەریان کردووە، کە لەنێوان حوزەیرانى 2013 بۆ تەموزى 2013 ژمارەى ئەو پەناخوازانەى قبووڵ کراون 12 هەزار پەناخواز بوون. 
لەو 12 هەزار پەناخوازەى ڤیزایان پێدراوە کە بەشێوەیەکى یاسایى کۆچ بکەن بۆ ئوسترالیا زیاتر لە یەک لە سێیان لەدایک بووى عێراقن، و بیست لە سەدیان ئەفغانى و 19 لەسەدیان بۆرماین، بەپێى ڕاپۆرتێکى حکومەتى ئوسترالى. هەروەها لەماوەى چوار ساڵى ڕابردوودا عێراقى و ئەفغانى زیاتر قبووڵ کراون لەڕێگەى ئەو پڕۆگرامە مرۆییە یاساییەى حکومەتى ئوسترالیەوە زیاتر لە هەر نەتەوەیەکى تر. 
هەروەها ڕاپۆرتەکەى حکومەتى ئوسترالى ئەوەى ئاشکرا کردووە کە ئەو عێراقیانەى قبووڵ دەکرێن لە وڵاتى جیاوازدا ژیاون کە بەشێوەیەکى سەرەکى لە سوریا بوون، بەڵام ئەفغانیەکان لە ئێران و پاکستان و ئیندۆنیزیاوە قبووڵ کراون. 
بەپێى ژمارەکانى حکومەتى ئوسترالى، 12596 عێراقى بەشێوەیەکى یاسایى داواى مافى پەنابەریان کردووە و لەو ژمارەیە 4064یان قبووڵ کراون، لەکاتێکدا 10777 ئەفغانى داواى مافى پەنابەریان کردووە و 2431یان قبووڵ کراون.

