Wednesday, December 26, 2012

"پێویسته‌ كاندیدی‌ تواناسازیی ببێته‌ نمونه‌ بۆ كورد"


به‌ڕێوه‌به‌ری‌ پرۆگرامی‌ تواناسازیی له‌وه‌زاره‌تی‌ خوێندنی‌ باڵا‌و توێژینه‌وه‌ی‌ زانستیی حكومه‌تی‌ هه‌رێمی‌ كوردستان ڕایگه‌یاند، پێویسته‌ ئه‌و خوێندكاره‌ی‌ كه‌ له‌هه‌رێمی‌ كوردستانه‌وه‌‌و له‌چوارچێوه‌ی‌ به‌رنامه‌ی‌ تواناسازییدا ده‌نێردرێته‌ ده‌ره‌وه‌ی‌ وڵات، ببێته‌ نمونه‌ بۆ كورد‌و هه‌رێمی‌ كوردستان.
(د. گۆڤه‌ند شێروانی‌) به‌ڕێوه‌به‌ری‌ پرۆگرامی‌ تواناسازیی له‌وه‌زاره‌تی‌ خوێندنی‌ باڵا‌و توێژینه‌وه‌ی‌ زانستیی حكومه‌تی‌ هه‌رێمی‌ كوردستان به‌ NNA وت:"ئێمه‌ ئاماده‌كاریی ته‌واومان بۆ خولی‌ نوێی به‌رنامه‌ی‌ تواناسازیی كردووه‌، ئه‌و خوله‌ی‌ كه‌ تایبه‌ت به‌وه‌زاره‌تی‌ خوێندنی‌ باڵا، پێویسته‌ به‌گوێره‌ی‌ پێوه‌ره‌كانی‌ تاقیكرده‌وه‌ی‌ IELTS، ئاستی‌ زمانی‌ له‌ (5) كه‌متر نه‌بێت، ئه‌گه‌ر كه‌متر بێت، ئه‌وا پێویسته‌ كۆرسی‌ زمان بخوێنێت".
د. گۆڤه‌ند شێروانی‌ ڕایگه‌یاند، ئێستا له‌شاری‌ سلێمانی‌ دوو كۆرسی‌ زمان ڕێكده‌خرێت، ته‌نانه‌ت ئه‌وانه‌ی‌ كه‌ ئاستی‌ زمانیان نزمه‌، ده‌توانن به‌شداریی ئه‌و كۆرسانه‌ بكه‌ن، كه‌ تێچوونی‌ له‌سه‌ر وه‌زاره‌تی‌ خوێندنی‌ باڵایه‌، ئه‌گه‌ر گه‌یشته‌ ئاستی‌ پێویست، ئه‌وا به‌شداری‌ كۆرسی‌ له‌ده‌ره‌وه‌ی‌ وڵات پێده‌كرێت.


د. گۆڤه‌ند شێروانی‌ ته‌ئكیدی‌ له‌وه‌شكرده‌وه‌، خوێندن له‌ده‌ره‌وه‌ی‌ وڵات ئاسان نییه‌، ئه‌وانه‌ی‌ كه‌ ده‌چن ڕووبه‌ڕووی‌ چه‌ند كێشه‌یه‌ك ده‌بنه‌وه‌، له‌وانه‌ش كێشه‌ی‌ زمان، زانستیی‌و كۆمه‌ڵایه‌تیی، هه‌ندێك له‌و كاندیدانه‌ی‌ كورد كه‌ بۆ خوێندن ده‌چنه‌ ده‌ره‌وه‌ی‌ وڵات، به‌هۆی‌ جیاوازیی له‌نێوان كۆمه‌ڵگه‌ی‌ یه‌كه‌م‌و كۆمه‌ڵگه‌ی‌ دووه‌مدا، تووشی‌ شۆكی‌ كه‌لتووری‌ ده‌بن، چونكه‌ كۆمه‌ڵگه‌ی‌ دووه‌م، له‌گه‌ڵ كۆمه‌ڵگه‌كه‌ی‌ خۆیدا جیاوازیی زۆری‌ له‌ڕووی‌ كه‌لتوور‌و ئاداب‌و نه‌ریته‌وه‌ هه‌یه‌، ئه‌وه‌ش كاریگه‌ری‌ نه‌رێنی‌ له‌سه‌ر خوێندنه‌كه‌یان ده‌بێت، بۆیه‌ گرووپێكی‌ كه‌م له‌كاندیده‌كان نه‌یانتوانی‌ خوێندنه‌كه‌یان ته‌واو بكه‌ن، گه‌ڕانه‌وه‌ بۆ كوردستان، به‌ڵام زۆربه‌یان خوێندنی‌ زمانیان ته‌واو كرد‌و ئێستا سه‌رقاڵی‌ خوێندنی‌ ماسته‌ر‌و دكتۆران.
به‌ڕێوه‌به‌ری‌ پرۆگرامی‌ تواناسازیی له‌وه‌زاره‌تی‌ خوێندنی‌ باڵاو توێژینه‌وه‌ی‌ زانستی‌ وتی‌:"ژماره‌یه‌كی‌ زۆر خوێندكاری‌ خولی‌ یه‌كه‌م گه‌ڕاونه‌ته‌وه‌ بۆ كوردستان‌و له‌زانكۆ‌و په‌یمانگه‌ نوێكاندا داده‌مه‌زرێن". 
به‌ڕێوه‌به‌ری‌ پرۆگرامی‌ تواناسازیی له‌وه‌زاره‌تی‌ خوێندنی‌ باڵا‌و توێژینه‌وه‌ی‌ زانستیی حكومه‌تی‌ هه‌رێمی‌ كوردستان ئاماژه‌ی‌ به‌وه‌كرد، له‌كۆرسه‌كاندا كه‌ مامۆستایانی‌ بیانی‌ ده‌یانڵێنه‌وه‌، تایبه‌ت به‌قسه‌كردن‌و مامه‌ڵه‌كردن له‌شوێنه‌ گشتییه‌كانی‌ ده‌ره‌وه‌ی‌ وڵاتدا، ئه‌وه‌ به‌شێكه‌ له‌مادده‌كانی‌ كۆرسی‌ زمان، پێش چوونی‌ خوێندكاران بۆ ده‌ره‌وه‌، به‌پێی توانا كۆده‌كرێنه‌وه‌‌و باسی‌ جیاوازیی نێوان هه‌ردوو سسته‌میان بۆ ده‌كرێت، هه‌ر كاندیدێكیش كه‌ ده‌چێته‌ ده‌ره‌وه‌ی‌ وڵات بۆ خوێندن، گرێبه‌ستێكی‌ له‌گه‌ڵ حكومه‌ت‌و وه‌زاره‌تدا هه‌یه‌، ده‌بێت ڕه‌چاوی‌ یاسا‌و ڕێنماییه‌كانی‌ ئه‌و وڵاته‌ بكات كه‌ تێیدا ده‌خوێنێت، هه‌روه‌ها ڕێز له‌ڕێنماییه‌كان بگرێت‌و ببێته‌ نمونه‌یه‌ك بۆ كورد‌و هه‌رێمی‌ كوردستان. 
-----------------------------------------------------------------
گۆران ئیبراهیم ـ NNA/ 


Tuesday, December 25, 2012

هۆڵەندا بڕیاریدا : مۆنۆمێنتی هەڵەبجە لە لاهای دادەنێین


هەفتەی رابردوو، ئەنجوومەنی شارەوانیی شاری لاهای لە هۆڵەندا پێشنیازی دروستكردنی مۆنۆمێنتی هەڵەبجەی لە شارەكەدا پەسندكرد. ئێستا كوردانی دانیشتووی هۆڵەندا دەیانەوێ حكومەتی هۆڵەندی هەنگاوی زیاتر هەڵێنێ و بە فەرمی دان بەوە دابنێ كە كورد جینۆسایدكراون. 
یەكێك لەو كەسانەی پشتگیری لە بیرۆكەی دانانی مۆنۆمێنتەكە كرد و كاری بۆكرد، هاری فان بۆمڵ بوو كە ئەندامی پەرلەمانی هۆڵەندایە لەسەر لیستی پارتی سۆسیالیست. ناوبراو لەوبارەوە بە (رووداو)ی راگەیاند "سەرۆك شارەوانی لاهای پێشنیازیكردووە مۆنۆمێنتەكە لەشوێنێكی گونجاودا لەنزیك باڵەخانەی رێكخراوی نێودەوڵەتی قەدەخەكردنی چەكی كیمیایی OPCW دروستبكرێت، بە نیازیشە بۆ ئەو مەبەستە لەگەڵ سەرۆكی رێكخراوەكە قسە بكات". سەرۆكی شارەوانی لاهای رایگەیاندووە كە چاوەڕێناكات مۆنۆمێنتەكە تاوەكو رۆژی 16ی ئاداری ساڵی داهاتوو تەواوبێت، كە دەبێتە یادی 25 ساڵەی كیمیابارانكردنی هەڵەبجە.
كۆمیتەی دروستكردنی مۆنۆمێنتی هەڵەبجە لەلایەن فیردەوس كازمییەوە سەرپەرشتیدەكرا. پەسندكردنی پێشنیازەكە لەلایەن ئەنجوومەنی شارەوانی لاهایەوە پیشانیدەدات كە كۆمیتەكە لە هەوڵەكانیدا سەركەوتووبووە. ئەو كۆمیتەیە ساڵی رابردوو پێكهات و توانی 2500 واژۆی دانیشتووانی لاهای و دەوروبەری كۆبكاتەوە تاوەكو پێشنیازی دانانی مۆنۆمێنتەكە بخەنە نێو ئەجێندای كۆبوونەوەكانی ئەنجوومەنی شارەوانییەوە.
فان بۆمڵی پەرلەمانتار لە بلۆگێكدا نووسیوویەتی "چەند ساڵێكە هەوڵدەدرێ بۆ دروستكردنی ئەو مۆنۆمێنتە، تاوەكو رێز لەو قوربانیانە بگیرێت كە بەهۆی ئەو هێرشەی سەدام حوسێنەوە گیانیان سپارد، لەكۆتاییدا ئەو خەونە هاتەدی، ئەمەش شایەنی ئەوەیە ئاهەنگی بۆ بگێڕین ".
لە كۆبوونەوەی هەفتەی رابردووی ئەنجوومەنی شارەوانی لاهای، كە تایبەت بوو بە مەسەلەی مۆنۆمێنتەكە، بەسەدان كەسی كورد و هۆڵەندی لە هۆڵی كۆبوونەوەكەدا ئامادەبوون. یەكێك لەو كەسانە ئارام ئەحمەد، وەزیری شەهیدان و ئەنفالكراوانی حكومەتی هەرێمی كوردستان بوو كە وەك بڵاوكرایەوە، بۆ ناساندنی جینۆسایدی كورد بە كۆمەڵگەی نێودەوڵەتی هاتبووە هۆڵەندا.
ئارام ئەحمەد بە (رووداو)ی راگەیاند كە وەزارەتەكەیان مەبەستییەتی روو لەو وڵاتانە بكات كە ژمارەیەكی زۆر كوردی لێدەژین، تاوەكو لەوێ بۆ ناساندنی جینۆسایدی كورد لۆبی بكەن. وەك چۆن هەفتەی رابردوو فراكسیۆنەكانی پەرلەمانی سوید ئەنفالیان بە جینۆساید ناساند، حكومەتی كوردستان لە هەریەكە لە بەریتانیا و هۆڵەنداش هەوڵدەدات هەمان كار بكات.
هەرچەندە پێشنیازی دروستكردنی ئەو مۆنۆمێنتە لەلایەن پارتە كوردییەكانەوە نەبوو، بەڵام پێشتر باڵیۆزی عێراق لە هۆڵەندا و بەرپرسانی حكومەتی هەرێمی كوردستان پشتگیریی خۆیان بۆ دروستكردنی مۆنۆمێنتەكە راگەیاندبوو.
رەزامەندی دەربڕینی شارەوانی لاهای بۆ دانانی مۆنۆمێنتی هەڵەبجە، دوای هەڵوێستی پەرلەمانی سوید بوو. فەلاح مستەفا، بەرپرسی فەرمانگەی پەیوەندییەكانی دەرەوەی حكومەتی هەرێمی كوردستان، لەسەر ماڵپەڕی تویتەر نووسیویەتی "هیوادارم وڵاتانی دیكەش چاو لە سوید بكەن". بەختیار بەكر، نوێنەری یەكێتی نیشتمانی كوردستان لە هۆڵەندا، دەڵێ كوردانی دانیشتووی هۆڵەنداش هەوڵدەدەن هەمان ئەنجامیان دەستبكەوێت: "وەك سوید دەكەین و ئامادەین بۆ هەنگاوی داهاتوو".
ولادیمێر ڤان ویلخنبێرخ
رووداو - هۆڵەندا