Monday, September 9, 2013

لەدواى هەڵبژاردنەوە کۆچ بۆ ئوسترالیا چ گۆڕانکاریەکى بەسەردا هاتووە؟




69567790_boat_rtrتایبەت بە کۆچ بۆ ئوسترالیا و کۆچى کوردان

تۆنى ئابۆت سەرۆکى پارتى هاوپەیمانى نیشتمانى لیبراڵى توانى هەڵبژاردنەکانى ئوسترالیا بباتەوەو ببێتە سەرۆک وەزیرانى نوێى ئوسترالیا. پەیمانى ئەوەیداوە کە ڕێوشوێنى توندتر بگرێتەبەر لەچاو حکومەتەکەى کێڤن ڕووددا بۆ وەستاندنى گەیشتنى بەلەمى پەناخوازە نایاساییەکان.
لەخوارەوەدا چەند پەیمانێکى تۆنى ئابۆت دەخەینەڕوو کە بەرلە هەڵبژاردنەکان ڕایگەیاندبون و لەداهاتوودا بەشێوەیەکى کردارى جێبەجێیان دەکات:
1-بەردەوام دەبێت لە پڕۆسەى هەڵسەنگاندنى کەیسى پەناخوازان لەدەرەوەى خاکى ئوسترالیا و بەشێوەیەکى بەرفراوان ناوەندەکانى دوورگەکانى ناورو و مانووس زیاد دەکات بۆ 2000 شوێنى تر بۆئەوەى لەماوەى دوو مانگدا لەلایەن حکومەتى هاوپەیمانیەوە لە ناورو بکرێنەوە. 
پەناخوازەکان لەسەرەتادا لە چادردا نیشتەجێ دەکرێن بەرلەوەى کە شوێنى نیشتەجێ بوونى پێویستى هەمیشەییان بۆ بنیات بنرێت. ئوسترالیا هاریکارى و ڕێنوێنى هەڵسەنگاندنى کەیسى پەناخوازان دەکات لەڕێگەى ڕاهێنانى لایەنە پەیوەندیدارەکانى ناورو و پاپوا نیو گینیا.
2-حکومەتى هاوپەیمانى وەڵامدانەوەیەکى شێوە سەربازى دەبێت بۆ چالاکى پەناخوازەکان و گەیشتنیان بەشێوەی قاچاخ لەڕێگەى بەلەمەوە، و حکومەت فەرماندەیەکى سێ ئەستێرەیى دادەمەزرێنێت کە ڕاستەوخۆ لەژێر دەسەڵاتى وەزیرى کۆچکردندا بێت. حکومەتى هاوپەیمانى فەرمانى نوێ بە سوپاى دەریایى ئوسترالیا دەدات بۆ گێڕانەوەى ئەو بەلەمانەى کە دەکرێت بە سەلامەتى ڕەوانەى ئەو شوێنانە بکرێنەوە کە بە نایاسایى لێوەى هاتوون. هەروەها پشتیوانى ببەخشێت بە وڵاتانى گەیەنەر بەتایبەتى سریلانکا و ئیندۆنیزیا بۆئەوەى گەیشتنى بەلەمەکان کۆتاییان پێبهێنرێت.
tony-abbott-asylum-seekers-policy-data3-بەپێى ڕێوشوێنەکانى حکومەتى هاوپەیمانى بڕیاروایە هەر پەناخوازێک کە لەدواى 13ى ئاب گەیشتبێت بە ئوسترالیا، و لەدواى ئەوەى وەکو پەناخواز دەناسێنرێت ڤیزاى پاراستنى کاتى پێدەدرێت. هیچ ڤیزایەکى لەوشێوەیە ماوەکەى نابێت لە سێ ساڵ زیاتر ببێت، و ماوەى ڤیزاکە بەپێى کەیسە جیاوازەکان دیاریدەکرێت. پەناخوازەکان دەتوانن داواى پاراستنى کاتى بکەن لەکاتێکدا ئەو ڤیزایە ماوەیەکى بەسەر دەچێت، بەڵام دووبارە هەڵسەنگاندن بۆ کەیسەکانیان دەکرێتەوە، بڕیاریش لەسەر بارودۆخى ئەوکاتەى وڵاتەکەیان لەکاتى هەڵسەنگاندنەکەدا دەدرێت. بەبوونى ڤیزاى پاراستنى کاتى، پەناخوازەکان ڕێگرى نیشتەجێ بوونى هەمیشەیی و داخوازى مافى هاوڵاتی بوون یاخود یەکگرتنەوەیان لەگەڵ خێزانەکانیاندا لێدەکرێت. ئەگەر هەڵگرى ئەو جۆرە ڤیزایە بڕیارى جێهێشتنى ئوسترالیایدا، ئەوە ڕێگرى گەڕانەوەى لێدەکرێت.
4-ئەو پەناخوازانەى کە بەر لە 13ى ئاب گەیشتونەتە ئوسترالیا، و بەڵگەنامەکانى ناسنامەیان نیە، بەپێى ڕێوشوێنەکانى حکومەتى هاوپەیمانى ئەوا لێکۆڵێنەوە دەکرێت بۆ پێدانى مافى پەنابەرى. بەدواداچوون دەکرێت بۆ هەڵسەنگاندنەکانى دادگاى پێداچوونەوەى کەیسى پەناخوازان. ئەو بەدواداچوونە دەبێت لەلایەن بەرپرسێکى تر لە وەزارەتى کۆچ و هاونیشتمانى بوون جێبەجێ بکرێت، و پەناخوازەکە دووبارە مافى ئەوەى پێدەدرێت داخوازى مافى پەنابەرى پێشکەش بکات بە زانیارى پێویستەوە. ئەو بەدواداچوونانەى ئەنجامەکانیان باش دەرناچێت بەزوویى مافى پەناخوازیان لێدەسەنرێتەوە و ڕەوانەى وڵاتەکەیان دەکرێنەوە یاخود بەشێوەیەکى خۆبەخشانە ڕەوانەى وڵاتى سێیەم دەکرێن بەمەرجێک دەرفەتیان پێبدرێت کە بۆ ئەو وڵاتەى تر بچن.
5-بەپێى ڕێوشوێنەکانى حکومەتى پارتى هاوپەیمانى ئوسترالیا، ئەو پەناخوازەى بە بەلەم دەگاتە ئوسترالیا ڕەوانەى دوورگەى ناورو و پاپوا نیو گینیا دەکرێت، و چیتر مافى یارمەتى یاسایى ئازادى نیە بەپێى سیستمى داواکردنى مافى پەنابەرى و کۆچکردن. 
6-حکومەتى داهاتووى ئوسترالیا پەیمانیداوە کە ژمارەى ئەو پەناخوازانە کەم بکاتەوە کە بەشێوەیەکى فەرمى لەڕێگەى پڕۆگرامى مرۆیى و پەنابەران لەڕێگەى کۆمسیۆنى پەنابەرانى نەتەوە یەکگرتووەکان وەریدەگرێت، لە 20000 پەناخوازەوە بۆ 13750 پەناخواز، و ئەم ژمارەیەش ئەوانە ناگرێتەوە کە بە بەلەم کۆچ دەکەن و داواى مافى پەنابەرى دەکەن. 
612561-tony-abbott7-حکومەتى هاوپەیمانى خۆى بەدووردەگرێت لەگرتنەبەرى ڕێگاى جیاواز و کاردەکات لەسەر بەدەستهێنانى پشتیوانى دوولایەنە و کاردانەوە لەڕێگەى بەدەستهێنانى هۆکارەکانى ڕزگارى ناوخۆیى لە وڵاتەکاندا. ئوسترالیا پشتیوانى دەکات و بەردەوام دەبێت لە جێبەجێکردنى پلانى بەیەکەوەیى و کۆکردنەوەى زانیارى و لێکۆڵینەوە لە قاچاخچییەکان لە ئیندۆنیزیا و سریلاکا و مالیزیا، و یاساى توندتر دادەڕێژێت بۆ ڕووبەڕووبوونەوەى قاچاخچیەکان. حکومەت پشتیوانى هەوڵە هەرێمییەکان دەکات بۆ هاریکارى گەڕانەوەى سەلامەتى پەناخوازان و چاودێریکردنى سەلامەتیان لەڕێگەى لێکۆڵەرانى سەربەخۆوەو هەوڵدان بۆئەوەى خەڵکى بۆ وڵاتى خۆیان بگەڕێنەوە.
هەروەها ئوسترالیا باندى قاچاخچییەکان تێکدەشکێنێت لەڕێگەى کەمپینى لە 100 گوندى ناوخۆیى ئیندۆنیزیاوەو کڕینى بەلەمە مەترسیدارەکان لەخاوەنەکانیان و پشتیوانى کردنى لایەنە پەیوەندیدارەکان بۆ بەخشینى زانیارى. هەروەها گەشەپێدانى لایەنى تەکنەلۆژى ناساندنەوەى سەرچاوەى ئەو وڵاتانەى کە کۆچبەرەکان لێیەوە کۆچ دەکەن و وڵاتانى گواستنەوەکان و گەشەپێدانى زانیارى بایۆمێتریکى و بەڵگەنامەى پەناخوازەکان. هەروەها ئوسترالیا هێڵى ئاسمانى ئیندۆنیزیا بەهێزتر دەکات بۆ بەدواداگەڕان و ڕزگارکردنى پەناخوازان و قاچاخچییەکان لەڕێگەى پێدانى بەلەم و پشتیوانى و ڕاهێنانى ستافەکانیان.