Monday, December 24, 2012

ئەڵمانیا کوردێک خەڵات دەکات


وەزارەتی ناوخۆی هەرێمی (شلێسڤیگ -هۆڵشتاین)ی ئەڵمانیا خەڵاتی ئەمساڵی ئەڵمانیای بۆ خۆگونجاندن (ئینتیگراسیۆن) دایە گەنجێكی كورد، کە لەڕێگەی تۆپی پێوە هەوڵی نزیککردنەوەی پێکهاتەکانی نێو کۆمەڵگەی ئەڵمانیا دەدات.
رۆژی 10/12/2012، خەڵاتەکە لەلایەن ئاندریاس برایتنەر، وەزیری ناوخۆی هەرێمەکە درایە سەمیح حوسێن ئیناك. 
بنەماڵەی سەمیح خەڵكی باكووری كوردستانن، بەڵام ئەو خۆی ساڵی 1989، لە شاری (هامبۆرگ)ی ئەڵمانیا لەدایكبووە و لە شاری (ڤێدەلە)ی سەر بە هەرێمی (شڵێسڤیگ -هۆڵشتاین) گەورە بووە. 
باوكی سەمیح ئەندامی پارتی سەوزەكانی ئەڵمانیایە و یەكەمین كەسی بیانی بووە كە کاتی خۆی بۆ ئەندامێتی ئەنجومەنی شاری ڤێدەلە هەڵبژێردراوە. 
کاتی خۆی، ئەركانی برای سەمیحیش لە تەمەنی 24 ساڵیدا بووەتە ئەندامی ئەنجوومەنی شارەوانیی شارەكە. سەمیح ساڵی 2005، بووەتە ئەندامی پارتی سەوز و ساڵی 2009، بووەتە سەرۆكی رێكخراوی لاوانی ئەو پارتە لە هەرێمەکەیاندا.
ئێستا سەمیح لە بەشی ماتماتیك و زانستی كۆمەڵایەتی لە زانكۆی دویسبورگ- ئێسن دەخوێنێ. سەرۆكی كۆمیتەی خوێندكارانی زانكۆشە: “بەڕێوەبردنی رێكخراوی خوێندكاران لە زانكۆدا کەمێک قورسە. بەتایبەتی لە زانكۆكەی ئێمەدا كە 38 هەزار خوێندكاری هەیە. هەرواش ئەمساڵ ئەو بەرپرسیارێتییەم وەرگرت”. 
كاركردن لە بواری خۆگونجاندنی پەنابەراندا وەكو میرات بۆ سەمیح ماوەتەوە. چونكە باوكیشی لەو بوارەدا كاریكردووە. سەمیح لەوبارەوە دەڵێت “باوكم لەدوای 11ی سێپتەمبەری 2001، مەسیحی و موسڵمانەكانی شاری ڤێدەلەی لەنێو كڵێسای ئەو شارەدا كۆكردەوە و بەیەكەوە نوێژ و دوعایان بۆ ئاشتی كرد”. ئەمە دواتر کاریگەریی زۆری لەسەر سەمیح داناوە “ ئەوكات تەمەنم 12 ساڵان بوو و ئەو نوێژە زۆر کاری تێکردم. بۆیە سەردانی شارەوانیی شارەکەمانم كرد و داوامكرد خولێكی تۆپی پێ سازبکەم. ئەوانیش پڕۆژەكەیان قبوڵكرد. ئیتر هەموو ساڵێک ئەو خولەمان سازدەکرد”.
سەمیح روونكردنەوەی زیاتر لەبارەی خولەکەوە دەدات و دەڵێت “ساڵانە لە مانگی گوڵاندا سازیدەکەین و بۆ ماوەی سێ رۆژ لەنێو هۆڵێكی داخراودا بەردەوام دەبین. تاوەكو ئێستا لاوانی سەر بە 26 وڵاتی جیهان كە لە ئەڵمانیا دەژین بەشداریان تێداكردووە”. سەمیح دەڵێ لە خولەکەدا “بە رۆژ یاری تۆپی پێ دەكەین و بە شەویش سیمینار سازدەکەین. خەڵاتێکیشمان بۆ خولەکە داناوە کە یەکێک لە تیپەکان و یاریزانێك خەڵاتەکە وەردەگرن. بابەتی سیمینارەكانیش دەربارەی كولتووری بەیەكەوە ژیان، مافی ژنان، تووندوتیژی دژی مرۆڤ و ئاشتەواییە. مەرجی ئەوەشمان داناوە کە دەبێ لەنێو هەر تیپێکدا بەلایەنی کەمەوە یەک ژنی یاریزان هەبێت”.
سەمیح باسی پلانی دوارۆژی خۆی بۆ (رووداو) دەکا و دەڵێ دەیەوێ هەم کاری مامۆستایەتی بکات و هەم كاری سیاسیش بكات “لە سیاسەتدا ئامانجم ئەوەیە كە پیشانی بدەم دیموكراسی شتێكی بەنرخە. بەڵام ئەگەر گوتت وڵاتێكی دیموكراسیم، دەبێ کار بەو قسەیەشت بکەیت.” هۆیەکی دیکەی تێکەڵاوبوونی سەمیح بە سیاسەت، وەک خۆی دەڵێت، ئەوەیە کە “لە ساڵی 1993ەوە مافی كۆچبەران لە ئەڵمانیا كەمكراونەتەوە. ئامانجم ئەوەیە ئەو سیاسەتە بگۆڕم”.

فیراز باران

رووداو - كوێلن


Sunday, December 23, 2012

ئه‌ڵمانیا...گه‌نجانی كورد بۆكاری سیخوری به‌كارده‌هێنێت


به‌پێی هه‌واڵێكی رۆژنامه‌ی  یه‌نى ئیوزگیور پۆڵه‌تیکای ئه‌ڵمانی ده‌زگای هه‌واڵگری ئه‌و وڵاته‌ گه‌نجانی كورد بۆ كاری سیخوری به‌كارده‌هێنێت و داواشیان لێده‌كات له‌ چالاکى و ڕێپێوانه‌کانى کوردان دوربکه‌ونه‌وه‌ ده‌نا هه‌ڕه‌شه‌ى ده‌ستگیرکردن و ده‌رکردنیان لێده‌که‌ن.

ڕۆژنامه‌ى یه‌نى ئیوزگیور پۆڵه‌تیکا سیاسه‌تى چه‌وتى ده‌وڵه‌تى ئه‌ڵمانى هه‌واڵێكی بڵاو كردۆته‌وه‌ و ده‌ڵێت :گه‌نجانی كوردی له‌و وڵاته‌ ئاشکرایان کردوه‌ که‌ پۆلیسى ئه‌ڵمانى به‌چه‌ند ڕێگا هه‌وڵ ده‌دات ئه‌و گه‌نجه‌ کوردانه‌ى په‌نابه‌ریان نیه‌ به‌تایبه‌تى ئه‌وانه‌ى ته‌مه‌نیان له‌ (٢٠) ساڵى بۆ سه‌ره‌وه‌یه‌ بیانکه‌ن به‌ سیخوڕى خۆیان و به‌کاریان بێنن.
هه‌ر له‌ هه‌واڵی رۆژنامه‌كه‌دا هاتووه‌ : زانرا که‌ پۆلیس له‌ هه‌موو شوێنێک به‌ تایبه‌تى له‌ کۆمه‌ڵه‌ کوردییه‌کان هه‌تا له‌ وێستگه‌کان و له‌ ناوه‌ندى چالاکیه‌کان کار ده‌کات که‌ گه‌نجان بخاته‌ ژێر کاریگه‌رى سیخوڕییه‌وه‌ و داواى کارکردنیان لێده‌که‌ن.
رۆژنامه‌ ئه‌ڵمانیه‌كه‌ ده‌ڵێت : هه‌موو ئه‌م زانیاریانه‌ له‌لایه‌ن ئه‌و گه‌نجانه‌وه‌ ڕاگه‌یاندراوه‌ که‌ خۆیان ڕووبه‌ڕووى داواکارى کاری سیخوڕی ئه‌ڵمانى بونه‌ته‌وه‌.
كوردیو

سه‌رچاوه‌ : ANF NEWS

Tuesday, December 18, 2012

لە ڕۆژى جیهانى کۆچبەراندا : 200 ملیۆن مرۆڤ لە کۆچدان لە پێناو ژیانێکى باشتر


18ى دیسەمبەرى هەموو ساڵێک لەلایەن رێکخراوى نەتەوە یەکگرتووەکانەوە وەک ڕۆژى جیهانى کۆچبەران ناسێنراوە کە میللەتانى دونیا بە شێوازوبۆنەى جیاواز ئەم ڕۆژە بەرز ڕادەگرن.
ئەگەر ئاوڕێک لە مێژووى کۆچى گەلى کورد بدرێتەوە بەئاشکرا ئەوەمان بۆدەردەکەوێت کە ئەگەر بۆ میللەتانى تر هۆرکارێک هەبووبێت بۆ کۆچکردنیان ، ئەوا بۆ کورد هەڵهاتن لەپێناو "مانەوە لە ژیاندا" زۆرجار لە سەرجەم قۆناغەکانى ڕابردوودا فاکتەرى بنچینەیى بوون بۆ ئەوەى بیر لە جێهێشتنى ووڵات و دۆزینەوەى پێگەیەکى نوێ بکەنەوە.
ناکرێت لێرەدا باس لە سەرجەم قۆناغە مێژوویەکانى کۆچى کورد بکەیت لە ڕابردوودا ، بەڵام هەڵوێستەکردنێک لەسەر ساڵانى دواى ڕاپەرێن بۆ ئەم یادە گەلێک پێویستە چونکە لەماوەى دەساڵى دواى ڕاپەڕین بەشێوەیەکى دیار گەلى کوردیش بوو بە خاوەنى تاراوگە و زیاتر لەوەش کەلتورى " ئەوانى تر" گوازرایەوە ناو کۆمەڵگاى کوردى.
برسێتى و قاتوقڕى و خراپى دۆخى سیاسى و ئەمنى ناوخۆى هەرێمى کوردستان بەجۆرێک بوو کە هەرچۆنێک ووڵاتت بەجێ بهێشتایە و بگەشتیتایە ووڵاتێکى ترى ئەوروپا یان نزیک ئەوروپاش ،زۆر بەزوویى قەرەبووى نەهامەتیەکانى رێگات دەکردوە. هەرچەندە ڕێگاى هات و نەهاتى کۆچى قاچاخ بوو بوو بە گۆڕەپانێکى ترى مەرگ بۆ سەدان کۆچبەرى کورد ، بەڵام هەرگیز شەوقى گڵۆپەکانى ئەستەنبوڵى لە دڵى گەنجانى لەو سەردەمەدا نەدەکوژاندەوە و وەک ووتراش ناحەقیان نەبوو .
لەبەر بەختى باشى کۆچبەران لەو دەیەیەى نەوەتەکاندا ، ئابوورى ئەوروپاش بەڕادەیەکى زۆر پێویستى بە دەستى کارى کۆچبەران بوو کە زۆربەزوویى ووڵاتانى وەرگر بیانوویەکیان دەدۆزیەوە بۆ کۆچبەران و مافى مانەوەیان بۆ ئەوان مسۆگەر دەکرد.
بەڵام لە پاش ڕووخانى حکومەتى بەعسى عێراق و نەمانى گرژى و ئاڵۆزیەکانى ناوخۆى هەرێمى کوردستان ، دەرگاکانى دەرەوە بەڕووى هەرێمى کوردستاندا کرایەوە و دۆخەکە گۆِرانکارى دراماتیکى بەخۆیەوە بینى . چۆڵایەکانى دەرەوەى شارى هەولێرو دەشتەکەى بەکرەجۆ فڕۆکەخانەى نێودەوڵەتەیان بەخۆوە بینى ، کە لەو دەیەیەى نەوەتەکاندا وەک خەونى وەنەوشەیى و نوکتەئاسا باسیان لێوە دەکرا. خوێندکارانى کورد پەیوەندیان بە زانکۆکانى دەرەوەى ووڵاـ کرد و کۆچى قاچاخ بوو بە کۆچى یاسایى بەئامانجى خزمەتکردنى ووڵات و ووڵاتانى دەرەوەش لەڕێگەى نوسیگەکانیانەوە لە هەرێمى کوردستان زیارتر و زیاتر ئاشنایەتیان پەیداکرد لەگەڵ ئەم هەرێمەدا و بەجۆرێک کە هەرێمەکە بە " عێراقەکەى تر" گوزارشت دەکرێت.
لەگەڵ ئەوەشدا لەو ماوەیەدا و تائێستاشى لەگەڵدا بێت ئابوورى ئەوروپا بە گشتى پاشەکشەى کرد و کینەى هاوڵاتیانى وووڵاتانى وەرگر بەرامبەر بە کۆچبەران و پەناخوازان ڕوو لە زیادبوو بەجۆرێک کە ئەو کینەیە واى لە بەشێک لە پارتە سیاسیەکانى ئەوروپاکرد کە قەدەغەکردنى کۆچى نایاسایى و ڕەتکردنەوەى کەیسى کۆچبەران ببێت بە بەشێک لە ئەجێنداى سیاسیان. بەمەش ڕەوشى ژیانى پەناخوان و کۆچبەران لەسەرتاسەرى جیهاندا و لە ئەوروپا بە تایبەتى ڕۆژبەرۆژ لە خراپبوووندایە بە جۆرێک کە سکرتێرى گشتى نەتەوە یەکرگرتووەکانیش ( بان کى موون ) لە پەیامێکى کورتدا لەسەر ماڵپەرى فەرمى نەتەوە یەکگرتووەکان بە ئاشکرا نیگەرانى خۆى لە یادى ئەمساڵى ڕۆژى کۆچبەرانى جیهان دەردەبڕێت بەرامبەر ئەو جیاکاریانەى کەلە جیهاندا بەرامبەر بە کۆچبەران دەکرێـت لە کاتێکدا ڕێژەکە ساڵ بە ساڵ لە زیادبووندایە و بەپێى زانیاریەکانى ئاژانسى هەواڵى دەنگى ئەمەریکاش نزیکەى 200 ملیۆن مرۆڤ لە ئێستادا ووڵاتى خۆیان بەجێ هێشتووە لەپێناوى دۆزینەوەى داهااتوویەکى باشتردا.
ئەگەر قەیرانەکە جارێکى تر لە پەیوەند بە هەرێمى کوردستانەوە باس بکەین ، هێشتا دۆخى هەرێمەکە نەگەشتۆتە ئاستێکى زۆر باش ، گومانى تێدا نیە کە هەنگاوەکان هەمیشە بە ئاڕاستەى پێشوە دەنرێن . ڕەتکردنەوەى بەردەوامى
کەیسى پەناخوازانى کوردى ئەم هەرێمە لەلایەن ووڵاتانى وەرگرەوە بەڵگەى ئەو ڕاستیەن کە ئەم هەرێمە شایانى بەجێ هێشتن نیە و ئەوان گەشتونەتە ئەو ڕاستەیەى کە دەرفەتەکان تازە لێرە دەستپێدەکەن و سەرسامن جا چ لە ئاستى گشتى یان سیاسیشدا بەرامبەر بە دۆخى گەشى هەرێم و پێشبینیکردنى داهاتوویەکى باشتر بۆ دانیشتوانەکەى.
لە کۆتایدا ، جێگەى خۆیەتى کە پرسە و سەرەخۆشى خۆمان لە یادەدا بگەیەنینە کەسوکارى ئەو کۆچبەرو پەناخوازە کوردانەى لە پێناو دۆزینەوەى ژیانێکى پاشتر گیانیان لە دەستدا و هیوادارم گەنجانى ووڵاتەکەم لەوەى ڕوویدا وانەیەک فێر بن نەک دووبارەى بکەنەوە.

Sunday, December 16, 2012

چه‌مچه‌ماڵ: په‌نابه‌رانی‌ دیپۆرتكراوه‌ گردبونه‌وه‌یه‌كیان ئه‌نجامداو داوای‌ مافه‌كانیان ده‌كه‌ن


به‌مه‌به‌ستی‌ جێبه‌جێكردنی‌ داواكارییه‌كانیان و گوێگرتنیان له‌لایه‌ن حكومه‌تی‌ هه‌رێمه‌وه‌، ئه‌مرۆ یه‌كشه‌ممه‌ به‌ئاماده‌بونی‌ سكرتێری‌ فیدراسیۆنی‌ سه‌راسه‌ری‌ په‌نابه‌رانی‌ عیراق، ژماره‌یه‌ك له‌په‌نابه‌رانی‌ كوردی‌ دیپۆرتكراوه‌ له‌به‌رده‌م قایمقامیه‌تی‌ قه‌زای‌ چه‌مچه‌ماڵ‌ گردبوونه‌وه‌یه‌كیان ئه‌نجامداو هاوكات یاداشتێكیشیان ئاڕاسته‌ی‌ قایمقامی‌ چه‌مچه‌ماڵ كرد.

ده‌شتی‌ جه‌مال سكرتێری‌ فیدراسیۆنی‌ سه‌راسه‌ری‌ په‌نابه‌رانی‌ عێراق له‌لێدوانێكیدا بۆ خه‌ندان وتی‌: ئامانج له‌م گردبوونه‌وه‌یه‌ كه‌ به‌نوێنه‌رایه‌تی‌ (6000) كه‌س ئه‌نجاممانداوه‌، جێبه‌جێكردنی‌ داواكارییه‌كانمانه‌ له‌لایه‌ن حكومه‌تی‌ هه‌رێمه‌وه‌ كه‌ خۆی‌ له‌ شانزه‌ خاڵدا ده‌بینێته‌وه‌.

وتیشی‌: "داواكارییه‌كانیشیمان بریتین له‌ جێبه‌جێكردنی‌ ئه‌و یاساو بریارانه‌ی‌ حكومه‌تی‌ عێراقی‌ بۆ په‌نابه‌رانی‌ دیپۆرتكراوه‌ ده‌ریكردوون، له‌لایه‌ن حكومه‌تی‌ هه‌رێمه‌وه‌، هه‌روه‌ها جێبه‌جێكردنی‌ یاسای‌ ژماره‌ 262ی‌ حكومه‌تی‌ هه‌رێم كه‌ تایبه‌ته‌ به‌مفای‌ په‌نابه‌رانی‌ دیپۆرتكراوه‌".

ده‌شتی‌ جه‌مال رونیشیكرده‌وه‌: داوامان كردووه‌ كار بۆ په‌نابه‌رانی‌ دیپۆرتكراوه‌ دابین بكریت یاخود بیمه‌ی‌ بێكارییان پێبدرێت یا به‌شێوه‌یه‌ك له‌شێوه‌كان قه‌ره‌بوو بكرێنه‌وه‌.

ناوبراو ئاشكرایكرد، كه‌ تا ئه‌وكاته‌ی‌ حكومه‌تی‌ هه‌رێم داواكاریه‌كانیان بۆ جێبه‌جێ‌ ده‌كات چالاكییه‌كانمان فراوانتر ده‌كه‌ن و له‌ته‌واوی‌ شاروچارۆچكه‌كانی‌ هه‌رێمی‌ كوردستان ده‌رژێنه‌ سه‌ر جاده‌و به‌رێگه‌ی‌ مه‌ده‌نیانه‌ داوای‌ مافه‌كانی‌ په‌نابه‌رانی‌ دیپۆرتكراوه‌ ده‌كه‌ن.

له‌باره‌ی‌ سیاسه‌تی‌ لێپرسراوانیشه‌وه‌، ده‌شتی‌ جه‌مال ئاماژه‌ی‌ به‌وه‌كرد، په‌نابه‌رانی‌ دیپۆرتكراوه‌  قوربانی‌ ده‌ستی‌ سیاسه‌تی‌ لێپرسراوانی‌ حكومه‌تی‌ عیراقی‌ و حكومه‌تی‌ هه‌رێمن، له‌به‌رئه‌وه‌ی‌ رێكه‌وتننامه‌و واژۆیان كردووه‌ تاكو په‌نابه‌ران دوور له‌خواست و ویستی‌ خۆیان دیپۆرت بكرێنه‌وه‌، ئه‌مه‌ له‌كاتێكدا په‌نابه‌رانی‌ له‌كاتی‌ به‌زۆر گه‌راندنه‌وه‌یان له‌ فرۆكه‌خانه‌كانی‌ عیراقدا رووبه‌رووی‌ ئه‌شكه‌نجه‌و ئازاربونه‌ته‌وه‌.

سكرتێری‌ فیدراسیۆنی‌ سه‌رتاسه‌ری‌ په‌نابه‌رانی‌ عیراق ئه‌وه‌شی‌ وت، ماوه‌ی‌ زیاتر له‌ دوو ساڵه‌ پرۆژه‌ یاسای‌ مافی‌ په‌نابه‌رانی‌ دیپۆرتكراوه‌، له‌په‌رله‌مانی‌ كوردستانه‌و تا ئێستا گفتوگۆی‌ له‌باره‌وه‌ نه‌كراوه‌، بۆیه‌ داواكارین له‌په‌رله‌مانی‌ كوردستان به‌زووترین كات گفتوگۆ له‌سه‌ر ئه‌و پرۆژه‌ یاسایه‌ بكات.

دوابه‌دوای‌ پێشكه‌شكردنی‌ یاداشتی‌ داواكارییه‌كانیان به‌ ئیداره‌ی‌ قه‌زاكه‌، تارق ره‌شید قایمقامی‌ چه‌مچه‌ماڵ‌ هه‌موو پشتگیریه‌كی‌ خۆی‌ بۆ داواكارییه‌كانیان ده‌ربری‌ و به‌ڵێنی‌ پێدان داواكارییه‌كانیان بگه‌یه‌نێته‌ لایه‌نی‌ په‌یوه‌ندیدار.

داواشی‌ له‌ فیدراسیۆنی‌ سه‌رتاسه‌ری‌ په‌نابه‌رانیش كرد، هه‌ماهه‌نگییان هه‌بێت تاكو به‌پێی‌ ئه‌و بواره‌ی‌ كه‌ هه‌یه‌ به‌شێك له‌ په‌نابرانی‌ دیپۆرتكراوه‌ به‌ كۆمپانیاكانی‌ سنوره‌كه‌دا دابمه‌زرێن. داواشیكرد ئه‌وانه‌ی‌ بروانامه‌یان هه‌یه‌ داواكاری‌ پێشكه‌ش بكه‌ن تاكو له‌و رێگه‌یه‌وه‌ دابمه‌زرێن و دووباره‌ بگه‌رێنه‌وه‌ بۆ ناو كۆمه‌ڵگه‌و له‌خزمه‌تكردن به‌رده‌وام بن.