دواى هەڵبژاردنەکانى ئوسترالیا کۆچى نایاسایى سەختتر دەبێت


تایبەت بە کۆچى کوردان و کۆچ بۆ ئوسترالیا

تۆنى ئابۆتى سەرۆک وەزیرانى نوێى ئوسترالیا: لە ئەمڕۆوە ڕایدەگەیەنم کە ئوسترالیا لەژێر سەرکردایەتیەکى نوێدایە.
لە هەڵبژاردنە گشتیەکاندا ئۆپۆزسیۆنى ئوسترالى بەسەر پارتى کرێکاراندا سەرکەوت و بەمەش دواى شەش ساڵ هاوپەیمانى نیشتمانى لیبڕاڵى دەچێتە سەر حوکم
هاوپەیمانەکان 88 کورسى و پارتى کرێکاران 57 کورسیان بەدەست هێنا لەکۆى 150 کورسى پەرلەمان.
تۆنى ئابۆتى سەرکردەى لیبراڵەکان، کە دەبێتە سەرۆک وەزیران، پەیمانیداوە کە حکومەتێکى تایبەتمەند و خاوەن متمانە پێکبهێنێت. کێڤن ڕۆدى سەرۆک وەزیرانى پێشوو دانى بە شکستیدا ناو ڕایگەیاند کە چیتر سەرۆکایەتى پارتى کرێکاران ناکات.
گەرمترین بابەتى هەڵبژاردنەکان چۆنیەتى زاڵ بوون بەسەر هێواش بوونەوەى گەشەسەندنى ئابوورى و بابەتى باج دانان لەسەر دەرچوونى گازى کاربۆنى وڕێگرى کردن بوو لە گەیشتنى پەناخوازە نایاساییەکان بە بەلەم.
زیاتر لە 14 ملیۆن کەس تۆمارکرابوون بۆ دەنگدان لە ڕۆژى یەکشەممەدا. دەنگدان لە ئوسترالیا ئیجباریە. 
لەلایەکى ترەوە، گواستنەوەى ئەو پەناخوازانەى گەیشتوونەتە ئاوەکانى ئوسترالیا بەشێوەى نایاسایى بەرەو مانوس بەردەوامە. گواستنەوەى پەناخوازەکان لە سەردەمى حکومەتى تۆنى ئابۆت فراوانتر دەبێت. سى و پێنج پاکستانى و نۆ ئەفغانستانى ڕەوانەى ناورو کران لە ڕۆژانى کۆتایى هەفتەدا. هەروەها 20 ئێرانى و 10 ئەفغانى و 7 سۆماڵى و 4 پاکستانى و 2 سودانى ڕەوانەى دوورگەى مانوس کران