به‌پێی‌ ئه‌و زانیاریانه‌ ده‌ست (خه‌ندان) كه‌وتووه‌ ته‌نها له‌سنوری‌ قه‌زای‌ چه‌مچه‌ماڵدا (حه‌وت سه‌د) په‌نابه‌ری‌ دیپۆرتكراوه‌ هه‌یه‌.

چه‌مچه‌ماڵ-پێشه‌وا شێخ ره‌ئووف

20 كۆچكه‌ری عیراقی له‌ ئاوه‌كانی‌ یۆناندا ده‌خنكێن



دوێنێ‌ شه‌ممه‌ پۆلیسی‌ یۆنان ئاشكرایكرد، به‌له‌مێكی‌ بچو‌وك كه‌ نزیكه‌ی‌ 30 كۆچكه‌ری‌ هه‌ڵگرتبوو، سه‌رله‌ به‌یانی‌ دوێنێ‌ به‌رله‌وه‌ی‌ بگه‌نه‌ یۆنان له‌ نزیك دورگه‌ی‌ لیسفۆس_ی‌ رۆژئاوا نقووم بووه‌ و به‌و هۆیه‌شه‌وه‌ 20 كه‌س خنكان.

ئاژانسه‌كانی‌ هه‌واڵ بڵاویانكردۆته‌وه‌، یه‌كێك له‌ رزگاربوانی‌ ئه‌و به‌له‌مه‌ ئاشكرای‌ كردووه‌، له‌ توركیاوه‌ به‌ره‌و یۆنان به‌ڕێ كه‌وتوون، ژماره‌ی‌ سه‌رنشینه‌كانی‌ ئه‌و به‌له‌مه‌ 27 كۆچكه‌ر و كاپتنه‌كه‌ی‌ بووه‌‌و پێش گه‌یشتنیان به‌ دورگه‌كه‌ به‌ دووری‌ 1.6 كیلۆمه‌تر به‌هۆی‌ بای‌ به‌هێزه‌وه‌ نقووم بووه‌.

به‌ پێی‌ وته‌ی‌ به‌رپرسێكی‌ پۆلیسی‌ ناوچه‌كه‌ش، كه‌سه‌ رزگار بوه‌كانی‌ ئه‌و به‌له‌مه‌ به‌ ئێشكگری‌ كه‌ناراوه‌كانیان راگه‌یاندووه‌ كه‌ هه‌موویان عیراقین و له‌به‌رامبه‌ر گواستنه‌وه‌ی‌ هه‌ریه‌كێكیان دوو هه‌زار دۆلاریان لێ وه‌رگیراوه‌.

پاش ئه‌و رووداوه‌ش هێزی‌ ده‌ریاوانی‌ و ئێشكگری‌ كه‌ناراوه‌كان گه‌یشتوونه‌ته‌ شوێنی‌ رووداوه‌كه‌ و ته‌رمی‌ 20 كه‌سیان دۆزیوه‌ته‌وه‌.

خه‌ندان-



وەهمى بەهەشت


لە 18، 19 و 20ى کانونى یەکەم/دیسێمبەردا چەند فیلمێکى دۆکیومێنتەرى پێشان دەدرێن لەبارەى ژیان و سەربوردەى کورد و گەلانى تر کە بە قاچاخ وڵاتى خۆیان بەجێ دێڵن بە هیواى ژیانێکى باشتر.
کۆچى نایاسایى کێشەیەکى رژدە لە کوردستان. لەگەڵ ئەوەشدا، هۆشیاریێکى کەم هەیە لەبارەى دەرەنجامە نەرێنییەکان یانیش لەبارەى بوونى دەرفەتى یاسایى بۆ کۆچ.
وەزارەتى رۆشنبیریى کوردستان و سەنتەرى میدیاى سەربەخۆ لە کوردستان بەخۆشحاڵییەوە هاوکارى فیستڤاڵەکە دەکەن.
سەنتەرى میدیاى سەربەخۆ لە زنجیرەیەک خولدا بۆ کۆمەڵێک کەناڵى تەلەڤزیۆنى لۆکال و فیلمسازان لە سلێمانى و هەولێر کۆمەڵێک فیلمى دۆکیومێنتەرى بەرهەم هێناوە. فیلمەکان پێشان دەدرێن لە هەر سێ رۆژى فیستیڤاڵەکە و پاشان باشترین فیلم خەڵات دەکرێ.
لە هەمان کاتى فیستیڤاڵەکەدا، پێشانگایەکى هونەرى و فۆتۆ دەکرێتەوە بۆ پێشاندانى پرس و ژیانى رۆیشتنى بە قاچاخ.
هیوادارین لە رۆژانى 18-20ى دیسێمبەر لە هۆڵى پێشەوان لە هەولێر لە ناو وەزارەتى رۆشنبیرى ئێوە ببینین.
لەگەڵ ئەوپەڕى ڕێزدا

وەهمى بەهەشت- رۆژى جیهانیى کۆچەران
مێژوو: 18، 19 و 20ى کانونى یەکەم/دیسێمبەر
کات: 4-7:30ى ئێوارە
شوێن: هۆڵى پێشەوا، هەولێر (ناو وەزارەتى رۆشنبیرى)

Thursday, December 13, 2012

یه‌كه‌م فیستیڤاڵی‌ كۆچبه‌ران له‌ كوردستان به‌رێوه‌ده‌چێت


به‌مه‌به‌ستی‌ هۆشیاركردنه‌وه‌ی‌ لاوان و گه‌نجان له‌ كۆچی‌ نایاسایی و له‌ رۆژی‌ جیهانی‌ كۆچبه‌ران رۆژانی‌ 18-20/12/2012  وه‌زاره‌تی‌ رۆشنبیری‌ حكومه‌تی‌ هه‌رێمی‌ كوردستان به‌هاوكاری‌ سه‌نته‌ری‌ میدیای‌ سه‌ربه‌خۆ یه‌كه‌م فیستیڤاڵ به‌ دروشمی‌ (وه‌همی‌ به‌هه‌شت) سازده‌كات و تێدا چه‌ندین وێنه‌ و فیلمی‌ دیكۆمێنتاری‌ له‌سه‌ر ئه‌و دیارده‌یه‌ نمایش ده‌كرێت.

 له‌باره‌یه‌وه‌ گۆران سه‌باح روێژكاری‌ میدیا له‌ رێكخراوی‌ ستاتی‌ نێوده‌ڵه‌تی‌ بۆ پرسی‌ په‌نابه‌ران و كۆچبه‌ران  به‌ خه‌ندانی‌ راگه‌یاند: له‌رۆژی‌ جیهانی‌ كۆچبه‌ران بۆ یه‌كه‌مجار له‌ هه‌رێمی‌ كورستان فیستیڤاڵێكی‌ سی رۆژه‌ سازده‌كرێت ، ئامانج لێی‌ هۆشیاركردنه‌وه‌ی‌ ئه‌و گه‌نجانه‌یه‌ كه‌ تاكوئێستا به‌شسَوه‌یه‌كی‌ نایاسای كۆچ ده‌كه‌ن.

وتیشی‌: "ئێمه‌ له‌و فیستیڤاڵه‌ ده‌مانه‌وێ‌ ره‌وشی‌ كۆمه‌ڵگاكانی‌ ئه‌وروپا و رۆژئاوا به‌گشتی‌ بۆ گه‌نجان بخه‌ینه‌روو كه‌ له‌چ بارودۆخێكی‌ خراپدان ، به‌ تایبه‌تی‌ له‌رووی‌ ئابووری‌ ، كاتێكیش گه‌نجانمان روو له‌و ولاَتانه‌ ده‌كه‌ن رووبه‌رووی‌ بێ ئومێدی‌ ده‌بنه‌وه‌".

گۆران سه‌باح رونیشیكرده‌وه‌: له‌میانه‌ی‌ ئه‌و سێ رۆژه‌دا چه‌ندین فیلم و وێنه‌ی‌ دیكۆمێنتاری‌  و تابلۆی‌ هونه‌ری‌ نمایش ده‌كرێت كه‌ باس له‌ نه‌هامه‌تیه‌كانی‌ كۆچبه‌رانی‌ نایاسایی ده‌كات، پێشبركێش بۆ ئه‌و فیلم و وێنانه‌ ده‌كرێت و باشترینیان خه‌لاَت ده‌كرێن.

به‌ئامانجی‌ پێشێل نه‌كردنی‌ مافه‌كانیان 18/12 /2000 له‌لایه‌ن نه‌ته‌ویه‌كگرتوه‌كانه‌وه‌ وه‌ك رۆژی‌ كۆچبه‌ران ده‌ستنیشان كرا، ئه‌مه‌ له‌كاتێدا رۆژی‌ 20/6/2001 رۆژی‌ جیهانی‌ په‌نابه‌ران ده‌ستنیشانكراوه‌. 
خه‌ندان- ره‌هێل سه‌مه‌د

Wednesday, December 12, 2012

700 دیپۆرتكراوه‌كه‌ى گه‌رمیان دواى قه‌ربوو ده‌كه‌ن


ژماره‌یه‌ك لە دیپۆرتكراوه‌)كانى سنورى ئیداره‌ى گه‌رمیان له‌ گردبوونه‌وه‌یه‌كدا داویان كرد حكومه‌تى هه‌رێمى كوردستان قه‌ره‌بوویان بكاته‌وه‌ .

ژماره‌یه‌كى زۆر له‌و كوردانه‌ى كه‌ له‌ وڵاتانى ئه‌وروپا مافی پەنابەریان پێدرابوو، به‌بڕیارى به‌شێك له‌و وڵاتانه‌ نێردارونه‌تەوه‌ بۆ كوردستان و پێیان گوتراوه‌ له‌پاش گه‌یشتنیان بۆ كوردستان، له‌ لایه‌ن حكومه‌تى هه‌رێمى كوردستانه‌وه‌ قه‌ره‌بوو ده‌كرێنه‌وە.

هەر بۆ ئەو مەبەستەش، ئەمڕۆ سێ شەممە، ژمارەیەک لە 700 دیپۆرتکراوەکەی گەرمیان لە بەردەم بەڕێوەبەرایەتی ئیدارەی گەرمیان گردبوونەوەیەکیان ئەنجامدا و تێیدا داوایان لە حکومەتی هەرێمی کوردستان کرد قەرەبوویان بکاتەوە.

عەلی تۆفیق، یەک لەو دیپۆرتکراوانەی گەرمیان بە (روداو)ی راگەیاند "ئێمه‌ كه‌ نێردراینه‌وه‌ بۆ كوردستان پێیان گوتین حكومه‌تى هه‌رێمى كوردستان ره‌زامه‌ندى ده‌ربڕیوه‌ به‌وه‌ى كه‌ قه‌ره‌بوو بكرێینه‌وه‌ به‌ڵام وانه‌بوو تاوه‌كوو ئێستا هیچمان بۆنه‌كراوه‌. کەچی له‌ عێراق پارچه‌زه‌ویه‌ك وه‌ بڕى 4 ملیۆن دینار ده‌درێت به‌هه‌ر دیپۆرتكراوێك".

هەروەها ده‌شتى جه‌مال، سكرتێرى فیدراسیۆنى سه‌رانسه‌رى په‌نابه‌رانى عێراق به‌ (رووداو)ى راگه‌یاند "ئامانج له‌م گردبوونه‌وه‌یه‌ گه‌یاندنى ده‌نگى ناڕه‌زایەتی دیپۆرتكراوه‌كانى گه‌رمیانە. هه‌فته‌ى رابردوو به‌نوێنه‌رایه‌تى زیاتر له‌ 6 هه‌زار دیپۆرتكراوى هەرێمی كوردستان له‌ سلێمانى خۆپیشاندانمان ئه‌نجامدا، ئه‌مڕۆش له‌ گه‌رمیان به‌ به‌نوێنه‌رایه‌تى زیاتر له‌ 700 كه‌س گردبووینه‌وه‌ و داوا ده‌كه‌ین حكومه‌تى هه‌رێمى كوردستان وپه‌رله‌مانى كوردستان پڕۆژه‌ بڕیارى فیدراسیۆن جێبه‌جێ بكات كه‌ خواستى په‌نابه‌ره‌ دیپۆرتكراوه‌كانى تێدا هاتووە".

سكرتێرى فیدراسیۆنى سه‌رانسه‌رى په‌نابه‌رانى عێراق گوتیشی "بۆ ئەو مەبەستە یاداشتێکمان پێشكه‌شى ئیداره‌ى گه‌رمیان كردووه‌ كه‌ داوا له‌ سه‌رۆك و جێگرى سەرۆکی هه‌رێمى كوردستان بکات کە په‌له‌ بكه‌ن له‌ جێبه‌جێ كردنى ئه‌و پرۆژه‌ بڕیاره‌ و وه‌ڵامان بدەنەوە، ئه‌گه‌رنا هه‌ڵویستى ترمان ده‌بێت به‌رانبه‌ر به‌ حكومه‌تى هه‌رێمى كوردستان".

هه‌ڤاڵ ئیبراهیم محەممەد، بەڕێوەبەری راگه‌یاندنى ئیداره‌ى گه‌رمیان لە لێدوانێکدا بۆ (رووداو) رایگەیاند "به‌رپرسى ئیداره‌ى گه‌رمیان پاڵپشتی لە داواکارییەکانیان کردووە و بەڵێنی پێداون داواکارییەکانیان بگەیەنێتە لایەنی پەیوەندیدار".

هەڵۆ محەممەد
رووداو- کەلار


Sunday, December 9, 2012

پەنابەرێکی دیپۆرتکراو لە کێشەیەکی کۆمەڵایەتیدا گیانی لەدەستدا


بەپێ ئەو هەواڵانەی بەدەستی لقی کوردستانی فیدراسیۆن گەیشتوە پەنابەرێك لە قه‌زای‌ چه‌مچه‌ماڵ له‌ڕووداوێکی کۆمەڵایەتیدا گیانی لەدەستدا.
به‌پێی‌ زانیاریه‌كانی‌ فیدراسیۆنی سەرسەری پەنابەرانی عێراقی  لقی کوردستان، ئه‌و په‌نابه‌ره‌بۆ ماوەی پێنج ساڵ لە وڵاتی بەریتانیا ژیانی بەسەر بردوە، بەڵام بەهۆی گوشاری سیاسەتی دژی پەنابەری حکومەتی بەریتانیا لەمافی پەنابەری نائومید دەکرێت.
ئه‌و هاوڵاتیه‌ لەبەرواری ٢٠-١١-٢٠١١ دیپۆرتی فرۆکەخانەی بەغدا دەکرێتەوه‌، ئه‌و په‌نابه‌ره‌ لە خۆپێشاندانی ناڕەزایەتی دیپۆرتکراوەکان لە بەرواری١٥-٤-٢٠١٢ لەبەردەم نوسینگەی پەرلەمانی کوردستان لە شاری سلێمانی بەشداری دەکات لەپێناو جێبەجێکردنی  خواستە ڕەواکانی دیپۆرتکراوەکان لە هەرێمی کوردستاندا.
هاوڵاتی‌

Thursday, December 6, 2012

هێڵی بازرگانی ئاسمانی نێوان ئەمریکا و هه‌رێمی‌ کوردستان دەکرێتەوە


دەزگای فڕۆکەوانی فیدراڵی ئەمریکا (FFA) بڕیاری دا بە هەڵوەشاندنەوەی ئەو بڕیارەی کە ١٦ ساڵ لەمەوبەر بەمەبەستی ڕاگرتنی هێڵی بازرگانی ئاسمانی بۆ هەرێمی کوردستان دابوی، ڕاشیگەیاند سەرلەنوێ گەشتەکانیان بۆ عیراق و هه‌رێمی‌ كوردستان ده‌ست پێده‌كاته‌وه‌.

ماڵپەڕی کۆنکۆرد مۆنیتەری ئەمریکی بڵاویکردەوە، دەزگای فڕۆکەوانی فیدراڵی ئەمریکا (FFA) بڕیاریداوە بە کردنەوەی گەشتی ئاسمانی بۆ شارەکانی هەولێر و سلێمانی بەمەبەستی بەرەوپێشبردنی پەیوەندی بازرگانی لەنێوان هەرێمی کوردستان و ئەمریکادا، ئەمەش بەهۆی بەرەوپێشچونی باری ئەمنی و بەکارهێنای ئەم ڕێگە بازرگانییە لەلایەن وڵاتانی دیکەوە بێ ڕودانی هیچ کێشەیەک.

دەزگای (FFA)  ئەوەشی ڕاگەیاندووە"هەردوو فڕۆکەخانەی هەولێر و سلێمانی دەتوانرێت بەشێوەیەکی سەلامەت لەلایەن فڕۆکە بازرگانییەکانی ئەمریکاوە بەکار بهێنرێت".

ئەم بڕیارەش پاش ئەوە دێت کە گەشتی فڕۆکە ئاساییەکانی ئەمریکا بۆ عێراق و هەرێمی کوردستان لە بەرزی ٢٠ هەزار پێەوە ڕێگەی پێدراوە.

لە هەواڵەکەدا ئەوەش هاتووە، دەزگای فڕۆکەوانی فیدراڵی ئەمریکا داوای لە بەڕێوەبەرایەتی ئاسایشی گواستنەوە کردووە بۆ ڕێکخستنی کاروباری گواستنەوەی فڕۆکە ئەمریکیەکان بۆ عێراق ، هەروەها ڕاشی گەیاندووە کە هەڵسەنگاند بۆ فڕۆکەخانەی شارەکانی دیکەی عێراق دەکرێت بەمەبەستی دڵنیابوون لە دۆخی ئەمنی و جێبەجێکردنی بڕیاریرەکە لەو شارانەی دیکەشدا.

لە ساڵی ١٩٩٦دا ئەمریکا سەرجەم گەشتەکانی بۆ عێراق ڕاگرت، بەمەبەستی سەلامەتی هاوڵاتیان بەهۆی ململانێکانی ڕژێمەکەی سەدام حسێن دوابەدوای ئەوەش ڕوخانی ڕژێمەکە لەلایەن سوپای ئەمریکاوە، لەم ساڵیشدا بەهۆی باشبونی پەیوەندی سیاسی و بازرگانی ئەمریکا لەگەڵ حکومەتی هەرێمی کوردستاندا جاریکی تر بڕیاری کردنەوەی ئەوڕێگا بازرگانیانە کەوتە بواری جێبەجێکردنەوە.

لە ئینگلیزییەوە هاوڕێ فەریق
خەندان-

Sunday, December 2, 2012

ساڵی‌ داهاتوو خولی‌ نوێی‌ تواناسازی‌ ڕاده‌گه‌یه‌ندرێت

به‌گوێره‌ی‌ ئاماده‌كاریه‌كانی‌ وه‌زاره‌تی‌ خوێندنی‌ باڵاو توێژنه‌وه‌ی‌ زانستی‌ حكومه‌تی‌ هه‌رێم‌و دوای‌ جێبه‌جێكردنی‌ مامه‌ڵه‌ی‌ زۆرێك له‌كاندیدانی‌ تواناسازی‌ له‌خوله‌كانی‌ ڕابردوودا، سه‌ره‌تایی‌ ساڵی‌ داهاتوو خولی‌ نوێی‌ پرۆگرامی‌ تواناسازی‌ لاوان ڕاده‌گه‌یه‌ندرێت.

(د. گۆڤه‌ند شێروانی‌) به‌ڕێوه‌به‌ری‌ پرۆگرامی‌ تواناسازی‌ لاوان له‌وه‌زاره‌تی‌ خوێندنی‌ باڵاو توێژینه‌وه‌ی‌ زانستی‌ حكومه‌تی‌ هه‌رێمی‌ كوردستان بۆ  NNAڕوونكرده‌وه‌، ئاماده‌كاریه‌كان له‌لایه‌ن وه‌زاره‌تی‌ خوێندنی‌ باڵاوه‌ بۆ ڕاگه‌یاندنی‌ خولی‌ نوێی‌ پرۆگرامی‌ تواناسازی‌ لاوان به‌رده‌وامه‌و له‌ئێستاشدا، سه‌رجه‌م ڕێنماییه‌كانی‌ ڕاگه‌یاندنی‌ ئه‌و خوله‌و وه‌رگرتنی‌ خوێندكاران تێیدا به‌كۆتا هاتووه‌.

وتیشی‌:"له‌ئێستادا، له‌وه‌زاره‌تی‌ خوێندنی‌ باڵاو توێژینه‌وه‌ی‌ زانستی‌ هه‌رێم، سه‌رقاڵی‌ جێبه‌جێكردنی‌ مامه‌ڵه‌ی‌ كاندیدانی‌ خوله‌كانی‌ ڕابردووی‌ تواناسازیه‌و ڕاگه‌یاندنی‌ خولی‌ نوێی‌ تواناسازی‌ له‌ده‌سه‌ڵاتی‌ لیژنه‌ی‌ باڵادایه‌ له‌ئه‌نجومه‌نی‌ وه‌زیران‌و پێده‌چێت سه‌ره‌تایی‌ ساڵی‌ نوێ‌ ئه‌و خوله‌ی‌ تواناسازی‌ ڕابگه‌یه‌ندرێت".

ڕۆژی‌ (27-11-2012) وه‌زیری‌ خوێندنی‌ باڵاو توێژینه‌وه‌ی‌ زانستی‌ هه‌رێم، له‌كۆنگره‌یه‌كی‌ ڕۆژنامه‌وانیدا ڕایگه‌یاند، پرۆگرامی‌ تواناسازی‌ به‌رده‌وامده‌بێت‌و له‌ئاینده‌یه‌كی‌ نزیكدا خولی‌ نوێی‌ ئه‌و پرۆگرامی‌ ڕاده‌گه‌یه‌ندرێت.
-----------------------------------------------------------------
ئارام قه‌ره‌داغی‌- هه‌ولێر (/)
NNA