ئێرانیە پەناخوازەکان لە ئوسترالیا دەگەڕێنەوە


تایبەت بە کۆچ بۆ ئوسترالیا و کۆچى کوردان
گروپێکى 28 کەسى کە کاریگەر بوون بە بڕیارى جێگیرکردنى هەرێمى بەشێوەیەکى خۆبەخشانە بڕیاریاندا کە بگەڕێنەوە بۆ وڵاتى خۆیان، کە لە تارانەوە گەیشتبوونە ئوسترالیا. 
وەزارەتى کۆچ و هاونیشتمانى ئوسترالیا لە بەیاننامەیەکدا جەختى لەوە کردۆتەوە کە ئەو ئێرانیانە خۆیان خواستى گەڕانەوەیان هەبووە بۆ وڵاتەکەیان نەک ئەوەى بچنە پاپوا نیو گینیا.
گەڕانەوەى ئەوان لە کۆتایى ئەم هەفتەیەکدا لەکاتێکدایە کە لە مانگى ئابدا 4 ئێرانى تر گەڕاونەتەوە. وتەبێژى وەزارەتەکە ڕایگەیاندووە کە دوو ئێرانى لە 17 و 21ى ئابدا ئوسترالیایان جێهێشتووە، لەکاتێکدا کە دوو ئێرانى تر لە 20ى ئابدا دوورگەى مانوسیان جێهێشتووە. 
وتەبێژەکە ئەوەى ئاشکرا کردووە کە ئەو ئێرانیانەى لەدواى 19ى تەموزەوە بە بەلەم گەیشتوونەتە ئوسترالیا لەوە تێدەگەن کە لە ئوسترالیا نیشتەجێ ناکرێن.
هەروەها ڕایدەگەیەنێت کە وەزارەتەکە بەردەوام دەبێت لە گواستنەوەى ئەو بەلەمانەى بەشێوەیەکى نایاسایى دەگەنە ئوسترالیا و ڕەوانەى دوورگەى مانوس یاخود ناورویان دەکەن بۆ ناوەندەکانى پڕۆسێسکردنى هەرێمى بۆ داخوازى پەناخوازیان، و لە ڕۆژان و هەفتەکانى داهاتوودا زیاتر دەگوازرێنەوە. 
وتەبێژەکە وتى کە چاوەڕوان دەکرێت خەڵکى زیاتر ئەوە هەڵبژێرن کە بگەڕێنەوە وڵاتى خۆیان.
ئەوانەى کە لەناوەندە هەرێمیەکانى هەڵسەنگاندنى کەیسى پەناخوازیدان لە هەرکاتێکدا بیانەوێت دەتوانن داواى خۆبەخشانە گەڕانەوەیان بۆ وڵاتى خۆیان بکەن. 
ئەوانەى کە خۆبەخشانە بڕیارى گەڕانەوە بۆ وڵاتى خۆیان دەدەن پشتیوانى داراییان دەکرێت بۆ گەڕانەوەیان، لەڕێگەى ڕێکخراوى نێودەوڵەتى بۆ کۆچکردن.