Wednesday, November 28, 2012

رۆژی پێنجشەممە په‌نابه‌رانی‌ دیپۆرتكراو له‌سلێمانی‌ خۆپیشاندان ده‌كه‌ن


فیدراسیۆنی سەراسەری پەنابەرانی عێراق رایدەگەیەنێت دابین كردنی ژیانی 6 هەزار پەنابەری دیپۆرتكراوە، لەئەستۆی حكومەتی هەرێمدایە‌و داوا لەهاوڵاتیان دەكات بەشداری لەو خۆپیشاندانەدا بكەن كە رۆژی پێنجشەممە لەسلێمانی بۆ پشتیوانیكردن لەپەنابەرە دیپۆرتكراوەكان سازدەكرێت.
لقی كوردستانی فیدراسیۆنی سەراسەری پەنابەرانی عێراقی، لەبەیاننامەیەكدا رونیدەكاتەوە لە ساڵی ٢٠٠٥ وە زیاتر لە ٦ هەزار پەنابەری هەرێمی كوردستان بەدور لە خواست و بڕیاری خۆیان بەزۆرە ملێ دیپۆرتی هەرێمی كوردستان كراونەتەوە‌و ‌ژمارەیەكی بەرچاویشیان خاوەنی مناڵ‌و هاوسەرین‌و ئەوەی لەژیاندا هەمانبووە‌ لەدەستیانداوە.
بەیاننامەكە كە بەناوی پەنابەرە دیپۆرتكراوەكانەوە بڵاوكراوەتەوە تێیدا هاتووە “ئێمە نامانەوێت چیتر ببینەوە خۆراكی دەریا‌و دەمانەوێت لەم خەمۆكی‌و دەردو مەینەتیە، لەبێكاری‌و دەستكورتی‌و نەبوونی ڕزگارمان بێت”.
ئاماژەبەوەشدەكەن ناچارین دەنگی نارەزایەتی دەربرین‌و ئەویش لەكاتێكدا كەدەسەڵاتداران وەڵام بە كێشەكانمان‌ نادەنەوەو بەرپرسیارێتی بەرامبەر بەكێشەكانی ئێمە نیشان نادات‌.
فیدراسیۆنی سەراسەری پەنابەران داوا لەهاوڵاتیان دەكات بەشداری لەخۆپیشاندانەكەدا بكەن كە بڕیارە رۆژی پێنجشەممە ٢٩-١١ لەبەردەم بەردەم پارێزگاری سلێمانی، كاتژمێر٣٠:٨ بەیانی بەرێوەبچێت.
دەقی بەیاننامەكە:
دابین كردنی ژیانی 6 هەزار پەنابەری دیپۆرتكراوە، لەئەستۆی حكومەتی هەرێمدایە
ئێمە هاوڵاتی ئەم كۆمەڵگایەین
لە خۆپیشاندانی ناڕەزایەتی  لقی كوردستانی فیدراسیۆنی سەراسەری پەنابەرانی عێراقی بۆ وەڵامدانەوە بەكێشەوگیروگرفتی پەنابەرە دیپۆرتكراوەكان پشتیوانی بكەن
رۆژی:پێنج شەمە بەرواری: ٢٩-١١
شۆین: بەردەم پاریزگاری سلێمانی، كاتژمێر٣٠:٨ بەیانی
ئێمە پەنابەرانی دیپۆرت كراوە، قوربانی هەڵومەرجی نەخوازراوی كۆمەڵگای كوردستانین. سەرباری  لەدەستدانی ماڵو حاڵو پیداویستیەكانی ژیانمان، ئێمە ئەو ئینسانانەین ‌كە بۆ بەهرەمەند بوون لەژیانێكی ئاسودە، بەناچاری ڕێگای هەندەرانمان گرتەبەر ودوای سالانێكی زۆر ژیانكردن لە ولاتانی ئەوروپا، بەزۆرەملێ وەك ئەنجامێك لەسیاسەتی هاوبەشی نێوان دەوڵەتانی ئەوروپا وحكومەتی عێراقی و هەرێم، دیپۆرت كراوینەتەوە وسفرەی خاڵیمان بۆ ڕاخرا. ئێمە جگەلە نەبوونی سەرچاوەیەكی دەرامەت بێكاریش یەخەی پێگرتووین، سەرپەنایەكمان نیە بۆئەوەی تێیدا بژین‌و بوینەتەبار بەسەر كەسوكارمانەوه. بێئومیدی‌و نەخۆشی دەرونی‌و خۆشنەویستی ژیان هەرساتەو هەر ڕۆژه ژیانی داگیركردوین. بەڵام ئەوە دەسەڵاتو لایەنە بەرپرسەكانە كەتائێستا نەك هیچ مەسئولەیەتێك بەرامبەر بەژیانی خۆمان‌و ژیانی خێزان و مناڵانی بەجێماومان نیشان نادات، بگرە لەسەر سیاسەتی دیپۆرتكردنەوەی هاوچارەنوسەكانمان بەردەوامە.

ئێمە بەم ژیانی بێدەرەتانیو سەرگەردانیەمانەوە، چەندین جار لەرێگای فیدراسیۆنی پەنابەرانەوە، داوامان لەدەسەلاتدارن كردووە كەلەكێشەو گرفتەكانی ئێمەی پەنابەرە دیپۆرتكراوەكان تێبگات وبۆ گێرانەوەی ژیانی ئاسایمان وەك هاولاتیانی ئەم ولاتە هەنگاو هەڵگرێ. بەڵام  بە داخەوە جگەلە وەعدەو بەڵێن تائێستا ولەماوەی ٢سالی ڕابردوودا، كەمترین داخوازی بۆ باشكردنی ژیانمان وەڵامی وەرنەرگرتۆتەوە.
لە ساڵی ٢٠٠٥ وە زیاتر لە ٦ هەزار پەنابەری هەرێمی كوردستان بەدور لە خواست و بڕیاری خۆمان بەزۆرە ملی دیپۆرتی هەرێمی كوردستان كراوینەتەوە. ‌ژمارەیەكی بەرچاویشمان خاوەنی مناڵ‌و هاوسەرین‌و ئەوەی لەژیاندا هەمانبووە‌ لەدەستمانداوە. ئێستاش هیچ سەرچاوەیەكمان نیە بۆ دامەزراندنەوەی ژیان وچونەوە نێوكۆمەڵگا وەك هەر هاولاتیەكی ئاسایی ئەم ولاتە.
ئێمە نامانەوێت چیتر ببینەوە خوراكی دەریا ودەمانەوێت لەم خەمۆكی ودەردو مەینەتیە، لەبێكاریو دەستكورتی ونەبوونی ڕزگارمان بێت. مافی ژیان وبەهرەمەندبوون لەپێداویستیەكانی هاولاتی ئاسایی مافی ئێمەشه.‌ هەربۆیە ناچارین دەنگی نارەزایەتی دەربرین. ئەویش لەكاتێكدا كەدەسەلاتداران وەڵام بە كێشەكانمان‌ نادەنەوەو بەرپرسیارێتی بەرامبەر بەكێشەكانی ئێمە نیشان نادات‌.
ئێمە لەم ڕێگایەدا ئێوە بەهاولاتیو كەسوكاری خۆمان دەزانین. هانای ئێوە ئازادیخوازانو ئینسان دۆستان وڕیكخراوەكان وهەموو ئەولایەنە سیاسی وپیشەییانەی كەژیانی هاولاتیان بۆ مەبەستە وئەركی خۆیان بۆ بەدیهێنانی ژیانێكی ئاسودەو مسۆگەر داناوە، گەورەترین پشتیوانییە. بەتایبەتی باشبونی ژیانی ئێمە 6هەزار ئینسان باش بوونی 6هەزار خێزانە.. بۆیە گرنگە‌ لەگەڵمان بن.. پشتیوانمان بن. دەنگی ناڕەزایەتیو داخوازیەكانمان بەدەنگو داوای خۆتان بزانن.. ئەمە تەنها ڕیگایەكی شارستانیە بۆ ناچاركردنی دەسەڵاتداران تا وەلام بەژیانو داخوازیەكانمان بدەنەوە. داوادەكەین بەهەر شیوەیەكی گونجاوی خۆتان پشتگیری ناڕەزایەتیو خۆپیشاندانەكانمان بكەن بەشداری بكەن. 
بەهرەمەند بوون لەژیانی شایستەی ئینسانی، مافی هەر هاولاتیەكی كوردستانە!

لقی كوردستانی فیدراسیۆنی سەراسەری پەنابەرانی عێراقی
٢٦-١١-٢٠١٢
بۆ زانیاری زیاتر بەریزەوە پەیوەندی بكەن بە ژمارە تەلەفونەكانی(٠٧٧٠٢٢٠٤٨٤٤ یان ٠٧٥٠١٧٣٠٧٠٧)


ئاگادارییەکی بەپەلە بۆ گەنجانی بێکار


وه‌زاره‌تى کارو کاروبارى کۆمه‌ڵایه‌تى خولى مه‌شق و راهێنانى پیشه‌یى له‌هه‌ولێر ده‌ستپێده‌کات
 
به‌ڕێوه‌به‌رایه‌تى به‌کارخستن و راهێنانى پیشه‌یى هه‌ولێر هه‌ڵده‌ستێت به‌کردنه‌وه‌ى خولى راهێنانى پیشه‌یى (به‌یانیان) بۆ ماوه‌ى 4 مانگ به‌خۆڕاى له‌پیشه‌کانى (کۆمپیوته‌ر – درومان – کاره‌با – ساردکه‌ره‌وه‌ – موه‌لیده‌ – لیحام – دارتاشى) بۆ ئه‌و که‌سانه‌ى که‌ته‌مه‌نیان له‌نێوان (18 – 45) سالێدایه‌. بۆ ئه‌م مه‌به‌سته‌ ئه‌وانه‌ى ئاره‌زووى به‌شداربوونیان له‌م خولانه‌ هه‌یه‌. با سه‌ردانى به‌ڕێوه‌به‌رایه‌تى به‌کارخستن و راهێنانى پیشه‌یى هه‌ولێر بکه‌ن له‌ 20/11/2012 تاکو 29-12-2012 .

ناونیشان: هه‌ولێر – رێگاى که‌رکوک – به‌رامبه‌ر به‌نزینخانه‌ى مه‌نتکاوه‌.
تێبینى: هه‌ر به‌شداربوێک رۆژانه‌ 5000 هه‌زار دینار خه‌رجى گیرفان و 2000 هه‌زار دینار هاتوچۆى بۆ خه‌رجده‌کرێت و ژه‌مێک خواردنیشى بۆ دابین ده‌کرێت.

Tuesday, November 27, 2012

ناوەندى دەستبەسەرکردنى ناورو بە گوانتانامۆى ئوسترالیا ناودەبرێت


کۆچى کوردان و کۆچ بۆ ئوسترالیا
پەناخوازانى ناورو دووبارە دەستیان کردەوە بە مانگرتن لە خواردن، لەکاتێکدا کە 5 ئێرانى بۆماوەى 24 ڕۆژە بەردەوامن لە مان گرتنیان. ئۆمید یەکێکە لەو ئێرانیانەى کە مانگرتنەکەى بۆماوەى 44ـەمین ڕۆژ دەچێت و هەروەها لەئێستادا ڕەتى دەکاتەوە کە ئاو بخواتەوەو بڕیارى قۆڵ بڕینى خۆیشى داوە.
لەلایەکى ترەوە 33 ئەفغانى و پاکستانى لە نەژادى هەزارا نوقم بوون لەئاوەکانى نزیک ئوسترالیا لەمانگى ڕابردوودا. لەکاتى ڕووداوەکەدا دەسەڵاتداران بەو ڕووداوەیان نەزانیبوو لەبەرئەوە بەشێکى زۆر لەوانەى نوقم بووبوون لەو کۆچە مەترسیدارەدا ڕزگار نەکران. 
لەهەمانکاتدا یەکێک لەوەزیرەکانى حکومەتى ئوسترالى ڕایدەگەیەنێت کە ڕێوشوێنى ڕووبەڕووبوونەوەى پەناخوازان سیاسەتێکى زۆر توندە بەڵام ئەو ڕێسایە پێویستە بۆئەوەى ڕێگرى لەخەڵکى بکرێت لە ئاوەکاندا نوقم ببن. 
لەگەڵ فشارە ناوخۆییەکان و مەترسییەکانى کۆچ بۆ ئوسترالیاش، لەهەمانکاتدا ڕێکخراوى لێبوردنى نێودەوڵەتى داوا دەکات ناوەندى دەستبەسەرکردنى پەناخوازان لە ناورو دابخرێت. ڕێکخراوى لێبوردنى نێودەوڵەتى لە بەیاننامەکەیاندا وتەى یەکێک لە پەناخوازەکانیان خستۆتەڕوو کە وتوویەتى: ئەمە وەکو سزادانى سەختى تاوانبارانە. لەوبڕوایەدام، لە ئوسترالیا تاوانباران باشتر لە ئێمە مامەڵەیان لەگەڵدا دەکرێت. تەنانەت تاوانباران دەزانن کە چەند ساڵ لە زیندانیدا دەمێننەوە بەڵام ئێمە هیچ بیرۆکەیەکمان نییە.
پشتیوانان لە پەناخوازانن ڕایدەگەیەنن کە حکومەتى ئوسترالى لاپەڕەیەکى داوەتە پەناخوازەکان لەناورو بەشێوەیەکە کە واڕێکخراوە خەڵکى ناچاربکات بەشێوەیەکى خۆبەخشانە بگەڕێتەوە وڵاتەکەى خۆى. 
لەگەڵ هەموو ئەوانەدا و لەم بارودۆخە سەختەدا دەکرێت و وتراویشە کە ناورو بە گوانتانامۆى ئوسترالیا ناوبنرێت. 