بەدواى کاردا دەگەڕێیت؟


تایبەت بە کۆچى کوردان و کۆچ بۆ ئوسترالیا

هەرکەسێک کە پێویستی بە کار دەتوانێ لە رێگای کۆمپانیاکەی ئێمەوە لە پارێزگای سلێمانی و هەولێر کار بۆ خۆی دابین بکات .
بۆ زانیاری زیاتر پێوەندی بکەن بە :
پارێزگای سلێمانی- ٠٧٧٠١٤٠٨٠٢٨ - ٠٧٥٠٣١٣٤٩٣٠
پارێزگای هەولێر : ٠٧٥٠١١٨٦٤٥٩
کاتی دەوام لە ٩ بەیانی بۆ ٦ ی ئێوارە هەمو رۆژێک جگە لە رۆژانی هەینی
سلێمانی – خوار فولکەی یەکگرتن – بەرامبەر بانکی ئیلاف – تەلاری حاجی رەسول – نهۆمی ٤

کۆمپانیاى گرین میل

Sunday, September 8, 2013

ئوسترالیا پەرلەمانێكی نوێی هەڵبژارد


 حكومەتی نوێی ئوسترالیا ڕێوشوێـنی توندتر دەگرێـتەبەر بۆ چارەسەركردنی كۆچی نایاسایی.
دوێنێ‌ رێكەوتی 7 ی سێپتەمبەر 2013، ئەنجامی هەڵبژاردنە پەرلەمانیەكەی ئوسترالیا كە پێشتر بەڕێوەچوو راگەیەندرا و پارتی هاوپەیمانی نیشتمانی لیبراڵ بەسەرۆكایەتی تۆنی ئەبۆت لایەنی كەم 88 كورسی پەرلەمانی لە كۆی 150 كورسی پەرلەمانی ئەو ووڵاتە بۆخۆی مسۆگەر كرد.
بەپێی پڕۆگرامی پارتی هاوپەیمانی نیشتمانی لیبراڵ، رێوشوێنی توندتر دەگرێـتەبەر بۆ بەگژداچوونەوەی كۆچی نایاسایی بۆ ئوسترالیا ئەویش ڕێگەی گێڕانەوەی بەلەمی پەناخوازان بۆ ئەو ووڵاتەی لێوەی هاتوون.
بەپێی ئامارە فەرمیەكان، لەسەرەتای ئەمساڵەوە زیاتر لە 18 هەزار پەناخواز لەرێًگەی كەنارە ئاویەكانەوە و بەشێوەیەكی نایاسایی خۆیان گەیاندۆتە ئوسترالیا و زیاتر لە 500 لەو پەناخوازانەش بەڕەگەز عێراقین.
سەرچاوە : بی بی سی، نیوز ئوسترالیا

Wednesday, September 4, 2013

بەدواى (کـار)دا دەگەڕێیت؟


حکومه‌تی هه‌رێمی کوردستان سایتێکی تایبه‌تى به‌ دۆزینه‌وه‌ی هه‌لیکار کردۆتەوە، که‌ تیایدا هه‌لیکاری وه‌زاره‌ته‌کان بڵاو ده‌کاته‌وه‌ و هاوڵاتیان ده‌توانن له‌و سایته‌دا (هه‌لیکار) به‌دوای کاردا بگه‌ڕێن.