قبولی زەمالە و خوێندن بەدەست بهێنە لە چەندین زانکۆ و پەیمانگای بەریتانی، ئوستورالی، هیندی و ئەڵمانی


خۆشحاڵین بە بانگهێشت کردنتان بۆ پێشانگای نێودەوڵەتی خوێندن و خوێندنی باڵا لە بەرواری
 ٢٦ -٢٧ / ١١ / ٢٠١٢ لە شاری هەولێر لە هۆتێلی شیراتۆن وە
 ٢٨ - ٢٩ / ١١ / ٢٠١٢ لە شاری سلێمانی لە هۆتێلی داوا لە سەرچنار
 بە ئامادەبوونی نوێنەرانی چەندین زانکۆ و پەیمانگای بەریتانی، ئوستورالی، هیندی و ئەڵمانی. بەشداربووانی پێشانگاکە دەتوانن بە بێ بەرامبەر قەبولی ئەکادیمی و قەبولی زمان بەدەست بهێنن.
 شایانی باسە کە هەرکەسێک لە پێشانگاکە خۆی ناونووس بکات دەتوانێت بۆ ماوەی دوو مانگ بە بێ بەرامبەر پێشکەشی قەبولی ئەکادیمی و قەبولی زمان بکات وە ١٥ % داشکانی بۆ دەکرێت بۆ خوولی زمانی ئینگلیزی و تاقی کردنەوەی پاسوۆرد لە سەنتەری لانۆ
بۆ زانیناری زیاتر تکایە سەیری فایلی هاوپێچ بکەن یان پەیوەندیمان پێوە بکەن
پێداویستیەکان
بڕوانامەی ئەکادیمی
پاسپۆرت
٢ پشتگیری مامۆستا بە کۆپی و ئەسلی
پرۆپۆزەڵ بۆ داواکارانی دکتۆرا

Sunday, November 25, 2012

ئاگادارییەکی گرنگ بۆ کاندیدانی تواناسازی


 ئاگاداری سەرجەم کاندیدەکانی بەرنامەی تواناسازی دەکەین (ئەوانەی تا ئـیستا ئۆفەری ئەکادیمییان بەدەست نەهێناوە) ڕێکخراوی (AMIDEAST) بە هاوکاری وەزارەتی خوێندنی باڵا و توێژینەوەی زانستیی زنجیرەیەک وۆرک شۆپ ڕێکدەخات بە مەبەستی هاوکاریکردن و ڕێنوێنی کردنی کاندیدەکانی بەرنامەی تواناسازی بۆ بەدەستهـێنانی ئۆفەری ئەکادیمی و پێشکەشکردنی ڕێنمایی پێویست دەربارەی بەدەستهینانی ڤیزا.هاوکات لەم وۆرک شۆپانەدا نوێنەری وەزارەتی خویندنی باڵا و توێژینەوەی زانستیی ئامادە دەبێت بۆ وەڵامدانەوەی پرسیار و تێبینییەکانی کاندیدەکان.
کات و شوێنی وۆرکشۆپەکان بەم شێوازی لای خوارەوەیە:
  1. لە شاری هەولێر: ڕۆژی سێشەممە ٢٧/١١/٢٠١٢ لە هۆڵی مەڵبەندی ڕۆشنبیری زانکۆی سەلاحەددین کاتژمێر ١٠.٣٠ ی سەرلەبەیانی.
  2. لە شاری دهۆک: ڕۆژی پێنجشەممە ٢٩/١١/٢٠١٢ لە هۆڵی کۆبونا زانکۆیا دهۆک، کاتژمێر ١٠.٣٠ ی سەرلەبەیانی.
  3. لە شاری سلێمانی : ڕۆژی شەممە ١/١٢/٢٠١٢ هۆڵی ڕاپەڕینی زانکۆی سلێمانی، کاتژمێر ١٠.٣٠ی سەرلەبەیانی.
هاتن بۆ هەموو کاندیدەکانی بەرنامەی تواناسازییە، هەروەها ئەو پێشکەشکارانەی کە لە خولەکانی ئایندەدا بە نیازن داوا پێشکەش بکەن دەتوانن ئامادەی ئەم وۆرکشۆپە ببن.

Thursday, November 22, 2012

ئوستورالیا، 30 حاڵه‌تی مردن له‌ كه‌مپه‌كانی په‌ناخوازان تۆماركراون


له‌پاش هه‌وڵدانێكی زۆر و كۆكردنه‌وه‌ی زۆرترین زانیاری له‌سه‌ر ڕه‌وشی په‌نابه‌رانی ووڵاته‌كه‌ی، راوێژكارێكی یاسایی به‌ڕه‌گه‌ز ئوسترالی به‌ناوی ئۆكۆنۆر له‌ چاوپێكه‌وتنێكیدا له‌گه‌ڵ یه‌كێك له‌ ڕۆژنامه‌ ناوخۆیه‌كانی ئوسترالیادا باس له‌ خراپی ڕه‌وشی ئه‌و په‌نابه‌رانه‌ ده‌كات و ئاماژه‌ بۆ كه‌یسی چه‌ند په‌نابه‌رێكی كورد ده‌كات له‌ كه‌مپه‌كانی ئه‌و ووڵاته‌دا . 
به‌پێی زانیاریه‌كانی ئۆكۆنۆر ، له‌سه‌دا په‌نجای ئه‌و په‌ناخوانه‌ی بۆ زیاتر له‌ شه‌ش مانگ له‌ هه‌ر كه‌مێكی ئه‌و ووڵاته‌دا ده‌مێننه‌وه‌ توشی كێشه‌ی ده‌روونی ده‌بن و به‌ زیادبوونی ئه‌و ماوه‌یه‌ش رێژه‌كه‌ زیاتر ده‌بێـت. 
ئه‌و ڕاوێژكاره‌ یاساییه‌ ئاماژه‌ بۆ ئه‌وه‌ده‌كات كه‌ 30 په‌نابه‌ر له‌ ماوه‌ی ده‌ساڵی ڕابردوودا له‌ناو كه‌مپه‌كانی ئوسترالیادا گیانیان له‌ ده‌ستداوه‌ كه‌ 11 حاڵه‌تیان به‌ " خۆكوشتن " تۆماركراون .

ئۆكۆنۆر ئاماژه‌ ده‌كات به‌ حاڵه‌تی په‌نابه‌رێكی كورد كه‌ له‌ ساڵی 2010 دا له‌ ڕێگه‌ی كه‌ناره‌ ئاویه‌كانی ئه‌نده‌نوسیاوه‌ خۆی گه‌یاندۆته‌ ئوسترالیا و ده‌ڵێت كه‌ هه‌رچه‌نده‌ توانوێتی بیسه‌لمێنێت كه‌ په‌نابه‌رێكی راسته‌قینه‌یه‌ ، تاوه‌كو ئێستا له‌ كه‌مپه‌دا هێڵراوه‌ته‌وه‌ و به‌بیانوی ئه‌وه‌ی كه‌ باوكی قاچاخچیه‌كی په‌نابه‌ران بووه‌ له‌ ئه‌نده‌نوسیا و به‌رپرسانی ئه‌منی ئه‌و ووڵاته‌ش به‌رده‌وامن له‌ لێكۆڵینه‌وه‌ له‌سه‌ر دیاریكردنی ئه‌و جۆره‌ په‌یوه‌ندیه‌ی كه‌له‌نێوان ئه‌و باوك و كوڕه‌دا هه‌بووه‌. ئۆكۆنۆر ده‌ڵێت ئه‌و په‌نابه‌ره‌ هێشتا ئاسه‌واری چه‌ندین حاڵه‌تی هه‌وڵدان بۆ خۆكوشتن و خۆئازاردان به‌جه‌سته‌یه‌وه‌ دیاره‌.

له‌ به‌دواداچوونه‌كانیدا ، ئه‌و ڕاوێژكاره‌ ئاماژه‌ بۆئه‌وه‌ده‌دات كه‌ سه‌ڕه‌رای پێدانی مافی په‌نابه‌رێتی به‌ به‌شێك له‌و په‌ناخوازانه‌ ، هێشتا كاریگه‌ریه‌ خراپه‌كانی مانه‌وه‌یان له‌ناو ئه‌و كه‌مپانه‌دا له‌سه‌ر ماوه‌و ده‌ڵێت " په‌ناخوازێك كه‌ پێشتر به‌ كه‌سێكی قسه‌ خۆش ناسراو بووه‌ و حه‌زی له‌ تێكه‌ڵاوی ده‌رووبه‌ره‌كه‌ی كردووه‌ و زمانه‌كانی عه‌ره‌بی و فارسی و ئینگلیزیشی زانیوه‌ ئێستا له‌ ماڵه‌كه‌ی خۆیدا به‌ ته‌نیا ژیان ده‌گوزه‌رێنێت و خه‌ریكی كۆتر به‌خێوكردنه‌و قسه‌ خۆشه‌كانیشی بوون به‌ گریانی رۆژانه‌ی ".

له‌لایه‌كی تره‌وه‌ ، رێكخراوی داسان بۆ داكۆكیكردن له‌ مافی په‌نابه‌ران، كه‌ رێكخراوێكی ناحكومی ئوسترالیه‌ ، له‌ ڕاگه‌یه‌ندراوێكی ڕۆژنامه‌وانیدا داوا له‌ هاوڵاتیانی ناوچه‌ی داروینی ئوسترالیا ده‌كات كه‌ ئاگاداریان بكه‌نه‌وه‌ له‌ هه‌بوونی هه‌رجۆره‌ ده‌رفه‌تێكی كاركردن بۆ ژماره‌یه‌ك له‌ په‌ناخوازانی به‌ڕه‌گه‌ز كورد كه‌له‌ ئێستادا له‌پاش به‌سه‌ربردنی چه‌ند ساڵێك له‌ كه‌مپه‌كاندا به‌شێوه‌یه‌كی كاتی ڕێگه‌یان پێدراوه‌ كه‌ له‌و كه‌مپانه‌ بێنه‌ ده‌ره‌وه‌ تا ئه‌و كاته‌ی كه‌یسه‌كانیان یه‌كلایی ده‌كرێته‌وه‌. 
ڕاگه‌یاندراوه‌كه‌ ئاماژه‌ به‌وه‌ ده‌كات كه‌ ئه‌و په‌ناخوازانه‌ شاره‌زایه‌كی سنورداریان له‌هه‌ندێك پیشه‌دا هه‌یه‌ و ئاماده‌ن هه‌رجۆره‌ كارێك بكه‌ن كه‌ پێوستی به‌ لێوه‌شاوه‌یه‌كی زۆر نه‌بێت.
واڵاپرێس


دواهەمین زانیارى لەسەر بڕیارەکانى حکومەتى ئوسترالى و دۆخى پەناخوزان لەو وڵاتە


بلۆگى کۆچى کوردان و کۆچ بۆ ئوسترالیا
دوێنێ حکومەتى ئوسترالى ناوەندێکى ترى دەستبەسەرکردنى پەناخوازانى لە دورگەى مانوس لە پاپوا نیو گینیا کردەوە بۆئەوەى ئەو پەناخوازانەى بە بەلەم دەگەنە ئوسترالیا ڕەوانەى ئەوێیان بکات. ئەوەبوو 19 ئێرانى و سریلانکى کە ئافرەت و منداڵیشیان تێدابوون وەکو یەکەم گروپ ڕەوانەکران. 
لەهەمانکاتدا حکومەت ئەوەیشى ڕاگەیاند کە هەندێ لەو پەناخوازانەى بە بەلەم لەدواى 13ى ئابەوە گەیشتوونە ئوسترالیا ئەوا ڕەوانەى ناورو ناکرێن و بەڵکو ڕێگەیان پێدەدرێت لەدەرەوەى ناوەندى دەستبەسەرکردنەکاندا بن بە ڤیزاى پەڕینەوە. 
لەوکاتەوەى کە یاساى نوێى ئوسترالیا ڕاگەیانراوە لە 13ى ئابەوە، نزیکەى 7000 بەلەم بەشێوەیەکى نایاسایى گەیشتوونەتە ئوسترالیا. ڕەشماڵى کامپەکان لە ناورو و دوورگەى مانوس تەنها 700 پەناخوازى بەلەمەکان هەڵدەگرێت، و لەکاتێکدا کە کامپەکان ڕێکخران و بیناى تەواویان هەبوو ئەوا شوێنى مانەوەى 2100 پەناخواز دەبێت. ئەمەش ماناى ئەوەیە کە زۆرێک لەو بەلەمانەى گەیشتوونەتە ئوسترالیا ناکرێت کە هەموویان ڕەوانەى ناورو و دوورگەى مانوس بکرێن. 
بەهۆى ئەو ژمارە زۆرەى پەناخوازەکانى بەلەم دەبێت حکومەتى ئوسترالى بڕیارى پێویستیان لەبارەوە بدات لەبەرئەوەى ئەوان ناکرێت بخرێنە دوورگەى کریسمسەوە. لەبەرئەوە دوێنێ وەزیرى کۆچى ئوسترالى کریس بۆوێن ڕایگیاند کە ئەو ڕێگە دەدات بە هەزاران لەوان کە بەپێى ڤیزاى پەڕینەوە لەناوەندەکانى دەستبەسەرکردن بن و داخوازییەکانى پەناخوازییان هەڵبسەنگێنرێت لەکاتێکدا بەئازادى لە کۆمەڵگادان.
هێشتا 387 کەسى تر بە بەلەم هاتوون و لە ناورون و لەئێستادا 19 کەسى تریش لە دوورگەى مانوسن لە پاپوا نیو گینیان. 
جێگەى باسە چەند خاڵێکى گرنگ هەیە کە پێویستە ئاماژەى پێبدرێت.
1-حکومەتى ئوسترالى بەهۆى زۆرى ژمارەى بەلەمەکان و پەناخوازەکانەوە ناچارە کە کارێکى لەوشێوەیە ئەنجام بدات. ئەو ڕێوشوێنەى کە ناردنى پەناخوازانە بۆ ناورو و دوورگەى مانوس هێشتا هەر بەردەوام دەبێت. حکومەتى ئوسترالى هێشتا دەیەوێت هاتنى خەڵکى لەڕێگەى بەلەمەوە بوەستێنێت و ڕێگرى بکات لە خنکان و مردنى خەڵکى لە ئاوەکانى نێوان ئیندۆنیزیا و ئوسترالیا.
2-هەزاران کەس چاوەڕوانى ئەوە نیین کە ڕەوانەى ناورو و دوورگەى مانوس بکرێن، بەڵکو هەموو ئەوانەى کە لە بەلەمى داهاتوودا دەگەنە ئەو وڵاتە ڕاستەوخۆ ڕەوانەى ئەو دوو ناوچەیە دەکرێن.
3-ڤیزاى پەڕینەوە لەڕاستیدا ڤیزا نییەو تەنها ڤیزایەکى کاتییە. لەگەڵ یەکلایى بوونەوەى کەیسى پەناخوازەکان و یاخود بەرلەوە لەگەڵ ئەنجامدانى کارى نایاسایدا ڕاستەوخۆ ئەو ڤیزایە هەڵدەوەشێتەوە.
4-تەنانەت ئەگەر ئەوانەى بەبەلەم گەیشتوونەتە ئەو وڵاتە و ڤیزاى پەڕینەوە وەردەگرن هیچ جیاوازییەک نییە لەمامەڵەکردن لەگەڵیاندا وەکو ئەوانەى ڕەوانەى ناورو دەکرێن، و هێشتا پێنج ساڵ دەخایەنێت تاوەکو مامەڵەى کەسێک وەکو پەناخواز وەربگیرێت و یەکلایى بکرێتەوە. ئەوکاتەى کە وەکو پەناخواز دەناسێنرێت ئەوا ماوەیەکى زۆرى دەوێت تاوەکو وەکو هاوڵاتى ئوسترالى دەناسێنرێت. ئەگەر ئەوان پەناخوازى تەواو و ڕاستەقینە نەبوون ئەوا دیپۆرت دەکرێنەوەو ڕەوانەى وڵاتەکەى خۆیان دەکرێنەوە. دوێنێ یەکەم ئەفغانى بەزۆر دیپۆرت کرایەوە لە ئوسترالیاوە.
5-ڤیزاى پەڕینەوە ڕێگەى کارکردن نادات بەوکەسانەى بە بەلەم هاتوونەتە ناو ئوسترالیاوە و حکومەتى ئوسترالى هیچ شوێنى حەوانەوە بەو کەسانە نابەخشێت بۆئەوەى لەناو کۆمەڵگادا بە ئازادى بژین. ئەوانەى بەبەلەم هاتوون دەبێت پارە بدەن لەبەرامبەر دابین کردنى شوێنى حەوانەوەیان. 
6-هێشتا پشتیوانانى مافەکانى پەناخوازان لە ئوسترالیا یاساو ڕێوشوێنەکانى حکومەت زۆر بە نامرۆڤانە وەسف دەکەن.

Wednesday, November 21, 2012

IDEL هه‌ڵده‌ستێت به‌ وه‌رگرتنی قبوڵ به‌ شێوه‌یه‌كی راسته‌وخۆ بۆ هه‌مو ئه‌و فێرخوازانه‌ی كه‌ ده‌یانه‌وێت له‌ زانكۆكانی به‌ریتانیا ماسته‌ر یان دكتۆرا بخوێنن


په‌یمانگه‌ی IDEL هه‌ڵده‌ستێت به‌ وه‌رگرتنی قبوڵ به‌ شێوه‌یه‌كی راسته‌وخۆ بۆ هه‌مو ئه‌و فێرخوازانه‌ی كه‌ ده‌یانه‌وێت له‌  زانكۆكانی به‌ریتانیا ماسته‌ر یان دكتۆرا بخوێنن، له‌ رێگه‌ی پرۆگرامی توانا سازیه‌وه‌ یاخود له‌سه‌ر حه‌سابی خۆیان.
هاوكات IDEL هه‌ڵده‌ستێت به‌ وه‌رگرتنی قبوڵ بۆ خوێندنی به‌كالریۆس بۆ هه‌مو ئه‌و كه‌سانه‌ی كه‌ده‌یانه‌وێت له‌ به‌ریتانیا بخوێنن.

بۆ زانینی ناوی زانكۆكان و زانیاری زیاتر ده‌توانن ئیمه‌یل بكه‌ن بۆ info@idelin.com بۆ ئه‌وه‌ی زانیاریه‌كانتان بۆ ئیمه‌یڵ بكه‌ین ،یان په‌یوه‌ندی بكه‌ن به‌ IDEL ه‌وه‌ له‌ رێگه‌ی ئه‌م ژماره‌یه‌وه‌ ٠٧٧٠٣٥٧٠٣٠٣

ده‌رباره‌ی IDEL
کورتەیەک دەربارەی IDEL

پەیمانگەى پەرەپێدانى زمانى ئینگلیزىIDEL  ، دامەزراوەیەکى ئەهلى بوارى فێربوونى زمانى ئینگلیزییە بۆ پێگەیشتووانء منداڵان ء ئامادەکردنء راهێنان بۆ تێستە جیهانیەکانى وەک   TOEFLء   .IELTS کۆرسەکان بەپێى پڕۆگرامە نوێیەکانى فێربوونى زمان دەوترێنەوەو بەپێوەرى تێستە نێودەوڵەتییەکان بڕِوانامە دەدرێت بەخوێندکارەکان. 
پەیمانگە IDEL ، لــە(1/9/2000)دا لەشارى سلێمانى دامەزرا. لەو کاتەوە هەزاران فێرخواز هاتوونەتە پەیمانگەو کۆرسیان وەرگرتووەو  دواتریش لەڕێگەى ئەوانەوە هاوڕێء کەسوکاریان هاتوون بۆ کۆرس وەرگرتن. ئێستا IDEL   چەندین هۆڵى گەورەى هەیە بۆ وانە خوێندن لەناوەڕاستى شاردا کەبۆ هەموو کەسێک نزیکء بەردەستە

 IDEL بەوە بەناوبانگە، کەزمانى ئینگلیزى وەکو زمانێکى بێگانە بەئارەزوء و حەماسەوە تیایدا دەخوێنرێت ء نرخەکانیش بەپێى ئاستى گوزەرانى کوردستان گونجاو گشتین. لەکەشوهەوایەکى هاوڕێیانەو پڕ لەخۆشەویستیی مامۆستاو فێرخوازەکاندا، ئینگلیزى بەشێوەیەکى هاوچەرخ و ئەکادیمى دەوترێتەوە. 
بەهۆى ئەو ئەزموونە دوورو درێژەوە کەهەمانە، توانیومانەو دەتوانین جێگەى متمانەو گرەنتیى فێربوونى زمانى ئینگلیزى بین بۆ هەموو کەسێک.

ئێستا IDEL لقی لە شارەکانی دەربەندیخان، کەلار و رانیە کردوەتەوە بەهەمان ستانداردو شێوازی ئۆفیسی سەرەکی لە سلێمانی...

Tuesday, November 20, 2012

ئەڵمانیا.. گەنجێكی دهۆكی لە نهۆمی حەوتەمەوە خۆی فڕێدەداتە خوارەوە


رۆژی 2ی تشرینی دووەمی 2012 گەنجێكی كوردی تەمەن 21 ساڵ لە شاری ڤوپەرتاڵی ئەڵمانیا خۆی لە نهۆمی حەوتەمی باڵەخانەیەك فرێدایە خوارەوە و گیانی لەدەستدا.

رووداوەكە نزیك كاژێر 11ی پێشنیوەڕۆ روویدا.‌ بەپێی زانیارییەكانی كەسانی نزیك لەو خێزانە ، ئەو گەنجە كە ناوی ئاڤەند فارس بووە و خەڵكی شاری دهۆكی باشووری كوردستانە، ماوەی زیاتر لە ساڵێكبوو تووشی كێشەی زۆر ببوو و بە تەنیا لە ماڵێكدا دەژیا.

بنەماڵەی ئاڤەند كە لەساڵی 1996ەوە وەك پەنابەر هاتوونەتە ئەڵمانیا، بڕیاریاندا تەرمی ئاڤەند لە شاری دهۆك بەخاك بسپێرن، لەسەرەتادا رووبەڕووی كێشە بوونەوە بەهۆی نەبوونی ناسنامە كە بتوانن سەفەری پێبكەن، بەڵام دواتر كاربەدەستانی ئەڵمانیا رایانگەیاند كە ئەوان هاوكاری بنەماڵەكە دەكەن و ناسنامەیان بۆ دەردەكەن، چونكە تووشی رووداوێكی دڵتەزێن بوونە.

دایك و باوك و برای ئاڤەند لەگەڵ تەرمی كوڕەكەیان چوونەوە شاری دهۆك.

رووداو - كوێلن