Monday, September 2, 2013

ئوسترالیا له‌ماوه‌ى مانگى ڕابردوودا 500 په‌ناخوازى دیپۆرتكردۆته‌وه‌


Picture1شالاَوى دیپۆرتكردنه‌وه‌ى په‌ناخوازان له‌لایه‌ن حكومه‌تى ئوسترالیا به‌رده‌وامه‌ و له‌ماوه‌ى یه‌ك مانگى ڕابردوودا 500 په‌ناخوازى دیپۆرتى وولاَتى پاپانیوگینیا كردۆته‌وه‌ و چه‌ند په‌ناخوازێكى به‌ڕه‌گه‌ز عێراقیش له‌ناویاندایه‌.  
دیپۆرتكردنه‌وى ئه‌م په‌ناخوانانه‌ له‌پاش ئه‌و ڕێكه‌وتنه‌ دێت كه‌له‌سه‌ره‌تاى مانگى ڕابردوو له‌نێوان حكومه‌تى ئوسترالیا و به‌رپریسانى وولاَتانى پاپانیوگینیادا ئیمزاكرا و هه‌ردوو وولاَت ڕێكه‌وتن له‌سه‌ر دیپۆرتكردنى هه‌ر په‌ناخوازێك كه‌به‌شێوه‌یه‌كى نایاسایى و له‌ڕێگه‌ى كه‌ناره‌ ئاوییه‌كانه‌وه‌ له‌دواى به‌روارى 19 ى ته‌مووزى ئه‌مساڵه‌وه‌ خۆیان ده‌گه‌یه‌ننه‌ ئوسترالیا بۆ وولاَتى پاپانیوگینیا كه‌ به‌پێى ڕیكه‌وتنامه‌كه‌  په‌ناخوازان كه‌یسه‌كانیان له‌ وولاَتى پاپانیوگینیا یه‌كلایده‌كرێـته‌وه‌ و ئه‌گه‌ر مافى په‌نابه‌رێتیش وه‌ربگرن له‌ پاپانویگینیا وه‌ریده‌گرن و ناگه‌ڕێندرێنه‌وه‌ بۆ ئوسترالیا.
به‌پێى ئاماره‌ فه‌رمیه‌كان ، ده‌یان منداڵ له‌نێو ئه‌و په‌ناخوازانه‌دایه‌ كه‌ تا ئێستا دیپۆرتى پاپانیوگینیا كراونه‌ته‌وه‌ و ئه‌مه‌ش بۆته‌ جێگه‌ى نیگه‌رانى ڕێكخراوه‌كانى تایبه‌ت به‌ داكۆكیكردن له‌ مافى په‌نابه‌ران . له‌ به‌رامیه‌ریشدا وه‌زاره‌تى كۆچى ئوسترالیا ڕایگه‌یاند كه‌ ئه‌وان به‌رده‌وام ده‌بن له‌ دیپۆرتكردنه‌وه‌ى ئه‌و په‌ناخوازانه‌ به‌مه‌به‌ستى تێكشكاندنى ئه‌و بانده‌ قاچاخچیانه‌ى كه‌ سالاَنه‌ ده‌یان په‌ناخواز ده‌كه‌نه‌ قوربانى شه‌پۆله‌كانى ده‌ریا له‌ پێشگه‌شتنیان به‌ ئوسترالیا. 
به‌رده‌وامى دیپۆرتكردنه‌وه‌ى په‌ناخوازان له‌لایه‌ن ئوسترالیاوه‌ هاوكاته‌ له‌گه‌ڵ به‌رده‌وامى پڕوپاگه‌نه‌ى هه‌ڵبژاردنى په‌رله‌مانى ئوسترالیا كه‌ بڕیاره‌ له‌ 7 ى ئه‌یلولى ئه‌مساڵدا ئه‌نجامبدرێت و سه‌رجه‌م پارته‌ سیاسیه‌ گه‌وره‌كانى ئه‌و وولاَته‌ هاوڕان له‌سه‌ر پیاده‌كردنى پلانێك بۆ به‌گژداچوونه‌وه‌ى كۆچى نایاسایى بۆ ئوسترالیا به‌لاَم هاوڕانین له‌سه‌ر چۆنێتى پیاده‌كردنى ئه‌و پلانه‌.   
  به‌پێى ئاماره‌ فه‌رمیه‌كان ، له‌سه‌ره‌تاى ئه‌مساڵه‌وه‌ زیاتر له‌ 18 هه‌زار په‌ناخواز له‌ریًَگه‌ى كه‌ناره‌ ئاویه‌كانه‌وه‌ و به‌شێوه‌یه‌كى نایاسایى خۆیان گه‌یاندۆته‌ ئوسترالیا و زیاتر له‌ 500 له‌و په‌ناخوازانه‌ش به‌ڕه‌گه‌ز عێراقین. 
رزگاركردنى په‌ناخوازان له‌پاش تێكشكانى به‌له‌مه‌كه‌یان له‌پێش گه‌شتنیان به‌ ئوسترالیا له‌ به‌روارى 20ى ئابى 2013 – فۆتۆ : ئه‌سۆشیه‌تد پرێس  
 گه‌شتنى په‌ناخوازان به‌ دوورگه‌ى پاپانیوگینیا – فۆتۆ EPA
 سه‌رچاوه‌ : ئاژانسه‌كان ، ماڵپه‌رى فه‌رمى وه‌زاره‌تى كۆچى ئوسترالیا
ئاماده‌كردنى : هه‌ژار ته‌ها